Luka 17 - Bulu Ntam Pɔpwɛ mʋ́a Israel Ɩlʋ

Lakpanbwɛ

¹ Yesu lɛbla mʋ akasɩpʋ ɔbɛɛ, “Bwɛbwɛbwɛ a, tɔkʋ ɩbɛ́ha nyankpʋsa ɔbɔ́bwɛ lakpan, tamɛ ɔha ánɩ́ ɩna mʋsʋ mʋ ba lɔbwɛ lakpan ɔgyɔwɩ nɩ.

² Nɩ ɔkʋ lɛha aha anfɩ bʋmɔkʋdan mɩsʋ hogyitɔ anfɩtɔ ɔkʋ lɔbwɛ lakpan a, nɩ bɛda nfuokwɛbʋ sian mʋ ɔmɛtɔ, tswɩ mʋ wa ɔpʋ okluklukpa po a, ɩbʋ alɛ dʋn.

³ Mʋ́ sʋ mlɩkɩ mlɩ ɩwɩ wanklaan. “Nɩ fʋ ba ɔpʋ ɩla gyi fʋ a, wa ɩyɩn wa mʋ. Nɩ ɔlɛdamli klʋntɔ a, sikie mʋ.

⁴ Nɩ ɔlɔpʋ ɩla gyi fʋ tse sienɔ ɛkɛwʋlɛ owitɔ, ɔlɛla bobwii ɩpa ha fʋ a, sikie mʋ.”

Hogyi

⁵ Yesu sumbi ayɔpʋ amʋ bɛbla mʋ bɛɛ, “Ha anɩ hogyi imoni tsɩa.”

⁶ Yesu lɛlɛ mʋ́ ɔnɔ ɔbɛɛ, “Nɩ mlɩ hogyi lomoni fɛ takyi-akpin ibi a, mlɛ́talɩ bla kɛlɩ anfɩ mlɩaa, ‘Puli yɛlɩɩ ɔpʋtɔ.> Ɩbɔ́bwɛ dɩnka mʋ́sʋ.

Osumpʋ Gyumagyihɛ

⁷ “Nɩ mlɩtɔ ɔkʋ bʋ osumpʋá ɔtɔyɔ agyʋma mʋ ndɔtɔ ntɛ ɔtɛkɩ mʋ akufasʋ, otsu agyʋmatɔ ba a, bla mʋ wie tɛbla mʋ ɔbɛɛ, ‘Wa ɔsa bwɛ afʋgyi atɔ?> Ɛkɛkɛɛkɛ!

⁸ Bla ɔtɛbla mʋ ɔbɛɛ, ‘Tsu tati saba, afʋbɔtswɩ ɔpʋnʋ ha mɩ. Bɛlɩɩ mɩ angyi atɔ ta, afʋyegyi fʋ klɛ.>

⁹ Ɔtɛda osumpʋ amʋ ɩpan ɔbɛɛ, alabwɛ tɔá mɔwa mʋ bwɛ? Ɛkɛkɛɛkɛ!

¹⁰ Ɩnɩ sʋ nɩ mlɩ ɛ mlɔbwɛ tɔá bɔwa mlɩ bwɛ ta a, mlɩblɩ mlɩaa, ‘Asumpʋ kɛkɛ anɩgyi. Tɔá igyi anɩ bwɛhɛ anɩlabwɛ a.> ”

Ɩlɔ Pɛpɛ Alɔpʋ Du Tsa

¹¹ Yesu na Samaria pʋ́ Galileafɔ ɔkasʋ ɔyɔ Yerusalem.

¹² Brɛá ɔlɛta wulu kʋsʋ wie ta a, ɩlɔ pɛpɛ alɔpʋ du akʋ bʋna bɛba befia mʋ, besi lɩɩ tsutsu.

¹³ Ɩnʋ bɔkplʋn blɩ bɛɛ, “Yesu! Owie! Wun anɩ nwɛ.”

¹⁴ Yesu lotsu ansɩ kɩ amʋ́, ɔlɛbla amʋ́ ɔbɛɛ, “Mlɩpʋ mlɩ ɩwɩ yesuna Bulu igyi ɔhapʋ.” Brɛá bɔpʋ ɔkpa bɔyɔ a, amʋ́ ɩwɩ lɛplɩ.

¹⁵ Ɔkʋlɛ mʋ́ lowun ánɩ́ mʋ ɩwɩ laplɩ a, oleyinki ɔdɛkplʋn kanfʋ Bulu kʋklʋkʋʋ.

¹⁶ Olebemli bun Yesu ayabitɔ, ɔdɛ mʋ ɩpan da. Samariayin oyin anfɩ gyi.

¹⁷ Ɩnʋ Yesu lɛfɩtɛ ɔbɛɛ, “Megyi aha idu natsa? Mʋ́ kweba atrahɛ mɛ?

¹⁸ Mʋ́ sʋ amʋ́tɔ ɔkʋkʋ mɛba bɛkanfʋ Bulu dʋn Samariayin ɔfɔɔ anfɩ nkʋlɛ?”

