Luka 13 - Bulu Ntam Pɔpwɛ mʋ́a Israel Ɩlʋ

Mlɩdamli Ɩklʋntɔ, Mɛnɩ Mlɩmóowu

¹ Aha amʋʋ bʋbʋ ɩnʋ alɩ brɛ amʋtɔ akʋ bɛbla Yesu bɛɛ, Pilato lamɔ Galileafɔ akʋ brɛá bʋdɛ afɔdɩɛ bɔ ha Bulu, Yerusalem Bulu ɔtswɛkpa ɩnʋ, ha obugya lada afɔdɩɛ amʋ.

² Yesu lɛfɩtɛ amʋ́ ɔbɛɛ, “Mlɩkɩ mlɩaa, Galileafɔ anfɩ bʋgyi lakpan abwɛpʋ dʋn Galileafɔ atrahɛ, sʋ bowun ɩwɩɔsɩn anfɩ odu?

³ Ndɛ mlɩ bla mbɛɛ, megyi alɩ igyi! Nɩ mlɩ ɛ mlɩmɛdamli klʋntɔ a, mlɩ fɛ́ɛ́ mlówu fɛ amʋ́.

⁴ Ntɛ aha dukwe amʋʋ abansrʋ lobwie da mɔ Siloam ɔmantiá ɩbʋ Yerusalemtɔ amʋ mɛ, mlɩkɩ mlɩaa, lakpan abwɛpʋ bʋgyi dʋn aha atrahɛá betsia Yerusalem alɩ brɛ amʋtɔ fɛ́ɛ́?

⁵ Ndɛ mlɩ bla mbɛɛ, megyi alɩ igyi. Nɩ mlɩmɛdamli klʋntɔ a, mlɩ ɛ mlówu fɛ amʋ́.”

Pɔntɔ Máswiehɛ

⁶ Mʋʋ ɔlɛha amʋ́ yebi ɔbɛɛ, “Oyin ɔkʋ lotswie pɔntɔ mʋ ndɔtɔ. Ɛkɛ ɔkʋ ɔlɔyɔ yɛkɩ bɛɛ, abi kʋ ɩdɩn mʋ́tɔ. Ɔlɔyɔ a, kʋkʋ mɛdɩn mʋ́tɔ.

⁷ Ɩnɩ sʋ ɔlɛbla mʋ ɔpayin ɔbɛɛ, ‘Nfinsa nɩ, nna oyi anfɩ asɩ. Mmɔkʋwun kʋkʋʋkʋ mʋ́tɔ. Ntogyi sʋ ɩbɛ́tra lɩɩ yinta ɔsʋlʋ? Kun mʋ́ da!>

⁸ Tamɛ ɔpayin amʋ lɛbla mʋ ɔbɛɛ, ‘Mɩ wie, fʋ mʋ́ si mʋ́ ɩtra lɩɩ ofi ɔkʋlɛ, ampulipuli mʋ́ asɩ, kpa wuna wa mʋ́ asɩ.

⁹ Nɩ ofieba iloswie a, ɩbʋ alɛ, tamɛ nɩ imoswie a, nakun mʋ́ da.> ”

Ɔtsɩ Ɔkʋ Ɩlɔ Tsa Ɔkpʋnʋ Ɔdakɛ

¹⁰ Yesu lɔyɔ ɔdɛ atɔ suna Yudafɔ ofiakpa ɔkpʋnʋ ɔdakɛ ɩkʋ.

¹¹ Ɔtsɩ ɔkʋá ɔŋɛ lalahɛ lɔwa mʋ ɩlɔ nfi dukwe nɩ, ɩlaha mʋ alaklo, ɔmɛtalɩ bwii natɩ bʋ ɩnʋ.

¹² Brɛá Yesu lowun mʋ a, ɔlɛtɩ mʋ bla mʋ ɔbɛɛ, “Anɩ yin, ɩwɩ ɩwa fʋ ɔnlɩn!”

¹³ Ɩnʋ ɔlɔpʋ ɩbɩ da ɔtsɩ amʋ. Ɩnʋnʋ olotswii lɩɩ kanfʋ Bulu.

¹⁴ Ofiakpa ɔhandɛ amʋ lenya ɔblɔ ánɩ́ Yesu latsa ɔha ɔkpʋnʋ ɔdakɛ. Mʋ́ sʋ ɔlɛbla aha amʋ ɔbɛɛ, “Nkensie bʋ ɩnʋ ha agyʋma yɔ. Mlɩba nkɛ amʋtɔ, abʋtsa mlɩ ɩlɔ. Megyi ɔkpʋnʋ ɔdakɛ!”

¹⁵ Anɩ Wie Yesu lɛlɛ mɔ ɔnɔ ɔbɛɛ, “Apinabwɛbi abwɛpʋ! Mlɩtɔ okugyiɔkʋ tɔwɔɩ mʋ nnantswie ntɛ afrimu lɛ ɩbantɔ, pʋ amʋ́ ya ntsu onunkpa ɔkpʋnʋ ɔdakɛ.

¹⁶ Mʋ́ ɩma alɛá mɩ mʋ́ nɛ́sankɩ Abraham mʋ na anfɩ Ɔbʋnsam lakɩklɩ mʋ nfi dukwe kɛkɛ anfɩ ɔkpʋnʋ ɔdakɛ?”

¹⁷ Mʋ asʋn blɩhɛ anfɩ lɛha pɛlɩ lɛkɩta mʋ alupʋ amʋ. Ansɩ legyi atrahɛ amʋ fɛ́ɛ́, ofula kpɔnkpɔntɩ amʋʋ ɔdɛbwɛ amʋ sʋ.

