Luka 7 - Bulu Ntam Pɔpwɛ mʋ́a Israel Ɩlʋ

Romafɔ Ɩsa Akɔpʋ Ɔhandɛ Osumpʋ Ɔkʋ Ɩlɔ Tsa

¹ Brɛá Yesu lɛbla aha amʋ asʋn anfɩ fɛ́ɛ́ ta a, ɔlɔyɔ Kapernaum wulutɔ.

² Romafɔ ɩsa akɔpʋ ɔhandɛ ɔkʋ bʋ ɩnʋ. Ɔbʋ osumpʋ ɔkʋá ɔtɛhɩɛ kle mʋ asʋn. Osumpʋ amʋ dɛlɔ, odekle owu.

³ Brɛá ɩsa akɔpʋ ɔhandɛ amʋ lonu Yesu nka a, ɔlɔwa Yudafɔ ahandɛ akʋ sɩsɩ Yesu ɔbɛɛ, bʋyokokoli mʋ ɔbɛ́tsa mʋ osumpʋ amʋ ɩlɔ ha mʋ.

⁴ Ahandɛ amʋ bɛhɩɛ kokoli Yesu bɛɛ, “Abwii ɩpa, nɩ ɔkʋ lehian fʋ mbʋa a, mʋmʋ oyin anfɩ nɩ!

⁵ Tsufɛ ɔtɔdwɛ anɩ pɩ. Mʋleyi anɩ ofiakpa kʋraa ha anɩ nɩ.”

⁶ Mʋ́ sʋ Yesu mʋa amʋ́nyɔ bɔpʋ ɔkpa. Brɛá bɛta woyi amʋtɔ wie ta a, ɩsa akɔpʋ ɔhandɛ amʋ lɔwa mʋ anyawie ɔbɛɛ bʋyefia Yesu, abʋbla mʋ bɛɛ, mbɛɛ, “Owie! Máhan fʋ ɩwɩ, tsufɛ mmɔfʋn ánɩ́ fɛ́ba mɩ woyitɔ.

⁷ Nawun ánɩ́ mɩ ɛ mmɔfʋn ánɩ́ nɛ́ba fʋ wa. Fʋ mʋ́ blɩ asʋankʋ, ɩwɩ bɔ́wa mɩ osumpʋ amʋ ɔnlɩn.

⁸ Tsufɛ mɩ ɛ mbʋ ahandɛ akʋ asɩ. Ɩsa akɔpʋ akʋ ɛ bʋbʋ mɩ asɩ. Nɛlɛ ɔnɔ mbɛɛ amʋ́tɔ ɔkʋ ɔnatɩ a, ɔtɛnatɩ. Nɩ mbɛɛ ɔba ɛ a, ɔtɛba. Togyitɔá nɛbla mɩ osumpʋ mbɛɛ ɔbwɛ a, ɔtɔbwɛ.”

⁹ Brɛá Yesu lonu asʋn anfɩ a, ɔnɔ lobwie mʋ, ɔlɛdamli bla ɔdɔm amʋʋ bʋbuo mʋ amʋ ɔbɛɛ, “Ɔnɔkwalɩ asʋn ndɛ mlɩ bla, mmɔkʋwun ɔha ánɩ́ ɔbʋ hogyi kpɔnkpɔntɩ anfɩ odu Israelfɔtɔ kʋraa kɩ!”

¹⁰ Brɛá abɔpʋ amʋʋ ɩsa akɔpʋ ɔhandɛ amʋ lɔwa amʋ beyinki yɔ woyitɔ a, bowun ánɩ́ osumpʋ amʋ ɩwɩ lawa mʋ ɔnlɩn.

Ɔsʋrapʋ Ɔkʋ Mʋ Bi Tsinki

¹¹ Ɩmɔwa ɔpá kʋkʋ Yesu lɔyɔ Nain wulutɔ. Ɔdɔm bʋbuo mʋa mʋ akasɩpʋ.

¹² Brɛá olowie wulu ɔnɔ a, ɔlɔtʋ akʋ bʋsʋn fuli akpasʋ bɛba. Obi yinhɛ ɔkʋlɛ pɛ ogyi ha ɔsʋrapʋ ɔkʋ. Ɔdɔm kpɔnkpɔɔnkpɔntɩá botsu wulu amʋtɔ ɛ bʋbuo ɔtsɩ amʋ.

