Luka 14 - Bulu Ntam Pɔpwɛ mʋ́a Israel Ɩlʋ

Ɔlɔpʋ Ɔkʋ Tsa

¹ Farisifɔ ɔhandɛ ɔkʋ lɛtɩ Yesu atɔ ogyikpa mʋ woyitɔ ɔkpʋnʋ ɔdakɛ. Aha bɔpʋ ansɩ yi Yesusʋ, bʋdɛ mʋ tɛ.

² Ɩnʋ oyin ɔkʋá alapunya lɛba Yesu wa.

³ Yesu lɛfɩtɛ Mose mbla asunapʋ pʋ́ Farisifɔ amʋ ɔbɛɛ, “Anɩ mbla lɛha ɔkpa ánɩ́ bʋtsa ɩlɔ ɔkpʋnʋ ɔdakɛ loo, ntɛ ɩmɛha ɔkpa?”

⁴ Amʋ́tɔ ɔkʋkʋ mobwii ɔnɔ. Mʋʋ Yesu lɛkɩta oyin amʋ, tsa mʋ ɩlɔ; olesi mʋ ɔlɛnatɩ.

⁵ Ɩnʋ ɔlɛfɩtɛ aha amʋ ɔbɛɛ, “Mlɩtɔ ma mʋ bi ntɛ mʋ ɔnantswie ɔbɛ́kpada wie ibuntɔ ɔkpʋnʋ ɔdakɛ, ɔmɔ́ɔkɔsɩ lɛ mʋ?”

⁶ Bʋmɛtalɩ lɛ mʋ́ ɔnɔ.

Ɩwɩasɩba

⁷ Ɩnʋ Yesu lowun ánɩ́ aha amʋʋ bɛtɩ atɔ ogyikpa ɩnʋ amʋtɔ akʋ bʋdɛ otsiakpa yile dunka bétsia. Mʋʋ ɔlɛha amʋ́ yebi ɔbɛɛ,

⁸ “Nɩ ɔkʋ ɔtɩ fʋ ɔka otsiakpa a, mayetsia ɔfʋakpa. Fialɩ ɔlɛtɩ ɔhandɛ ɔkʋá ɔdʋn fʋ.

⁹ Ɩnʋ ɔha amʋʋ ɔlɛtɩ mlɩ amʋ ɔbɛ́bla fʋ ɔbɛɛ, ‘Mɩ wie, kʋsʋ pʋ obia ha ɔha anfɩ.> Ɩnʋ pɛlɩ bɛ́kɩta fʋ, fɛ́pɛtɩ yodunka ɔtɩnɛkʋ tsia.

¹⁰ Mʋ́ sʋ nɩ ɔha ɔtɩ fʋ atɔ ogyikpa a, yetsia obia kusubisʋ mboun, ɔha amʋ ɔbɛbla fʋ ɔbɛɛ, ‘Mɩ wie, betsia ɔfʋakpa nfɩ.> Ɩnɩ obótsu fʋ ansɩtɔ fʋa aha amʋ fɛ́ɛ́ ansɩtɔ nɩ.

¹¹ Tsufɛ ɔhagyiɔha ánɩ́ ototsu ɩwɩ a, Bulu tɛba mʋ asɩ. Ɔhagyiɔha ánɩ́ ɔtɛba ɩwɩasɩ ɛ a, Bulu totsu mʋ fʋa.”

¹² Yesu lɛbla ɔha amʋʋ ɔlɛtɩ mʋ atɔ ogyikpa amʋ ɛ ɔbɛɛ, “Nɩ fɔtswɩ ɔpʋnʋ ɔpa onye a, mátɩ fʋ anyawie, fʋ apio, fʋ abusuanfɔ ntɛ ɩwɩ anyapʋá bʋtsie manta fʋ. Nɩ fɔbwɛ mʋ́ alɩ a, amʋ́ ɛ bɛ́latɩ fʋ amʋ́ klɛ asɩ ka ɩkɔ.

¹³ Mboun tɩ ahianfɔ, tsukʋlɛ asinpʋ, abubupʋ pʋ́ ansibi abwiepʋ.

¹⁴ Bulu obóyula fʋ, tsufɛ bʋma tɔtɔá bɔ́pʋka fʋ ɩkɔ. Bulu ɔbɛ́ka fʋ ɩkɔ ɛkɛá ɔbɔ́kʋsʋa aha yile tsu afulitɔ.”

Nkɛ Kpɔnkpɔntɩ Kʋ Yebi

¹⁵ Aha amʋʋ amʋ́a Yesu bʋtsie ɔpʋnʋasɩ amʋtɔ ɔkʋlɛ lonu mʋ asʋn blɩhɛ anfɩ, ɔlɛblɩ ɔbɛɛ, “Ansɩ bégyi aha ánɩ́ bégyi atɔ Bulu ɔpʋnʋ ɔtswɩkɛ mʋ iwiegyi amʋtɔ!”

¹⁶ Tamɛ Yesu lɛbla mʋ ɔbɛɛ, “Oyin ɔkʋ lɔtswɩ ɔpʋnʋ kpɔnkpɔɔnkpɔntɩ kʋ, ɔlɛtɩ aha tsɔtsɔɔtsɔ.

