Marko 4 - Bulu Ntam Pɔpwɛ mʋ́a Israel Ɩlʋ

Atɔ-abi Owunyapʋ Ɩwɩ Yebi

¹ Yesu lɛtra kʋsʋ yɔ ɔdɛ atɔ suna Galilea ɔpʋ ɔnɔ ɛkɛ ɔkʋ. Ɔdɔm amʋ bobomli mʋ. Mʋ́ sʋ ɔlɔdʋ wie ɔklʋntɔ, yetsia ɔpʋ amʋsʋ, aha amʋ ɛ bʋlɩɩ ɔpʋ ɔnɔ ɩnʋ.

² Ɩnʋ olosuna amʋ́ atɔ tsɔtsɔɔtsɔ ayebitɔ ɔbɛɛ,

³ “Mlɩnu! Ɔdɔtɔpʋ ɔkʋ lɔyɔ atɔ-abi owunyakpa.

⁴ Brɛá ɔdɛ mʋ́ wunya a, ɩkʋ lɔwʋlɩ ɔkpatɔ, mbubwi bɛba bɔtswɛtswɛ mʋ́ fɛ́ɛ́.

⁵ Ɩkʋ ɛ lɔwʋlɩ abʋtasʋ, ɔtɩnɛá ɩsɩ kpalobi dɩn. Ɩlɔwa ɔsa kwɛ,

⁶ tamɛ brɛá owi lɛlɩn a, ɩlɔtɔ mʋ́ mɔ, tsufɛ mʋ́ nlin mɔyɔ ɔtɔtɔ.

⁷ Abi amʋ kʋ lobun awutɔ. Awu amʋ lɔbʋla kɩta mʋ́, ɩmɛdan. Mʋ́ sʋ imoswie abi.

⁸ Tamɛ abi amʋ kʋ ɛ lɔwʋlɩ ɔsʋlʋ wanklaansʋ. Ɩlɔkwɛ, dan, swie abi, ɩkʋ adʋasa (30). Ɩkʋ aduesie (60), ɩkʋ ɛ lafa (100).”

⁹ Ɩnʋ ɔlɔmɔ mʋ́ ɔnɔ ɔbɛɛ, “Ɔha ánɩ́ ɔbʋ asʋ onu!”

Tɔá Sʋá Yesu Lɔtɔɩ Ayebisʋ

¹⁰ Brɛá ilesi Yesu mʋa sumbi ayɔpʋ duanyɔ amʋ pʋ́ aha kpalobi akʋá bʋbuo mʋ a, bobwii ɩpa ha mʋ bɛɛ, ɔlɛ yebi anfɩ asɩ suna amʋ́.

¹¹ Mʋʋ ɔlɛbla amʋ́ ɔbɛɛ, “Mlɩ mʋ́ a, Bulu laha mlɩ ɔkpa ɔbɛɛ, mlɩbɩ mʋ iwiegyi amʋ ɩwɩ asʋn ŋainhɛ. Tamɛ ndɛ aha bamba asʋn bla ayebisʋ,

¹² ‘Mɛnɩ bówun lawun, tamɛ bʋmɛ́ɛbɩ mʋ́. Bónu lanu, tamɛ bʋmóonu mʋ́ asɩ. Nɩ megyi alɩ tɛkɩ bɛ́damli klʋntɔ, Bulu obési amʋ́ lakpan kie amʋ́.> ”

Atɔ-abi Owunyapʋ Yebi Amʋ Asɩ

¹³ Mʋʋ Yesu lɛfɩtɛ amʋ́ ɔbɛɛ, “Nɩ mlɩmonu yebi anfɩ asɩ a, mʋ́ nkalɩ mlɔ́bwɛ asa mlónu trahɛ fɛ́ɛ́ asɩ?

¹⁴ Atɔ-abi amʋʋ owunyapʋ amʋ dewunya amʋ gyi Bulu asʋn amʋ.

