Marko 15 - Bulu Ntam Pɔpwɛ mʋ́a Israel Ɩlʋ

Yesu Pilato Ansɩtɔ Lɩɩ

¹ Ɔyɩkɛhɛ nyankɩ-nyankɩ a, Yudafɔ ahandɛ-ahandɛ amʋ fɛ́ɛ́ befia kɩta agywɩɩn. Akʋ bʋgyi Bulu igyi ahapʋ dɛhɛn, Mose mbla asunapʋ pʋ́ Yudafɔ ahandɛ atrahɛ Ɩnʋ bɛha bɛklɩ Yesu, pʋ mʋ yɛwa Pilato ɩbɩtɔ.

² Pilato lɛfɩtɛ Yesu ɔbɛɛ, “Fʋgyi Yudafɔ owie amʋ nɩ?” Yesu lɛlɛ mʋ́ ɔnɔ ɔbɛɛ, “Ee, mʋ́ fablɩ a!”

³ Ɩnʋ igyi ahapʋ dɛhɛn amʋ bɛka asʋn tsɔtsɔɔtsɔ dɩnka Yesusʋ.

⁴ Mʋ́ sʋ Pilato lɛfɩtɛ Yesu ɔbɛɛ, “Kɩ asʋn tsɔtsɔɔtsɔá baka dɩnka fʋsʋ, fʋma mʋ́ ɔnɔ lɛ?”

⁵ Tamɛ Yesu mɛlɛ asʋansʋ ɔnɔ. Mʋ sʋ ɩlɔwa Pilato wanwan.

Yesu Lowu Ɩpɔn Ha

⁶ Katsʋn Nkɛ kugyikʋtɔ a, igyi ɔmásʋ ogyipʋ Pilato amandɩɛá obési obu adɩpʋtɔ ɔkʋlɛá amʋ́ onuto bʋdekle ha amʋ́.

⁷ Oyin ɔkʋá bʋtɛtɩ mʋ Baraba mʋa mʋ aba bʋda obu alɩ brɛ amʋtɔ. Bɔkʋsʋ lɩɩ ɔmásʋ, kpokiti lɛda, bɔmɔ ɔha mʋ́tɔ.

⁸ Ɔdɔm amʋ bɔyɔ Pilato wa yobwii ɩpa ha mʋ bɛɛ, osi obu ɔdɩpʋ ɔkʋlɛ ha amʋ́ alɩ amʋʋ otetsia bwɛ ha amʋ́ amʋ.

⁹ Mʋʋ Pilato lɛfɩtɛ amʋ́ ɔbɛɛ, “Mlɩdekle mlɩaa, nsi Yudafɔ Owie anfɩ ha mlɩ loo?”

¹⁰ Ɔlɛfɩtɛ amʋ́ alɩ, tsufɛ olowun ánɩ́ Yesu ɩwɩ olu sʋ Bulu igyi ahapʋ dɛhɛn amʋ bakɩta mʋ ba mʋ.

¹¹ Igyi ahapʋ dɛhɛn amʋ bɛha ɔdɔm amʋ ɔnɔ bɛɛ, bʋkokoli Pilato, osi Baraba mboun ha amʋ́.

¹² Pilato lɛtra fɩtɛ amʋ́ ɔbɛɛ, “Ntɔ mbwɛ ɔha anfɩ mlɩdɛtɩ mlɩaa, Yudafɔ Owie anfɩ?”

¹³ Ɩnʋ amʋ́ fɛ́ɛ́ bɔsʋra okitikiti bɛɛ, “Da mʋ manta oyikpalihɛsʋ!”

¹⁴ Pilato lɛfɩtɛ amʋ́ ɔbɛɛ, “Tsitsa mɔmʋ alabwɛ?” Tamɛ bɛlasʋra okitikiti kʋklʋkʋʋ bɛɛ “Da mʋ manta oyikpalihɛsʋ!”

¹⁵ Pilato dekleá ɔbɔ́bwɛ ɔdɔm amʋ apɛ ha amʋ́. Mʋ́ sʋ olesi Baraba ha amʋ́, ɔlɛha mʋ ɩsa akɔpʋ bɛpɩtɩ Yesu mplɩ; ɔlɔpʋ mʋ wa amʋ́ ɩbɩtɔ ɔbɛɛ, bʋyɛda mʋ manta oyikpalihɛsʋ.

