Hebrifɔ 9 - Bulu Ntam Pɔpwɛ mʋ́a Israel Ɩlʋ

Ɔsʋlʋsʋ Mʋ́a Ɔsʋsʋ Bulusum

¹ Bulusum mbla letsia Bulu ntam dada amʋtɔ. Bɔbwɛ tati-obu ánɩ́ bósum Bulu mʋ́tɔ ɔsʋlʋsʋ nfɩ.

² Bɔpʋ tati tin tati-obu amʋ ɔnɔ, bɔpʋ ɩkʋlɛ ɛ ka mʋ́tɔ. Bɛtɩ obu gyankpapʋ amʋtɔ bɛɛ, Ɔwankɩkpa. Ɔkandɩɛ-oyiá bʋtonywɛ nkandɩɛ bian mʋ́sʋ pʋ́ ɔpʋnʋá bodobodoá bapʋha Bulu igyi dɩn mʋ́sʋ bʋ ɩnʋ.

³ Obu nyɔsɩ amʋʋ ɩbʋ tati nyɔsɩ amʋ ɔma amʋtɔ bʋtɛtɩ Ɔwankɩkpatɔ Ɔwankɩkpa nɩ.

⁴ Sika pɛpɛ afɔdɩɛ-ɔswɩ bʋ ɩnʋ. Bulu Ntam-daka ánɩ́ bɔpʋ sika pɛpɛ piata mʋ́ ɩwɩ fɛ́ɛ́ ɛ itsie ɩnʋ. Bʋtɔwa ɔhɩɛn ogya afɔdɩɛ-ɔswɩ amʋsʋ. Atoku asa bʋ Bulu Ntam-daka amʋtɔ. Mʋ́gyi, sika pɛpɛ ɔlankabiá atogyihɛ kʋá bɛtɩ mʋ́ mana bʋ mʋ́tɔ, Aaron oyi yiahɛ amʋʋ ɩlɔpɔɩ amʋ pʋ́ abwi pɛtɛplɛ anyɔ amʋʋ Bulu lɔwanlɩn mʋ mbla dɩnka mʋ́sʋ amʋ ɛ bʋ mʋ́tɔ.

⁵ Bɔbwɛ akerub anyɔá bʋbʋ numnyam, bʋgyi ntobi akʋá bʋbʋ abamba dɩnka Ntam-daka amʋ obuasʋsʋ. Amʋ́ fɛ́ɛ́ bɛtɩnkɩ amʋ́ abamba fia aba, ilobun daka amʋsʋ. Amʋ́ nsɩnɛ ɩnʋ Bulu tesi aha lakpan kie amʋ́ nɩ. Tamɛ megyi sei abɛ́lɛ asʋn anfɩ asɩ.

⁶ Alɩ bɛla ntobi amʋ yaɩ ɩnʋ nɩ. Bulu igyi ahapʋ amʋ bʋtowie obu gyankpapʋ, igyi Ɔwankɩkpa amʋtɔ ekekegyiɛkɛ yɔyɔ amʋ́ agyʋma.

⁷ Bulu igyi ɔhapʋ dɛhɛn pɛ towie obu nyɔsɩ, igyi Ɔwankɩkpatɔ Ɔwankɩkpa amʋtɔ. Ɔtsawʋlɛ pɛ otowie ɩnʋ ofitɔ. Ilehian ánɩ́ ɔbɔ́pʋ ɔbwɩ obugya ánɩ́ ɔbɔ́pʋbɔ afɔdɩɛ ha Bulu mʋ onuto nwunsʋ pʋ́ aha lakpan ánɩ́ bɔbwɛ, bʋmeyin sʋ ya ɩnʋ.

⁸ Tɔá Ɔŋɛ Wankɩhɛ amʋ desuna tsu ntobi anfɩ ɩwɩ gyi, Ɔwankɩkpatɔ Ɔwankɩkpa ɩnʋ ɔkpa lefin wa amʋ́ brɛá tati-obu amʋ gyi amʋ́ Bulu ɔtswɛkpa.

