Marko 14 - Bulu Ntam Pɔpwɛ mʋ́a Israel Ɩlʋ

Bɛkɩklɩ Yesu Nwunsʋ

¹ Ilesi nkenyɔ Yudafɔ abʋgyi Israelfɔsʋ Katsʋn Nkɛ pʋ́ Bodobodo Mátuhɛ Nkɛ. Alɩ brɛ amʋtɔ Bulu igyi ahapʋ dɛhɛn pʋ́ Mose mbla asunapʋ bodunka ɔkpa ánɩ́ bɔ́tsʋn mʋ́sʋ kɩta Yesu ŋaintɔ, mɔ mʋ kokooko.

² Tamɛ bɛblɩ bɛɛ, “Megyi Katsʋn Nkɛ anfɩtɔ abɔ́mɔ mʋ, mɛnɩ kpokiti mɛ́ɛda ɔmá amʋtɔ.”

Ofobi Fanfaanfan Pʋwʋlɩ Yesu

³ Brɛá Yesu bʋ Betania wulutɔ, Simon ɔkʋá alalɔ ɩlɔ pɛpɛ kɩ woyitɔ ɔdɛ atɔ gyi a, ɔtsɩ ɔkʋ lɛba ɩnʋ. Ɔdɛ prɛntʋa wanklaan kʋá ofobi fanfan ánɩ́ ɩbʋ ibia bʋ mʋ́tɔ. Oletii mʋ́ ɔnɔ, ɔlɛtsɛɩ ofobi amʋ wʋlɩ Yesu nwuntɔ.

⁴ Akʋ bʋbʋ ɩnʋá ɩmɔwa amʋ́ ɔdwɛ. Bɛfɩtɛ aba bɛɛ, “Ntogyi sʋ ɔdɛ ofobi anfɩ yinta?

⁵ Tɛkɩ abɛ́talɩ fɛ ofobi fanfan anfɩ mʋ́ ibia bɔ́dʋn ɔbakʋlɛ ofi ɔkʋlɛ ɩkɔka anfɩ, pʋha ahianfɔ.” Bɛhɩɛ wa ɩyɩn wa ɔtsɩ amʋ.

⁶ Tamɛ Yesu lɛblɩ ɔbɛɛ, “Mlɩsi mʋ! Ntogyi sʋ mlɩdɛ mʋ han? Ɩtɔ yile alabwɛ ha mɩ.

⁷ Ahianfɔ bétsia mlɩ wa ekekegyiɛkɛ. Bregyibrɛá mlɩdekle a, mlɛ́talɩ wa awɩtɔlɛ ha amʋ́, tamɛ mɩ mʋ́ mméetsia mlɩtɔ yɔ.

⁸ Alabwɛ mʋ́á ɔbɛ́talɩ pʋla mɩ ɔyʋlʋ yaɩ ha mɩ opulakɛ.

⁹ Ɔnɔkwalɩ ndɛ mlɩ bla. Ɔyɩtɔ ɔtɩnɛgyiɔtɩnɛá bɛ́da Bulu asʋn wanklaan amʋ ɔkan a, bɛ́blɩ tɔ anfɩ ɔtsɩ anfɩ labwɛ anfɩ pʋkaɩn mʋsʋ.”

Yuda Iskariot Lotsula Ánɩ́ Ɔbɛ́lɛ Yesu Ha

¹⁰ Mʋ́ ɔma a, mʋ akasɩpʋ duanyɔ amʋtɔ ɔkʋlɛá bʋtɛtɩ mʋ Yuda Iskariot loyowun Bulu igyi ahapʋ dɛhɛn amʋ, mɛnɩ ɔbɛ́lɛ Yesu ha amʋ́.

¹¹ Brɛá bonu asʋn anfɩ a, ɩlɛhɩɛ wa amʋ́ ɔdwɛ. Bɛhɩɛ mʋ asɩ ánɩ́ bɛ́ka mʋ ɩkɔ. Mʋ́ sʋ olodunka ɔkpa ánɩ́ ɔbɔ́tsʋn mʋ́sʋ lɛ Yesu ha amʋ́.

Katsʋn Atogyihɛ Gyi

¹² Bodobodo Mátuhɛ Nkɛ amʋtɔ ɛkɛ gyankpapʋá bʋtɔmɔ Israelfɔsʋ Katsʋn Nkɛ akufa lɔfʋn. Yesu akasɩpʋ bɛfɩtɛ mʋ bɛɛ, “Osunapʋ, obu mɔmʋtɔ ayɛla ha fʋ, afʋgyi Katsʋn Nkɛtɔ atogyihɛ amʋ?”

