Luka 23 - Bulu Ntam Pɔpwɛ mʋ́a Israel Ɩlʋ

Yesu Kpa Ya Pilato

¹ Ɩnʋ aha amʋʋ befia ɩnʋ amʋ bɔkʋsʋ kpa Yesu ya ɔmásʋ ogyipʋ Pilato.

² Bɛka asʋn dɩnka mʋsʋ bɛɛ, “Anɩlawun ánɩ́ oyin anfɩ dɛ ɔmá anfɩtɔ aha yinta. Ɔdɛ amʋ́ bla ɔbɛɛ, bʋmátra ka lampoo ha Roma owie dɛhɛn. Ɔdɛblɩ ɛ ɔbɛɛ, mʋgyi Kristo (ɔha ánɩ́ Bulu lada mʋ ofuli amʋ). Idesuna ánɩ́ owie ogyi.”

³ Pilato lɛfɩtɛ Yesu ɔbɛɛ, “Fʋgyi Yudafɔ owie amʋ nɩ?” Yesu lɛlɛ mʋ́ ɔnɔ ɔbɛɛ, “Ee, mʋ́ fablɩ a.”

⁴ Pilato lɛbla Bulu igyi ahapʋ dɛhɛn pʋ́ ɔdɔm amʋ ɔbɛɛ, “Mmɔkʋwun tsitsa kʋkʋá oyin anfɩ labwɛ.”

⁵ Tamɛ amʋ́ mʋ́ bʋdɛ mʋ́tɔ kotoo bɛɛ, “Ɔdɛpʋ mʋ atosunahɛ tɩ ɩtrɛ mʋ́a ɩkɔ wa Yudea ɔmá anfɩtɔ. Olefi mʋ́ asɩ tsu Galilea, alapʋ bowie nfɩ.”

Yesu Herode Ansɩtɔ Lɩɩ

⁶ Brɛá Pilato lonu asʋn anfɩ a, ɔlɛfɩtɛ ɔbɛɛ, “Galileayin oyin anfɩ gyi?”

⁷ Brɛá ɔlɛbɩá Yesu otsu Galilea, ɔtɩnɛá owie Herode dɛ iwie gyi a, ɔlɛha bɛkpa mʋ ya Herode. Alɩ brɛ amʋtɔ a, Herode bʋ Yerusalem wulutɔ ɩnʋ.

⁸ Brɛá owie Herode lowun Yesu a, ansɩ lɛhɩɛ gyi mʋ. Tsufɛ olodunka ánɩ́ obówun mʋ dodoodo, mʋ ɩwɩ asʋn ánɩ́ alanu sʋ. Odekleá Yesu ɔbwɛ osuna ɩkʋ suna mʋ.

⁹ Mʋ́ sʋ ɔlɛfɩtɛ Yesu asʋn tsɔtsɔɔtsɔ, tamɛ Yesu mɛlɛ kʋkʋ ɔnɔ.

¹⁰ Bulu igyi ahapʋ dɛhɛn amʋ pʋ́ Mose mbla asunapʋ amʋ bʋlɩɩ ɩnʋ, bʋdɛkplʋn ka asʋn dɩnka mʋsʋ.

¹¹ Owie Herode mʋa mʋ ɩsa akɔpʋ amʋ ɛ bɔsʋpa mʋ, bwɛ mʋ ahinla. Bɔpʋ srɩkɩ liga kʋ wa mʋ, beyinkia mʋ ya Pilato.

¹² Owie Herode mʋa Pilato bemli anyawie tsu ɛkɛ amʋ. Tɛkɩ amʋ́ nsɩnɛ ɩma alɛ yaɩ.

Yesu Lowu Ɩpɔn Ha

¹³ Pilato lɛtɩ Bulu igyi ahapʋ dɛhɛn, Yudafɔ ahandɛ pʋ́ ɔmá amʋ fɛ́ɛ́ befia.

