Hebrifɔ 6 - Bulu Ntam Pɔpwɛ mʋ́a Israel Ɩlʋ

¹ Mʋ́ sʋ mlɩmátra bɩtɩa anɩ ayabi ya ɔma. Mlɩha akasɩ mʋ́á ɩbɛ́ha anɩ abɔ́yɔ nkpa, asi Kristo ɩwɩ atosunahɛ gyankpapʋ amʋtɔ pla lapla. Mehian ánɩ́ abɛ́tra suna atɔ tsu Bulu-hogyi pʋ́ klʋntɔdamli tsu bwɛhɛá ɩtɛtɩ lowu ɩwɩ,

² atosunahɛ tsu asubɔ, ɩbɩ pʋdɩnka ɔhasʋ, Afulikʋsʋ pʋ́ Bulu asʋngyi ɛkɛ trahɛ amʋ ɩwɩ.

³ Nɩ Bulu lotsula a, mʋmʋ mʋ́á ɩbɛ́ha abɔ́yɔ nkpa sɔɔn abósuna mlɩ ngya.

⁴ Nɩ aha ánɩ́ bawun Bulu wankɩ amʋ kɩ, bada ɔsʋsʋ atokiehɛ ɔnɔ kɩ, banya Ɔŋɛ Wankɩhɛ amʋ ɛ kɩ,

⁵ bada Bulu asʋn amʋʋ ɩbʋ alɛ amʋ pʋ́ brɛ amʋʋ ɩbɛ́ba amʋtɔ tumi ɔnɔ kɩ,

⁶ mʋ́ ɔma bɛdɩda hogyitɔ a, bʋtamatalɩ tra damli klʋntɔ. Tsufɛ amʋ́ onuto amʋ tra bʋdɛ Bulu mʋ Bi amʋ da manta oyikpalihɛsʋ, tsu mʋ́ lɩɩ bɛɛ, aha bʋbwɛ mʋ ahinla nɩ.

⁷ Anyankpʋsa akʋ bʋgyi fɛ ɔsʋlʋá itonun ntsuá nyankpʋ detswie wʋlɩ mʋ́sʋ. Mʋ́sʋ atɔ tɔwa alɛ, wa labi ha aha amʋ sʋ amʋʋ bɔdɔ mʋ́ amʋ. Bulu toyula alɩ aha anfɩ odu.

⁸ Tamɛ akʋ ɛ bʋgyi fɛ ɔsʋlʋá tʋnkpa mʋ́a awu aná tɔkwɛ mʋ́sʋ, bʋtamawa labi. Nɩ bʋmɛkɩ wanklaan a, Bulu ɔbɔ́lwɩɩ amʋ́, wa amʋ́ ogya.

⁹ Tamɛ apio adwɛpʋ, nɩ ndɛ ɩnɩ blɩ o a, opuni mɛdɛ mɩ tsii. Tsufɛ nyin ánɩ́ mlɩdɛ atɔ wanklaan bwɛ, idesuna ánɩ́ Bulu lahɔ mlɩ nkpa.

¹⁰ Tsufɛ tɔá ɩda ɔkpa Bulu tɔbwɛ. Ɔmɛ́ɛtan mlɩ gyumagyihɛ pʋ́ ɔdwɛá mlɩlalɛ suna mʋ tsu mʋ ahatsatɔ, mlɩtra mlɩbʋ mʋ́sʋ.

¹¹ Nhɩɛ ndekle mbɛɛ, mlɩtɔ okugyiɔkʋ ɔbɔ́wa ɩwɩ ɔwʋnlɩn, bwɛ mʋ́ yɔfʋn mʋ́ ɔnɔmɔ, fówun ɩtɔ amʋʋ mlɩ ansɩ dɩn mʋ́sʋ amʋ ɩbɛ́ba mʋ́tɔ ha mlɩ.

¹² Mmedekleá mlɩ mli ɔŋɛtɔ awʋlɩyɔpʋ. Mboun mlɩkasɩ aha amʋʋ amʋ́ hogyi pʋ́ amʋ́ ɩklʋnya sʋ amʋ́ ɩbɩ bɛ́da ɩtɔ amʋʋ Bulu lɛhɩɛ yaɩ amʋ.

Bulu Lɛdɩnka Ibwi Tɔá Ɔlɛhɩɛ Yaɩsʋ

¹³ Brɛá Bulu lɛka ntam ha Abraham a, ɔhaa má ɩnʋá ɔdʋn mʋ Bulu. Mʋ́ sʋ mʋ onuto ɩwɩ ɔlɔpʋka ntam.

¹⁴ Ɔbɛɛ, “Nɛkasɛ, nɛ́hɩɛ yula fʋ. Nɛ́ha fʋ abi-aná bɛ́klɛɩ tsɔtsɔɔtsɔ!”

¹⁵ Abraham lenya klʋn. Mʋ́ sʋ olenya ɩtɔ amʋʋ Bulu lɛka ntam ɔbɛɛ, mɛ́ha mʋ amʋ.

¹⁶ Nɩ ɔkʋ ɔbɛ́ka ntam a, ɔha ánɩ́ ɔdʋn mʋ ɩda ɔtɔpʋka ntam amʋ. Isuna ánɩ́ nwɛngyi kʋkʋ ma mʋ ntam amʋ ɩwɩ.

¹⁷ Ɩnɩ sʋ brɛá Bulu dekleá obósuna aha amʋʋ ɔlɛhɩɛ tɔ amʋ ha amʋ ánɩ́ ɔmɛ́ɛtsɛ mʋ agywɩɩn ɛkɛkɛɛkɛ a, ɔlɛtanʋ mʋ ɩwɩ.

¹⁸ Bulu tamawa afunu! Mʋ tɔ amʋʋ ɔlɛhɩɛ yaɩ amʋ, pʋ́ ntam amʋ igyi atoku anyɔá ɩmɛ́ɛtsɛ ɛkɛkɛɛkɛ. Ɩnɩ sʋ anɩ aha amʋʋ anɩlasrɩ tanʋ mʋ amʋ anɩbʋ tɔá abɔ́pʋwa ɩwɩ ɔwʋnlɩn, akɩta tɔ amʋʋ anɩdɛ ɔkpa kɩ amʋtɔ kinkiinkin.

¹⁹ Anɩ ɔkpakɩ anfɩ lakɩta anɩ yaɩ, fɛ alɩá ɔtan tɛkɩta obu lɩɩ. Anɩ ɔkpakɩ anfɩ tɛkpa anɩ, anɩtɔtsʋn tati amʋʋ isian ɔsʋsʋ Ɔwankɩkpatɔ Ɔwankɩkpa obu-ɔnɔ amʋtɔ wie mʋ́tɔ.

²⁰ Anɩ sʋ Yesu lagyankpa yɔ ɔbʋ obu amʋtɔ ɩnʋ dodo. Alamli igyi ɔhapʋ dɛhɛn ánɩ́ ɔbʋ ɩnʋ brɛ fɛ́ɛ́tɔ ha anɩ, fɛ Melkisedek.