Luka 8 - Bulu Ntam Pɔpwɛ mʋ́a Israel Ɩlʋ

Atsɩá Bobuo Yesu

^1-2 Ɩmɔwa ɔpá kʋkʋ, Yesu leki awulu mʋ́a nkuda asɩ, ɔdɛ Bulu iwiegyi amʋ ɩwɩ asʋn wanklaan ɔkan da. Mʋ akasɩpʋ duanyɔ amʋ pʋ́ atsɩ akʋá olegya ɔŋɛ lalahɛ lɛ amʋ́tɔ, tsa amʋ́ ɩlɔ bobuo mʋ. Atsɩ amʋ gyi, Magdalayintse Maria ánɩ́ Yesu legya ɔŋɛ lalahɛ asienɔ lɛ mʋtɔ.

³ Owie Herode woyisʋ ɔkɩpʋ Kusa mʋ ka Yohana. Ɔtsɩ ɔkʋá bʋtɛtɩ mʋ Susana pʋ́ atsɩ tsɔtsɔɔtsɔá betsia pʋ amʋ́ atɔ kɩ Yesu mʋa mʋ akasɩpʋsʋ.

Atɔ-abi Owunyapʋ Ɩwɩ Yebi

⁴ Brɛá ɔdɔm kpɔnkpɔɔnkpɔntɩ botsu awulu-awulusʋ ba befia Yesu wa a, ɔlɛha amʋ́ yebi ɔbɛɛ,

⁵ “Ɔdɔtɔpʋ ɔkʋ lɔyɔ atɔ-abi owunyakpa. Brɛá ɔdɛ mʋ́ wunya a, ɩkʋ lɔwʋlɩ ɔkpatɔ, aha bɛtsatsa mʋ́sʋ, mbubwi ɛ bɔtswɛtswɛ mʋ́ fɛ́ɛ́.

⁶ Ɩkʋ lɔwʋlɩ abʋtasʋ, ɔtɩnɛá ɩsɩ kpalobi dɩn. Ɩlɔwa ɔsa kwɛ, tamɛ brɛá owi lɛlɩn a, ɩlɔtɔ mʋ́ mɔ, tsufɛ imenya ntsu.

⁷ Abi amʋ kʋ lɔwʋlɩ awutɔ, awu amʋ lɔbʋla kɩta mʋ́, ɩmɛdan.

⁸ Abi amʋ kʋ lɔwʋlɩ ɔsʋlʋ wanklaansʋ, dan. Iloswie abi tsɔtsɔɔtsɔ fɛ mʋ́ amʋʋ olodu amʋ odu tse lafa.” Yesu lɔmɔ mʋ asʋn ɔnɔ ɔbɛɛ, “Ɔha ánɩ́ ɔbʋ asʋ onu.”

Tɔá Sʋá Yesu Lɔtɔɩ Ayebisʋ

⁹ Yesu akasɩpʋ bɛfɩtɛ mʋ yebi anfɩ asɩ.

¹⁰ Ɔlɛbla amʋ́ ɔbɛɛ, “Bulu laha mlɩ ɔkpa ɔbɛɛ, mlɩbɩ mʋ iwiegyi amʋ ɩwɩ asʋn ŋainhɛ. Tamɛ ndɛ aha bamba asʋn bla ayebisʋ, mɛnɩ bówun, tamɛ bʋmɛ́ɛbɩ. Bónu, tamɛ bʋmóonu mʋ́ asɩ.

Atɔ-abi Owunyapʋ Yebi Amʋ Asɩ

¹¹ “Yebi amʋ asɩ nɩ. Atɔ-abi amʋ gyi Bulu asʋn.

¹² Abi amʋʋ ɩlɔwʋlɩ ɔkpatɔ amʋ gyi aha ánɩ́ bʋtonu asʋn amʋ, tamɛ Ɔbʋnsam tɛba bɛlɛ mʋ́ lɛ amʋ́ klʋntɔ, mɛnɩ bʋmɔ́ɔhɔ mʋ́sʋ gyi, fówun bénya nkpa ánɩ́ ɩtamata.