¹⁷ Brɛá bɛnɩna atogyihɛ amʋ ta a, ɔlɔwa mʋ asumpʋ ɔbɛɛ bʋyɛbla aha amʋʋ ɔlɛtɩ amʋ bɛɛ, ‘Babwɛ ta!>

¹⁸ Tamɛ amʋ́ fɛ́ɛ́ bɛblɩ bɛɛ amʋ́ ɩbɩ dɛ. Ogyankpapʋ ɔbɛɛ, ‘Nahɔ ɔsʋlʋ kʋ. Ilehian ánɩ́ nɛ́yɛkɩ mʋ́. Mʋ́ sʋ mlɩkɩta mʋ́tɔ ha mɩ.>

¹⁹ Onyɔsɩ ɛ ɔbɛɛ, ‘Nahɔ nnantswie yinhɛ idu, bópulipuli mɩ ndɔtɔ ha mɩ. Nɛyɛkapʋ amʋ́ kɩ. Mʋ́ sʋ mlɩkɩta mʋ́tɔ ha mɩ.>

²⁰ Ɔbamba ɛ ɔbɛɛ, ‘Nwɛn kotoo netsia ɔka. Mʋ́ sʋ mmɛ́ɛtalɩ ba.>

²¹ “Ɩnʋ osumpʋ amʋ leyinki bɛbla mʋ wie. Ɔblɔ lɛkɩta mʋ wie amʋ, ɔlɛbla mʋ ɔbɛɛ, ‘Wa ɔsa srɩ yeki dɩnsʋ pʋ́ brɔnʋsʋ, afʋkpa ahianfɔ, tsukʋlɛ asinpʋ, ansibi abwiepʋ pʋ́ abubupʋ ba.>

²² Ɩmɔwa ɔpá osumpʋ amʋ lɛba bɛbla mʋ ɔbɛɛ, ‘Mɩ wie, nayɔ sumbi amʋ, tamɛ otsiakpa ɩtra da.>

²³ Mʋ wie amʋ lɛbla mʋ ɔbɛɛ, ‘Tsʋn mmuatse mʋ́a nkpakwi fɛ́ɛ́. Tɩ ɔhagyiɔha ánɩ́ fowun fɛɛ ɔba, mɛnɩ aha bɔ́bʋla mɩ woyitɔ.

²⁴ Nɛkasɛ, aha amʋʋ nɛhɩɛ tɩ amʋtɔ ɔkʋkʋ mɛ́ɛda mɩ atɔ anfɩ ɔnɔ!> ”

Yesu Buotɔ Ipian

²⁵ Yesu mʋa ɔdɔm kpɔnkpɔɔnkpɔntɩ amʋ bʋna bɔyɔ. Mʋʋ ɔlɛdamli bla amʋ́ ɔbɛɛ,

²⁶ “Ɔhagyiɔha ánɩ́ ɔlɛba mɩ wa, tamɛ ɔdɛ mʋ sɩ, mʋ yin, mʋ otsiaba, mʋ abi, mʋ apio, mʋ onuto kʋraa ɩwɩ dwɛ dʋn mɩ a, ɔmɛ́ɛtalɩ bwɛ mɩ ɔkasɩpʋ.

²⁷ Ɔha ánɩ́ omotsu mʋ oyikpalihɛ bobuo mɩ mɔfʋn ánɩ́ ɔbɔ́bwɛ mɩ ɔkasɩpʋ.

²⁸ “Mlɩtɔ ɔmɔmʋ bʋ ɩnʋ, nɩ obéyi obu kpɔnkpɔntɩ a, oméetsia asɩ kɩ tɔá obéyinta, wun ánɩ́ mʋ kɔba bɔ́fʋn?

²⁹ Nɩ ɔmɛkɩ mʋ́ alɩ, asa ɔlɔkʋsʋ wa obu amʋ ntswɩasɩ, pwɛ mʋ́ fʋn ɔkpatɔ; ɔmɛtalɩ mɔ mʋ́ ɔnɔ a, obu amʋ awunpʋ fɛ́ɛ́ bɔ́mɔsɩ mʋ.

³⁰ Bɛ́blɩ bɛɛ, ‘Oyin anfɩ lɔkʋsʋ ɔdɛ obu yi, ɔmɛtalɩ mɔ mʋ́ ɔnɔ.>

³¹ “Ntɛ owie ɔmɔmʋ bʋ ɩnʋá nɩ owie ɔkʋ dɛ akɔpʋ mpɩm-adʋanyɔ (20,000) ɔba bɔkɔ mʋ a, oméetsia asɩ kɩ alɩá ɔbɔ́bwɛ ɔbɔ́pʋ mʋ ɩsa akɔpʋ mpɩm-du (10,000) yefia amʋ́?

³² Nɩ owun ánɩ́ ɔmɛ́ɛtalɩ a, ɔbɔ́wa abi ɔsasʋ bóyokokoli mʋ ha ɩkʋlɛbwɛ, brɛá bʋmɔkʋnya kpʋkpɛ ba.

³³ Ɩnɩ sʋ mlɩtɔ ɔha ánɩ́ omesi mʋ togyitɔ ɔmagya ɔmɛ́ɛtalɩ bwɛ mɩ ɔkasɩpʋ.

Nfɔlɩá Ɩma Labi

³⁴ “Nfɔlɩ bʋ alɛ, tamɛ nɩ ɩta ɔdwɛ a, ntɔ bɛ́lapʋwa mʋ́ ɔdwɛ?

³⁵ Ɩtra ma alɛ ha tɔtɔɔtɔ bwɛ. Tsɛɩ bʋtɛtsɛɩ mʋ́ tsitsa wunasʋ. Ɔha ánɩ́ ɔbʋ asʋ onu asʋn anfɩ.”