Hebrifɔ 3 - Bulu Ntam Pɔpwɛ mʋ́a Israel Ɩlʋ

Yesu Dʋn Mose

¹ Ɩnɩ sʋ apio aba ánɩ́ Bulu latɩ mlɩ wa ɔsʋsʋ ayɔpʋtɔ, mlɩpʋ ansɩ dɩnka Yesusʋ. Mʋgyi Bulu sumbi ɔyɔpʋ pʋ́ mʋ igyi ɔhapʋ dɛhɛn amʋʋ anɩdɛ mʋ ɩwɩ asʋn blɩ amʋ nɩ.

² Ɔlɔwa ɔnɔkwalɩ ha Bulu, Bulu lɛlɛ mʋ ɔbɛɛ, ɔbɔ́yɔ mʋ agyʋma fɛ alɩ amʋʋ Mose lɔwa ɔnɔkwalɩ ha Bulu, Bulu lɔpʋ mʋ woyi fɛ́ɛ́ wa mʋ ɩbɩtɔ amʋ.

³ Tamɛ obú bʋ Yesusʋ dʋn Mose, fɛ alɩá bʋtobu woyi oyipʋ dʋn woyi amʋ.

⁴ Woyigyiwoyi a, ɔha leyi mʋ́, tamɛ atɔ fɛ́ɛ́ ɔbwɛpʋ gyi Bulu.

⁵ Mose lɔbwɛ osumpʋ ɔnɔkwalɩpʋá ɔdɛ Bulu woyisʋ kɩ. Ɔlɛbla amʋ́ asʋn ánɩ́ Bulu ɔbɛ́blɩ ɛkɛkʋ.

⁶ Tamɛ Kristo lɔbwɛ obi ɔnɔkwalɩpʋá ɔdɛ Bulu woyisʋ kɩ. Bulu woyitɔ abi anɩgyi, nɩ anɩlɔwa klʋn kɩta mʋ ɔkpakɩtɔ kinkiinkin yɔfʋn mʋ́ ɔnɔmɔkɛ.

Bulu Aha Ɔkpʋnʋda

⁷ Mʋ́ sʋ ɩbʋ Bulu asʋn amʋtɔá Ɔŋɛ Wankɩhɛ lɛblɩ ɔbɛɛ, “Ndɛ, nɩ mlonu Bulu ɔmɛ a,

⁸ mlɩmáwa asʋtɔ-ɔnlɩn, fɛ alɩá mlɩ anain Israelfɔ bɔbwɛ brɛá bɔkʋsʋ lɩɩ Bulusʋ, sɔ mʋ kɩ ɔsʋlʋkpan amʋsʋ.

⁹ Ɩnʋ mlɩ anain bɔsɔ mɩ kɩ nɩ. Ɩbʋ mʋ́tɔá bowun mɩ bwɛhɛ nfi adʋana (40) kɛkɛ.

¹⁰ Ɩnɩ sʋ nenya ɔblɔ wa amʋ́, blɩ mbɛɛ, ‘Bʋtɛdalɩ mɩ ɔma bregyibrɛ, kina mɩ asʋnsʋ gyi.>

¹¹ Mʋ́ sʋ nenya ɔblɔ ka ntam mbɛɛ, ‘Nɩ bówie mɩ ɔkpʋnʋ ɔdakpa ɩnʋ fiin! Nɛka nɔtʋn!> ”

¹² Mɩ apio, mlɩkɩ wanklaan ánɩ́ mlɩtɔ ɔkʋkʋ méenya klʋn lalahɛá ɩtamahɔ Bulu gyi, mɛnɩ ɩmɛ́ɛha mʋ ɔdalɩ Bulu Ɔkɩankpapʋ amʋ ɔma.

¹³ Mboun mlɩtɔɩ kpla aba ekekegyiɛkɛá ɔyɩ lɛkɛ, bɛtɩ mʋ́ “Ndɛ,” fɛ alɩá Bulu asʋn wanlɩnhɛ anfɩ ɩdɛblɩ. Fówun lakpan mɛ́ɛmlɛ mlɩtɔ ɔkʋkʋ, ha mʋ ɔwa asʋtɔ-ɔnlɩn.

¹⁴ Tsufɛ nɩ akɩta anɩ hogyitɔ kinkiinkin, fɛ brɛ amʋʋ anɩlɔtsɔ hogyi amʋ yɔfʋn mʋ́ ɔnɔmɔ a, anɩa Kristonyɔ abɛ́kan, bwɛ toku kʋlɛ.

¹⁵ Fɛ alɩá Bulu asʋn wanlɩnhɛ amʋ lɛblɩ. Ɔbɛɛ, “Ndɛ, nɩ mlonu Bulu ɔmɛ a, mlɩmáwa asʋtɔ-ɔnlɩn, fɛ alɩá mlɩ anain Israelfɔ bɔkʋsʋ lɩɩ Bulusʋ.”

¹⁶ Amɛndɩ lonu Bulu asʋn blɩhɛ, tamɛ bɔkʋsʋ lɩɩ mʋsʋ? Megyi aha amʋʋ Mose lɛkpa tsu Egyipte ɔsʋlʋsʋ amʋ fɛ́ɛ́?

¹⁷ Amɛndɩ Bulu lenya ɔblɔ wa nfi adʋana (40) kɛkɛ? Megyi amʋ́ kɛn lɔbwɛ lakpan, bowu sin ɔsʋlʋkpansʋ ɩnʋ nɩ?

¹⁸ Amɛndɩ Bulu lɛka ntam ha ɔbɛɛ, “Nɩ bówie mɩ ɔkpʋnʋ ɔdakpa ɩnʋ fiin! Nɛka nɔtʋn?” Megyi aha amʋʋ bɔkʋsʋ lɩɩ mʋsʋ amʋ?

¹⁹ Mʋmʋ ɩlawankɩ ánɩ́ amʋ́ Bulu mahógyi sʋ bʋmɔyɔ ɔsʋlʋ amʋsʋ yɛda ɔkpʋnʋ.