¹³ Abi amʋʋ ɩlɔwʋlɩ abʋtasʋ amʋ gyi aha amʋʋ bonu asʋn amʋ pɛ, bahɔ mʋ́ ansigyisʋ, tamɛ bʋma nlin. Mʋ́ sʋ bʋtamahogyi wa ɔpá. Nɩ ɩsɔkɩ kʋ inya tʋ amʋ́ pɛ badɩda.

¹⁴ Abi amʋʋ ɩlɔwʋlɩ awutɔ amʋ gyi aha ánɩ́ bonu asʋn amʋ a, bahɔ mʋ́, tamɛ ɔyɩ anfɩtɔ atohianhɛ ɩwɩ gywɩɩn, pʋ́ mʋ́tɔ atonyahɛ ɩwɩ ansigyi tegyi asʋn amʋsʋ. Ɩnɩ sʋ bʋtamaswie abi dan.

¹⁵ Abi amʋʋ ɩlɔwʋlɩ ɔsʋlʋ wanklaansʋ amʋ gyi aha amʋʋ bonu asʋn amʋ a, bʋtɔhɔ mʋ wa ɩklʋn wanklaan ánɩ́ itonu asʋn, gyi mʋ́sʋtɔ. Ɩnɩ sʋ bʋtotomi swie abi tsɔtsɔɔtsɔ.

Ɔkandɩɛ Ɩwɩ Yebi

¹⁶ “Ɔhaa tamanywɛ ɔkandɩɛ pʋ atɔ bun mʋ́sʋ, ntɛ pʋwa mpa ayasɩ. Ɔfʋakpa ɔtɔpʋbian, mɛnɩ ɩbɔ́wankɩ ha aha ánɩ́ bɛ́ba woyi amʋtɔ.

¹⁷ “Tsufɛ tɔtɔ ma ɩnʋá ibéŋain, ɩmɛ́ɛlɩn ɔwan. Asʋn ŋainhɛ kʋkʋ ɛ ma ɩnʋá bʋmɛ́ɛbɩ mʋ́.

¹⁸ “Mlɩkɩ wanklaan mlɩ asʋn-nutɔ. Tsufɛ ɔha ánɩ́ odekleá obónu mɩ atosunahɛ amʋ asɩ a, Bulu ɔbɔ́pʋ ɩkʋ tsɩa mʋ́tɔ ha mʋ. Tamɛ ɔha ánɩ́ omedekleá obónu mʋ́ asɩ a, Bulu ɔbɔ́swɩɩ mʋ kpalobi amʋʋ olosusuá alabɩ amʋ kʋraa.”

Yesu Abusuanfɔ Onuto

¹⁹ Yesu mʋ yin mʋa mʋ apio bɛba mʋ wa, tamɛ ɔdɔm amʋ sʋ bʋmɛtalɩ wie ba mʋ wa.

²⁰ Aha amʋtɔ ɔkʋ lɛbla Yesu ɔbɛɛ, “Fʋ yin mʋa fʋ apio bʋlɩɩ kpankpa, bʋdekleá bówun fʋ.”

²¹ Yesu lɛbla amʋ́ ɔbɛɛ, “Mɩ yin mʋa mɩ apio gyi aha ánɩ́ bʋtonu Bulu asʋn amʋ, gyi mʋ́sʋ.”

Atsufu Asɩba

²² Ɛkɛ ɔkʋ Yesu lɛbla mʋ akasɩpʋ ɔbɛɛ, “Mlɩha afa Galilea ɔpʋ yɔ ɔbɩn.” Mʋ́ sʋ bɔpʋ ɔkpa bɔyɔ.

