Hebrifɔ 7 - Bulu Ntam Pɔpwɛ mʋ́a Israel Ɩlʋ

Bulu Igyi Ɔhapʋ Melkisedek

¹ Melkisedek anfɩ a, Salem owie ogyi. Ɔlɔbwɛ ɔsʋsʋʋsʋ Bulu amʋ igyi ɔhapʋ. Ɛkɛ ɔkʋ Abraham lɔyɛkɔ awie abana akʋ ɩsa, gyi amʋ́sʋ. Brɛá oleyinki ɔba a, olefia Melkisedek. Melkisedek loyula mʋ.

² Abraham leye atɔá olenya tsu ɩsa amʋtɔ idu, ɔlɔpʋ idusɩ ha Melkisedek. Ɩda anfɩ asɩ gyi, “Yilebwɛ Owie.” Mʋ ɩda kʋlɛ ɛ gyi “Iwilwii Owie”, tsufɛ Salem asɩ gyi, “Iwilwii.”

³ Bulu asʋn mɛblɩ asʋansʋ tsu Melkisedek akwɩɩpʋ ntɛ mʋ otuntufla, mʋ kwɩɩ ntɛ mʋ lowu ɩwɩ. Ɔlɛlɩan Bulu mʋ Bi amʋ. Bulu igyi ɔhapʋ ogyi brɛ fɛ́ɛ́tɔ.

⁴ Mlɩkɩ alɩá Melkisedek gyi ɔha kpɔnkpɔɔnkpɔntɩ ɔkʋ. Anɩ nain Abraham kʋraa leye mʋ atɔá olenya tsu ɩsatɔ idu, pʋ iku-kʋlɛ ha mʋ.

⁵ Mose Mbla lɛha Lewi abi-aná, bʋgyi igyi ahapʋ amʋ ɔkpa ánɩ́ bʋhɔ atɔye idutɔ tsu amʋ́ aha Israelfɔ wa. Ɩbʋ mʋ́tɔá Abraham abi-aná amʋ́ ɛ bʋgyi.

⁶ Melkisedek anfɩ motsu Lewi abi-anátɔ, tamɛ ɔlɔhɔ Abraham atɔye idutɔ kʋlɛ, yula Abraham mboun amʋʋ Bulu lɛka ntam ha amʋ.

⁷ Nwɛngyi ma mʋ́ ɩwɩ ánɩ́ ɔha ánɩ́ otoyula dʋn ɔmʋá bʋdeyula.

⁸ Yudafɔ igyi ahapʋ amʋʋ bʋtɔhɔ Israelfɔ atɔ idutɔ-kʋlɛ amʋ bʋtowu, tamɛ ɔlɔhɔ Abraham atɔye idutɔ-kʋlɛ anfɩ mʋ́ tra otsie nkpa, fɛ alɩá Bulu asʋn wanlɩnhɛ amʋ dɛblɩ.

⁹ Nɩ anɩmɔ́ɔwa afunu a, abɛ́talɩ blɩ anɩaa, brɛ amʋʋ Abraham lɔpʋ mʋ atɔ idutɔ-kʋlɛ ha mʋ amʋ a, Lewi abusuan amʋʋ bʋtɔhɔ Israelfɔ atɔ idutɔ-kʋlɛ amʋ ɛ bɛka mʋ́ tsʋn Abrahamsʋ.

¹⁰ Tsufɛ Lewi bʋ mʋ nain Abraham ɩwɩtɔ, bʋmɔkʋnya kwɩɩ mʋ asa mʋ nain lɔpʋ mʋ atɔ idutɔ-kʋlɛ ha Melkisedek.

¹¹ Ɩbʋ mʋ́tɔá Mose mbla amʋ lɛblɩá Bulu igyi ahapʋ bʋtsu Lewi abusuantɔ. Nɩ bɛ́talɩ ha ɔha ɔbɔ́fʋn a, tɛkɩ Bulu mɛtra lɛ mʋ igyi ɔhapʋ bamba ánɩ́ ogyi fɛ Melkisedek, omotsu Aaron abusuantɔ.

¹² Nɩ bɛtsɛ igyi ahapʋlɛ mbla amʋ a, mʋmʋ ilehian ánɩ́ bɛ́tsɛ Mose mbla amʋ ɛ.

¹³ Tsufɛ anɩ Wie anfɩ anɩdɛ mʋ ɩwɩ asʋn blɩ anfɩ otsu abusuan bambatɔ. Abusuan anfɩtɔ ɔhaa mɔkʋsum afɔdɩɛ-ɔswɩ amʋsʋ kɩ.

¹⁴ Ɔhagyiɔha yin ánɩ́ Yuda abusuantɔ anɩ Wie anfɩ otsu. Mose mɛtɩ abusuan anfɩ ɩda brɛá ɔdɛ abusuan oduá bɔ́bwɛ Bulu igyi ahapʋ ɩwɩ asʋn blɩ.

Bulu Igyi Ɔhapʋ Bamba Ánɩ́ Ogyi Fɛ Melkisedek

¹⁵ Bulu mbla anfɩ tsɛ latra wankɩ anɩ tsɩa, tsufɛ igyi ɔhapʋ bamba labɛlɛ ɩwɩ ɔwan fɛ Melkisedek.