¹³ Mʋʋ ɔlɔwa amʋ́tɔ abanyɔ, bla amʋ́ ɔbɛɛ, “Mlɩyɔ Yerusalem wulutɔ. Mléfia oyin ɔkʋá ɔsʋ ntsu-ɔlɔ, mlɩbuo mʋ.

¹⁴ Woyi oduatɔ obówie a, mlɩfɩtɛ woyi mʋ wie amʋ mlɩaa, ‘Nkʋnʋ afɔɔ ɔswɩɩkpa bʋ, mɩa mɩ akasɩpʋ aba begyi Israelfɔsʋ Katsʋn atogyihɛ amʋ ɩnʋ?>

¹⁵ Obósuna mlɩ abansrʋ yile kʋá bala mʋ́tɔ yaɩ. Mlɩbwɛ atɔ amʋ yaɩ ɩnʋ.”

¹⁶ Yesu akasɩpʋ amʋ bɔyɔ wulu amʋtɔ a, bowun togyitɔ alɩ amʋʋ Yesu lɛbla amʋ́ amʋ pɛpɛɛpɛ. Bɔbwɛ Israelfɔsʋ Katsʋn atogyihɛ amʋ yaɩ ɩnʋ.

¹⁷ Brɛá nsaɩntɔ deklun a, Yesu mʋa mʋ akasɩpʋ bɛba ɩnʋ.

¹⁸ Atɔ amʋ ogyikpa a, Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Mlɩtɔ ɔkʋlɛá mɩa mʋnyɔ ɩbɩ da ɔlɛpɛtɔ ɔbɛ́lɛ mɩ ha.”

¹⁹ Asʋn anfɩ lɛhɩɛ han akasɩpʋ amʋ. Mʋ́ sʋ befi asɩ bʋdɛ mʋ fɩtɛ ɩkʋlɛ-kʋlɛ bɛɛ, “Mɩ nɩ loo?”

²⁰ Yesu lɛbla amʋ́ ɔbɛɛ, “Mlɩ aha duanyɔ anfɩtɔ ɔkʋlɛá mɩa mʋnyɔ ɩbɩ da ɔlɛpɛtɔ ɔbɛ́lɛ mɩ ha nɩ.

²¹ Mɩ, Nyankpʋsa-Mʋ-Bi anfɩ nówu fɛ alɩá bɔwanlɩn tswɩ, tamɛ ɔha amʋʋ ɔbɛ́lɛ mɩ ha amʋ ɔgyɔwɩ nɩ. Nɩ bʋmetepi kwɩɩ mʋ kʋraa a, tɛkɩ ɩbʋ alɛ ha mʋ.”

Yesu Ntʋpwɛ Atogyihɛ Trahɛ

²² Brɛá bʋdɛ atɔ amʋ gyi a, Yesu lɛlɛ bodobodo ipin. Ɔlɛda Bulu ɩpan, biabia mʋ́tɔ pʋha amʋ́, blɩ ɔbɛɛ, “Mlɩhɔ, mɩ ɔyʋlʋ nɩ.”

²³ Ɩnʋ olotsu nta-ɛwɛ, ɔlɛda Bulu ɩpan, pʋha amʋ́ fɛ́ɛ́ bonun.

²⁴ Mʋʋ ɔlɛbla amʋ́ ɔbɛɛ, “Mɩ obugya nɩ. Mʋ́ Bulu dɛpʋsi mʋ ntam ánɩ́ alaka ha ahasʋ nɩ. Bɛ́tsɛɩ mʋ́ wʋlɩ asɩ aha tsɔtsɔɔtsɔ lakpan sʋ.

²⁵ Ɔnɔkwalɩ ndɛ mlɩ bla, mmɛ́ɛtra nun waɩn-abi nta anfɩ alɩɩ yɔfʋn ɛkɛá nónun mʋ́ pɔpwɛ Bulu iwiegyi amʋtɔ.”

²⁶ Benya wa ɩlʋ da Bulu ɩpan ta alɩ bɛnatɩ yɔ Olif ɩbʋ amʋsʋ.

Petro Ɔbɔ́swɩɩ Ɔbɛɛ Mʋmeyin Yesu

²⁷ Mʋʋ Yesu lɛbla amʋ́ ɔbɛɛ, “Mlɩ fɛ́ɛ́ mléyinki mɩ ɔma. Tsufɛ Bulu ɔnɔsʋ atɔɩpʋ amʋ bɔwanlɩn wa Bulu asʋn amʋtɔ bɛɛ, ‘Nɛ́da akufa ɔkpapʋ amʋ lɛda, mʋ akufa bɛdasaɩn.>

²⁸ Tamɛ nɩ Bulu ɔkʋsʋa mɩ tsu afulitɔ a, négya mlɩ nkpa yɔ Galilea ɔmátɔ.”