¹³ Brɛá anɩ Wie lowun ɔtsɩ amʋ a, mʋ asʋn lɔwa mʋ nwɛ, ɔlɛbla mʋ ɔbɛɛ, “Másu!”

¹⁴ Mʋʋ ɔlɔyɔpʋ ɩbɩ da akpa amʋ, asʋrapʋ amʋ besi lɩɩ. Ɩnʋ ɔlɛbla fuli amʋ ɔbɛɛ, “Ɔyasubi, ndɛ fʋ bla mbɛɛ, kʋsʋ!”

¹⁵ Ɩnʋ fuli amʋ lɔkʋsʋ tsia, wa tɔɩ bɩ. Yesu lɔpʋ mʋ wa mʋ yin ɩbɩtɔ.

¹⁶ Ifu lɛkɩta aha amʋ fɛ́ɛ́, bɛkanfʋ Bulu bɛɛ, “Bulu labɔbʋa mʋ aha! Mʋ ɔnɔsʋ ɔtɔɩpʋ kpɔnkpɔntɩ ɔkʋ lalɩn anɩtɔ!”

¹⁷ Yesu ɩwɩ asʋn anfɩ lɛklɛɩ wa Yudea ɔmá pʋ́ awuluá ɩbʋ nsɩnɛ ɩnʋ fɛ́ɛ́tɔ.

Yesu Mʋa Asu Ɔbɔpʋ Yohane

¹⁸ Asu Ɔbɔpʋ Yohane akasɩpʋ bɛyɛbla mʋ asʋn anfɩ fɛ́ɛ́. Mʋ́ sʋ ɔlɔwa amʋ́tɔ abanyɔ sɩsɩ Yesu ɔbɛɛ,

¹⁹ bʋyɛfɩtɛ mʋ bɛɛ, “Fʋgyi ɔha amʋʋ ɔbɛ́ba amʋ nɩ, ntɛ akɩ ɔha bamba ɔkpa?”

²⁰ Brɛá aha amʋ bɛba bowie Yesu wa a, bɛbla mʋ bɛɛ, “Asu Ɔbɔpʋ Yohane ɔbɛɛ abɛ́fɩtɛ fʋ anɩaa, ‘Fʋgyi ɔha amʋʋ ɔbɛ́ba amʋ nɩ, ntɛ akɩ ɔha bamba ɔkpa?> ”

²¹ Yesu lɛtsa alɔpʋ pʋ́ aha ánɩ́ ɩwɩ dɛ amʋ́ ɔsɩn tsɔtsɔɔtsɔ alɩ brɛ amʋtɔ. Olegya ɔŋɛ lalahɛ lɛ ahatɔ, bwii ansibi abwiepʋ tsɔtsɔɔtsɔ ɛ ansibi.

²² Ɩnʋ ɔlɛlɛ Yohane akasɩpʋ asʋn amʋ ɔnɔ ɔbɛɛ, “Mlɩyinki yɛbla Yohane tɔá mlɩlabowun pʋ́ mʋ́á mlɩlabonu. Mlɩlabowun ánɩ́ ansibi abwiepʋ bʋdɛ atɔ wun, abɔ bʋna. Ɩlɔ pɛpɛ alɔpʋ ɩwɩ dɛplɩ, ɩsʋ atinpʋ bʋdɛ asʋn nu. Afuli bʋdetsinki, ahianfɔ ɛ bʋdɛ asʋn wanklaan amʋ nu.

²³ Bulu obóyula ɔha ánɩ́ mɩ bwɛhɛ mɔkʋsʋ lɩɩ mʋsʋ.”

²⁴ Brɛá abi amʋʋ Yohane lɔwa sumbi amʋ beyinki bɔyɔ a, Yesu lɔwa tɔɩ tsu Yohane ɩwɩ suna ɔdɔm amʋ bɩ. Ɔbɛɛ, “Brɛá mlɩlɛdalɩ yɔ ɔsʋlʋkpansʋ ɩnʋ a, ntɔ ɔkɩkpa mlɩlɔyɔ? Fɩta ánɩ́ afu dɛ mʋ́ tsʋn loo? Ɛkɛkɛɛkɛ!