²³ Brɛá bɔyɔ a, Yesu lɛdɩdɩ. Ɩnʋ afu kpɔnkpɔɔnkpɔntɩ kʋ lɔwa tsʋn bɩ. Ntsu amʋ ɩdɛda wie ɔklʋn amʋtɔ, idekle ɩmɛ. Ɩlɔtʋ amʋ́ ansɩ pɛpɛ.

²⁴ Mʋ́ sʋ betsinki Yesu, bla mʋ bɛɛ, “Anɩ Wie! Anɩdɛ ntsu wie!” Yesu lɔkʋsʋ lɛ ɔnɔ wa afu mʋ́a ntsu amʋ, ɩnʋ fɛ́ɛ́ lɔlʋa.

²⁵ Ɩnʋ ɔlɛfɩtɛ amʋ́ ɔbɛɛ, “Mlɩ hogyi mɛ?” Ifu lɛkɩta amʋ́, ɔnɔ lobwie amʋ́, bɛfɩtɛ aba bɛɛ, “Nyankpʋsa ɔmɔmʋ nɩ, alalɛ ɔnɔ wa afu mʋ́a ntsu kʋraa, banu mʋ ɔmɛ alɩ?”

Ɔŋɛ Lalahɛ Gya Lɛ Ogbedepʋtɔ

²⁶ Yesu mʋa mʋ akasɩpʋ bɛfa ɔpʋ tsu Galilea yowie Gerasefɔ ɔsʋlʋsʋ.

²⁷ Brɛá Yesu dɛdalɩ ɔklʋn amʋtɔ a, oyin ɔkʋá otsu wulu amʋtɔ, ɔŋɛ lalahɛ bʋ mʋtɔ lebefia mʋ. Oyin anfɩ lɛkpa atɔ, tu dalɩ woyitɔ, yɔ otsie afuli opulakpa ɩlawa ɔpá.

²⁸ Brɛá olowun Yesu a, ɔlɔsʋra okitikiti, da akpawunu mʋ ayabitɔ, kplʋn blɩ ɔbɛɛ, “Ɔsʋsʋʋsʋ Bulu mʋ Bi Yesu, amansʋ igyi? Kokoli, mápɩtɩ mɩ atɔ.”

²⁹ Alɩ brɛ amʋtɔ a, Yesu lakplʋn wa ɔŋɛ lalahɛ amʋ ɔbɛɛ, ɩdalɩ mʋtɔ dodo. Mʋ́ sʋ oyin amʋ lɛblɩ alɩ nɩ. Ɔŋɛ lalahɛ amʋ itowie mʋtɔ bregyibrɛ. Mʋ́ sʋ bʋtɔwa mʋ ɩbɩ pʋ́ mʋ ayabi ɩkan, gyo mʋ ɩwɩ. Mʋ́ oo a, otebia ɩkan amʋ, ɔŋɛ lalahɛ amʋ ɩtɛha mʋ ɔtɛsrɩ wie aputu.

³⁰ Ɩnʋ Yesu lɛfɩtɛ mʋ ɔbɛɛ, “Nkalɩ bʋtɛtɩ fʋ?” Oyin amʋ lɛlɛ mʋ́ ɔnɔ ɔbɛɛ, “Mɩ da gyi ‘Ɔdɔm.> ” Tsufɛ ɔŋɛ lalahɛ tsɔtsɔɔtsɔ bʋ mʋtɔ.

³¹ Ɔŋɛ lalahɛ amʋ bokokoli Yesu bɛɛ, ɔmagya amʋ́ yɛwa ɩlan klukluukluá ɩma ɔkatɔ.

³² Mprakuo tsɔtsɔɔtsɔ akʋ bʋdegyi okuku kʋsʋ ɩnʋ fʋn. Mʋ́ sʋ ɔŋɛ lalahɛ amʋ bokokoli Yesu bɛɛ, ɔha abʋyewie mprakuo amʋtɔ. Ɔlɛha amʋ́ ɔkpa ɔbɛɛ bʋyɔ.

