Luka 9 - Bulu Ntam Pɔpwɛ mʋ́a Israel Ɩlʋ

Akasɩpʋ Duanyɔ Amʋ Sumbiwa

¹ Yesu lɛtɩ akasɩpʋ duanyɔ amʋ fia, ɔlɛha amʋ́ tumi, ha amʋ́ ɔkpa ɔbɛɛ, bʋgya ɔŋɛ lalahɛ fɛ́ɛ́, abʋtsa ɩlɔ.

² Ɔlɔwa amʋ́ ɔbɛɛ, bʋyɛda Bulu iwiegyi amʋ ɔkan, abʋtsa alɔpʋ.

³ Ɔlɛbla amʋ́ ɔbɛɛ, “Nɩ mlɔyɔ a, mlɩmátsu tɔtɔ. Mlɩmátsu oyi yiahɛ, akpankogyo, atogyihɛ, kɔba ntɛ atadɩɛ nyɔsɩ.

⁴ Woyigyiwoyitɔá bɔ́hɔ mlɩ a, mlɩtsia ɩnʋ yɔfʋn ɛkɛá mlɛ́dalɩ wulu amʋtɔ.

⁵ Nɩ bʋmɔhɔ mlɩ wulu kʋsʋ, mlɩdɛdalɩ mlɔyɔ a, mlɩkpakpa mlɩ ayabitɔ-ɩsɩ wʋlɩ wulu amʋtɔ, isuna ánɩ́ bʋmɛbɩ bwɛ.”

⁶ Bɛnatɩ ki nsɩnɛ ɩnʋ awulu fɛ́ɛ́sʋ, bʋdɛ asʋn wanklaan amʋ ɔkan da, tsa ɩlɔ.

Herode Legyigya

⁷ Brɛá Galilea ɔmásʋ ogyipʋ Herode lonu tɔá ɩdɛ mʋ́sʋ yɔ a, olegyigya. Tsufɛ akʋ bʋdɛblɩ bɛɛ, “Asu Ɔbɔpʋ Yohane lakʋsʋ tsu afulitɔ.”

⁸ Akʋ ɛ bɛɛ, “Bulu ɔnɔsʋ ɔtɔɩpʋ dada Elia lalɛ ɩwɩ ɔwan.” Akʋ ɛ bɛɛ, “Bulu ɔnɔsʋ atɔɩpʋ dada amʋtɔ ɔkʋ lakʋsʋ tsu afulitɔ.”

⁹ Herode lɛblɩ ɔbɛɛ, “Naha batɩn Yohane. Ngya oyin ɔmɔmʋ ɩwɩ asʋn ntra ndenu alɩ?” Mʋ́ sʋ ɔlɔbɔ mbɔdɩá mowun Yesu.

Aha Mpɩm-nu Atogyihɛ Ha

¹⁰ Yesu sumbi ayɔpʋ amʋ beyinki ba bɛbla mʋ tɔá bayɛbwɛ. Ɔlɛkpa amʋ́ buo ɩwɩ, amʋ́ nkʋlɛ bɔyɔ Betsaida wulutɔ.

¹¹ Brɛá ɔdɔm amʋ bɛbɩá ɔbʋ ɩnʋ a, begya mʋ ɔkpa yɔ ɩnʋ. Yesu lɔhɔ amʋ́ atuu, ɔlɛbla amʋ́ Bulu iwiegyi amʋ ɩwɩ asʋn, ɔlɛtsa amʋ́á bʋdɛlɔ.

¹² Brɛá owi dɛpɔn a, sumbi ayɔpʋ duanyɔ amʋ bɛba bɛbla Yesu bɛɛ, “Ha amʋ́ abʋnatɩ, mɛnɩ bɛ́talɩ yɔ awuluá ɩbʋ manta nfɩsʋ yodunka atogyihɛ mʋ́a ɔdɩkpa, tsufɛ anɩméenya tɔtɔ ha amʋ́ ɔsʋlʋkpan anfɩtɔ.”

