Luka 2 - Bulu Ntam Pɔpwɛ mʋ́a Israel Ɩlʋ

Yesu Kristo Kwɩɩ

¹ Alɩ brɛ amʋtɔ a, Roma owie dɛhɛn Augusto lɔwa mbla ɔbɛɛ, bʋkla aha ánɩ́ bʋbʋ Romafɔ asɩ fɛ́ɛ́, abʋwanlɩn amʋ́ ada.

² Mʋ́gyi ahakla gyankpapʋ nɩ. Alɩ brɛ amʋtɔ a, oyin ɔkʋá bʋtɛtɩ mʋ Kirenio dɛ Siria ɔmásʋ gyi.

³ Ɩnɩ sʋ ɔhagyiɔha lɔyɔ ɩda ɔwanlɩnkpa mʋ onuto wulutɔ.

⁴ Yosef ɛ lɔkʋsʋ tsu Nasaret wuluá ɩbʋ Galilea ɔmátɔ dʋ yɔ Yudea ɔmátɔ, Owie Dawid wulutɔ Betlehem. Tsufɛ Owie Dawid mʋ na ogyi.

⁵ Mʋa Maria amʋʋ bapʋha mʋ bɛɛ otsia, ɔna odwinsʋ amʋ nyɔ lɔyɔ ɩda amʋ ɔwanlɩnkpa.

⁶ Brɛá bʋbʋ Betlehem ɩnʋ a, ɩkwɩɩ lɛkan Maria,

⁷ ɔlɔkwɩɩ mʋ bitɩ, ogyi oyin. Ɔlɛkɩklɩ mʋ wa tatidatɔ, pʋ mʋ tswɩ mbwɩ atogyihɛ dakatɔ, tsufɛ bʋmenya otsiakpa afɔɔ ɔswɩɩkpa.

Akufa Akpapʋ Pʋ́ Bulu-abɔpʋ

⁸ Alɩ brɛ amʋtɔ a, akufa akpapʋ akʋ bʋbʋ ɩnʋ fʋn dimbitɔ, bʋdɛ amʋ́ akufa ɩwɩ gyo onye.

⁹ Bulu-ɔbɔpʋ lɛlɛ ɩwɩ ɔwan suna amʋ́, Bulu numnyam lɔwankɩ wʋlɩ amʋ́sʋ. Mʋ́ sʋ ifu lɛhɩɛ kɩta amʋ́.

¹⁰ Ɩnʋ a, Bulu-ɔbɔpʋ amʋ lɛbla amʋ́ ɔbɛɛ, “Mlɩmánya ifu! Mlɩkɩ, napʋ asʋn wanklaan ánɩ́ ɩbɔ́wa mlɩa ɔyɩtɔ aha fɛ́ɛ́ ansigyi ba mlɩ.

¹¹ Ndɛ bakwɩɩ nkpa Ɔhɔpʋ, anɩ Wie Kristo, (ɔha amʋʋ Bulu lada mʋ ofuli amʋ) ha mlɩ Owie Dawid wulutɔ!

¹² Tɔá mlɔ́pʋbɩ mʋ gyi, mlówun kebi bɔbwɛ ɔkʋá bapʋ tatida kɩklɩ mʋ ɩwɩ, ɔda mbwɩ atogyihɛ dakatɔ.”

¹³ Ɔtsawʋlɛ pɛ a, Bulu-abɔpʋ tsɔtsɔɔtsɔ bɛba bɛtsɩa Bulu-ɔbɔpʋ amʋtɔ, bʋdɛ Bulu kanfʋ bɛɛ,

¹⁴ “Mlɩha apʋ numnyam ha Buluá ɔbʋ ɔsʋsʋʋsʋ! Ɩwɩ ilwii aha ánɩ́ Bulu ansɩ tegyi amʋ́ ɩwɩ ɔsʋlʋsʋ.”

¹⁵ Brɛá Bulu-abɔpʋ amʋ beyinki yɔ ɔsʋsʋ a, akufa akpapʋ anfɩ bɛbla aba bɛɛ, “Mlɩha ayɔ Betlehem. Ayɛkɩ ɩtɔ anfɩ ɩlaba, Bulu lalɛ suna anɩ anfɩ.”

¹⁶ Ɩnɩ sʋ bɔwa ɔsa yɔ. Lɛlɛ a, bowun Maria mʋa Yosef pʋ́ kebi bɔbwɛ amʋ, ɔda mbwɩ atogyihɛ dakatɔ.

¹⁷ Brɛá bowun kebi amʋ a, bɛlɛ mʋ ɩwɩ asʋn amʋʋ bonu amʋ blɩ.

¹⁸ Akufa akpapʋ asʋn anfɩ lɔwa aha ánɩ́ bonu mʋ́ fɛ́ɛ́ wanwan.