³³ Ɩnʋnʋ bɛdalɩ oyin amʋtɔ yowie mprakuo amʋtɔ, amʋ́ fɛ́ɛ́ bɛsrɩ kpakplɩ okuku amʋ wie ɔpʋtɔ, wuwu.

³⁴ Brɛá mprakuo akpapʋ amʋ bowun tɔá ɩlaba a, bɛsrɩ yɛblɩ asʋn anfɩ wulutɔ pʋ́ ɔmá amʋtɔ.

³⁵ Ɩnʋ aha bɛba bɛkɩ tɔá ɩlaba. Bowun ánɩ́ oyin amʋʋ tɛkɩ ɔŋɛ lalahɛ bʋbʋ mʋtɔ amʋ ansɩtɔ ladɩ, alawa atadɩɛ otsie Yesu wa. Ɩlɔwa amʋ́ ifu.

³⁶ Aha amʋʋ bowun ɩtɔ amʋʋ ɩlɛba amʋ bɛbla amʋ́ alɩá oyin amʋʋ ɔŋɛ lalahɛ bʋbʋ mʋtɔ amʋ lenya mʋ ɩlɔtsa.

³⁷ Ɔma amʋtɔ aha fɛ́ɛ́ bokokoli Yesu bɛɛ, ɔdalɩ amʋ́ ɔmátɔ, tsufɛ ifu lɛhɩɛ kɩta amʋ́. Mʋ́ sʋ Yesu lowie ɔklʋn amʋtɔ ɔbɛɛ amʋnatɩ.

³⁸ Oyin amʋʋ tɛkɩ ɔŋɛ lalahɛ tsie mʋtɔ amʋ lokokoli mʋ ɔbɛɛ, “Ha mɩ ambuo fʋ yɔ.” Tamɛ Yesu mɛha mʋ ɔkpa.

³⁹ Mboun ɔlɛbla mʋ ɔbɛɛ, “Yinki yɔ woyi, afʋyɛbla mlɩ pɩ toyileá Bulu labwɛ ha fʋ.” Mʋ́ sʋ oyin amʋ leki wulu amʋ fɛ́ɛ́ fia, ɔdɛ itoyile amʋʋ Yesu labwɛ ha mʋ amʋ blɩ wulu amʋtɔ fɛ́ɛ́.

Ɔhandɛ Ɔkʋ Mʋ Bi Mʋa Ɔtsɩ Ɔkʋ Ɩlɔ Tsa

⁴⁰ Brɛá Yesu leyinki yowie ɔpʋ amʋ ɔbɩn a, ɔdɔm bɔhɔ mʋ atuu, tsufɛ bʋdɛ mʋ ɔkpa kɩ.

⁴¹ Ɩnʋ oyin ɔkʋá bʋtɛtɩ mʋ Yairo, ogyi Yudafɔ ofiakpa ɔhandɛ lɛba bɛda akpawunu mʋ ayabitɔ, kokoli mʋ ɔbɛɛ, ɔba abʋyɔ mʋ woyitɔ.

⁴² Mʋ bi tsɩhɛ ɔkʋlɛ pɛá ɔbʋ, alahɔ nfi duanyɔ da odewu. Brɛá Yesu lɔpʋ ɔyɔ ɩnʋ a, ɔdɔm amʋʋ bʋbuo mʋ amʋ bɛkpa buo mʋ yɛɛ.

⁴³ Ɔtsɩ ɔkʋá obugya dɛ mʋ wʋlɩ nfi duanyɔ nɩ, ɔhaa mɔkʋtalɩ tsa mʋ, alayinta mʋ́ ɩwɩsʋ atɔ fɛ́ɛ́ ɩlɔ atsapʋ ɩbɩtɔ bʋ aha amʋtɔ.