¹⁴ Mʋʋ ɔlɛbla amʋ́ ɔbɛɛ, “Mlɩlɛkpa oyin anfɩ ba mɩ mlɩaa, ɔdɛ ɔmá amʋ agywɩɩn yinta. Nafɩtɛ mʋ ɔnɔtɔ asʋn mlɩ ansɩtɔ, nawun ánɩ́ asʋn amʋʋ mlɩlɛka dɩnka mʋsʋ amʋ ɩma mʋ́tɔ.

¹⁵ Owie Herode ɛ lawun mʋ́ alɩ. Mʋ́ sʋ alayinkia mʋ sɩsɩ anɩ nɩ. Oyin anfɩ mɔkʋbwɛ tɔtɔá bɔ́mɔ mʋ.

¹⁶ Ɩnɩ sʋ nɛ́ha bɛ́pɩtɩ mʋ atɔ, ansi mʋ ɔnatɩ.”

^17-18 Ɩnʋ ɔdɔm amʋ fɛ́ɛ́ bɔkplʋn blɩ bɛɛ, “Lɛ mʋ ɩnʋ, afʋsi Baraba ha anɩ!”

¹⁹ (Baraba anfɩ da obu, tsufɛ ɔlɔkʋsʋ lɩɩ wulu amʋsʋ, ɔlɔmɔ ɔha ɛ mʋ́tɔ.)

²⁰ Pilato lekleá obési Yesu. Mʋ́ sʋ ɔlɛtra tɔɩ kpla ɔdɔm amʋ.

²¹ Tamɛ bɔkplʋn kʋklʋkʋʋ bla mʋ bɛɛ, “Da mʋ manta oyikpalihɛsʋ! Da mʋ manta oyikpalihɛsʋ!”

²² Pilato lɛbla amʋ́ otse sasɩ ɔbɛɛ, “Tsitsa mɔmʋ alabwɛ? Mmɔkʋwun tɔá alabwɛ, sʋ nɛ́ha bɔ́mɔ mʋ. Nɛ́ha abʋpɩtɩ mʋ atɔ, ɔnatɩ.”

²³ Tamɛ bʋbʋ mʋ́sʋ bʋdɛkplʋn kʋklʋkʋʋ bɛɛ, ɔha abʋda mʋ manta oyikpalihɛsʋ. Ɩnʋ bɔdʋn mʋ ɔnɔlɩ.

²⁴ Mʋ́ sʋ Pilato lɔbwɛ dɩnka tɔ amʋʋ bʋdedunka amʋsʋ.

²⁵ Olesi oyin amʋʋ ɔlɔkʋsʋ lɩɩ ɔmá amʋsʋ, mɔ ɔha mʋ́tɔ sʋ ɔda obu amʋ, olesi Yesu ha mʋ ɩsa akɔpʋ ɔbɛɛ, bʋbwɛ mʋ alɩá aha amʋ bʋdekle.

Yesu Da Manta Oyikpalihɛsʋ

²⁶ Brɛá bɛkpa Yesu bɔyɔ a, befia Kireneyin ɔkʋá bʋtɛtɩ mʋ Simon. Otsu abu asɩ. Ɩsa akɔpʋ amʋ bɛka mʋ hɩɛ bɛɛ, ɔsʋra oyikpalihɛ amʋ buo Yesu.

²⁷ Ɔdɔm bobuo Yesu. Atsɩá bʋbʋ amʋ́tɔ bʋpu amʋ́ anyɔpʋ, bʋhɩɛ bʋdesu ha Yesu.

²⁸ Yesu lɛdamli, ɔlɛbla amʋ́ ɔbɛɛ, “Yerusalemfɔ atsɩ, mlɩmásu mɩ. Mlɩsu mlɩ ɩwɩ pʋ́ mlɩ abi.