¹⁹ Tamɛ Maria mʋ́ lɛkɩta asʋn amʋ fɛ́ɛ́ wa nwuntɔ, tsia gywɩɩn mʋ́ ɩwɩ.

²⁰ Brɛá akufa akpapʋ amʋ beyinki bɔyɔ a, bʋna bʋdɛ Bulu adabi da, kanfʋ mʋ, asʋn amʋʋ bonu pʋ́ ɩtɔ amʋʋ bayowun fɛ alɩ amʋʋ Bulu-ɔbɔpʋ amʋ lɛbla amʋ́ amʋ sʋ.

Yesu Ɩda Dɩnka

²¹ Kebi amʋ obuto ɔlɛkɛ a, bɛtɩn mʋ kete, dɩnka mʋ ɩda Yesu. Ɩda anfɩ Bulu-ɔbɔpʋ amʋ lɛha mʋ asa mʋ yin lenya mʋ ɔmɛ nɩ.

Yesu Pʋya Bulu Ɔtswɛkpa

²² Brɛá mʋ akwɩɩpʋ bɔ́gyʋra ɩwɩ Mose Mbla ɔnɔ lɔfʋn a, bɔpʋ mʋ dʋ yɔ Yerusalem, pʋ mʋ yɛwa Bulu ɩbɩtɔ.

²³ (Tsufɛ bɔwanlɩn wa Mose Mbla amʋtɔ bɛɛ, “Ilehian ánɩ́ Israelfɔ bɔ́pʋ amʋ́ bitɩ okugyiɔkʋ ha Bulu.”)

²⁴ Mʋ́ sʋ bɔyɔbɔ afɔdɩɛ amʋ Mbla amʋ ɔnɔ. Abrɔdʋma anyɔ ntɛ aklobi anyɔ bɔpʋbɔ alɩ afɔdɩɛ anfɩ ha Bulu.

²⁵ Alɩ brɛ amʋtɔ a, oyin dɛhɛn ɔkʋ bʋ Yerusalem, bʋtɛtɩ mʋ Simeon. Yile ɔbwɛpʋ ogyi, otenya Bulu ifu. Ɔŋɛ Wankɩhɛ bʋ mʋsʋ, otsie ogyo brɛá Bulu ɔbɔ́pʋ Ɔlɛpʋ ba mʋ aha Israelfɔ.

²⁶ Ɔŋɛ Wankɩhɛ amʋ lɛlɛ suna mʋ ánɩ́ omóowu, yɔfʋn brɛá alawun Kristo, (ɔha amʋʋ Bulu lada mʋ ofuli amʋ) asa.

²⁷ Ɔŋɛ Wankɩhɛ amʋ lɛha Simeon lɔyɔ Bulu ɔtswɛkpa wunsɩnɛsʋ. Alɩ brɛ amʋtɔ a, Yesu akwɩɩpʋ baba mʋ amandɩɛ anfɩ ɔbwɛkpa fɛ alɩá Mose Mbla amʋ lɛblɩ.

²⁸ Ɩnʋ Simeon lɔhɔ kebi bɔbwɛ amʋ, ɔlɛkanfʋ Bulu ɔbɛɛ,

²⁹ “Mɩ Wie! Asʋn amʋʋ fɛblɩ tswɩ amʋ ɩlaba mʋ́tɔ. Sei mʋ́ a, mɩ fʋ osumbi anfɩ nɛ́talɩ wu iwilwiitɔ ngya.

³⁰ Tsufɛ mɩ onuto napʋ mɩ ansibi wun Ɔlɛpʋ amʋ.

³¹ Fʋ onuto fala mʋ bwɛ aha fɛ́ɛ́ ansɩtɔ.

³² Wankɩ ogyi, ɔbɛ́lɛ fʋ suna aha ánɩ́ bʋmegyi Israelfɔ, pʋ numnyam ba fʋ aha Israelfɔ.”

³³ Asʋn anfɩ Simeon lɛblɩ tsu kebi bɔbwɛ anfɩ ɩwɩ lɛha ɔnɔ lobwie mʋ akwɩɩpʋ.

³⁴ Simeon loyula amʋ́, ɔlɛbla obi mʋ yin Maria ɔbɛɛ, “Ɩna kebi anfɩ sʋ Israelfɔ ɔfan bɛ́dɩda, ɔfan ɛ bɛ́lɩɩ. Osuna ogyi tsu Bulusʋ, aha bɔ́kʋsʋ lɩɩ mʋsʋ.

³⁵ Ɩnɩ sʋ Bulu ɔbɛ́ha aha tsɔtsɔɔtsɔ klʋnsʋ asʋn bɛ́lɩn ɔwan. Fʋ ɛ a, awɩrɛhɔ bɛ́hɩɛ kɩta fʋ klʋn. Ɩbɔ́hɔ fʋ ɔsɩn fɛ ɔdayi ɩya anyɔ bakpie yi fʋ.”

