Luka 18 - Bulu Ntam Pɔpwɛ mʋ́a Israel Ɩlʋ

Ɔsʋrapʋ Mʋa Asʋn Ogyipʋ Ɔkʋ

¹ Ɩnʋ Yesu lɛha yebi kʋ pʋsuna ánɩ́ bʋbɔ mpaɩ bregyibrɛ, ɩmákpɔn amʋ́.

² Ɔlɛbla amʋ́ ɔbɛɛ, “Asʋn ogyipʋ ɔkʋ letsia wulu kʋsʋ. Ɔtamanya Bulu ifu, ɔtamanya ɔhaa ɛ pɛlɩ.

³ Ɔsʋrapʋ ɔkʋ ɛ letsia wulu amʋtɔ. Oletsia bokokoli mʋ ɔbɛɛ, ogyi mʋ asʋn ɔnɔkwalɩsʋ ha mʋ, ɔlɛ mʋ tsu mʋ olupʋ ɩbɩtɔ!

⁴ Tɛkɩ olekle okina, tamɛ ɔma-ɔma a, ɔlɛbla mʋ ɩwɩ ɔbɛɛ, ‘Ɩbʋ mʋ́tɔá ntamanya Bulu ifu, ntamanya ɔhaa ɛ pɛlɩ.

⁵ Tamɛ alɩ anfɩ ɔsʋrapʋ anfɩ na ɔdɛ mɩ han anfɩ sʋ a, négyi mʋ asʋn ɔnɔkwalɩsʋ. Nɩ megyi alɩ a, oméesi mɩ tɔɩ wa. Ɔmɛ́ɛha mméenya ɔkpa bwɛ tɔtɔ.> ”

⁶ Yesu lɔyɔ mʋ́sʋ ɔbɛɛ, “Mlɩkɩ alɩá asʋn ogyipʋ anfɩ ɔtamagyi asʋn ɔnɔkwalɩsʋ anfɩ lablɩ.

⁷ Mʋmʋ nkalɩ Bulu mʋ́ méegyi mʋ aha amʋʋ alalɛ, bʋdesu kpoli mʋ ɔpa-onye amʋ asʋn ɔnɔkwalɩsʋ? Obési amʋ́ asʋn wa obiatɔ? Ɛkɛkɛɛkɛ!

⁸ Ndɛ mlɩ bla mbɛɛ, obégyi mʋ́ ɔnɔkwalɩsʋ ha amʋ́ ɔsasʋ. Tamɛ ndɛfɩtɛ mbɛɛ, nɩ mɩ, Nyankpʋsa-Mʋ-Bi anfɩ neyinki ba a, nówun ahogyipʋ akʋ ɔsʋlʋ anfɩsʋ?”

Lampoo Ɔhɔpʋ Mʋa Farisiyin

⁹ Yesu lɛtra ha yebi kʋ pʋsuna amʋ́ atɔ tsu aha ánɩ́ bʋtɛkɩ amʋ́ ɩwɩ yile abwɛpʋ dʋn amʋ́ aba ɩwɩ.

¹⁰ Ɔlɛha yebi amʋ ɔbɛɛ, “Ayin abanyɔ akʋ bɔdʋ yɔ mpaɩ ɔbɔkpa Bulu ɔtswɛkpa. Amʋ́tɔ ɔkʋlɛ gyi Farisiyin, ɔkʋlɛ ɛ gyi lampoo ɔhɔpʋ.

¹¹ “Farisiyin amʋ lɔkʋsʋ lɩɩ, bɔ mpaɩ wa nwuntɔ ɔbɛɛ, ‘Bulu, nɛda fʋ ɩpan ánɩ́ mmegyi fɛ akʋ. Mɩ mʋ́ mma ɔnsɩpɛ, ntamasisi ɔha, ntamatɔ mbʋa, mmegyi fɛ lampoo ɔhɔpʋ anfɩ ɛ.