²⁹ Petro lɛbla mʋ ɔbɛɛ, “Nɩ amʋ́ fɛ́ɛ́ béyinki fʋ ɔma kʋraa a, mɩ mʋ́ mméeyinki ɛkɛkɛɛkɛ.”

³⁰ Yesu lɛbla mʋ ɔbɛɛ, “Ɔnɔkwalɩ ndɛ fʋ bla. Onyenɩ, asa batɛ ɔbɛ́lɛ ɔnɔ tse nyɔ a, fɔ́swɩɩ pʋ ɩbɩ wa ogya tse sa fɛɛ fʋmeyin mɩ.”

³¹ Ɩnʋ Petro lɛfɩn yabi yi ɔbɛɛ, “Nɩ lowu igyi kʋraa a, mméekina fʋ ɛkɛkɛɛkɛ.” Alɩ kɛn atrahɛ amʋ ɛ fɛ́ɛ́ bɛblɩ nɩ.

Mpaɩbɔ Getsemane

³² Boyowie ɔtɩnɛkʋá bʋtɛtɩ ɩnʋ Getsemane. Mʋʋ Yesu lɛbla mʋ akasɩpʋ amʋ ɔbɛɛ, “Mlɩtsia nfɩ, nɔ́yɔbɔ mpaɩ.”

³³ Ɔlɛkpa Petro mʋa Yakobo pʋ́ Yohane buo ɩwɩ. Ɩnʋ asʋn lɛhɩɛ han mʋ, mʋ ansɩ lɛpɛ.

³⁴ Mʋʋ ɔlɛbla amʋ́ ɔbɛɛ, “Asʋn ɩhɩɛ dɛ mɩ han. Idekle mɔ mɩ. Mlɩtsia nfɩ, amlɩgyo.”

³⁵ Ɩnʋ ɔlɛnatɩ yɔ nkpa kpalobi, ɔlɛda akpawunu kokoli Bulu ɔbɛɛ, “Nɩ ɩbɔ́wa alɛ a, ha brɛ anfɩ ɩtsʋn mɩsʋ.”

³⁶ Mʋʋ ɔlɛblɩ ɔbɛɛ, “Abba mɩ Sɩ, fʋtɛtalɩ bwɛ togyitɔ. Ha nta-ɛwɛ anfɩ ɩtsʋn mɩsʋ! Tamɛ megyi tɔá ndekle, mboun mʋ́á fʋdekle ɩba mʋ́tɔ!”

³⁷ Oleyinki ba akasɩpʋ amʋ wa bowun ánɩ́ bʋdɛdɩdɩ. Ɩnɩ sʋ ɔlɛfɩtɛ Petro ɔbɛɛ, “Simon, fʋdɛdɩdɩ? Fʋmɛtalɩ gyo dɔnhwɩrɩ kʋlɛ kpan?

³⁸ Mlɩgyo amlɩkokoli Bulu, mɛnɩ mlɩmóowie ɩsɔkɩtɔ. Tsufɛ ɔŋɛ amʋ dekle, tamɛ nyankpʋsa lɔpɔn.”

³⁹ Ɔlɛtra yɔbɔ mpaɩ, bla Bulu asʋn kuakʋlɛ amʋ kɛn.

⁴⁰ Ɔlɛtra yinki ba bowun ánɩ́ akasɩpʋ amʋ bʋtra bʋdɛdɩdɩ, tsufɛ dɩdɩ dɛ amʋ́ bʋ. Bʋmɛtalɩ bla mʋ asʋansʋ.

⁴¹ Brɛá ɔlɛba otse sasɩ a, ɔlɛfɩtɛ amʋ́ ɔbɛɛ, “Mlɩlatra si mlɩda mlɩdɛ ɔkpʋnʋ da? Itsia alɩ ngya! Brɛ amʋ lafʋn ánɩ́ bɔ́pʋ mɩ, Nyankpʋsa-Mʋ-Bi anfɩ wa lakpan abwɛpʋ ɩbɩtɔ.

⁴² Mlɩkʋsʋ ayɔ. Mlɩkɩ, ɔha amʋʋ ɔdɛ mɩ lɛ ha amʋ na a!”

Yesu Kɩta

⁴³ Yesu ɔnɔ mesi asa akasɩpʋ duanyɔ amʋtɔ ɔkʋlɛá bʋtɛtɩ mʋ Yuda lobowie ɩnʋ. Ɔdɔm ánɩ́ bʋdɛ ndayi pʋ́ nkpoti bʋbuo mʋ. Bulu igyi ahapʋ dɛhɛn, Mose mbla asunapʋ pʋ́ Yudafɔ ahandɛ amʋ lɔwa amʋ́.