²⁹ Tsufɛ nkɛ kʋ ɩba, mlɛ́blɩ mlɩaa, ‘Bulu layula atsɩá bʋmɔkʋkwɩɩ kɩ, obi mɔkʋdɩ amʋ́ opunitɔ kɩ, obi mɔkʋnyɔpʋ amʋ́ ɛ kɩ.>

³⁰ Alɩ brɛ amʋtɔ a, aha bɛ́bla abʋ bɛɛ, ‘Mlɩbwie bun anɩsʋ. Nkuku, mlɩpula anɩ.>

³¹ Tsufɛ nɩ bʋdɛ oyi bɔbwɛ ogya wa alɩ a, nkalɩ bɔ́bwɛ oyi wʋlɩhɛ?”

³² Ɩsa akɔpʋ amʋ bɛkpa lalahɛ abwɛpʋ abanyɔ ɛ manta Yesusʋ, bɔyɔmɔ amʋ́.

³³ Brɛá bowie ɔtɩnɛkʋá bʋtɛtɩ ɩnʋ “Nwun Okokobi” a, bɛda Yesu manta oyikpalihɛsʋ. Bɛda amʋ́ abanyɔ amʋ ɛ manta nyikpalihɛsʋ. Ɔkʋlɛ bʋ Yesu gyɔpɩsʋ, ɔkʋlɛ ɛ bʋ mʋ bɩnasʋ.

³⁴ Ɩnʋ Yesu lɛblɩ ɔbɛɛ, “Mɩ Sɩ, sikie amʋ́, tsufɛ bʋmeyin tɔá bʋdɛbwɛ.” Ɩsa akɔpʋ amʋ bɔtswɩ abi ye Yesu atadɩɛtɔ.

³⁵ Aha tsɔtsɔɔtsɔ amʋʋ bobuo amʋ́ yɔ ɩnʋ amʋ besi bʋlɩɩ ɩnʋ bʋdɛ mʋ kɩ. Yudafɔ ahandɛ amʋ bɔbwɛ mʋ ahinla bɛɛ, “Ɔlɔhɔ aha nkpa. Nɩ lɛlɛ mʋgyi Kristo (ɔha amʋʋ Bulu lada mʋ ofuli), mʋ Bulu lalɛ nɩ a, ɔhɔ mʋ ɩwɩ nkpa!”

^36-37 Ɩsa akɔpʋ amʋ ɛ bɔpʋ nta ɔdaɩ tin mʋ ɔnɔ, bwɛ mʋ ahinla bɛɛ, “Nɩ fʋgyi Yudafɔ owie amʋ nɩ a, lɛ fʋ ɩwɩ!”

³⁸ Bɔwanlɩn atɔ manta oyikpalihɛ amʋ awunsʋ bɛɛ, “Yudafɔ Owie amʋ nɩ.”

³⁹ Lalahɛ abwɛpʋ amʋʋ bɛda manta oyikpalihɛsʋ amʋtɔ ɔkʋlɛ lɛblɩ Yesu ɩwɩ abususʋ ɔbɛɛ, “Megyi fʋgyi Kristo amʋ nɩ? Lɛ fʋ ɩwɩ, afʋlɛ anɩ mɛɛ!”

⁴⁰ Tamɛ onyɔsɩ amʋ lɔwa ɩyɩn wa mʋ ɔbɛɛ, “Fʋmɛdɛ Bulu ifu nya? Fʋa mʋnyɔ fɛ́ɛ́ dɛ ɩsʋbɩtɩ kʋlɛ hɔ.

⁴¹ Anɩ mʋ́ a, anɩ ɩsʋbɩtɩ ɩda ɔkpa, lakpan ánɩ́ anɩlɔbwɛ sʋ. Tamɛ oyin anfɩ mʋ́ mɔkʋbwɛ lalahɛ kʋkʋ.”

⁴² Mʋʋ ɔlɛbla Yesu ɔbɛɛ, “Yesu, nɩ fɛba fʋ iwie ogyikpa a, kaɩn mɩsʋ!”

⁴³ Yesu lɛbla mʋ ɔbɛɛ, “Ɔnɔkwalɩ ndɛ fʋ bla. Ndɛ, mɩa fʋnyɔ abétsia Paradiso.”