⁴⁴ Ɔtsɩ anfɩ lɔtsʋn yɔ Yesu ɔma, pʋ ɩbɩ da mʋ tati osiebi. Ɩnʋnʋ obugya amʋ lɛka itin.

⁴⁵ Mʋʋ Yesu lɛfɩtɛ ɔbɛɛ “Ma lapʋ ɩbɩ da mɩ?” Brɛá aha amʋ fɛ́ɛ́ bɛɛ bʋmɔkʋpʋ ɩbɩ da mʋ a, Petro lɛfɩtɛ Yesu ɔbɛɛ, “Mɩ Wie, ɔdɔm anfɩ bʋpu fʋ anfɩ a, mʋ́ fʋdɛ asʋn anfɩ fɩtɛ?”

⁴⁶ Tamɛ Yesu lɛblɩ ɔbɛɛ, “Ɔkʋ lapʋ ɩbɩ da mɩ. Nawun ánɩ́ ɔŋɛ kʋ ladalɩ mɩtɔ.”

⁴⁷ Brɛá ɔtsɩ amʋ lowun ánɩ́ ɩtɔ amʋʋ mabwɛ amʋ lalɩn ɔwan a, ɔlɛdalɩ ba. Ɔdɛkpɩnkɩ kpakpakpakpa, ɔlɛyɛda akpawunu Yesu ayabitɔ, bla mʋ aha amʋ fɛ́ɛ́ ansɩtɔ tɔá sʋá mɔpʋ ɩbɩ da mʋ, pʋ alɩá manya ɩlɔtsa.

⁴⁸ Ɩnʋ Yesu lɛbla mʋ ɔbɛɛ, “Mɩ bi, fʋ hogyi latsa fʋ ɩlɔ. Natɩ iwilwiitɔ.”

⁴⁹ Brɛá Yesu bʋ mʋ tɔɩ anfɩsʋ a, ɔkʋ lɛsrɩ tsu Yairo woyitɔ ba bɛbla mʋ ɔbɛɛ, “Fʋ bi amʋ ɔdɩkpa mɔwa alɛ. Mátepi tra wa osunapʋ tɔɩ.”

⁵⁰ Brɛá Yesu lonu asʋn anfɩ a, ɔlɛbla Yairo ɔbɛɛ, “Mánya ifu. Fʋ mʋ́ hogyi wʋlɛ, obénya nkpa.”

⁵¹ Brɛá Yesu lowie-woyitɔ ɩnʋ a, ɔmɛha ɔhaa obuo mʋ yɔ obuá kebi amʋ da mʋ́tɔ, dʋn Petro, Yohane, Yakobo pʋ́ kebi amʋ akwɩɩpʋ.

⁵² Alɩ brɛ amʋtɔ a, aha amʋ fɛ́ɛ́ bʋdesu, bʋdɛ okitikiti. Yesu lɛbla amʋ́ ɔbɛɛ, “Mlɩsi okitikiti sʋra. Ɔmɔkʋwu, dɩdɩ ɔdɛ.”

⁵³ Aha amʋ fɛ́ɛ́ bʋyin ánɩ́ otsibi amʋ lawu. Mʋ́ sʋ bɔmɔsɩ Yesu.

⁵⁴ Ɩnʋ Yesu lɛkɩta otsibi amʋ ɩbɩ, kpoli mʋ ɔbɛɛ, “Obi, kʋsʋ!”

⁵⁵ Ɔŋɛ lɛlawie mʋ, ɔlɔkʋsʋ lɩɩ ɔtsawʋlɛ pɛ. Mʋʋ Yesu lɛbla amʋ́ ɔbɛɛ, “Mlɩdunka tɔkʋ ha mʋ ogyi.”

⁵⁶ Ɔnɔ lobwie otsibi amʋ akwɩɩpʋ, tamɛ Yesu lɛda amʋ́ ɔla ɔbɛɛ, “Mlɩmábla ɔhaa asʋn anfɩ.”