⁴⁴ Yuda amʋʋ ɔlɛlɛ Yesu ha amʋ lɛbla ɔdɔm amʋ yaɩ ɔbɛɛ, “Ɔha amʋʋ nɛ́lata puta amʋ gyi ɔha amʋ nɩ. Mlɩkɩta mʋ kinkiinkin, amlɩkpa mʋ natɩ.”

⁴⁵ Ɩnʋ ɔlɛnatɩ laa yɔ Yesu wa, yokpoli mʋ ɔbɛɛ, “Osunapʋ!” Ɔlɛlata mʋ puta.

⁴⁶ Ɩnʋ aha amʋ bɛnatɩ tʋ Yesu, kɩta mʋ kinkiinkin.

⁴⁷ Tamɛ ɩnʋ alɩɩpʋ amʋtɔ ɔkʋlɛ lɔtswɩ mʋ ɔdayi kpa Bulu igyi ɔhapʋ dɛhɛn osumbi ɔkʋ ɩsʋ lɛ.

⁴⁸ Ɩnʋ Yesu lɛfɩtɛ amʋ́ ɔbɛɛ, “Ogyo otswapʋ ngyi, sʋ mlɩlatsu nkpoti pʋ́ ndayi mlɛba mɩ ɔkɩtakpa?

⁴⁹ Ntsie mlɩ wa Bulu ɔtswɛkpa wunsɩnɛsʋ ɩnʋ ekekegyiɛkɛ ndɛ mlɩ atɔ suna, mlɩmɛkɩta mɩ ɛkɛkɛɛkɛ. Ɩnɩ laha Bulu asʋn wanlɩnhɛ amʋ ɩlaba mʋ́tɔ.”

⁵⁰ Ɩnʋ mʋ akasɩpʋ amʋ fɛ́ɛ́ bɛsrɩ si mʋ.

⁵¹ Ilesi ɔyasubi ɔkʋá ɔlɔwa liga nkʋlɛ. Bɛkɩta mʋ,

⁵² tamɛ ɔlɔkɔlɩ si mʋ liga amʋ wa amʋ́ ɩbɩtɔ, pʋ yaya srɩ.

Yudafɔ Ahandɛ Ansɩtɔ Lɩɩ

⁵³ Bɛkpa Yesu ya Bulu igyi ɔhapʋ dɛhɛn woyi. Igyi ahapʋ dɛhɛn, Mose mbla asunapʋ pʋ́ Yudafɔ ahandɛ amʋ fɛ́ɛ́ bafia ɩnʋ.

⁵⁴ Petro lɛpɛtɩ buo amʋ́ ɔma tsutsuutsu, alɩɩ yowie-woyitɔ ɩnʋ. Ɩnʋ oleyetsia ɩnʋ asumpʋ wa, ɔdɛ ogya nun.

⁵⁵ Ɩnʋ Bulu igyi ahapʋ dɛhɛn pʋ́ Yudafɔ asʋn agyipʋ atrahɛ fɛ́ɛ́ bodunka aha ánɩ́ bɛ́ka asʋn dɩnka Yesusʋ, mɛnɩ bɛ́lɩɩ amʋ́ asʋn blɩhɛsʋ mɔ mʋ, tamɛ bʋmenya.

⁵⁶ Tsufɛ aha tsɔtsɔɔtsɔ bɔwa afunu dɩnka mʋsʋ, tamɛ amʋ́ fɛ́ɛ́ ɔnɔ lɔtsʋn ɔtsan.

⁵⁷ Ɩnʋ akʋ bɔkʋsʋ ka asʋn dɩnka mʋsʋ bɛɛ,

⁵⁸ “Anɩlonuá ɔlɛblɩ ɔbɛɛ, ‘Nóbwie Bulu ɔtswɛkpa anfɩ bapʋ ɩbɩ yi anfɩ, tamɛ nkɛnsa ɔma a, nɛ́layi pɔpwɛá megyi nyankpʋsa ɔbɔ́pʋ ɩbɩ yi mʋ́.> ”

⁵⁹ Tamɛ amʋ́ ɛ amʋ́ ɔnɔ mɔbwɛ kʋlɛ.

⁶⁰ Ɩnʋ Bulu igyi ɔhapʋ dɛhɛn amʋ lɔkʋsʋ lɩɩ amʋ́ fɛ́ɛ́ ansɩtɔ, ɔlɛfɩtɛ Yesu ɔbɛɛ, “Fʋma ɔnɔ lɛ? Fʋma asʋansʋ blɩ pʋlɛ fʋ ɩwɩ?”