Yesu Ahinla Bwɛ

¹⁶ Ɩsa akɔpʋ amʋ bɛkpa Yesu ya ɔmásʋ ogyipʋ amʋ woyitɔ. Bɛtɩ amʋ́ aba ɩsa akɔpʋ atrahɛ amʋ fɛ́ɛ́, bɛda Yesu ɔbʋn.

¹⁷ Bɔpʋ liga pɛpɛ kʋ wa mʋ, bɔlʋ obungyo-awu, bwɛ mʋ́ owiepa bun mʋ nwun.

¹⁸ Ɩnʋ bɔbwɛ mʋ ahinla, bɛtɩ mʋ bɛɛ, “Yudafɔ Owie, fʋ nkpasʋ ɔnlɩnsʋ!” Bɔtswɩ ope!

¹⁹ Ɩnʋ bɔpʋ oyi sisi mʋ nwuntɔ, tutu atsʋnɔ wʋlɩ mʋ, da akpawunu mʋ ansɩtɔ.

²⁰ Bɔbwɛ mʋ ahinla ta a, bɔwɔɩ amʋ́ liga pɛpɛ amʋ, yinkia mʋ onuto atadɩɛ wa mʋ, bɛkpa mʋ dalɩ bɛyɛda mʋ manta oyikpalihɛsʋ.

Yesu Da Manta Oyikpalihɛsʋ

²¹ Befia Kireneyin ɔkʋá bʋtɛtɩ mʋ Simon, ogyi Aleksandro mʋa Rufo ɔsɩ. Otsu abu asɩ ɔba, bɛka mʋ hɩɛ bɛɛ, ɔsʋra oyikpalihɛ amʋ.

²² Mʋʋ bɛkpa Yesu ya ɔtɩnɛkʋá bʋtɛtɩ ɩnʋ Golgota. Mʋ́ asɩ gyi, “Nwun Okokobi Otsiakpa.”

²³ Bɔpʋ afa kʋá ɩtɛba ɩwɩɔsɩn asɩ wa ntatɔ tin Yesu ɔnɔ bɛɛ onun, tamɛ omonun.

²⁴ Bɛda mʋ manta oyikpalihɛ amʋsʋ ta a, beye mʋ atadɩɛtɔ. Ɩnʋ bɔtswɩ abi pʋkɩ ɔhagyiɔha ogyikpa.

²⁵ Ɩbɔ́bwɛ fɛ nyankɩ dokwebatɔ bɛda mʋ manta oyikpalihɛsʋ.

²⁶ Mʋʋ bɔwanlɩn tɔá sʋá bʋdɛ mʋ da manta oyikpalihɛ amʋsʋ dɩnka mʋ awunsʋ bɛɛ, “Yudafɔ Owie.”

^27-28 Bɛda awikplu abanyɔ akʋ ɛ manta nyikpalihɛsʋ tsɩa mʋtɔ. Ɔkʋlɛ bʋ mʋ gyɔpɩsʋ, ɔkʋlɛ ɛ bʋ mʋ bɩnasʋ.

²⁹ Ɩnʋ atsʋnpʋ bɔkpʋkpʋ nwuntɔ, blɩ mʋ ɩwɩ abususʋ bɛɛ, “Yɛ fʋ fɛɛ, fɛ́talɩ bwie Bulu ɔtswɛkpa amʋ, lapwɛ mʋ nkɛnsa owitɔ nɩ?

³⁰ Hɔ fʋ ɩwɩ, afʋkplɩ tsu oyi amʋsʋ akɩ!”

³¹ Bulu igyi ahapʋ dɛhɛn pʋ́ Mose mbla asunapʋ amʋ ɛ bɔbwɛ mʋ ahinla bɛɛ, “Ɔlɔhɔ aha nkpa, tamɛ ɔmɛtalɩ hɔ mʋ ɩwɩ.

³² Nɩ mʋgyi Israelfɔ owie, Kristo, (ɔha amʋʋ Bulu lada mʋ ofuli) a, ɔkplɩ tsu oyi amʋsʋ awun, ahɔ mʋ gyi!” Aha amʋʋ bɛda manta oyisʋ mʋ gyɔpɩsʋ mʋ́a bɩnasʋ amʋ ɛ bɔbwɛ mʋ ahinla.