³⁶ Ɔtsɩ dɛhɛn ɔkʋá ogyi Bulu ɔnɔsʋ ɔtɔɩpʋ ɛ bʋ ɩnʋ. Mʋ ɩda gyi Hana. Mʋ sɩ gyi Fanuel, otsu Asa abusuantɔ. Ɔtsɩ dɛhɛn anfɩ mʋa mʋ klu betsia aba nfinsienɔ, mʋ klu lowu.

³⁷ Olosu ɩsʋra alɩɩ bɔfʋn brɛá ɔlɔhɔ nfi adukwe-na (84). Ɔlɔpʋ Bulu ɔtswɛkpa wunsɩnɛsʋ ɩnʋ mli mʋ ɔdɩkpa, ɔdɛ Bulu sum, klɩ ɔnɔ, bɔ mpaɩ ɔpa mʋ́a onye.

³⁸ Mʋ ɛ ɔlɛdalɩ ba bɛkanfʋ Bulu, blɩ kebi bɔbwɛ amʋ ɩwɩ asʋn suna aha amʋʋ bʋdɛ Yerusalemfɔ ɩwɩgyi ɔkpa kɩ amʋ.

Yesu Yinkia Ya Nasaret Wulutɔ

³⁹ Brɛá Yesu akwɩɩpʋ bɔbwɛ amandɩɛ amʋ ta Bulu mbla amʋ ɔnɔ a, beyinki kplɩ yɔ amʋ́ wulutɔ Nasaret, Galilea ɔsʋlʋsʋ.

⁴⁰ Kebi amʋ lɛdan, nya ɔwʋnlɩn, nya nyansa, Bulu ɛ loyula mʋ.

Yesu Bulu Ɔtswɛkpa Sin

⁴¹ Yesu akwɩɩpʋ bʋtetsia yɔ Yerusalem yegyi Israelfɔsʋ Katsʋn Nkɛ ofifigyiofi.

⁴² Brɛá Yesu lɔhɔ nfi duanyɔ a, mʋa amʋ́nyɔ bɔyɔ nkɛ amʋ ogyikpa fɛ alɩá bʋtɔyɔ yaɩ.

⁴³ Brɛá begyi nkɛ amʋ ta beyinki a, Yesu akwɩɩpʋ bʋmɛbɩá alasin ɩnʋ.

⁴⁴ Bʋkɩ bɛɛ mʋa mʋ abanyɔ na. Mʋ́ sʋ bɛnatɩ ɛkɛwʋlɛ owitɔ asa bɔwa mʋ dunka apio abatɔ bɩ.

⁴⁵ Brɛá bodunka mʋ kasian a, beyinki yɔ Yerusalem, yodunka mʋ.

⁴⁶ Ɛkɛ sasɩ a, boyowotii mʋsʋ Bulu ɔtswɛkpa wunsɩnɛsʋ ɩnʋ. Otsie Mose mbla asunapʋ wa, ɔdɛ asʋ ya amʋ́ asʋntɔ, ɔdɛ amʋ́ asʋn fɩtɛ.

⁴⁷ Ɔnɔ lobwie aha ánɩ́ bʋbʋ ɩnʋ fɛ́ɛ́, tsu alɩá ɔdɛ asʋn amʋ asɩ nu pʋ́ alɩá ɔdɛ mʋ́ ɔnɔ lɛ.

⁴⁸ Ɔnɔ lobwie mʋ akwɩɩpʋ brɛá bowun mʋ. Mʋ yin lɛfɩtɛ mʋ ɔbɛɛ, “Mɩ bi, ntogyi sʋ fabwɛ anɩ alɩ? Mɩa fʋ sɩnyɔ ansɩ lapɛ anɩdɛ fʋ dunka.”

⁴⁹ Ɩnʋ Yesu lɛfɩtɛ amʋ́ ɔbɛɛ, “Ntogyi sʋ mlɩdɛ mɩ dunka? Ilehian ánɩ́ mlɛ́bɩá mɩ Sɩ woyitɔ nétsia.”

⁵⁰ Tamɛ mʋ akwɩɩpʋ bʋmonu asʋn ánɩ́ ɔdɛ amʋ́ bla asɩ.

⁵¹ Mʋa amʋ́nyɔ beyinki yɔ Nasaret, ɔlɛba ɩwɩasɩ ha amʋ́. Maria lɛkɩta asʋn amʋ fɛ́ɛ́ wa kpawunutɔ, tsia gywɩɩn mʋ́ ɩwɩ.

⁵² Yesu lɛdan, wa ɔwʋnlɩn, nya nyansa, Bulu mʋa anyankpʋsa fɛ́ɛ́ ansɩ legyi mʋ ɩwɩ.