Marko 16 - Bulu Ntam Pɔpwɛ mʋ́a Israel Ɩlʋ

Yesu Kʋsʋ Tsu Afulitɔ

¹ Yudafɔ ɔkpʋnʋ ɔdakɛ amʋ ɩlɔtsʋn a, Magdalayintse Maria mʋa Yakobo mʋ yin Maria pʋ́ Salome bɔhɔ ofobi fanfan kʋ bɛɛ, bɛyɛkpa Yesu fuli amʋ.

² Kwasieda nyankɩ, brɛá owi lopwie a, bɔyɔ Yesu opulakpa ɩnʋ.

³ Brɛá bʋna ɔkpatɔ a, amʋ́ wʋlɛwʋlɛ bʋdɛ aba fɩtɛ bɛɛ, “Ma abénya obémina ibwi amʋ lɛ ɔbɔ amʋ ɔnɔ ha anɩ?”

⁴ Botsu ansɩ kɩ a, bamina ibwi amʋ lɛ ɔbɔ amʋ ɔnɔ dodo. Ibwi amʋ lɛhɩɛ moni.

⁵ Brɛá bebitiwie ɔbɔ amʋtɔ a, bowun ánɩ́ ɔyasubi ɔkʋ lɔwa liga fututuutu, otsie ɔbɔ amʋ gyɔpɩsʋ. Ifu lɛkɩta amʋ́.

⁶ Ɔyasubi amʋ lɛbla amʋ́ ɔbɛɛ, “Mlɩmánya ifu. Nawun ánɩ́ Yesu Nasaretyin amʋʋ bɛda manta oyikpalihɛsʋ amʋ mlɩdedunka. Bulu lakʋsʋa mʋ, ɔma nfɩ. Mlɩkɩ ɔtɩnɛ amʋʋ bopula mʋ amʋ.

⁷ Mlɩyɛbla mʋ akasɩpʋ amʋ pʋ́ Petro mlɩaa, alagya mlɩ nkpa ɔyɔ Galilea ɔmátɔ. Ɩnʋ mlówun mʋ fɛ alɩ amʋʋ ɔlɛbla mlɩ amʋ nɩ.”

⁸ Ɩnʋ bɛsrɩ dalɩ ɔbɔ amʋtɔ, tsufɛ opuni letsi amʋ́, ɔnɔ ɛ lobwie amʋ́. Mʋ́ sʋ brɛá bɔyɔ a, bʋmɛbla ɔhaa, tsufɛ ifu dɛ amʋ́, bʋdɛkpɩnkɩ kpakpakpakpa.

Yesu Ɩwɩɔwanlɛ Suna Magdalayintse Maria

⁹ [Kwasieda bakɛ, brɛá Yesu lɔkʋsʋ tsu afulitɔ a, olegyankpa lɛ ɩwɩ ɔwan suna Magdalayintse Maria amʋʋ olegya ɔŋɛ lalahɛ asienɔ lɛ mʋtɔ amʋ.

¹⁰ Mʋ ɛ ɔlɛyɛbla Yesu abuopʋ amʋʋ bʋdɛ mʋ su, bʋdɛ awɩrɛhɔ gyi amʋ.

¹¹ Tamɛ brɛá ɔlɛbla amʋ́ ɔbɛɛ, Yesu lakʋsʋ, mawun mʋ a, bʋmohogyi.

Yesu Ɩwɩɔwanlɛ Suna Mʋ Abuopʋ Abanyɔ

¹² Ɩnɩ ɔma a, Yesu lɛlɛ ɩwɩ ɔwan ɔkpa bambasʋ suna mʋ abuopʋ abanyɔ brɛá bʋna bɔyɔ akuda, tamɛ bʋmɔkɔsɩ bɩ mʋ.

¹³ Amʋ́ ɛ beyinki yɛbla atrahɛ amʋ, tamɛ amʋ́ ɛ bʋmohogyi.

Yesu Ɩwɩɔwanlɛ Suna Mʋ Akasɩpʋ

¹⁴ Ɩnɩ fɛ́ɛ́ ɔma a, Yesu lɛlɛ ɩwɩ ɔwan suna mʋ akasɩpʋ duɔkʋn amʋ brɛá bʋdɛ atɔ gyi. Amʋ́ klʋntɔ-odwin pʋ́ amʋ́ máhogyi sʋ ɔlɔwa ɩyɩn wa amʋ́. Tsufɛ bʋmɔhɔ aha amʋʋ bowun mʋ mʋ kʋsʋ tsu afulitɔ ɔma amʋ gyi.

¹⁵ Mʋʋ ɔlɛbla amʋ́ ɔbɛɛ, “Mlɩyɔ ɔyɩtɔ fɛ́ɛ́, amlɩyɛda Bulu asʋn wanklaan amʋ ɔkan ha aha fɛ́ɛ́.

¹⁶ Ɔha ánɩ́ olohogyi, bɔbɔ mʋ asu a, Bulu ɔbɔ́hɔ mʋ nkpa, tamɛ ɔha ánɩ́ omohogyi obégyi pɔn.

¹⁷ Osuna anfɩ obóbuo aha ánɩ́ bohogyi nɩ. Bégya ɔŋɛ lalahɛ mɩ ɩdatɔ, bɛ́blɩ ɔblɩ bamba,

¹⁸ bɛ́kɩta awɔ ɩbɩtɔ, bónun afa ánɩ́ ɩtɔmɔ kugyikʋ, tamɛ ɩmɔ́ɔbwɛ amʋ́ tɔtɔ. Bɔ́pʋ ɩbɩ dɩnka alɔpʋsʋ, ɩwɩ bɔ́wa amʋ́ ɔnlɩn.”

Yesu Ɔsʋsʋ Yɔ

¹⁹ Brɛá anɩ Wie Yesu lɛbla amʋ́ asʋn ta a, Bulu lotsu mʋ ya ɔsʋsʋ, oleyetsia mʋ gyɔpɩsʋ.

²⁰ Mʋ akasɩpʋ amʋ befi asɩ bʋdɛ asʋn amʋ ɔkan da ɔtɩnɛgyiɔtɩnɛ. Anɩ Wie Yesu lɛlɩɩ amʋ́ ɔma bɔyɔ agyʋma. Ɔlɔtsʋn osuna ánɩ́ bɔbwɛsʋ, wa asʋn amʋ ɔwʋnlɩn.]