¹² Ntɛklɩ ɔnɔ tse nyɔ ndawɔtswɩ ɩkʋlɛtɔ. Nteye mɩ atɔ fɛ́ɛ́tɔ du, lɛ idusɩ ha fʋ.>

¹³ “Tamɛ lampoo ɔhɔpʋ amʋ mʋ́ lɛyɛlɩɩ tsutsu, oloko nwuntɔ wa. Omotsula tsu ansɩ kʋraa fʋa kɩ ɔsʋsʋ. Ɔlɔpʋ ɔbɩma da ɩbɩtɔ, kokoli Bulu ɔbɛɛ, ‘Oo Bulu, wun mɩ nwɛ; lakpan ɔbwɛpʋ ngyi.> ”

¹⁴ Yesu lɔmɔ mʋ́ ɔnɔ ɔbɛɛ, “Ndɛ mlɩ bla mbɛɛ, asa beyinki yɔ woyi a, Bulu ansɩ legyi lampoo ɔhɔpʋ amʋ ɩwɩ dʋn Farisiyin amʋ. Tsufɛ ɔha ánɩ́ ototsu ɩwɩ a, Bulu ɔbɛ́ba mʋ asɩ. Ɔha ánɩ́ ɔtɛba ɩwɩasɩ ɛ a, Bulu obótsu mʋ fʋa.”

Nyebi Yula

¹⁵ Aha akʋ bɔpʋ amʋ́ abi ba Yesu bɛɛ, ɔpʋ ɩbɩ dɩnka amʋ́sʋ, oyula amʋ́. Mʋ akasɩpʋ bowun amʋ́. Mʋ́ sʋ bɔwa ɩyɩn wa amʋ́.

¹⁶ Tamɛ Yesu lɛtɩ nyebi amʋ ba mʋ ɩwɩ wa, ɔlɛbla akasɩpʋ amʋ ɔbɛɛ, “Mlɩha nyebi amʋ abʋba mɩ wa. Mlɩmátin amʋ́ ɔkpa, tsufɛ aha anfɩ odu bʋ Bulu iwiegyi amʋ nɩ.

¹⁷ Ɔnɔkwalɩ ndɛ mlɩ bla. Ɔha ánɩ́ ɔmɔhɔ Bulu iwiegyi amʋ fɛ kebi a, omóowie mʋ́tɔ.”

Atonyahɛ Ɩwɩ Atosunahɛ

¹⁸ Ɛkɛ ɔkʋ Yudafɔ ɔhandɛ ɔkʋ lɛbɛfɩtɛ Yesu ɔbɛɛ, “Osunapʋ yile, ntɔ nɔ́bwɛ asa nénya nkpa ánɩ́ ɩtamata?”

¹⁹ Yesu lɛfɩtɛ mʋ ɔbɛɛ, “Ntogyi sʋ fʋdɛ mɩ tɩ ɔha yile? Ɔhaa megyi ɔha yile, nkɛtɩ Bulu nkʋlɛ.

²⁰ Yɛ fʋyin Bulu mbla amʋ o. Mʋ́gyi, mátɔ mbʋa, mámɔ ɔha, máwi atɔ, máka asʋn dɩnka fʋ basʋ, bu fʋ si mʋa fʋ yin.”

²¹ Ɔhandɛ amʋ lɛbla mʋ ɔbɛɛ, “Tsu mɩ nyebitɔ ɔpá ndɛ mʋ́ fɛ́ɛ́sʋ gyi.”

²² Yesu lonu mʋ asʋn blɩhɛ anfɩ a, ɔlɛbla mʋ ɔbɛɛ, “Toku kʋlɛ ɩlasi ánɩ́ fɔ́bwɛ. Yɛfɛ fʋ ɩwɩsʋ atɔ fɛ́ɛ́, afʋye kɔba amʋ ha ahianfɔ, mɛnɩ fénya siadɩɛ ɔsʋsʋ. Fɔbwɛ mʋ́ ta a, ba afʋbobuo mɩ.”

²³ Brɛá oyin amʋ lonu asʋn anfɩ a, ɩlɔtɔ mʋ klʋn, tsufɛ ɔhɩɛ ɔbʋ atɔ.

²⁴ Yesu lowun ánɩ́ ɩlahan mʋ. Mʋ́ sʋ ɔlɛblɩ ɔbɛɛ, “Ɩbʋ ɔnlɩn asa ɩwɩ onyapʋ obówie Bulu iwiegyi amʋtɔ.

²⁵ Lɛlɛ mʋ́ a, ɩlɔpɔn ha kpɔsɔ ánɩ́ ɔbɔ́tsʋn ɔbɩn-atɔ ɔbɔtɔ, dʋn ánɩ́ ɩwɩ onyapʋ obówie Bulu iwiegyi amʋtɔ.”

²⁶ Aha ánɩ́ bonu asʋn anfɩ bɛfɩtɛ bɛɛ, “Mʋmʋ ma mɛɛ Bulu ɔbɔ́hɔ nkpa?”

