Luka 21 - Bulu Ntam Pɔpwɛ mʋ́a Israel Ɩlʋ

Ɔsʋrapʋ Ɔkʋ Tswɩtswɩ

¹ Brɛá Yesu tsie manta tswɩtswɩ daka amʋ Bulu ɔtswɛkpa ɩnʋ a, olowun alɩá aha ánɩ́ amʋ́ ɩbɩtɔ bʋ odwin bʋdɛpʋ kɔba akpɔnkpɔntɩ bɔwa daka amʋtɔ.

² Ɩnʋ ɔsʋrapʋ ohiani ɔkʋ ɛ lɔpʋ mʋ kɔba ana bɔwa mʋ́tɔ.

³ Mʋʋ Yesu lɛblɩ ɔbɛɛ, “Ɔnɔkwalɩ ndɛ mlɩ bla, tswɩtswɩá ɔsʋrapʋ anfɩ ɔma tɔtɔ anfɩ lawa a, ɩdʋn ɔhagyiɔha klɛ.

⁴ Tsufɛ atrahɛ amʋ fɛ́ɛ́ a, amʋ́ kɔba tsɔtsɔɔtsɔtɔ balɛ kpalobi tsu bɔwa. Tamɛ ɔsʋrapʋ anfɩ mʋ́, ɩnɩá ɔma tɔtɔ sʋ tɔá ɔbʋ fɛ́ɛ́ alapʋ bɔwa a.”

Bulu Ɔtswɛkpa Amʋ Bwie

⁵ Yesu akasɩpʋ akʋ bʋdɛtɔɩ tsu alɩá bɔpʋ abwiá ɩbʋ bia yi Bulu ɔtswɛkpa amʋ, pʋ atokiehɛ wanklaan la mʋ́tɔ. Tamɛ Yesu lɛbla amʋ́ ɔbɛɛ,

⁶ “Brɛ kʋ ɩba, bóbwie mʋ́ fɛ́ɛ́ bun. Ibwi kʋlɛ kʋraa méesian dɩnka mʋ́ basʋ.”

Ɩwɩɔsɩn Mʋ́a Ɩkplan

⁷ Mʋʋ mʋ akasɩpʋ amʋ bɛfɩtɛ mʋ bɛɛ, “Osunapʋ, brɛ mɔmʋtɔ ɩnɩ fɛ́ɛ́ ɩbɛ́ba? Osuna mɔmʋ abɔ́pʋbɩá brɛ amʋ ɩlafʋn?”

⁸ Ɩnʋ Yesu lɛbla amʋ́ ɔbɛɛ, “Mlɩkɩ wanklaan, mɛnɩ ɔhaa mɛ́ɛmlɛ mlɩ. Tsufɛ aha tsɔtsɔɔtsɔ bɔ́pʋ mɩ ɩda ba bɛɛ, amʋ́gyi Kristo amʋ nɩ. Mʋ́ brɛ lafʋn ta, tamɛ mlɩmábuo amʋ́.

⁹ Nɩ mlonuá ɩsa mʋ́a kpokiti lada a, opuni mátsii mlɩ. Tsufɛ ilehian ánɩ́ ɩnɩ aná bégyankpa ba, tamɛ ɔyɩ ɔnɔmɔkɛ ɩmɛ́ɛba ɩnʋnʋ.”

¹⁰ Ɩnʋ ɔlɛbla amʋ́ ɔbɛɛ, “Ɔmá bɔ́kɔ aba. Awie bɔ́kʋsʋ lɩɩ abasʋ.

¹¹ Ɔsʋlʋ bɛ́kpɩnkɩ ntɩnɛ-ntɩnɛ. Akʋn mʋ́a ɩlɔ tsankɩhɛ ɛ bɛ́ba ntɩnɛ-ntɩnɛ. Ntobiá ɩhɩɛ bʋ ifu pʋ́ osuna akpɔnkpɔntɩ bɛ́ba tsu ɔsʋsʋ.

¹² Tamɛ asa mʋ́ fɛ́ɛ́ bɛ́ba a, bɛ́kɩta mlɩ. Bɛ́hɩɛ dɩnka mlɩsʋ, pʋ mlɩ ya Yudafɔ ofiakpa yegyi mlɩ asʋn, wa mlɩ obu. Mɩ sʋ bɛ́kpa mlɩ ya awie pʋ́ ɔmásʋ agyipʋ ansɩtɔ.

¹³ Ɩnɩ ɔbɛ́ha mlɩ ɔkpa mlɛ́talɩ gyi mɩ ɩwɩ adansɩɛ suna amʋ́ nɩ.

¹⁴ Tamɛ mlɩmáhan mlɩ ɩwɩ susu alɩá mlɛ́lɛ ɩwɩ ɔnɔ.

¹⁵ Tsufɛ nɛ́ha mlɩ nyansa mʋ́a ɔnɔwankɩ. Mlɩ anyaba amʋtɔ ɔkʋkʋ mɛ́ɛtalɩ gyi mlɩ nwɛn.

¹⁶ Mlɩ akwɩɩpʋ, mlɩ apio, mlɩ woyitɔ aha pʋ́ mlɩ anyawie kʋraa bɛ́lɛ mlɩ ha, bɔ́mɔ mlɩtɔ akʋ.

¹⁷ Mɩ sʋ aha fɛ́ɛ́ bólu mlɩ.

¹⁸ Tamɛ mlɩ nwunsʋ-imi kʋlɛ kʋraa mɔ́ɔfwɩ.

¹⁹ Nɩ mlɛ́talɩ lɩɩ kinkin a, mlénya nkpa ánɩ́ ɩtamata.