¹⁶ Mbla dada amʋ ilosuna ánɩ́ Lewifɔ nkʋlɛ ɔbwɛ igyi ahapʋ, tamɛ megyi bɛɛ mʋ anain botsu Lewifɔtɔ sʋ ɔlɔbwɛ igyi ɔhapʋ. Mboun mʋ nkpa ánɩ́ ɩmɔ́ɔmɔ ɔnɔ ɛkɛkɛɛkɛ tumitɔ ɔna ɔlɔbwɛ igyi ɔhapʋ.

¹⁷ Tsufɛ bɔwanlɩn wa Bulu asʋn amʋtɔ bɛɛ, “Bulu igyi ɔhapʋ fʋgyi brɛ fɛ́ɛ́tɔ, fɛ Melkisedek.”

¹⁸ Idesuna ánɩ́ balɛ igyiha mbla dada amʋ ibwi, tsufɛ ɩmɔwa ogya, ɩmɔwa labi ɛ.

¹⁹ Tsufɛ Mose mbla amʋ mɛtalɩ bwɛ tɔtɔɔtɔ ɩfʋn. Sei a, Bulu lapʋ anɩ ɔkpakɩ wanklaan ánɩ́ ɩdʋn mbla dada amʋ yaɩ mʋ́ otsiakpa. Mʋ́á ɩbɛ́kpɩa anɩ manta Bulu.

²⁰ Bulu lɛka Yesu ɩwɩ ntam ánɩ́ ɔbɔ́bwɛ mʋ igyi ɔhapʋ brɛ fɛ́ɛ́tɔ. Ɔmɛka igyi ɔhapʋ bamba ɔkʋkʋʋkʋ ɩwɩ ntam.

²¹ Yesu ɩwɩ ntam ánɩ́ ɔlɛka brɛá ɔlɔbwɛ mʋ igyi ɔhapʋ gyi, “Mɩ Bulu, naka mɩ ɩwɩ ntam ánɩ́ igyi ɔhapʋ fʋgyi brɛ fɛ́ɛ́tɔ. Mmɛ́ɛlatsɛ mɩ agywɩɩn!”

²² Ɩna ntam anfɩ sʋ Yesu labɔbwɛ ɔma ɔlɩɩpʋ ha Bulu nhɩhɩɛá ɩhɩɛ bʋ alɛ dʋn nhɩhɩɛ dada amʋ.

²³ Bulu igyi ahapʋ amʋʋ betsia nhɩhɩɛ dada amʋ ɔnɔ amʋ bʋhɩɛ bʋtsɔ, tsufɛ bʋtowu si agyʋma amʋ tswɩ.

²⁴ Yesu mʋ́ bʋ ɩnʋ brɛ fɛ́ɛ́tɔ. Mʋ́ sʋ mʋ Bulu igyiha mɔ́ɔmɔ ɔnɔ ɛkɛkɛɛkɛ.

²⁵ Mʋ́ sʋ ɔtɛtalɩ hɔ aha ánɩ́ bʋtɔtsʋn mʋsʋ ba Bulu wa fɛ́ɛ́ nkpa plɩplɩplɩ. Tsufɛ otsie Bulu wa, ɔdɛ mʋ kokoli amʋ́ nwunsʋ brɛ fɛ́ɛ́tɔ.

²⁶ Yesu gyi Bulu igyi ɔhapʋ dɛhɛn onutoá anɩdehian nɩ. Mʋ ɩwɩ lɛtɩn, tsitsa kʋkʋ ɩma mʋ ɩwɩ. Lalahɛ kʋkʋʋkʋ ɛ ɩma mʋtɔ. Bulu lɛlɛ mʋ lɛ lakpan abwɛpʋ ɔkpasʋ, ha mʋ otsiakpa fʋahɛ ɔsʋsʋʋsʋ.

²⁷ Imehian ánɩ́ mʋ mʋ́ obégyankpa bɔ mʋ lakpan ɩwɩ afɔdɩɛ, fɛ igyi ahapʋ dɛhɛn atrahɛ amʋ. Amʋ́ mʋ́ betsia bɔ ha amʋ́ onuto lakpan ekekegyiɛkɛ, asa bɔtɔbɔ ha aha. Ɔtsawʋlɛ pɛ mʋ mʋ́ ɔlɔbɔ afɔdɩɛ ha aha fɛ́ɛ́ lakpan, brɛá ɔlɔpʋ mʋ ɩwɩ bɔ afɔdɩɛ aha fɛ́ɛ́ nwunsʋ.

²⁸ Mose mbla lɛha aha ánɩ́ bapɔn bɔbwɛ Bulu igyi ahapʋ dɛhɛn. Tamɛ mbla amʋ ɔma a, Bulu lɛka ntam lɛ mʋ Bi. Alaha mʋ Bi amʋ labwɛ mʋ igyi ɔhapʋ dɛhɛn ánɩ́ ɔlɔfʋn brɛ fɛ́ɛ́tɔ.