Hebrifɔ 5 - Bulu Ntam Pɔpwɛ mʋ́a Israel Ɩlʋ

¹ Lɛ bʋtɛlɛ igyi ɔhapʋ dɛhɛn okugyiɔkʋ tsu mʋ aba anyankpʋsatɔ, ɔtɛlɩɩ amʋ́ nwun Bulu ansɩtɔ. Ɔtɔhɔ atɔ hahɛ pʋ́ lakpan afɔdɩɛ-abɔtɔ tsu amʋ́ wa, pʋha Bulu igyi.

² Mʋ onuto ɛ ɔtamatalɩ gyi ɩwɩsʋ brɛ tsɔtsɔɔtsɔtɔ. Mʋ́ sʋ otenya klʋn ha aha ánɩ́ bʋmeyin ɔlala pʋ́ amʋ́á bafwɩ ɔkpa.

³ Mʋ́ sʋ ilehian ánɩ́ ɔbɔ́bɔ afɔdɩɛ ha mʋ onuto lakpan, fɛ alɩá ɔtɔbɔ ha mʋ aha.

⁴ Ɔhaa tamawa mʋ ɩwɩ numnyam ɔbɛɛ, Bulu igyi ɔhapʋ dɛhɛn mʋgyi. Mboun Bulu tɛtɩ ɔha, bwɛ mʋ mʋ igyi ɔhapʋ dɛhɛn, fɛ alɩá ɔlɔbwɛ Aaron.

⁵ Alɩ kɛn Kristo onuto ɛ mɔwa ɩwɩ numnyam ánɩ́ Bulu igyi ɔhapʋ dɛhɛn mʋgyi nɩ. Mboun Bulu lɛbla mʋ ɔbɛɛ, “Mɩ Bi gyi fʋ. Ndɛ nabwɛ fʋ Sɩ.”

⁶ Bɔwanlɩn wa Bulu asʋn amʋ ɔtɩnɛkʋ ɛ bɛɛ, Bulu ɔbɛɛ, “Bulu igyi ɔhapʋ fʋgyi brɛ fɛ́ɛ́tɔ, fɛ Melkisedek.”

⁷ Brɛá Yesu tsie nkpa ɔsʋlʋ anfɩsʋ a, ɔlɔpʋ kokoli mʋ́a isu bɔ mpaɩ, kplʋn kʋklʋkʋʋ, pʋ mʋ atɔ kʋlɩhɛ tswɩ Buluá ɔbɛ́talɩ hɔ mʋ nkpa ansɩtɔ. Mʋ ɩwɩasɩba sum Bulu sʋ Bulu lonu mʋ mpaɩ.

⁸ Ɩbʋ mʋ́tɔá Bulu mʋ Bi ogyi mʋ́, tamɛ ɔlɔtsʋn ɩwɩɔsɩntɔ asa ɔlɛtalɩ bɩ alɩá Bulu-bu ɩhɩɛ igyi.

⁹ Ɩnɩá ɔlɔbwɛ togyitɔá Bulu lɔwa mʋ bwɛ sʋ a, olemli ɔkpa ánɩ́ aha ánɩ́ bʋtobu mʋ fɛ́ɛ́ bɔ́tsʋn mʋ́sʋ nya nkpahɔá ɩtamata.

¹⁰ Bulu lɛlɛ mʋ suna ánɩ́ ogyi mʋ igyi ɔhapʋ dɛhɛn, fɛ alɩá ɔlɛyaɩ Melkisedek.

Mlɩmási Hogyi Amʋtɔ

¹¹ Mbʋ asʋn tsɔtsɔɔtsɔá abɛ́blɩ tsu Melkisedek asʋn anfɩ ɩwɩ. Tamɛ mʋ́ asɩlɛ suna mlɩ ɩbɔ́wa ɔnlɩn. Tsufɛ sei a, mlɩtra mlɩmɛdɛ asʋn asɩ nu ɔsasʋ.

¹² Tɛkɩ bɔfʋn alɩ brɛ anfɩtɔ a, mlɩlamli asunapʋ, tamɛ mlɩlɛtra hian ɔha ánɩ́ obósuna mlɩ atɔ gyankpapʋá ɩbʋ Bulu asʋn amʋtɔ. Mʋ́gyi, mlɩlehian atosuanhɛá ɩlɔpɔn fɛ nyɔpʋ-ntsu. Megyi mʋ́á ɩbʋ ɔnlɩn fɛ atɔ wɩhɛ ntɛ atogyihɛ onuto.

¹³ Tamɛ kebi bɔbwɛ tonyɔpʋ. Omeyin tɔá gyi yilebwɛ.

¹⁴ Ɔhandɛ tegyi tɔá ɩbʋ ɔnlɩn, tsufɛ alatsʋntsʋn ntobitɔ kɩ, alakasɩ bɩ yile mʋ́a lalahɛ.