¹⁵ Abi amʋʋ ɩlɔwʋlɩ ɔkpasʋ amʋ gyi aha amʋʋ benya nu Bulu asʋn amʋ alɩ Ɔbʋnsam labɛlɛ mʋ́ lɛ amʋ́ klʋntɔ natɩ amʋ.

¹⁶ Abi amʋʋ ɩlɔwʋlɩ abʋtasʋ amʋ gyi aha amʋʋ bonu asʋn amʋ pɛ, bahɔ mʋ́ ansigyisʋ,

¹⁷ tamɛ ɩnɩá bʋma nlin sʋ a, asʋn amʋ ɩtamatsia amʋ́tɔ yɔ. Mʋ́ sʋ nɩ bʋdɩn amʋ́sʋ ntɛ ɩwɩɔsɩn kʋ ɩtʋ amʋ́ asʋn amʋ sʋ a, ɩnʋnʋ bʋtɛdɩda.

¹⁸ Abi amʋʋ ɩlɔwʋlɩ awutɔ amʋ gyi aha amʋʋ bonu asʋn amʋ a, bahɔ mʋ́,

¹⁹ tamɛ ɔyɩ anfɩtɔ atohianhɛ ɩwɩ gywɩɩn, pʋ mʋ́tɔ atonyahɛ ɩwɩ ɔnsɩpɛ tegyi asʋn amʋsʋ. Ɩnɩ sʋ bʋtamaswie abi.

²⁰ Abi amʋʋ ɩlɔwʋlɩ ɔsʋlʋ wanklaansʋ amʋ gyi aha amʋʋ bonu asʋn amʋ a, bʋtegyi mʋ́sʋ. Ɩnɩ sʋ ɩtɛha bʋtɔbwɛ yile fɛ alɩá atɔ-abi amʋ loswie, ɩkʋ adʋasa (30), ɩkʋ aduesie (60), ɩkʋ ɛ lafa (100) amʋ.”

Ɔkandɩɛ Ɩwɩ Yebi

²¹ Yesu lɛfɩtɛ amʋ́ ɔbɛɛ, “Bʋtonywɛ ɔkandɩɛ pʋ ɔlɔ bun mʋ́sʋ, ntɛ pʋwa mpa ayasɩ? Megyi ɔfʋakpa bʋtɔpʋbian?

²² Tɔtɔ ma ɩnʋá ibéŋain, ɩmɛ́ɛlɩn ɔwan. Asʋn ŋainhɛ kʋkʋ ɛ ɩma ɩnʋá bʋmɛ́ɛbɩ mʋ́.

²³ Ɔhagyiɔha ánɩ́ ɔbʋ asʋ onu!”

²⁴ Mʋʋ ɔlɛblɩ ɔbɛɛ, “Mlɩyaa asʋ wanklaan mlɩ asʋn-nutɔ. Ɩtɔá mlɔ́pʋsusu ha mlɩ aba a, mʋ́ kɛn Bulu ɔbɔ́pʋsusu mʋ́ wanklaan, lapʋ ɩkʋ tsɩa mʋ́tɔ ha mlɩ nɩ.

²⁵ Tsufɛ ɔha ánɩ́ odekleá obónu mɩ atosunahɛ amʋ asɩ a, Bulu ɔbɔ́pʋ ɩkʋ tsɩa mʋ́tɔ ha mʋ. Tamɛ ɔha ánɩ́ omedekleá obónu mʋ́ asɩ a, Bulu ɔbɔ́swɩɩ mʋ kpalobi amʋʋ alabɩ amʋ kʋraa.”

Oyi-ibiá Ɩdɛdan Ɩwɩ Asʋn

²⁶ Yesu lɛtra blɩ ɔbɛɛ, “Bulu iwiegyi amʋ igyi fɛ alɩá ɔha todu oyi-ibi mʋ ndɔtɔ.

²⁷ Nɩ owi ɩta a, ɔha amʋ tɛklɛdɩ. Nɩ ɔyɩ ɩkɛ a, ɔtɛlakʋsʋ, tamɛ omeyin alɩá ɩtɔbwɛ asa oyi-ibi amʋ ɩtɔkwɛ dan.