Takyi-akpin Ibi Yebi

¹⁸ Ɩnʋ Yesu lɛfɩtɛ ɔbɛɛ, “Ntɔ Bulu iwiegyi amʋ lɛlɩan? Ntɛ ntɔ nɔ́pʋkapʋ mʋ́?

¹⁹ Igyi fɛ takyi-akpin ibi, oyin ɔkʋ lodu wa mʋ ndɔtɔ. Ɩlɛdan mli oyi yile, mbubwi bʋtogyonka mʋ́ abambitɔ.”

Bodobodotu-afa Yebi

²⁰ Yesu lɛtra blɩ ɔbɛɛ, “Ntɔ mpʋkapʋ Bulu iwiegyi amʋ?

²¹ Igyi fɛ Bodobodotu-afa ánɩ́ ɔtsɩ ɔkʋ lɔpʋtsɩa bodobodo nfuo kɛntɛ kʋlɛ, ɩlɛha mʋ́ ilotu.”

Obu-ɔnɔ Kplanhɛ

²² Brɛá Yesu ɔyɔ Yerusalem a, ɔlɔtsʋn nkudasɩ pʋ́ awulusʋ. Ɔna ɔdɛ amʋ́ atɔ suna.

²³ Ɔha ɔkʋ lɛfɩtɛ mʋ ɔbɛɛ, “Owie, aha kpalobi kʋ obénya nkpa?” Yesu lɛbla aha amʋ ɔbɛɛ,

²⁴ “Mlɩbɔ mbɔdɩ amlɩtsʋn obu-ɔnɔ kplanhɛ amʋtɔ. Tsufɛ aha tsɔtsɔɔtsɔ bɔ́bɔ mbɔdɩá bɔ́tsʋn wie ɩnʋ, tamɛ bʋmɛ́ɛtalɩ.

²⁵ Tamɛ nɩ woyi mʋ wie ɔkʋsʋ fin obu amʋ, mlɛba bɛlɩɩ klʋn ɔma, da klʋn amʋsʋ mlɩaa, ‘Owie, finki ha anɩ!> a, ɔbɛ́bla mlɩ ɔbɛɛ, ‘Mmeyin mlɩ. Mmeyin ɔtɩnɛá mlotsu.>

²⁶ Ɩnʋ mlɛ́blɩ mlɩaa, ‘Anɩa fʋnyɔ letsia gyi atɔ, nun nta. Fetsia suna atɔ anɩ dɩnsʋ!>

²⁷ Tamɛ ɔbɛ́lɛ mʋ́ ɔnɔ ɔbɛɛ, ‘Mmeyin mlɩ. Mmeyin ɔtɩnɛá mlotsu. Mlɩnatɩ tɛɩ mɩsʋ, mlɩ lalahɛ abwɛpʋ fɛ́ɛ́!>

²⁸ Nɩ mlowun Abraham, Isakɩ, Yakob pʋ́ Bulu ɔnɔsʋ atɔɩpʋ amʋ fɛ́ɛ́ bʋbʋ Bulu iwie ogyikpa, tamɛ bʋmɛha mlɩ mʋ́ ɔkpa amlɩwie ɩnʋ a, ɩnʋ mlósu kpisi nɩ.

²⁹ Aha bótsu owi ɔdalɩkpa pʋ́ owi ɔkplɩwiekpa, bɩnasʋ mʋ́a gyɔpɩsʋ ba betsia atɔ ogyikpa Bulu iwiegyi amʋtɔ.

³⁰ Ɔnɔkwalɩ, amapʋ akʋ bémli agyankpapʋ; agyankpapʋ akʋ ɛ bémli amapʋ.”

Yesu Losu Ha Yerusalem

³¹ Ɩnʋ Farisifɔ akʋ bɛba Yesu wa bɛbla mʋ bɛɛ, “Dalɩ Galilea ɔmátɔ nfɩ, tsufɛ ɔmásʋ ogyipʋ Herode dekleá ɔbɔ́mɔ fʋ.”

³² Yesu lɛbla amʋ́ ɔbɛɛ, “Mlɩyɛbla ɔkpataku amʋ mlɩaa, ‘Négya ɔŋɛ lalahɛ lɛ ahatɔ, tsa aha ɩlɔ ndɛ, gya lɛ ɔkɛ, mɔ mʋ́ ɔnɔ klaɩ.>

³³ Tamɛ ilehian ánɩ́ nɔ́yɔ mɩ ɔnatɩ amʋsʋ ndɛ, ɔkɛ mʋ́a klaɩ. Tsufɛ ɔkpa ma ɩnʋá bɔ́mɔ Bulu ɔnɔsʋ ɔtɔɩpʋ ɔkʋkʋ ɔtɩnɛtɩnɛ, dʋn Yerusalem!

³⁴ “Oo Yerusalemfɔ, Yerusalemfɔ! Mlɩtɔmɔ Bulu ɔnɔsʋ atɔɩpʋ, da abiá Bulu lawa sɩsɩ mlɩ abwi mɔ nɩ. Ntekleá nóbun mlɩ abisʋ bregyibrɛ, fɛ alɩá batɛ tobun mʋ abisʋ; tamɛ mlɩtamaha mɩ ɔkpa.

³⁵ Mlɩkɩ, Bulu obési mlɩ ɔtswɛkpa tswɩ mlɩ. Ndɛ mlɩ bla mbɛɛ, mlɩmɛ́ɛtra wun mɩ ɛkɛkɛɛkɛ, yɔfʋn ɛkɛá mlɛ́blɩ mlɩaa, ‘Bulu oyula ɔha amʋʋ ɔba mʋ ɩdatɔ> amʋ.”