⁶¹ Tamɛ Yesu mɛlɛ asʋansʋ ɔnɔ. Mʋʋ Bulu igyi ɔhapʋ dɛhɛn amʋ lɛtra fɩtɛ mʋ ɔbɛɛ, “Bulu amʋʋ bʋtɛkanfʋ amʋ mʋ Bi gyi fʋ? Fʋgyi Kristo (ɔha amʋʋ Bulu lɛda mʋ ofuli amʋ) nɩ?”

⁶² Yesu lɛlɛ mʋ́ ɔnɔ ɔbɛɛ, “Ee! Mɩ nɩ! Mlowun ánɩ́ mɩ, Nyankpʋsa-Mʋ-Bi anfɩ ntsie Bulu Otumipʋ gyɔpɩsʋ anfɩ ndɩn nwʋlʋtasʋ tsu ɔsʋsʋ nɛba.”

⁶³ Bulu igyi ɔhapʋ dɛhɛn amʋ lɛkɩta mʋ atadɩɛ balɩ mʋ́ kɩaan. Mʋʋ ɔlɛblɩ ɔbɛɛ, “Adansɩɛ mɔmʋ anɩtra anɩgyo?

⁶⁴ Mlɩlanu abususʋá alablɩ. Nkalɩ gyi mlɩ agywɩɩn?” Amʋ́ fɛ́ɛ́ botsula ánɩ́ olegyi pɔn, bʋmɔ mʋ.

⁶⁵ Amʋ́tɔ akʋ bɔwa atsʋnɔ tutu wʋlɩ mʋ bɩ. Bɔpʋ atɔ tin mʋ ansibi, bɔfʋlɩ mʋ atswɛ, bla mʋ bɛɛ, “Bulu ɔnɔsʋ ɔtɔɩpʋ, suna anɩ ɔha ánɩ́ ɔlɔfʋlɩ fʋ ɩtswɛ!” Ɩnʋ agyopʋ amʋ ɛ bɛdada mʋ asʋtɔ.

Petro Lɔswɩɩ Ɔbɛɛ Mʋmeyin Yesu

⁶⁶ Petro lesi otsie wunsɩnɛsʋ ɩnʋ, Bulu igyi ɔhapʋ dɛhɛn amʋ osumbi tsɩhɛ ɔkʋ lɛba.

⁶⁷ Brɛá olowun Petro tsie ɔdɛ ogya nun a, ɔlɛkɩ mʋ diin. Mʋʋ ɔlɛfɩtɛ Petro ɔbɛɛ, “Fʋa Yesu Nasaretyin amʋ nyɔ na.”

⁶⁸ Tamɛ Petro lɔswɩɩ blɩ ɔbɛɛ, “Mmeyin tɔtɔ tsu asʋn anfɩ fʋdɛblɩ anfɩ ɩwɩ!” Ɔlɛnatɩ yɛlɩɩ ɔkpa ɔnɔ, ɩnʋ batɛ lɔbɔn.

⁶⁹ Osumbi tsɩhɛ amʋ lɛtra yɔtʋ mʋ ɩnʋ, ɔlɔwa aha amʋʋ bʋlɩɩ ɩnʋ amʋ bla bɩ ɔbɛɛ, “Amʋ́tɔ ɔkʋlɛ gyi oyin anfɩ.”

⁷⁰ Tamɛ Petro lɛtra swɩɩ pʋ ɩbɩ wa ogya. Ɩlɔbwɛ kpalobi a, aha amʋʋ bʋlɩɩ ɩnʋ amʋ bɛbla Petro bɛɛ, “Lɛlɛ mʋ́ a, amʋ́tɔ ɔkʋlɛ fʋgyi, tsufɛ Galileayin fʋ ɛ fʋgyi?”

⁷¹ Ɩnʋ Petro lɔwa ntam kaka bɩ ɔbɛɛ, “Nɛka togyitɔ, mmeyin oyin anfɩ mlɩdɛ mʋ ɩwɩ asʋn blɩ anfɩ.”

⁷² Ɩnʋ batɛ lɔbɔn otse nyɔsɩ. Mʋʋ Petro lɛkaɩn asʋn amʋʋ Yesu lɛbla mʋ ɔbɛɛ, “Fɔ́swɩɩ tse sa fɛɛ fʋmeyin mɩ asa batɛ ɔbɛ́lɛ ɔnɔ tse nyɔ.” amʋsʋ. Mʋʋ ɔlɛkpa isu yi, hɩɛ su woo.