⁹ Ɩnɩ igyi atosuanhɛ ha ndɛ ɔyɩkɛhɛ. Idesuna ánɩ́ ɩbʋ mʋ́tɔá bʋtɔpʋ atɔ hahɛ pʋ́ afɔdɩɛ-abɔtɔ ha Bulu igyi. Tamɛ ɩmɛ́ɛtalɩ ha mʋ́ ɔhapʋ amʋ klʋn isi mʋ ɩpɔn ha ánɩ́ mʋ ɩwɩ latɩn tsu mʋ lakpantɔ.

¹⁰ Tsufɛ ntobiá igyi atogyihɛ, atonunhɛ pʋ́ amandɩɛá nyankpʋsa tɔpʋgyʋra ɩwɩ kɛkɛ mbla amʋ losuna. Bulu lɔbwɛ mbla amʋ fɛ́ɛ́ ha nyankpʋsa, ánɩ́ ɔkɩta mʋ́tɔ bɔfʋn brɛ anfɩ alabwɛ ɔkpa pɔpwɛá bɔ́pʋbwɛ mʋ́ anfɩ, anɩmɛ́ɛtra bwɛ dada amʋ.

¹¹ Kristo labɔbwɛ Bulu igyi ɔhapʋ dɛhɛn ha atɔ wanklaan amʋʋ ɩlaba amʋ. Mʋ tati-obu ánɩ́ ɔbʋ mʋ́tɔ bʋ ɔsʋsʋ. Ɩnʋ tati-obu amʋ dʋn ɔsʋlʋsʋ klɛ, ɩlɔfʋn dʋn mʋ́ ɛ. Megyi nyankpʋsa lɔbwɛ mʋ́ mʋ́, imotsu ɔyɩ anfɩtɔ ɛ.

¹² Megyi atrʋkpa pʋ́ nnantswie yinhɛ obugya Kristo lɔpʋya Ɔwankɩkpatɔ Ɔwankɩkpa ɩnʋ. Mʋ onuto obugya ɔlɔpʋya ɩnʋ, ɔlɔpʋka anɩ nwunsʋ ɩkɔ ɔtsawʋlɛ pɛ, anɩlenya nkpa ánɩ́ ɩtamata.

¹³ Mose mbla amʋ ɔnɔ a, akpala pʋ́ nnantswie obugya pʋ́ ɔnantswiebiá bawa mʋ ogya, alahɔ nsuo bʋtowunya wʋlɩ aha ánɩ́ ifin lada amʋ́, pʋgyʋra amʋ́.

¹⁴ Nɩ bɛtalɩ bʋdɛ mbwɩ obugya kʋraa pʋtɩn aha ɩwɩ a, ntogyi sʋ Kristo obugya mɛ́ɛtalɩ tɩn aha ɩwɩ dʋn? Kristo lɔtsʋn Ɔŋɛ amʋʋ ɩbʋ ɩnʋ brɛ fɛ́ɛ́ amʋsʋ, pʋ mʋ ɩwɩ lɛ mbusuo ánɩ́ ɩlɔfʋn ha Bulu. Mʋ obugya amʋ ɩbɛ́tɩn ánɩ́ klʋntɔ tsu bwɛhɛá ɩbɛ́kpa ánɩ́ wa lowutɔ ɩwɩ, mɛnɩ abɛ́talɩ sum Bulu Ɔkɩankpapʋ amʋ.

¹⁵ Ɩnɩ sʋ Kristo gyi ntam pɔpwɛ ánɩ́ ɔbʋ Bulu mʋa anyankpʋsa nsɩnɛ ɔma ɔlɩɩpʋ, mɛnɩ aha amʋʋ Bulu latɩ amʋ bénya atɔ amʋʋ ɩtamayinta, ɔlɛhɩɛ yaɩ ha amʋ́ amʋ. Tsufɛ Kristo lowu amʋ ɩlaha amʋ́ bagyi ɩwɩ tsu lakpan amʋʋ bɔbwɛ brɛ amʋʋ bʋbʋ ntam gyankpapʋ amʋ asɩ amʋtɔ.

¹⁶ Nɩ ɔkʋ ɔwanlɩn nhɩhɩɛ ha mʋ atɔtɔye tswɩ a, otowu asa ɩtɔyɔ agyʋma.

¹⁷ Tsufɛ nhɩhɩɛ amʋ ɩma labi brɛá ɔha amʋ onuto tsie nkpa. Mʋ lowu ɔma ɩtɔwa labi.