Yesu Lowu

^44-45 Alɩ brɛ anfɩ ɩbɔ́bwɛ fɛ ɔpa doduanyɔ. Owi lɛta ɔsʋlʋ amʋsʋ fɛ́ɛ́ alɩɩ yɔfʋn ntʋpwɛ dɔsatɔ. Owi mɛtra lɩn ɛ. Ɩnʋ a, tati amʋʋ bɔpʋka Bulu Ɔtswɛkpa obu amʋtɔ amʋ ɩlɛbalɩ anyɔ.

⁴⁶ Yesu lɔkplʋn kʋklʋkʋʋ blɩ ɔbɛɛ, “Mɩ Sɩ, napʋ mɩ ɔŋɛ wa fʋ ɩbɩtɔ.” Olenya blɩ alɩ ta pɛ, ɔlɛlɛ ɔŋɛ.

⁴⁷ Brɛá ɩsa akɔpʋ ɔhandɛ amʋ lowun tɔá ɩlaba a, ɔlɛkanfʋ Bulu ɔbɛɛ, “Lɛlɛ, ɔha yile oyin anfɩ gyi.”

⁴⁸ Aha amʋʋ bʋlɩɩ ɩnʋ amʋ fɛ́ɛ́ bowun tɔá ɩlaba, bɔpʋ awɩrɛhɔ natɩ bɔyɔ woyi.

⁴⁹ Tamɛ amʋ́á bʋyin Yesu pʋ́ atsɩ amʋʋ bobuo mʋ tsu Galilea ɔmátɔ amʋ besi bʋlɩɩ tsutsuutsu, bʋdɛ ɩtɔá ɩdɛ mʋ́sʋ yɔ kɩ.

Yesu Pula

^50-51 Oyin ɔkʋ letsia, bʋtɛtɩ mʋ Yosef. Otsu Yuda wulu kʋá bʋtɛtɩ mʋ́ Arimateatɔ. Ɔha yile ogyi, obú ɛ bʋ mʋsʋ. Ɩbʋ mʋ́tɔá ɔbʋ ɔmá amʋtɔ asʋn agyipʋtɔ, tamɛ omotsula dɩnka amʋ́ agywɩɩn pʋ́ amʋ́ bwɛhɛ anfɩsʋ. Otsie ogyo Bulu iwiegyi amʋ.

⁵² Oyin anfɩ lɔyɔ Pilato wa, yɔkʋlɩ mʋ ɔkpa ɔbɛɛ, osi Yesu fuli amʋ ha mʋ. Pilato lɛha mʋ ɔkpa.

⁵³ Ɩnʋ Yosef lɛyɛsɩɛɩ Yesu fuli, ɔlɔpʋ ɔhrada kɩklɩ mʋ ɩwɩ, pʋ mʋ yɛwa ɔbɔ kʋá mʋ onuto ɔlɛha bɛda bʋtatɔ ha mʋ ɩwɩ, bʋmɔkʋpula ɔhaa mʋ́tɔ kɩ.

⁵⁴ Ɛkɛ amʋ igyi Fieda. Ɛkɛ amʋ igyi ogya ɔdʋdakɛ. Owi inya ta pɛ, ɔkpʋnʋ ɔdakɛ amʋ ɩlafi asɩ.

⁵⁵ Atsɩ amʋʋ bʋbuo mʋ tsu Galilea amʋ bobuo Yosef yɛkɩ Yesu opulakpa pʋ́ alɩá ɔlɔpʋ fuli amʋ tswɩ ɔbɔ amʋtɔ.

⁵⁶ Beyinki yɔ woyi yɔkwɛ ohuam, ɔhɩɛn pʋ́ ofobi fanfan ánɩ́ bɔ́pʋ yɛkpa Yesu. Botsutsua abʋbwɛ ta a, owi lata, bɛda ɔkpʋnʋ ɔkpʋnʋ ɔdakɛ amʋ fɛ alɩá Mose Mbla lɛblɩ.