²⁸ Ɔsʋlʋ onuto tɛha mʋ́ tɔkwɛ. Itegyankpa lɛ atɛ, wa ntswɩtswɩ, asa ɩtɔbɔbwɛ abi onuto.

²⁹ Tamɛ ayo amʋ inya blɩ pɛ, ɔdɔpʋ amʋ latsu mʋ ɔdayi ɔyɛtɩn mʋ́, tsufɛ mʋ́ tɩnbɩ lafʋn.”

Takyi-akpin Ibi Yebi

³⁰ Ɩnʋ Yesu lɛfɩtɛ ɔbɛɛ, “Ntɔ Bulu iwiegyi amʋ lɛlɩan? Ntɛ yebi mɔmʋ nɔ́pʋsuna alɩá igyi?

³¹ Igyi fɛ takyi-akpin ibi. Mʋ́gyi tukuriibi nyi-abitɔ fɛ́ɛ́ nɩ.

³² Tamɛ nɩ ɩdan a, ɩtɔbwɛ ɩfa fʋahɛ dʋn ɩfa kugyikʋ. Mʋ́ abambi tekpikpli, mbubwi bʋtogyonka mʋ́ asɩ.”

³³ Oletsia pʋ ayebi anfɩ odu tsɔtsɔɔtsɔ suna amʋ́ atɔ, yɔfʋn alɩá aha amʋ bɛ́talɩ nu mʋ́ asɩ.

³⁴ Ɔmɛbla amʋ́ asʋn kʋkʋá imegyi ayebi ɔlɔpʋtɔɩ. Tamɛ nɩ isi mʋa mʋ akasɩpʋ nkʋlɛ a, ɔtɛlɛ togyitɔ asɩ.

Atsufu Asɩba

³⁵ Alɩ ɛkɛ amʋ ntʋpwɛsʋ a, Yesu lɛbla mʋ akasɩpʋ ɔbɛɛ, “Mlɩha afa Galilea ɔpʋ yɔ mʋ́ ɔbɩn!”

³⁶ Mʋʋ bowie ɔklʋntɔ, akasɩpʋ amʋ bɛpla mʋ́, bɛnatɩ si ɔdɔm amʋ. Nklʋn bamba kʋ ɛ lobuo amʋ́.

³⁷ Afu kpɔnkpɔɔnkpɔntɩ kʋ lɔwa tsʋn bɩ. Mʋ́ sʋ ntsu dɛda wie ɔklʋn amʋtɔ, idekle ɩmɛ.

³⁸ Tamɛ Yesu mʋ́ ŋɛlɩn sumuɛsʋ ɔklʋn amʋ ɔma ɔdɛdɩdɩ. Akasɩpʋ amʋ betsinki mʋ. Mʋʋ bɛfɩtɛ mʋ bɛɛ, “Osunapʋ, ɩnɩá anɩdɛ ntsu wie a, fʋmotsu kʋkʋ lɛ mʋ́tɔ?”

³⁹ Ɩnʋ Yesu lɔkʋsʋ lɛ ɔnɔ wa afu amʋ, ɔlɛbla ɔpʋ amʋ ɔbɛɛ, “Kpa ɔnɔ bun! Dɩ diin!” Ɩnʋ afu amʋ lesi tsʋn, ɩnʋ fɛ́ɛ́ lɔlʋa.

⁴⁰ Mʋʋ ɔlɛfɩtɛ amʋ́ ɔbɛɛ, “Ntogyi sʋ mlɩdɛ ifu nya alɩ? Mlɩmá hogyi?”

⁴¹ Ifu lɛhɩɛ kɩta amʋ́, bɛfɩtɛ aba bɛɛ, “Nyankpʋsa ɔmɔmʋ nɩ, afu mʋa ntsu kʋraa tonu mʋ ɔmɛ alɩ?”