Hebrifɔ 8 - Bulu Ntam Pɔpwɛ mʋ́a Israel Ɩlʋ

Anɩ Igyi Ɔhapʋ Dɛhɛn

¹ Asʋn ánɩ́ ndɛblɩ fɛ́ɛ́ gyi, anɩbʋ Bulu igyi ɔhapʋ dɛhɛn ánɩ́ ogyi alɩ, otsie Bulu Otumipʋ amʋ obia gyɔpɩsʋ ɔsʋsʋ.

² Ɔdɛ Bulu igyi ha Ɔwankɩkpatɔ Ɔwankɩkpa onuto ánɩ́ ɩbʋ ɔsʋsʋ ɩnʋ. Mʋ́ mʋ́ a, Bulu onuto leyi mʋ́, megyi nyankpʋsa.

³ Bulu igyi ɔhapʋ dɛhɛn okugyiɔkʋ mʋ agyʋma gyi, ɔbɔ́pʋ aha amʋ atɔ hahɛ pʋ́ amʋ́ afɔdɩɛ-abɔtɔ ha Bulu. Ɩnɩ sʋ ilehian ánɩ́ anɩ Bulu igyi ɔhapʋ dɛhɛn Kristo ɛ obénya tɔá ɔbɔ́pʋha Bulu.

⁴ Nɩ ɔsʋlʋ anfɩsʋ ɔbʋ a, tɛkɩ ɔmɔ́ɔbwɛ Bulu igyi ɔhapʋ ɛkɛkɛɛkɛ. Tsufɛ Bulu igyi ahapʋ onuto bʋbʋ ɩnʋá bʋtɛha Bulu igyi Mose mbla ɔnɔ.

⁵ Igyi ahapʋ amʋ bʋtɔtswɛ Bulu igyi ɔhakpa ánɩ́ ɩlɛlɩan ɔsʋsʋ tati-obu amʋ. Ɩnɩ sʋ Bulu lɛda Mose ɔla brɛá ɔbɔ́bwɛ tati-obu amʋ ɔbɛɛ, “Kɩá fɔ́bwɛ togyitɔ fɛ obu amʋʋ nɛlɛ suna fʋ ɩbʋsʋ ɩnʋ amʋ odu pɛpɛɛpɛ.”

⁶ Tamɛ Yesu igyiha agyʋma amʋʋ Bulu lɛha mʋ amʋ lɛhɩɛ fʋa dʋn ɔsʋlʋsʋ igyi ahapʋ dɛhɛn amʋ klɛ. Ntam pɔpwɛ amʋʋ ɩbʋ anɩa Bulu nsɩnɛ, Yesu gyi mʋ́ ɔma ɔlɩɩpʋ amʋ ɛ ɩhɩɛ bʋ alɛ dʋn ntam dada amʋ. Tsufɛ ɔlɛhɩɛ atoyileá mɔ́bwɛ ha anɩ wa mʋ́tɔ.

⁷ Ntam gyankpapʋ amʋ ɩmɔfʋn. Nɩ ɩlɔfʋn a, tɛkɩ nyɔsɩ mɛtra hian.

⁸ Tamɛ Bulu lowun ánɩ́ anyankpʋsa bʋmɛbɩ bwɛ. Mʋ́ sʋ ɔlɛblɩ ɔbɛɛ, “Ɛkɛ ɔkʋ ɩba. Mɩ mlɩ Wie dɛblɩ. Mɩa Israelfɔ pʋ́ Yudafɔ abɛ́ka ntam pɔpwɛ.

⁹ Ɩmɔ́ɔbwɛ fɛ mʋ́ amʋʋ iletsia mɩa amʋ́ anain nsɩnɛ, brɛ amʋʋ nɛkɩta amʋ́ ɩbɩ, kpa amʋ́ dalɩ Egyipte ɔsʋlʋsʋ amʋ. Tsufɛ bʋmegyi mɩ ntam amʋsʋ. Ɩnɩ sʋ nesi amʋ́ ɩwɩ ha amʋ́.

¹⁰ Ntam anfɩ obétsia mɩa Israelfɔ nsɩnɛ ɛkɛ amʋ nɩ. Mɩ mlɩ Wie dɛblɩ. Nɔ́pʋ mɩ mbla wa amʋ́ nwuntɔ. Nɔ́wanlɩn mʋ́ dɩnka amʋ́ klʋnsʋ. Nɔ́bwɛ amʋ́ Bulu, amʋ́ ɛ bɔ́bwɛ mɩ aha.

¹¹ Amʋ́tɔ ɔkʋkʋ mɛ́ɛtra suna mʋ pio, ntɛ mʋ ba ɔbɛɛ, ɔbɩ Bulu. Tsufɛ amʋ́ fɛ́ɛ́ bɛ́bɩ mɩ. Tsu nyebisʋ yɔfʋn ahandɛsʋ.

¹² Nési amʋ́ lakpan kie amʋ́. Mmɛ́ɛtra kaɩn lalahɛá babwɛsʋ.”

¹³ Nɩ anɩ Wie dɛ ntam pɔpwɛ ɩwɩ asʋn blɩ a, mʋmʋ ilosuna ánɩ́ dada amʋ ɩtra ma labi mʋ ansɩtɔ. Tɔá ɩladan bwɛ dada a, wu itowu.