Hebrifɔ 4 - Bulu Ntam Pɔpwɛ mʋ́a Israel Ɩlʋ

¹ Nhɩhɩɛ amʋʋ Bulu lɔbwɛ ɔbɛɛ, mɔ́pʋ mʋ ɔkpʋnʋ ɔdakpa ha anɩ amʋ ɩtra da. Mʋ́ sʋ mlɩha akɩ wanklaan, mɛnɩ ɩmɛ́ɛba ánɩ́ mlɩtɔ ɔkʋ oméenya ɩnʋ yɔ.

² Tsufɛ bɛda asʋn wanklaan amʋ ɔkan suna anɩ, fɛ amʋ́, tamɛ bʋmɔhɔ asʋn amʋsʋ gyi. Mʋ́ sʋ ɩmɔwa labi ha amʋ́.

³ Tsufɛ anɩ aha amʋʋ anɩlahɔ mʋ́sʋ gyi amʋ obówie mʋ ɔkpʋnʋ ɔdakpa ɩnʋ. Aha amʋʋ bʋmɔhɔ mʋ́sʋ gyi amʋ mʋ́ a, Bulu lɛblɩ tswɩ ɔbɛɛ, “Nenya ɔblɔ, ka ntam mbɛɛ, ‘Nɩ bówie mɩ ɔkpʋnʋ ɔdakpa ɩnʋ fiin! Nɛka nɔtʋn!> ” Ɩbʋ mʋ́tɔá Bulu lɛhɩhɩɛ ɔkpʋnʋ ɔdakpa ɩnʋ yaɩ tsu brɛá ɔlɛlɛ ɔyɩ ɔpá.

⁴ Tsufɛ bɔwanlɩn ɛkɛ sienɔsɩ amʋ ɩwɩ asʋn wa Bulu asʋn amʋtɔ bɛɛ, “Ɛkɛ sienɔsɩ a, Bulu lɛda ɔkpʋnʋ tsu mʋ gyumagyihɛ fɛ́ɛ́tɔ.”

⁵ Fɛ alɩá anɩlanu bɔtsʋn a, Bulu ɔbɛɛ, “Nɩ bówie mɩ ɔkpʋnʋ ɔdakpa ɩnʋ fiin! Nɛka nɔtʋn!”

⁶ Ɩnɩ desuna ánɩ́ akʋ mʋ́ bówie ɩnʋ. Tamɛ aha amʋʋ begyankpa nu asʋn wanklaan amʋ bʋmenya ɩnʋ yɔ, tsufɛ bʋmobu mʋ.

⁷ Ɩnɩ sʋ Bulu lɛtra hɩɛ ɛkɛ bamba, ɔlɛtɩ mʋ́ “Ndɛ.” Nfi tsɔtsɔɔtsɔ ɔma a, ɔlɔtsʋn Owie Dawidsʋ tɔɩ tsu alɩ ɛkɛ anfɩ ɩwɩ, fɛ alɩá ɩbʋ Bulu asʋn amʋtɔ ɔbɛɛ, “Ndɛ, nɩ mlonu Bulu ɔmɛ a, mlɩmáwa asʋtɔ-ɔnlɩn.”

⁸ Nɩ amʋ́ ɔkpapʋ Yosua lɛha bɛda ɔkpʋnʋ a, tɛkɩ Bulu mɛtra hɩɛ ɛkɛ bamba.

⁹ Ɩnɩ sʋ ɔkpʋnʋ ɔdakɛ kʋá ɩna ɔtsan ɩda gyo Bulu aha, fɛ alɩá Bulu lɛda ɔkpʋnʋ ɛkɛ sienɔsɩ amʋ.

¹⁰ Tsufɛ ɔha ánɩ́ olowie ɔkpʋnʋ ɔdakpa ɩnʋ ɛ lada ɔkpʋnʋ tsu mʋ ɛ mʋ gyumagyihɛ kugyikʋtɔ, fɛ alɩ amʋʋ Bulu lɛda ɔkpʋnʋ tsu mʋ klɛ kugyikʋtɔ amʋ.

¹¹ Mʋ́ sʋ mlɩha abɔ mbɔdɩ awie ɔkpʋnʋ ɔdakpa ɩnʋ, mɛnɩ anɩtɔ ɔkʋkʋ méesin ɔkpatɔ fɛ alɩ amʋʋ Israelfɔ bɔwa asʋtɔ-ɔnlɩn, besin ɔkpatɔ amʋ.

¹² Tsufɛ Bulu asʋn amʋ ɩbʋ nkpa, ɩtɔyɔ agyʋma. Ɩbʋ ogya dʋn ɔdayi ɩya anyɔ kugyikʋ. Ɩtɛka ɔha alɩɩ yowie mʋ ɔkla pʋ́ mʋ́ ɔŋɛ ofiakpa, mʋ ntsakpa pʋ́ mʋ awú nfɔtɔ. Itegyi anɩ agywɩɩn pʋ́ tɔá anɩtekle tsu anɩ klʋntɔ asʋn.

¹³ Tɔtɔɔtɔ tamaŋain Bulu! Togyitɔ da yaya mʋ ansɩtɔ. Mʋ abéyebu anɩ tsiatɔ akunta kugyikʋ suna nɩ.

Anɩ Bulu Igyi Ɔhapʋ Dɛhɛn

¹⁴ Anɩbʋ igyi ɔhapʋ dɛhɛn kpɔnkpɔntɩá alada fa ɔsʋsʋ yɔ ɔbʋ Bulu wa. Mʋgyi mʋ Bi Yesu. Ɩnɩ sʋ mlɩha akɩta Yesu anfɩ anɩdɛ mʋ ɩwɩ adansɩɛ gyi anfɩtɔ kinkiinkin. Anɩmádɩnkɩ ansɩ mʋsʋ.

¹⁵ Tsufɛ mʋ mʋ́ omegyi ɔha ánɩ́ omóonu anɩ asɩ nɩ anɩmɛtalɩ gyi ɩwɩsʋ. Ogyi ɔha ánɩ́ bɔsɔ mʋ kɩ ɔkpagyiɔkpasʋ fɛ anɩ, tamɛ ɔmɔbwɛ lakpan ɛkɛkɛɛkɛ.

¹⁶ Ɩnɩ sʋ mlɩha awa klʋn, ayɔ Awɩtɔlɛpʋ Bulu obia asɩ. Fówun obówun anɩ nwɛ, wa awɩtɔlɛ, kpa anɩ anɩ ohiankɛ.