²⁷ Tamɛ Yesu lɛbla amʋ́ ɔbɛɛ, “Tɔá nyankpʋsa mɛ́ɛtalɩ bwɛ mɔdʋn Bulu bwɛ.”

²⁸ Ɩnʋ Petro lɛbla Yesu ɔbɛɛ, “Mɩ Wie, kɩ, anɩlasi anɩ woyi tswɩ bobuo fʋ.”

²⁹ Yesu lɛbla amʋ́ ɔbɛɛ, “Ɔnɔkwalɩ ndɛ mlɩ bla. Ɔhaa má ɩnʋá obési mʋ woyi, mʋ ka, mʋ apio, mʋ akwɩɩpʋ ntɛ mʋ abi tswɩ Bulu iwiegyi amʋ sʋ,

³⁰ Bulu mɛ́ɛlawa mʋ́ otsiakpa ha mʋ tse du tse lafa sei, laha mʋ nkpa ánɩ́ ɩtamata brɛ amʋʋ ɩba amʋtɔ.”

Yesu Lowu Ɩwɩ Asʋn Blɩ Otse Sasɩ

³¹ Yesu lɛtɩ akasɩpʋ duanyɔ amʋ ya ɩtsɛtɔ, ɔlɛbla amʋ́ ɔbɛɛ, “Ayɔ Yerusalem. Ɩnʋ asʋn amʋʋ Bulu ɔnɔsʋ atɔɩpʋ amʋ bɔwanlɩn tsu mɩ, Nyankpʋsa-Mʋ-Bi anfɩ ɩwɩ amʋ fɛ́ɛ́ bɛ́ba mʋ́tɔ nɩ.

³² Bɛ́lɛ mɩ ha aha ánɩ́ bʋmegyi Yudafɔ. Bɔ́bwɛ mɩ ahinla, sia mɩ, tu atsʋnɔ wʋlɩ mɩ.

³³ Bɛ́pɩtɩ mɩ atɔ, mɔ mɩ. Mʋ́ ɛkɛ sasɩ a, nɔ́kʋsʋ tsu afulitɔ.”

³⁴ Akasɩpʋ amʋ bʋmonu ɩnɩ asɩ, tsufɛ Bulu lɔpʋŋain amʋ́. Bʋmɛbɩ tɔá ɔdɛblɩ ɛ.

Ansibi Obwiepʋ Ɔkʋ Ɩlɔ Tsa

³⁵ Yesu lɛta Yeriko wulutɔ wie ta a, ansibi obwiepʋ ɔkʋ tsie ɔkpa ɔnɔ, ɔdɛ atɔ kʋlɩ.

³⁶ Ansibi obwiepʋ amʋ lonuá ɔdɔm bʋdɛtsʋn. Mʋʋ ɔlɛfɩtɛ ɔbɛɛ, “Amansʋ igyi?”

³⁷ Aha bɛbla mʋ bɛɛ, “Yesu Nasaretyin amʋ dɛtsʋn.”

³⁸ Ɩnʋ ansibi obwiepʋ amʋ lɔkplʋn blɩ ɔbɛɛ, “Anɩ wie Dawid mʋ na Yesu, wun mɩ nwɛ!”

³⁹ Aha amʋʋ bʋgya Yesu nkpa amʋ bɔkplʋn wa ansibi obwiepʋ amʋ bɛɛ, ɔwa ɔsa kpa ɔnɔ bun. Ɔlɛlakplʋn dʋn alɩ ɔbɛɛ, “Anɩ wie Dawid mʋ na, wun mɩ nwɛ!”

⁴⁰ Yesu lesi lɩɩ, ɔlɛha ɔbɛɛ bʋkpa mʋ ba mʋ. Brɛá bɛkpa mʋ ba a, Yesu lɛfɩtɛ mʋ ɔbɛɛ,

⁴¹ “Ntɔ fʋdekle fɛɛ mbwɛ ha fʋ?” Ɔlɛlɛ mʋ́ ɔnɔ ɔbɛɛ, “Owie, ha mɩ anwun atɔ!”

⁴² Yesu lɛbla mʋ ɔbɛɛ, “Fʋ hogyi latsa fʋ ɩlɔ. Wun atɔ.”

⁴³ Ɩnʋnʋ mʋ ansibi lobwii, ɔlɛkpla buo Yesu, ɔdɛ Bulu kanfʋ. Ɔdɔm amʋ fɛ́ɛ́ bowun ɩnɩ, amʋ́ ɛ bɛkanfʋ Bulu.