Marko 3 - Bulu Ntam Pɔpwɛ mʋ́a Israel Ɩlʋ

Ɩlɔtsa Ɔkpʋnʋ Ɔdakɛ

¹ Yesu lɛtra yɔ Yudafɔ ofiakpa ɩnʋ a, oyin ɔkʋ tsie ɩnʋ, mʋ ɩbɩ kʋlɛ lawu.

² Aha akʋ bɛtɛ Yesu kɩ bɛɛ ɔbɛ́tsa mʋ ɩlɔ ɔkpʋnʋ ɔdakɛ amʋ, mɛnɩ bénya mʋ ɩwɩ asʋn blɩ.

³ Yesu lɛbla oyin amʋʋ mʋ ɩbɩ kʋlɛ lawu amʋ ɔbɛɛ, “Kʋsʋ bɛlɩɩ amʋ́ ansɩtɔ nfɩ.”

⁴ Mʋʋ ɔlɛfɩtɛ amʋ́ ɔbɛɛ, “Ntɔ anɩ mbla lɛha ɔkpa ánɩ́ abwɛ ɔkpʋnʋ ɔdakɛ? Yile loo, ntɛ lalahɛ. Ahɔ ɔha nkpa loo, ntɛ amɔ mʋ?” Tamɛ ɔhaa mɛlɛ mʋ́ ɔnɔ.

⁵ Yesu lɔpʋ ɔblɔ kɩ amʋ́ bomli. Ɩlɔhɔ mʋ ɔsɩn, tsufɛ klʋntɔ bʋ amʋ́ odwin. Mʋʋ ɔlɛbla oyin amʋ ɔbɛɛ, “Tɩnkɩ fʋ ɩbɩ amʋ.” Olenya tɩnkɩ mʋ́ alɩ pɛ, ɔŋɛ lowie mʋ́tɔ.

⁶ Farisifɔ amʋ bɛdalɩ yɔ, amʋ́a Owie Herode aha bɛkɩta agywɩɩn ɩnʋnʋ alɩá bɔ́bwɛ bɔ́mɔ Yesu.

Aha Tsɔtsɔɔtsɔ Ɩlɔ Tsa

^7-8 Yesu mʋa mʋ akasɩpʋ bɛnatɩ bɔyɔ Galilea ɔpʋ ɔnɔ. Ɔdɔm kpɔnkpɔɔnkpɔntɩ bobuo mʋ tsu Galilea mʋ́a Yudea ɔmátɔ, Yerusalem, Idumea, Yordan bʋnkpa ɔbɩn pʋ́ Tiro mʋ́a Sidon nsaɩntɔ ba mʋ wa.

⁹ Aha amʋ bɔdʋbɩ. Mʋ́ sʋ ɔlɛbla mʋ akasɩpʋ ɔbɛɛ, bʋdunka ɔklʋn kʋ yaɩ ha mʋ, mɛnɩ bʋmóoputa mʋ.

¹⁰ Tsufɛ alatsa aha tsɔtsɔɔtsɔ ɩlɔ. Mʋ́ sʋ alɔpʋ amʋtɔ okugyiɔkʋ dekleá ɔbɔ́pʋ ɩbɩ da mʋ.

¹¹ Nɩ aha ánɩ́ ɔŋɛ lalahɛ bʋ amʋ́sʋ benya wun mʋ alɩ badɩda mʋ ayabiasɩ, sʋra okitikiti blɩ bɛɛ, “Fʋgyi Bulu mʋ Bi amʋ nɩ!”

¹² Tamɛ ɔlɛda ɔŋɛ lalahɛ amʋ ɔla kinkiinkin ɔbɛɛ, ɩmáha aha abʋbɩ mʋ.

Akasɩpʋ Amʋ Ada

¹³ Yesu lɔdʋ yɔ bʋsʋ, ɔlɛtɩ aha ánɩ́ mʋ onuto odekle, bɔyɔtʋ mʋ.

^14-15 Mʋʋ ɔlɛlɛ amʋ́tɔ aha duanyɔ, ɔlɛtɩ amʋ́ mʋ sumbi ayɔpʋ ánɩ́ mʋa amʋ́nyɔ bétsia; otsia wa amʋ́ abʋyɛda mʋ asʋn ɔkan, abʋgya ɔŋɛ lalahɛ lɛ ahatɔ.

