Luka 15 - Bulu Ntam Pɔpwɛ mʋ́a Israel Ɩlʋ

Kufa Fwɩhɛ

¹ Ɛkɛ ɔkʋ lampoo ahɔpʋ pʋ́ lakpan abwɛpʋ bɛba Yesu asʋn blɩhɛ onukpa.

² Farisifɔ pʋ́ Mose mbla asunapʋ amʋ bowunti mʋ bɛɛ, “Oyin anfɩ mʋa lakpan abwɛpʋ tɛnatɩ, bʋtɔwa ɩbɩ gyi atɔ kʋraa.”

³ Mʋ́ sʋ Yesu lɛha yebi pʋsuna amʋ́ atɔ ɔbɛɛ,

⁴ “Mlɩtɔ ma bʋ akufa lafakʋlɛ (100), ɔkʋlɛ ɔfwɩ a, omesi adukweba-kweba (99) trahɛ wa dimbitɔ ɩnʋ, yodunka mʋ alɩɩ kpɛfʋn brɛá obówun mʋ?

⁵ Nahogyi mbɛɛ, nɩ owun mʋ a, ansɩ bégyi mʋ, obótsu mʋ wa nkɔnkɔ,

⁶ pʋ mʋ ya woyitɔ. Ɔbɛ́tɩ mʋ anyawie pʋ́ mʋ aba, bla amʋ́ ɔbɛɛ, ‘Mlɩha anya ansigyi. Nawun mɩ kufa amʋʋ ɔlɔfwɩ amʋ!>

⁷ Alɩ kɛn ndɛ mlɩ bla mbɛɛ, nɩ lakpan ɔbwɛpʋ ɔkʋlɛ pɛ ɔdamli klʋntɔ a, ansɩ bɛ́hɩɛ gyi aha ɔsʋsʋ ɩnʋ dʋn alɩá ibégyi amʋ́ aha wanklaan adukweba-kweba (99) ánɩ́ bʋmɛtra hian klʋntɔdamli ɩwɩ.

Kɔba Fwɩhɛ

⁸ “Ntɛ nɩ ɔtsɩ ɔkʋ bʋ sika fututu idu, mʋ́tɔ kʋlɛ lafwɩ a, omóonywɛ ɔkandɩɛ kɩkɩ mʋ woyitɔ wanklaan, kpakpa ntobitɔ kɩ, fɛɩ woyi amʋtɔ wanklaan yɔfʋn brɛá alawun mʋ́?

⁹ Nɩ owun mʋ́ a, ɔbɛ́tɩ mʋ apio aba, bla amʋ́ ɔbɛɛ, ‘Mlɩha anya ansigyi. Nawun mɩ sika fututu amʋʋ ɩlɔfwɩ amʋ.>

¹⁰ Ndɛ mlɩ bla mbɛɛ, alɩ ansɩ bɛ́hɩɛ gyi Bulu-abɔpʋ nɩ lakpan ɔbwɛpʋ ɔkʋlɛ ɔdamli klʋntɔ nɩ.”

Obi Fwɩhɛ Ɔkʋ

¹¹ Yesu lɛtra ha amʋ́ yebi ɔbɛɛ, “Oyin ɔkʋ letsia, ɔbʋ abi yinhɛ anyɔ.

¹² Ɔkʋsʋ amʋ lɛbla mʋ sɩ ɔbɛɛ, ‘Mɩ sɩ, ye fʋ atɔtɔ, afʋpʋ mɩ klɛ ha mɩ.> Ɩnʋ mʋ sɩ lɛkɩta mʋ atɔtɔ ye ha amʋ́.

¹³ Imegyi nkɛ kʋkʋ ɔkʋsʋ amʋ lɔkʋla mʋ atɔ fɛ́ɛ́, olotu ɔkpa yɔ tsutsuutsu ɔmá kʋtɔ. Ɩnʋ oleyetsia nkpa lalahɛ, yinta mʋ atɔ amʋ fɛ́ɛ́.

¹⁴ Brɛá oleyinta atɔ amʋ ta a, akʋn kpɔnkpɔntɩ kʋ lɛba ɔmá amʋtɔ, ɔlɔwa akʋn dɩ bɩ.

¹⁵ Mʋ́ sʋ ɔlɔpʋ ɩwɩ yɛmanta ɩnʋyin ɔkʋsʋ, oyin amʋ lɛkpa mʋ ya mʋ ibuasɩ ɔbɛɛ, ɔyɛkɩ mʋ mprakuosʋ ha mʋ.

¹⁶ Tɛkɩ olekleá obétsia gyi mprakuo atogyihɛ amʋ kʋ, tamɛ ɔhaa mɛha mʋ mʋ́ ɩwɩ ɔkpa.