²⁵ Nɩ megyi mʋ́ a, ntɔ koun ɔkɩkpa mlɩlɔyɔ? Ɔha ánɩ́ ɔdɩdɩ ntsrim. Ɛkɛkɛɛkɛ! Aha ánɩ́ bʋtɛdɩda tati amʋ odu gyi ɔdwɛ a, awie woyi bʋtetsia.

²⁶ Mlɩbla mɩ! Bulu ɔnɔsʋ ɔtɔɩpʋ mlɩlɛdalɩ yɛkɩ? Ee, Yohane nɩ. Ɔdʋn Bulu ɔnɔsʋ ɔtɔɩpʋ.

²⁷ Mʋ ɩwɩ asʋn Bulu lɛblɩ bɔwanlɩn mʋ́ tswɩ bɛɛ, ‘Kɩ, ndɛ obi wa gya fʋ nkpa. Mʋ ɔbɛ́la ɔkpa ha fʋ nɩ.> ”

²⁸ Yesu lɔyɔ mʋ asʋnsʋ ɔbɛɛ, “Ndɛ mlɩ bla mbɛɛ, ɔhagyiɔha ánɩ́ ɔha tsɩhɛ lakɛn kwɩɩ mɔfʋn mʋ, tamɛ mʋ ɛ ɔmɔfʋn Bulu iwiegyi amʋtɔ ɔkʋsʋ kʋraa.”

²⁹ Aha ánɩ́ bonu Yesu asʋn anfɩ pʋ́ lampoo ahɔpʋ kʋraa bowun ánɩ́ Bulu asʋn da ɔkpa. Botsula ha Asu Ɔbɔpʋ Yohane lɔbɔ amʋ́ asu.

³⁰ Tamɛ Farisifɔ pʋ́ Mose mbla asunapʋ amʋ mʋ́ bʋmɛha Yohane ɔbɔ amʋ́ asu. Bekina tɔá Bulu lɛhɩhɩɛ ha amʋ́ bwɛ.

³¹ Yesu lɔyɔ mʋ asʋnsʋ ɔbɛɛ, “Sei anfɩ a, amɛndɩ nɔ́pʋkapʋ ndɛmba-abi anfɩ? Ntɔ bɛlɩan?

³² Bʋgyi fɛ nyebiá bʋtsie dɩnsʋ bʋdɛ aba kpoli blɩ bɛɛ, ‘Anɩlaplei ansigyisʋ, mlɩmɛtsa. Mʋ́ sʋ anɩlawa awɩrɛhɔ ɩlʋ, tamɛ mlɩmosu.>

³³ Mlɩgyi fɛ nyebi anfɩ, tsufɛ Yohane lɛba a, oletsia klɩ ɔnɔ, omonun nta, tamɛ mlɩaa, ‘Ɔŋɛ lalahɛ bʋ mʋtɔ!>

³⁴ Mɩ, Nyankpʋsa-Mʋ-Bi anfɩ mʋ́ naba ndɛ atɔ gyi, ndɛ nta nun. Mʋ́ ɛ mlɩaa, ‘Mlɩkɩ opotsuapʋ pʋ́ nta ɔbʋpʋ. Lakpan abwɛpʋ pʋ́ lampoo ahɔpʋ onyawie.>

³⁵ Tamɛ ɔha ánɩ́ ɔbʋ Bulu nyansa a, mʋ tsiatɔ tɛlɛ mʋ́ ɔwan.”

Ɔtsɩ Lakpan Ɔbwɛpʋ Ɔkʋ

³⁶ Farisiyin ɔkʋ lɛtɩ Yesu atɔ ogyikpa mʋ woyitɔ. Brɛá Yesu tsie ɔpʋnʋ amʋ asɩ a,

³⁷ ɔtsɩ ɔkʋá ɔbʋ wulu amʋtɔ, ogyi lakpan ɔbwɛpʋ lonu Yesu nka ánɩ́ batswɩ ɔpʋnʋ ha mʋ Farisiyin amʋ woyitɔ. Ɩnʋ olotsu mʋ ofobi fanfan ánɩ́ ɩbʋ bia prɛntʋa wanklaan ɔbɔ ba ɩnʋ.