¹³ Tamɛ Yesu lɛlɛ mʋ́ ɔnɔ ɔbɛɛ, “Mlɩdunka atɔ ha amʋ́ abʋgyi.” Akasɩpʋ amʋ bɛbla mʋ bɛɛ, “Tɔá anɩbʋ fɛ́ɛ́ gyi bodobodo apin anu pʋ́ ntsutso iye bwahɛ anyɔ. Nkɛtɩ anɩlayɛhɔ atogyihɛ ba aha anfɩ fɛ́ɛ́.”

¹⁴ (Ayin ánɩ́ bʋbʋ ɩnʋ bɔ́bwɛ fɛ mpɩm-nu (5,000).) Yesu lɛbla akasɩpʋ amʋ ɔbɛɛ, “Mlɩha amʋ́ abʋtsia okutɔ. Iku kʋlɛ ɩbwɛ fɛ aha aduenu (50).”

¹⁵ Akasɩpʋ amʋ bɔbwɛ dɩnka mʋ́sʋ, ɔhagyiɔha letsia asɩ.

¹⁶ Ɩnʋ olotsu bodobodo anu pʋ́ ntsutso iye bwahɛ anyɔ amʋ. Ɩnʋ olotsu ansɩ fʋa kɩ ɔsʋsʋ, ɔlɛda Bulu ɩpan. Mʋʋ olebiabia mʋ́tɔ pʋha akasɩpʋ amʋ ɔbɛɛ, bʋye mʋ́ ha amʋ́ fɛ́ɛ́ abʋgyi.

¹⁷ Amʋ fɛ́ɛ́ begyi mwɛ sian. Brɛá akasɩpʋ amʋ bɔtɔsɩ isianhɛ amʋ a, ɩlɔbʋla alakpa duanyɔ.

Ɔha Ánɩ́ Yesu Gyi

¹⁸ Ɛkɛ ɔkʋ Yesu nkʋlɛ dɛ mpaɩ bɔ, mʋ akasɩpʋ amʋ bʋbʋ ɩnʋ. Mʋʋ ɔlɛfɩtɛ amʋ́ ɔbɛɛ, “Ma aha bɛɛ ngyi?”

¹⁹ Bɛlɛ mʋ́ ɔnɔ bɛɛ, “Akʋ bɛɛ, fʋgyi Asu Ɔbɔpʋ Yohane. Akʋ bɛɛ, Bulu Ɔnɔsʋ Ɔtɔɩpʋ Elia. Akʋ ɛ bɛɛ, Bulu ɔnɔsʋ ɔtɔɩpʋ dada ɔkʋ lakʋsʋ tsu afulitɔ.”

²⁰ Mʋʋ ɔlɛfɩtɛ amʋ́ ɔbɛɛ, “Mlɩ ɛ mɛ? Mlɩaa, mɩgyi ma?” Petro lɛlɛ mʋ́ ɔnɔ ɔbɛɛ, “Fʋgyi Kristo, (ɔha amʋʋ Bulu lada mʋ ofuli amʋ) nɩ.”

Yesu Ɩwɩɔsɩn Pʋ́ Mʋ Lowu Ɩwɩ Asʋn Blɩ

²¹ Ɩnʋ Yesu lɛda amʋ́ ɔla kpakpaakpa ɔbɛɛ, bʋmábla ɔhaa mʋ ɩwɩ asʋn anfɩ.

²² Ɔlɛtra bla amʋ́ ɔbɛɛ, “Ilehian ánɩ́ mɩ, Nyankpʋsa-Mʋ-Bi anfɩ nɛ́hɩɛ wun ɩwɩɔsɩn tsɔtsɔɔtsɔ Yudafɔ ahandɛ, Bulu igyi ahapʋ dɛhɛn pʋ́ Mose mbla asunapʋ ɩbɩtɔ. Amʋ́ fɛ́ɛ́ békina mɩ, ha bɔ́mɔ mɩ, tamɛ Bulu ɔbɛ́lakʋsʋa mɩ tsu afulitɔ ɛkɛ sasɩ.”