¹⁷ Brɛá mʋ ansɩ leyinki ba mʋ ɩwɩsʋ a, ɔlɛfɩtɛ mʋ ɩwɩ ɔbɛɛ, ‘Apafɔ amɔmʋ kʋraa ma mɩ sɩ woyitɔ, bʋmɛdɛ atɔ gyi sian ekekegyiɛkɛ? Mʋ́ ntsie nfɩ, akʋn dɛ mɩ mɔ?

¹⁸ Nɔ́kʋsʋ yinki yɔ mɩ sɩ wa, yɛbla mʋ mbɛɛ, mɩ sɩ, napʋ ɩla gyi Bulu, pʋgyi fʋ ɛ.

¹⁹ Mmɛkana ánɩ́ fɛtra tɩ mɩ fʋ bi. Pʋ mɩ bwɛ fʋ apafɔ amʋtɔ ɔkʋlɛ.>

²⁰ Mʋ́ sʋ ɔlɔkʋsʋ pʋ ɔkpa ɔba mʋ sɩ wa. “Brɛá olowotii, mʋ sɩ lowun mʋ sɩsɩ a, ɔlɔwa mʋ nwɛ, ɔlɛsrɩ yefia mʋ, lata mʋ puta.

²¹ Ɩnʋ mʋ bi amʋ lɛbla mʋ ɔbɛɛ, ‘Mɩ sɩ, napʋ ɩla gyi Bulu, pʋgyi fʋ ɛ. Mmɛkana ánɩ́ fɛ́tra tɩ mɩ fʋ bi.>

²² Tamɛ mʋ sɩ lɛtɩ mʋ asumpʋ, bla amʋ́ ɔbɛɛ, ‘Mlɩwa ɔsa yotsu atadɩɛ wanklaan amʋ bɔwa mʋ. Mlɩwa mʋ opetia, amlɩwa mʋ ntʋkʋta.

²³ Mlɩyɛlɛ ɔnantswie yinhɛ kanahɛ amʋʋ alawa nfɔ amʋ ba, amlɩbɔmɔ mʋ, apʋgyi nkɛ ha mʋ.

²⁴ Tsufɛ mɩ bi anfɩ lawu tsinki. Ɔlɔfwɩ, anɩlawun mʋ.> Ɩnʋ bɔwa nkɛ gyi bɩ.

²⁵ “Alɩ brɛ amʋtɔ a, obi dɛhɛn amʋ bʋ ndɔtɔ. Brɛá olotsu ndɔ amʋtɔ ɔba, alata woyi wie ta a, olonuá plei dɛ woyitɔ ɩnʋ.

²⁶ Mʋ́ sʋ ɔlɛtɩ mʋ sɩ asumpʋ amʋtɔ ɔkʋlɛ, fɩtɛ ɔbɛɛ, ‘Amansʋ laba?>

²⁷ Osumpʋ amʋ lɛlɛ mʋ́ ɔnɔ ɔbɛɛ, ‘Fʋ pio laba. Mʋ́ sʋ fʋ sɩ laha bamɔ ɔnantswie kanahɛ amʋ, tsufɛ alayinki bɔtʋ mʋ, ɔbʋ nkpa, ɔbʋ ɔnlɩn.>

²⁸ “Ɔblɔ lɛkɩta ɔdɛhɛn amʋ. Mʋ́ sʋ olesin mmua. Mʋ sɩ lɛdalɩ ba bokokoli mʋ ɔbɛɛ, ɔba woyitɔ.

²⁹ Tamɛ ɔlɛlɛ mʋ́ ɔnɔ ɔbɛɛ, ‘Mɩ sɩ, kɩ nfi dʋdʋʋdʋá napʋtsia fʋ wa sum fʋ. Mmɔkʋbwɛ mábula kʋkʋ kɩ. Tamɛ fʋmɔkʋha mɩ ɔkpalabi fɛɛ mɩa mɩ aba apʋwa ɩwɩ ansigyi kɩ.

³⁰ Tamɛ fʋ bi anfɩ alayinta fʋ togyitɔ, mʋa akipʋ bayegyi nkpa anfɩ mʋ́ laba a, famɔ ɔnantswie yinhɛ kanahɛ amʋʋ alawa nfɔ amʋ ha mʋ!>

³¹ Ɩnʋ mʋ sɩ lɛbla mʋ ɔbɛɛ, ‘Mɩ bi, yɛ fʋ mʋ́ fʋbʋ mɩ wa bregyibrɛ. Fʋbʋ mɩ atɔ fɛ́ɛ́.

³² Fʋ pio anfɩ lawu tsinki. Ɔlɔfwɩ, anɩlawun mʋ. Mʋ́ sʋ ilehian ánɩ́ abégyi mʋ́ nkɛ, nya ansigyi.> ”