¹⁸ Ɩnɩ sʋ bɔpʋ obugya si Bulu ntam gyankpapʋ amʋ ɛsʋ asa ɩlɔyɔ agyʋma nɩ.

¹⁹ Tsufɛ brɛá Mose lɛkla mbla amʋ fɛ́ɛ́ suna Israelfɔ ta a, ɔlɔpʋ ntsu fra nnantswie pʋ́ akpala obugyatɔ, pʋ́ kufa ɩwɩ imi pɛpɛ mʋ́a ɔtsandɩ wunya obugya frahɛ amʋ wʋlɩ mbla ɔwʋlʋ amʋ pʋ́ aha amʋ fɛ́ɛ́sʋ.

²⁰ Mʋʋ ɔlɛblɩ ɔbɛɛ, “Obugya ánɩ́ ndɛpʋsi ntam ánɩ́ Bulu laka ha mlɩsʋ nɩ.”

²¹ Alɩ kɛn ɔlɔpʋ obugya amʋ kʋ wunya tati-obu pʋ́ ntobi amʋʋ bʋtɔpʋtswɛ Bulu amʋ fɛ́ɛ́sʋ nɩ.

²² Lɛlɛ mʋ́ Bulu mbla amʋ ɔnɔ a, abɛ́talɩ blɩ anɩaa, obugya bʋtɔpʋgyʋra togyitɔ. Nɩ bʋmɔpʋ obugya lɛ mbusuo a, lakpansikie tamaba.

Kristo Afɔdɩɛ Tɛlɛ Anɩ Tsu Lakpantɔ

²³ Alɩ ilehian ánɩ́ bɔ́bwɛ amandɩɛ anfɩ pʋgyʋra ntobi anfɩ igyi fɛ ɔsʋsʋ klɛ amʋ nɩ. Tamɛ ɔsʋsʋ klɛ amʋ ilehian afɔdɩɛ ánɩ́ ɩhɩɛ dʋn ɔsʋlʋsʋ klɛ anfɩ.

²⁴ Ɩnɩ sʋ Kristo mowie tati-obuá nyankpʋsa lɔpʋ mʋ ɩbɩ bwɛ, igyi fɛ ɔsʋsʋ klɛ amʋ odutɔ nɩ. Ɔsʋsʋ ɔlɔyɔ yɛlɩɩ Bulu ansɩtɔ, ɔdɛ mʋ kokoli ha anɩ.

²⁵ Ɔmɔpʋ mʋ ɩwɩ yɔbɔ afɔdɩɛ tsenyɔ-tsesa, fɛ alɩ amʋʋ Bulu igyi ahapʋ dɛhɛn amʋ bʋtɔpʋ mbwɩ obugya ya ɔsʋlʋsʋ Ɔwankɩkpatɔ Ɔwankɩkpa ɩnʋ ofifigyiofi amʋ.

²⁶ Nɩ alɩ igyi a, tɛkɩ ilehian ánɩ́ Kristo obétsia wun ɩwɩɔsɩn wu tse du tse lafa, tsu brɛá ɔyɩ lefi asɩ ɔpá. Mboun alalɛ ɩwɩ ɔwan ɔyɩ ɔnɔmɔbɩ anfɩ, pʋ mʋ ɩwɩ bɔbɔ afɔdɩɛ ɔtsawʋlɛ pɛ pʋlɛ aha tsu amʋ́ lakpantɔ.

²⁷ Igyi fɛ alɩá ɩda yaɩ ánɩ́ ɔtsawʋlɛ pɛ ɔha obówu. Mʋ́ ɔma a, Bulu obégyi mʋ asʋn.

²⁸ Alɩ kɛn Kristo lɔpʋ mʋ ɩwɩ bɔ afɔdɩɛ ɔtsawʋlɛ pɛ, pʋlɛ aha tsɔtsɔɔtsɔ tsu amʋ́ lakpantɔ nɩ. Mʋ́ sʋ nɩ ɔlɛ ɩwɩ ɔwan otse nyɔsɩ a, imehian ánɩ́ ɔbɛ́tra bwɛ tɔtɔ tsu lakpan ɩwɩ. Mboun aha ánɩ́ bʋhɩɛ bʋtsie bʋgyo mʋ nkpa ɔba bɔhɔ.