²³ Ɩnʋ ɔlɛbla aha amʋ ɔbɛɛ, “Nɩ ɔkʋ dekleá obóbuo mɩ a, osi tɔá otekle bwɛ, otsu mʋ oyikpalihɛ ekekegyiɛkɛ bobuo mɩ.

²⁴ Tsufɛ nɩ ɔkʋ lɛprɩ mʋ nkpa a, ɔbɔ́hʋlɩ mʋ́. Nɩ ɔkʋ ɛ lesi mʋ nkpa ha mɩ sʋ ɛ a, Bulu ɔbɔ́hɔ mʋ nkpa.

²⁵ Nɩ ɔkʋ onya ɔyɩtɔ atɔ fɛ́ɛ́, tamɛ ɔhʋlɩ mʋ ɔkla a, labi mɔmʋ ɩlɔwa ha mʋ?

²⁶ Nɩ ɔkʋ onya mɩa mɩ atosunahɛ pɛlɩ a, mɩ, Nyankpʋsa-Mʋ-Bi anfɩ ɛ nénya mʋ pɛlɩ brɛá nna mɩa mɩ Sɩ pʋ́ mʋ abɔpʋ wankɩhɛ numnyamtɔ nɛba.

²⁷ Ɔnɔkwalɩ ndɛ mlɩ bla. Akʋ bʋbʋ mlɩtɔ nfɩ bʋmóowu asa bówun Bulu iwiegyi amʋ.”

Yesu Ɩwɩtsɛ

²⁸ Yesu lɛblɩ asʋn anfɩ ndawɔtswɩ ɔma a, ɔlɛkpa Petro mʋa Yohane pʋ́ Yakobo buo ɩwɩ, bɔdʋ yɔ mpaɩ ɔbɔkpa ɩbʋ kʋsʋ.

²⁹ Brɛá ɔdɛ mpaɩ amʋ bɔ a, mʋ ansɩtɔ lɛtsɛ. Mʋ atadɩɛ lofuli hʋnanana, ɩdɛ ogya kpa.

^30-31 Ɩnʋ aha abanyɔá batsia kɩ, bʋgyi Mose mʋa Elia bɛlɛ ɩwɩ ɔwan ɔsʋsʋ numnyamtɔ. Amʋ́a Yesu bɔtɔɩ tsu mʋ lowuá Bulu lɛhɩɛ tswɩ mʋá ɩmɔ́ɔwa ɔpá obówu Yerusalem ɩwɩ.

³² Petro mʋa mʋ aba amʋ bɛdɩdɩ. Brɛá bɔwan tsinki a, bowun Yesu numnyam, aha abanyɔ amʋ ɛ bʋlɩɩ mʋ wa.

³³ Brɛá aha abanyɔ amʋ bʋdɛnatɩ a, Petro lɛbla Yesu ɔbɛɛ, “Mɩ Wie, ɩbʋ alɛá abétsia nfɩ. Ha ada abu asa. Fʋ klɛ kʋlɛ, Mose klɛ kʋlɛ, Elia ɛ klɛ kʋlɛ.” (Ɔmɛbɩ tɔá ɔdɛblɩ).

³⁴ Brɛá ɔdɛ asʋn anfɩ blɩ a, agyinde kʋ lobobun amʋ́ fɛ́ɛ́sʋ. Ɩnʋ ifu lɛkɩta amʋ́ abasa amʋ.

³⁵ Ɩnʋ a, ɔmɛ kʋ lɛdalɩ tsu agyinde amʋtɔ ɔbɛɛ, “Ɔ́nɩ gyi mɩ Biá nalɛ nɩ. Mlɩyaa asʋ amlɩnu mʋ ɔmɛ.”

³⁶ Ɔmɛ amʋ lotsutsua ɩbɛka tin a, ɩlasi Yesu nkʋlɛ ɩnʋ. Akasɩpʋ amʋ bɛkpa ɔnɔ bun asʋn anfɩsʋ nkɛ amʋtɔ. Bʋmɛbla ɔhaa tɔá bayowun.