Yesu Lowu

³³ Brɛá doduanyɔ lɛda a, owi lɛta ɔsʋlʋ amʋsʋ fɛ́ɛ́ alɩɩ yɔfʋn ntʋpwɛ dɔsatɔ.

³⁴ Dɔsa amʋtɔ a, Yesu lɔkplʋn kʋklʋkʋʋ, blɩ ɔbɛɛ, “Eloi, Eloi, Lama Sabaktani?” Mʋ́ asɩ gyi, “Mɩ Bulu, mɩ Bulu, ntogyi sʋ fakpa mɩ ɔma?”

³⁵ Aha amʋʋ bʋlɩɩ ɩnʋ amʋtɔ akʋ bonu asʋn anfɩ, bɛblɩ bɛɛ, “Mlɩnu, ɔdɛ Elia kpoli.”

³⁶ Ɩnʋ amʋ́tɔ ɔkʋ lɛsrɩ tsu ɔsapɔ, pʋda nta ɔdaɩtɔ, pʋyi oyisʋ, tsu mʋ́ fʋa pʋtin mʋ ɔnɔ ɔbɛɛ, onun. Mʋʋ ɔlɛblɩ ɔbɛɛ, “Mlɩlɩɩ akɩ bɛɛ, Elia ɔbɛ́ba bɛsɩɛɩ mʋ lɛ oyi amʋsʋ?”

³⁷ Ɩnʋ Yesu lɔkplʋn kʋklʋkʋʋ, ɔlɛlɛ ɔŋɛ.

³⁸ Ɩnʋnʋ Bulu lɛbalɩ tatiá bɔpʋka ɔtswɛkpa obu amʋtɔ anyɔ, tsu awunsʋ beyi asɩ.

³⁹ Brɛá ɩsa akɔpʋ ɔhandɛá ɔlɩɩ Yesu ansɩtɔ ɔdɛkɩ lowun alɩá Yesu lɛlɛ ɔŋɛ trahɛ a, ɔlɛblɩ ɔbɛɛ “Lɛlɛ, Bulu mʋ Bi oyin anfɩ gyi!”

⁴⁰ Atsɩ akʋ ɛ bʋlɩɩ ɩfʋntɔ bʋdɛkɩ sɩsɩ. Amʋ́tɔ akʋ gyi, Magdalayintse Maria, Salome pʋ́ Maria ánɩ́ ɔlɔkwɩɩ Yakobo mʋa mʋ gyama Yosef.

⁴¹ Amʋ́ ɛ betsia buo Yesu, tsia kɩ mʋsʋ brɛá ɔbʋ Galilea. Atsɩ tsɔtsɔɔtsɔ akʋá bobuo mʋ ba Yerusalem ɛ bʋbʋ ɩnʋ.

Yesu Pula

⁴² Ɛkɛ amʋ igyi ɛkɛá Yudafɔ bʋtɔpʋla ɩwɩ asa bʋtegyi amʋ́ ɔkpʋnʋ ɔdakɛ. Brɛá owi dɛpɔn a,

⁴³ Arimateayin Yosef lɔwa ɩklʋn yɔ Pilato wa yɔkʋlɩ mʋ ɔbɛɛ, osi Yesu fuli ha mʋ amʋpula. Yudafɔ asʋn ogyipʋ ogyi, bʋtobu mʋ. Mʋ ɛ ɔdɛ Bulu iwiegyi amʋ ɔkpa kɩ.

⁴⁴ Ɩlɔwa Pilato wanwan ánɩ́ Yesu lawuna wu. Mʋ́ sʋ ɔlɛtɩ mʋ ɩsa akɔpʋ ɔhandɛ, fɩtɛ mʋ nɩ olowu ɩlawa ɔpá.

⁴⁵ Brɛá ɩsa akɔpʋ ɔhandɛ amʋ lotsula mʋ́sʋ a, Pilato lesi fuli amʋ ha Yosef.

⁴⁶ Mʋʋ Yosef lɔhɔ ɔhrada, ɔlɔyɔ yɛsɩɛɩ Yesu lɛ oyi amʋsʋ, kɩklɩ mʋ wa ɔhrada amʋtɔ, tsu mʋ yopula ɔbɔ kʋá bɛda bʋtatɔ, olemina ibwi yileyile kʋ tin ɔbɔ amʋ ɔnɔ.

⁴⁷ Magdalayintse Maria mʋa Yosef mʋ yin Maria bowun Yesu opulakpa.