Yerusalem Bwie Ɩwɩ Asʋn Blɩ

²⁰ “Nɩ mlowun ánɩ́ ɩsa akɔpʋ bakafia Yerusalem wulu a, mlɩbɩá wulu amʋ ɩba obwiekpa.

²¹ Mʋmʋ aha ánɩ́ bʋbʋ Yudea ɔmátɔ bʋsrɩ yɔ abʋsʋ. Aha ánɩ́ bʋbʋ Yerusalem wulutɔ bʋdalɩ. Amʋ́á bʋma wulu amʋtɔ ɛ bʋmáyinki ba.

²² Tsufɛ alɩ nkɛ amʋ ɩbɔ́bwɛ Israelfɔ ɩsʋbɩtɩ nkɛ, fɛ alɩá Bulu ɔnɔsʋ atɔɩpʋ amʋ bɔwanlɩn tswɩ.

²³ Amenyapʋ pʋ́ abi-ayín ánɩ́ bʋpia abi bɔbwɛ alɩ brɛ amʋtɔ, bʋgyɔwɩ nɩ. Tsufɛ asʋn wunhɛ amʋ ɔnɔ bɔ́wa ɔnlɩn. Ɩkplan kpɔnkpɔntɩ bɛ́ba ɔsʋlʋsʋ. Ɩsʋbɩtɩ kpɔnkpɔntɩ ɛ ɩbɛ́ba mʋ́sʋ atsiapʋsʋ.

²⁴ Amʋ́tɔ akʋ bésin ɔdayi ɔnɔ. Bɛ́kɩta amʋ́ akʋ ɛ ndoun ya ɔmá-ɔmátɔ. Yerusalem wulu ibétsia ɔmá bambasʋfɔ asɩ, alɩɩ yɔfʋn brɛá amʋ́ ɔmá amʋ asɩtsiabɩ lamɔ ɔnɔ.

Nyankpʋsa-Mʋ-Bi Amʋ Ɩbabɩ

²⁵ “Bówun osuna owi, ɔtsra pʋ́ ntsrakpabisʋ. Ɔpʋ bɛ́da ifusʋ. Ɔsʋlʋsʋ atsiapʋ bénya ifu, bʋmɛ́ɛbɩ tɔá bʋbwɛ.

²⁶ Nwʋlʋta mʋ́a mʋ́tɔ atɔ fɛ́ɛ́ bɛ́kpɩnkɩ. Mʋ́ sʋ aha bénya ifu, tɩn ɩŋɛ tɔá ɩdɛba sʋ.

²⁷ Alɩ brɛ amʋtɔ a, ɔhagyiɔha obówun ánɩ́ mɩ, Nyankpʋsa-Mʋ-Bi anfɩ napʋ tumi mʋ́a numnyam kpɔnkpɔntɩ mbʋ nwʋlʋtatɔ tsu ɔsʋsʋ nɛba.

²⁸ Nɩ ntobi anfɩ ɩdɛ mʋ́sʋ yɔ a, mlɩkʋsʋ lɩɩ, amlɩtsu ansɩ fʋa kɩ; tsufɛ mlɩ nkpahɔbɩ lafʋn.”

Ɔyɩ Ɔnɔmɔ Ɩwɩ Osuna

²⁹ Yesu lɛha amʋ́ yebi ɔbɛɛ, “Mlɩpʋkɩ pɔntɔ mʋ́a nyi atrahɛ.

³⁰ Nɩ ɩdɛ atɛ pɔpwɛ lɛ a, mlɩtowun mʋ́, bɩá awikpan brɛ lafʋn ta.

³¹ Alɩ kɛn, nɩ mlowun ánɩ́ ntobi anfɩ fɛ́ɛ́ ɩdɛ mʋ́tɔ ba a, mlɩbɩá Bulu iwiegyi amʋ ɩlawie woyi ta.

³² “Ɔnɔkwalɩ ndɛ mlɩ bla. Ndɛmba-abi anfɩ fɛ́ɛ́ bʋmóowu ta, asa ɩnɩ fɛ́ɛ́ bɛ́ba mʋ́tɔ.

³³ Ɔsʋ mʋ́a asɩ fɛ́ɛ́ bɔ́tsʋn, tamɛ mɩ asʋn blɩhɛ mɔ́ɔtsʋn ɛkɛkɛɛkɛ.

Ɩwɩsʋda

³⁴ “Mlɩkɩ wanklaan, mɛnɩ opotsuawa, ntabʋ pʋ́ ɔyɩtɔ atɔ ɔmagya méegyi mlɩ agywɩɩnsʋ. Mɛnɩ mɩ, Nyankpʋsa-Mʋ-Bi anfɩ ɔbakɛ amʋ mɛ́ɛbɛkɩta mlɩ fɛ yibi.

³⁵ Tsufɛ ɩbɛ́ba ɔyɩtɔ aha fɛ́ɛ́sʋ.

³⁶ Ɩnɩ sʋ mlɩgyo, amlɩbɔ mpaɩ, mɛnɩ mlénya ɔwʋnlɩn talɩ tsʋn ofula amʋ fɛ́ɛ́tɔ bɛlɩɩ mɩ, Nyankpʋsa-Mʋ-Bi anfɩ ansɩtɔ.”

³⁷ Nkɛ amʋtɔ a, Yesu letsia yesuna atɔ Bulu ɔtswɛkpa ɩnʋ ɔpa. Onye a, alanatɩ yɔ Olif ɩbʋ amʋsʋ.

³⁸ Aha tsɔtsɔɔtsɔ bʋtɔkʋsʋ ba Ɔtswɛkpa ɩnʋ bakɛ, bonu mʋ asʋn blɩhɛ.