Ɩlɔ Dɩdahɛ Ɔlɔpʋ Tsa

³⁷ Mʋ́ ɔyɩkɛhɛ a, Yesu mʋa akasɩpʋ abasa amʋ bɛkplɩ tsu ɩbʋ amʋsʋ, ɔdɔm amʋ befia mʋ.

³⁸ Ɩnʋ amʋ́tɔ ɔkʋ lɔkplʋn ɔbɛɛ, “Osunapʋ, kokoli, damli kɩ mɩ bi ha mɩ. Obi yinhɛ ɔkʋlɛ pɛ ogyi mɩ.

³⁹ Ɔŋɛ lalahɛ kʋ towie mʋtɔ, ɔtɔkplʋn. Ɔtɛdɩda gbla, ɔdɛkɔ tsikitsiki, mʋ ɔnɔ tɔbwɛ afu. Ipiantɔ asa itesi mʋ. Ɩdɛ mʋ yinta.

⁴⁰ Nobobwii ɩpa ha fʋ akasɩpʋ amʋ mbɛɛ bʋgya mʋ́ lɛ mʋtɔ, tamɛ bʋmɛtalɩ.”

⁴¹ Yesu lɛlɛ mʋ́ ɔnɔ ɔbɛɛ, “Ndɛmba-abiá mlɩmá hogyi, mlɩ tsiatɔ ma alɛ. Alɩ nétsia mlɩ wa, nya klʋn ha mlɩ ekekegyiɛkɛ nɩ?” Ɩnʋ ɔlɛbla oyin amʋ ɔbɛɛ, “Kpa fʋ bi amʋ ba mɩ.”

⁴² Brɛá ɔlɛkpa kebi amʋ ɔba a, ɔŋɛ lalahɛ amʋ lɛfɩn mʋ da, ɔdɛkɔ tsikitsiki. Tamɛ Yesu lɔkplʋn wa ɔŋɛ lalahɛ amʋ, tsa kebi amʋ. Ɩnʋ oleyinkia mʋ ha mʋ sɩ.

⁴³ Bulu tumi kpɔnkpɔntɩ amʋ lɛha ɔnɔ lobwie aha amʋ fɛ́ɛ́. Brɛá mʋ bwɛhɛ ɩdɛ ɔhagyiɔha wanwan wa a, Yesu lɛbla mʋ akasɩpʋ ɔbɛɛ,

Yesu Lowu Ɩwɩ Asʋn Blɩ Tse Nyɔsɩ

⁴⁴ “Mlɩhɩɛ yaa asʋ amlɩnu. Bɛ́lɛ mɩ, Nyankpʋsa-Mʋ-Bi anfɩ ha adʋn bɔ́mɔ mɩ.”

⁴⁵ Tamɛ akasɩpʋ amʋ bomonu mʋ́ asɩ. Bulu lɔpʋ mʋ́ asɩnu ŋain amʋ́. Mʋ́ sʋ ɩmɔwankɩ amʋ́ asʋn ánɩ́ ɔdɛblɩ. Ifu ɛ dɛ amʋ́ ánɩ́ bɛ́fɩtɛ mʋ.

Ma Ɔbɔ́bwɛ Ɔhandɛ?

⁴⁶ Nwɛn kʋ lɛba akasɩpʋ amʋ nsɩnɛ, tsu amʋ́tɔ ɔha ánɩ́ ɔbɔ́bwɛ ɔhandɛ ɩwɩ.

⁴⁷ Yesu lɛbɩ amʋ́ agywɩɩn. Mʋ́ sʋ ɔlɛkpa kebi ɔkʋ bɛlɩɩ mʋ ɩwɩ wa.