³⁸ Ɔlɛbɛda akpawunu Yesu ayabiasɩ, ɔlɛkpa isu yi woo. Ɔlɔpʋ mʋ ntsú fwɩ Yesu ayabiasɩ, pʋ mʋ nwunsʋ-imi tsitsi mʋ́. Ɔlɔkʋla Yesu ayabi puta, tsɛɩ ofobi fanfan amʋ wʋlɩ mʋ ayabisʋ.

³⁹ Brɛá Farisiyin amʋʋ ɔlɛtɩ Yesu amʋ lowun ɩnɩ a, ɔlɛblɩ wa nwuntɔ ɔbɛɛ, “Nɩ Bulu ɔnɔsʋ ɔtɔɩpʋ oyin anfɩ gyi lɛlɛ a, tɛkɩ alawun ɔha oduá ɔtsɩ anfɩ gyi asa ɔdɛpʋ ɩbɩ da mʋ, tsufɛ lakpan ɔbwɛpʋ ogyi.”

⁴⁰ Yesu lɛbla oyin amʋ ɔbɛɛ, “Simon, mbʋ asʋankʋ bla fʋ.” Simon lɛfɩtɛ mʋ ɔbɛɛ, “Osunapʋ, amansʋ igyi? Bla mɩ.”

⁴¹ Yesu lɛbla mʋ ɔbɛɛ, “Aha abanyɔ akʋ bɛpan sika oyin ɔkʋ wa. Ɔkʋlɛ lɛpan blɩba-anu (5,000,000), ɔkʋlɛ ɛ lɛpan mpɩm lafanu (500,000).

⁴² Bʋmenya kɔba amʋ ka. Mʋ́ sʋ oyin amʋ lesikie amʋ́ abanyɔ fɛ́ɛ́. Bla mɩ, amʋ́tɔ ɔmɔmʋ ɔbɔ́dwɛ oyin amʋ dʋn?”

⁴³ Simon lɛbla mʋ ɔbɛɛ, “Nahogyiá ɔmʋamʋʋ mʋ ɩkɔ tsɔ dʋn amʋ.” Yesu lɛbla mʋ ɔbɛɛ, “Ɔnɔkwalɩ igyi.”

⁴⁴ Ɩnʋ Yesu leyinki kɩ ɔtsɩ amʋ, ɔlɛbla Simon ɔbɛɛ, “Fawun ɔtsɩ anfɩ? Nɛba fʋ woyitɔ a, fʋmɛha mɩ ntsu anfwɩ ayabiasɩ. Tamɛ ɔtsɩ anfɩ mʋ́ lapʋ mʋ ntsú fwɩ mɩ ayabiasɩ, pʋ mʋ nwunsʋ-imi tsitsi mʋ́.

⁴⁵ Fʋmɛlata mɩ puta, tamɛ tsu brɛá nɛba nfɩ ɔpá a, ɔtsɩ anfɩ mɔkʋsi mɩ ayabi kʋla puta.

⁴⁶ Fʋmɛtsɛɩ ofobi wʋlɩ mɩ nwuntɔ, tamɛ mʋ mʋ́ alatsɛɩ ofobi fanfan wʋlɩ mɩ ayabisʋ.

⁴⁷ Mʋ́ sʋ ndɛ fʋ bla mbɛɛ, ɔdwɛ tsɔtsɔɔtsɔ anfɩ alalɛ suna mɩ anfɩ idesuna ánɩ́ Bulu lasi mʋ lakpan tsɔtsɔɔtsɔ amʋ fɛ́ɛ́ kie mʋ. Tamɛ ɔha ánɩ́ Bulu osi lakpan kpalobi kie mʋ a, ɔdwɛ kpalobi ɔtɛlɛ suna.”

⁴⁸ Ɩnʋ Yesu lɛbla ɔtsɩ amʋ ɔbɛɛ, “Nasi fʋ lakpan fɛ́ɛ́ kie fʋ.”

⁴⁹ Aha amʋʋ amʋ́a Yesu bʋtsie ɔpʋnʋasɩ amʋ bɛblɩ wa nwuntɔ bɛɛ, “Ma gyi oyin anfɩ ɔbɛɛ, mʋna mʋdɛ aha lakpan sikie amʋ́.”

⁵⁰ Mʋʋ Yesu lɛbla ɔtsɩ amʋ ɔbɛɛ, “Fʋ hogyi lahɔ fʋ nkpa. Natɩ iwilwiitɔ.”