¹⁹ Ɩnʋ ɔlɛbla oyin amʋ ɔbɛɛ, “Kʋsʋ natɩ. Fʋ hogyi latsa fʋ ɩlɔ.”

Bulu Iwiegyi Amʋ Ɩba

²⁰ Farisifɔ akʋ bɛfɩtɛ Yesu bɛɛ, “Ɔmɛnkɛ Bulu iwiegyi amʋ ɩbɛ́ba?” Yesu lɛbla amʋ́ ɔbɛɛ, “Megyi tɔá ɔha ɔbɔ́pʋ ansibi wun Bulu iwiegyi amʋ igyi.

²¹ Ɔhaa mɛ́ɛtalɩ blɩ ɔbɛɛ, ‘Kɩ, mʋ́bʋ nfɩ.> Ntɛ ‘Mʋ́bʋ nana a.> Tsufɛ mlɩ klʋntɔ Bulu iwiegyi amʋ bʋ.”

²² Ɩnʋ Yesu lɛbla mʋ akasɩpʋ ɔbɛɛ, “Ɛkɛ ɔkʋ ɩba, mlódunka ánɩ́ mlówun mɩ, Nyankpʋsa-Mʋ-Bi anfɩ ɛkɛwʋlɛ pɛ, tamɛ mlɩmóowun mɩ.

²³ Aha bɛ́bla mlɩ bɛɛ, ‘Ɔbʋ nfɩ.> ntɛ ‘Ɔbʋ nana,> tamɛ mlɩmásrɩ buo amʋ́ yɛkɩ.

²⁴ Tsufɛ mɩ, Nyankpʋsa-Mʋ-Bi anfɩ ɔbakɛ bɔ́bwɛ fɛ alɩ amʋʋ nyankpʋ tɔfwɩ ɩbɩ, bʋtowun mʋ́ nsaɩntɔ fɛ́ɛ́ amʋ.

²⁵ Tamɛ négyankpa wun ɩwɩɔsɩn tsɔtsɔɔtsɔ, ndɛmba-abi anfɩ ɛ békina mɩ.

²⁶ Alɩ amʋʋ ilegyi Noa brɛsʋ amʋ a, alɩ ibégyi mɩ, Nyankpʋsa-Mʋ-Bi anfɩ ɛ ɩbabɩ nɩ.

²⁷ Aha betsia, bʋdɛ atɔ gyi, bʋdɛ nta nun; bʋdɛ aka tsia, bʋdɛ atsɩ kɩta ha aklu alɩɩ yɔfʋn ɛkɛá Noa lowie mʋ daka kpɔnkpɔntɩ amʋtɔ, ntsu lɔbʋla bɔmɔ amʋ́ fɛ́ɛ́.

²⁸ Alɩ kɛn ɩlɛba Lot ɛ brɛsʋ nɩ. Aha betsia, bʋdɛ atɔ gyi, bʋdɛ nta nun, bʋdɛ atɔ hɔ, bʋdɛ atɔ fɛ; bʋdɛ atɔ du, bʋdɛ ibu yi,

²⁹ yɔfʋn ɛkɛá Lot lɛdalɩ Sodom wulutɔ, ogya mʋ́a atonkodu lotswie tsu ɔsʋsʋ bɛhɩ amʋ́ fɛ́ɛ́.

³⁰ Alɩ kɛn mɩ, Nyankpʋsa-Mʋ-Bi anfɩ ɩwɩɔwanlɛkɛ bófwie ahatɔ nɩ.

³¹ “Ɛkɛ amʋ a, ɔha ánɩ́ ɔdɩn obusʋ, mʋ atɔ ɩbʋ obuto ɔmákplɩ botsu tɔtɔ. Alɩ kɛn ɔha ánɩ́ ɔbʋ ndɔtɔ ɛ máyinki botsu tɔtɔ nɩ.

³² Mlɩkaɩn Lot mʋ ka asʋnsʋ!

³³ Tsufɛ nɩ ɔkʋ lodunka ánɩ́ ɔbɛ́prɩ mʋ nkpa a, ɔbɔ́hʋlɩ mʋ́. Tamɛ nɩ ɔkʋ lɔhʋlɩ mʋ nkpa a, ɔbɛ́lanya mʋ́.

³⁴ Ndɛ mlɩ bla mbɛɛ, alɩ ɛkɛ amʋ onye a, nɩ aha abanyɔ bʋda ɔklan kʋlɛsʋ a, Bulu obótsu ɔkʋlɛ si ɔkʋlɛ.

^35-36 “Nɩ atsɩ abanyɔ bʋdɛ nfuo kwɛ a, Bulu obótsu ɔkʋlɛ si ɔkʋlɛ.”

³⁷ Yesu akasɩpʋ amʋ bɛfɩtɛ mʋ bɛɛ, “Anɩ Wie, nkʋnʋ ɩbɛ́ba?” Yesu lɛbla amʋ́ ɔbɛɛ, “Ɔtɩnɛá itowuhɛ da a, ɩnʋ alasa bʋtefia nɩ.”