⁴⁸ Mʋʋ ɔlɛbla amʋ́ ɔbɛɛ, “Ɔhagyiɔha ánɩ́ ɔlɔhɔ kebi anfɩ mɩ ɩdatɔ lahɔ mɩ. Ɔhagyiɔha ánɩ́ ɔhɔ mɩ ɛ lahɔ ɔha amʋʋ ɔlɔwa mɩ amʋ. Tsufɛ ɔha ánɩ́ ogyi ɔtrahɛ mlɩtɔ fɛ́ɛ́ gyi ɔdɛhɛn.”

Anɩ Obuopʋ

⁴⁹ Yohane lɛbla Yesu ɔbɛɛ, “Mɩ Wie, anɩlowun oyin ɔkʋ dɛpʋ fʋ ɩda gya ɔŋɛ lalahɛ, anɩlɛka mʋ tin, tsufɛ ɔma anɩtɔ.”

⁵⁰ Tamɛ Yesu lɛbla amʋ́ ɔbɛɛ, “Mlɩmáka mʋ tin! Tsufɛ ɔha ánɩ́ ɔmɔkʋsʋ lɩɩ mlɩsʋ buo mlɩ.”

Samariafɔ Yesu Mahɔ

⁵¹ Brɛá nkɛá Bulu obótsu Yesu ya ɔsʋsʋ dɛkpʋkpɛ ba a, ɔlɔbwɛ agywɩɩn ánɩ́ ɔbɔ́yɔ Yerusalem kokooko.

⁵² Ɔlɔwa abi gyankpa yɔ Samaria wulu kʋsʋ ɔbɛɛ, bʋyɛla ɩnʋ yaɩ ha mʋ.

⁵³ Tamɛ bʋmɔhɔ mʋ wulu amʋtɔ, tsufɛ Yerusalem ɔyɔ.

⁵⁴ Brɛá mʋ akasɩpʋ Yakobo mʋa Yohane bowun alɩ a, bɛfɩtɛ mʋ bɛɛ, “Anɩ Wie, fʋdekle fɛɛ aha ogya itsu ɔsʋsʋ bɔhɔ amʋ́ mɔ?”

⁵⁵ Tamɛ Yesu lɛdamli, wa ɩyɩn wa amʋ́.

⁵⁶ Mʋʋ bɔpʋ ɔkpa yɔ wulu bambasʋ a.

Aha Ánɩ́ Bɛɛ Bɔ́bwɛ Yesu Abuopʋ

⁵⁷ Brɛá bʋna ɔkpatɔ bɔyɔ a, oyin ɔkʋ lɛbla Yesu ɔbɛɛ, “Nóbuo fʋ yɔ ɔtɩnɛgyiɔtɩnɛá fɔ́yɔ.”

⁵⁸ Yesu lɛbla oyin amʋ ɔbɛɛ, “Awɩa bʋbʋ mbɔ, mbubwi ɛ bʋbʋ asia, tamɛ mɩ, Nyankpʋsa-Mʋ-Bi anfɩ mʋ́ a, mma ɔtɩnɛá nɔ́pʋ mɩ nwun tswɩ.”

⁵⁹ Yesu lɛbla ɔha bamba ɛ ɔbɛɛ, “Bobuo mɩ.” Tamɛ oyin amʋ lɛbla mʋ ɔbɛɛ “Owie, ha mɩ anyopula mɩ sɩ asa ambobuo fʋ.”

⁶⁰ Mʋʋ Yesu lɛbla mʋ ɔbɛɛ, “Si awupʋ abʋpula amʋ́ afuli. Tamɛ fʋ mʋ́ yɔ afʋyɛda Bulu iwiegyi amʋ ɔkan.”

⁶¹ Ɔkʋ ɛ lɛbla mʋ ɔbɛɛ, “Mɩ Wie, nóbuo fʋ, tamɛ ha mɩ anyinki yɛkla mɩ woyitɔ aha asa.”

⁶² Yesu lɛbla mʋ ɔbɛɛ, “Ɔha ánɩ́ ɔtɛsrɩ damli kɩ ɔma mɔfʋn ha Bulu iwiegyi amʋtɔ agyʋma yɔ.”