¹⁶ Aha duanyɔ amʋ ada gyi, Simon ánɩ́ ɔlɛdɩnka mʋ Petro;

¹⁷ Sebedeo abi Yakobo mʋa mʋ pio Yohane (ɔlɛdɩnka amʋ́ ada ɔbɛɛ, “Boanerges.” Mʋ́ asɩ gyi, “Ɔprada abi.”);

¹⁸ Atrahɛ gyi; Andrea, Filipo, Bartolomeo, Mateo, Toma, Alfeo mʋ bi Yakobo, Tadeo mʋa Simon ánɩ́ ogyi ɩwɩsʋtsia adunkapʋ ɔpasuatɔ ɔha

¹⁹ pʋ́ Yuda Iskariot ánɩ́ ɔlɛbɛlɛ mʋ ha.

Yesu Mʋa Beelsebul

²⁰ Brɛá Yesu lɔyɔ woyitɔ a, ɔdɔm bɛtra ba ɩnʋ. Mʋa mʋ akasɩpʋ bʋmenya ɔkpa ánɩ́ bégyi atɔ kʋraa.

²¹ Brɛá mʋ woyitɔ aha bonu mʋ ɩwɩ asʋn a, bɔyɔ bɛyɛkpa mʋ, tsufɛ bʋkɩ bɛɛ mʋ nwun layinta.

²² Mose mbla asunapʋ akʋá botsu Yerusalem ba ɩnʋ bɛblɩ bɛɛ, “Ɔŋɛ lalahɛ owie Beelsebul tsie mʋtɔ. Mʋ tumi ɔdɛpʋgya ɔŋɛ lalahɛ lɛ ahatɔ.”

²³ Mʋ́ sʋ Yesu lɛtɩ amʋ́ ba mʋ ɩwɩ wa, ɔlɛbla amʋ́ asʋn ayebitɔ ɔbɛɛ, “Nkalɩ Ɔbʋnsam ɔbɛ́talɩ gya mʋ ɩwɩ?

²⁴ Iwie ogyikpa ánɩ́ ɩlaye anyɔ, bʋdɛ aba kɔ ɩbɛ́dɩda.

²⁵ Woyi oduá mʋ́tɔ atsiapʋ bʋdɛ aba kɔ ɛ tobwie.

²⁶ Mʋ́ sʋ nɩ Ɔbʋnsam dɛ mʋ ɩwɩ gya a, ɔmɛ́ɛtalɩ lɩɩ. Mʋ ɔnɔ ɔmɔkpa nɩ.

²⁷ “Ɔhaa mɛ́ɛtalɩ wie ɔwʋnlɩnpʋ woyitɔ yɔkʋla mʋ atɔ, nkɛtɩ alagyankpa kɩklɩ mʋ tswɩ, asa ɔbɛ́talɩ kʋla mʋ atɔ fɛ́ɛ́.

²⁸ “Ɔnɔkwalɩ ndɛ mlɩ bla mbɛɛ, Bulu ɔbɛ́talɩ si lakpan pʋ́ abususʋ kugyikʋ kie nyankpʋsa.

²⁹ Tamɛ nɩ ɔkʋ ɔblɩ abususʋ Ɔŋɛ Wankɩhɛ amʋ ɩwɩ a, Bulu méesikie mʋ ɛkɛkɛɛkɛ, tsufɛ alabwɛ lakpan ánɩ́ sikie ma mʋ́ ɩwɩ.”

³⁰ Aha akʋ bɛblɩ bɛɛ, ɔŋɛ lalahɛ bʋ Yesutɔ. Mʋ́ sʋ ɔdɛ ɩnɩ blɩ nɩ.

Yesu Abusuanfɔ Onuto

³¹ Yesu mʋ yin mʋa mʋ apio bɛba bɛlɩɩ kpankpa, bɔwa ɔkʋ bɛɛ ɔtɩ mʋ ha amʋ́.

³² Ɔdɔm bʋtsie bomli mʋ, bɛbla mʋ bɛɛ, “Fʋ yin mʋa fʋ apio bʋlɩɩ kpankpa, bʋdɛ fʋ dunka.”

³³ Mʋʋ Yesu lɛfɩtɛ amʋ́ ɔbɛɛ, “Amɛndɩ gyi mɩ yin mʋ́a mɩ apio?”

³⁴ Mʋʋ ɔlɛkɩ aha amʋʋ bʋtsie bomli mʋ amʋ, blɩ ɔbɛɛ, “Mlɩkɩ, mɩ yin mʋ́a mɩ apio gyi aha anfɩ a!

³⁵ Ɔhagyiɔha ánɩ́ ɔtɔbwɛ Bulu apɛ a, mʋgyi mɩ pio pʋ́ mɩ yin nɩ.”