Hebrifɔ 2 - Bulu Ntam Pɔpwɛ mʋ́a Israel Ɩlʋ

Nkpahɔ Kpɔnkpɔɔnkpɔntɩ

¹ Ɩnɩ sʋ ilehian ánɩ́ abɛ́kɩta ɔnɔkwalɩ asʋn amʋʋ anɩlanu amʋtɔ kinkiinkin, mɛnɩ ɩmɛ́ɛdalɩ anɩ ɩbɩ.

² Tsufɛ mbla amʋʋ Bulu lɔwa ha anɩ anain tsʋn mʋ abɔpʋsʋ amʋ igyi ɔnɔkwalɩ. Ɩnɩ sʋ aha amʋʋ bɔwa asʋtɔ-ɔnlɩn, bʋmegyi mʋ́sʋ amʋ benya ɩsʋbɩtɩá ɩda ɔkpa.

³ Nkalɩ anɩ mʋ́ abɛ́talɩ srɩ si ɩsʋbɩtɩ amʋ, nɩ akina nkpahɔ kpɔnkpɔɔnkpɔntɩ anfɩ? Anɩ Wie onuto legyankpa blɩ mʋ́ asʋn. Aha amʋʋ bonu mʋ́ amʋ ɛ begyi mʋ́ ɩwɩ adansɩɛ suna anɩ bɛɛ, ɩbʋ mʋ́tɔ.

⁴ Bulu onuto ɛ lɔbwɛ ofula pʋ́ osuna ɔtsan-ɔtsan mʋ tumitɔ, ɔlɛha aha mʋ Ɔŋɛ Wankɩhɛ atokiehɛ brɛá iletsia mʋ, pʋdɩnka ibwi mʋ́sʋ ánɩ́ ɔnɔkwalɩ igyi.

Nkpahɔ Ɔkpa Osunapʋ

⁵ Bulu mɔpʋ ɔyɩ amʋʋ ɩba, anɩdɛ mʋ́ ɩwɩ asʋn blɩ amʋ wa mʋ abɔpʋ ɩbɩtɔ ɔbɛɛ, bʋgyi mʋ́sʋ.

⁶ Mboun fɛ alɩá ɔkʋ lɔwanlɩn wa Bulu asʋn amʋtɔ ɔtɩnɛkʋ ɔbɛɛ, “Oo Bulu, ntɔ nyankpʋsa gyi, sʋ fʋ ansɩ ɩdɩn mʋsʋ alɩ? Ntɔ nyankpʋsa gyi, sʋ fʋtɛkɩ mʋsʋ?

⁷ Brɛ itinbi kʋtɔ pɛ fɛba mʋ asɩ dʋn fʋ abɔpʋ. Fɔpʋ numnyam pʋ́ obú dɩnka mʋsʋ.

⁸ Fɛha mʋ ɔdɛ atɔ fɛ́ɛ́sʋ gyi.” Nɩ Bulu asʋn anfɩ dɛblɩ ɔbɛɛ, “Atɔ fɛ́ɛ́” a, idesuna ánɩ́ tɔtɔ mesian ánɩ́ ɔmɛdɛ mʋ́sʋ gyi. Sei anfɩ a, anɩmɔkʋnya wun ánɩ́ ɔdɛ atɔ fɛ́ɛ́sʋ gyi.

⁹ Tamɛ anɩlawun Yesu. Bulu lɛba mʋ asɩ dʋn mʋ abɔpʋ brɛ itinbi kʋtɔ. Awɩtɔlɛ Bulu lɔwa bwɛ mʋ́ alɩ, tsufɛ ɔlɛha Yesu lowu ɔhagyiɔha nwunsʋ. Anɩlabɩá sei a, Bulu lapʋ numnyam pʋ́ obú dɩnka mʋsʋ, ɩwɩɔsɩn amʋʋ olowun, wu amʋ sʋ.

¹⁰ Bulu, atɔ fɛ́ɛ́ Ɔlɛpʋ pʋ́ mʋ́sʋ Ɔkɩpʋ amʋ ɔbɛ́kpa mʋ abi tsɔtsɔɔtsɔ ba mʋ numnyamtɔ. Mʋ́ sʋ ɩbʋ alɛá ɔlɔtsʋn Yesu amʋʋ ogyi amʋ́ Nkpa Ɔhɔpʋ amʋ lowusʋ ha mʋ ɔlɔfʋn, mɛnɩ ɔbɔ́hɔ amʋ́ nkpa.

¹¹ Yesu amʋʋ ɔtɔgyʋra aha lɛ amʋ́ lakpantɔ amʋ mʋa aha amʋʋ alagyʋra amʋ fɛ́ɛ́ babwɛ Ɔsɩ ɔkʋlɛ abi. Mʋ́ sʋ ɩma mʋ pɛlɩá ɔbɛ́tɩ amʋ́ ɔbɛɛ mʋ apio.

¹² Ɔlɛbla Bulu ɔbɛɛ, “Nɛ́kla fʋ bwɛhɛ suna mɩ apio. Nɛ́kanfʋ fʋ anɩ ofiakpa.”

¹³ Ɔlɛblɩ brɛ bambatɔ ɛ ɔbɛɛ, “Nɔ́pʋ ansɩ dɩnka Bulusʋ.” Ɔlɛtra blɩ ɔbɛɛ, “Kɩ, mɩa abi amʋʋ Bulu lapʋha mɩ amʋ lɩɩ a.”

¹⁴ Ɩnɩá anyankpʋsa abi amʋʋ Bulu lɔpʋha mʋ amʋ bʋgyi sʋ a, ɔlɔbwɛ mʋ ɩwɩ nyankpʋsa fɛ amʋ́, mɛnɩ ɔbɔ́tsʋn mʋ lowusʋ swɩɩ Ɔbʋnsam tumi, yinta mʋ.

¹⁵ Ɔkpa anfɩ pɛsʋ ɔbɛ́talɩ tsʋn ha aha amʋʋ benya lowu ifu, sʋ bɔbwɛ nkpábi amʋ́ nkpatɔ fɛ́ɛ́ amʋ bégyi ɩwɩ nɩ.

¹⁶ Tsufɛ ɩda yaɩ ánɩ́ megyi Bulu-abɔpʋ nkpa ɔhɔkpa ɔlɛba, mboun Abraham abi-aná.

¹⁷ Ɩnɩ sʋ ilehian ánɩ́ ɔbɛ́lɩan mʋ apio togyitɔtɔ, mɛnɩ ɔbɔ́bwɛ amʋ́ igyi ɔhapʋ dɛhɛn ánɩ́ obówun aha nwɛ, wa ɔnɔkwalɩ Bulu ansɩtɔ. Fówun ɔbɛ́talɩ bɔ amʋ́ lakpan ɩwɩ afɔdɩɛ ha Bulu, obésikie amʋ́.

¹⁸ Bɔsɔ mʋ kɩ, mʋ onuto ɛ ɔlɔtsʋn ɩwɩɔsɩntɔ. Mʋ́ sʋ ɔbɛ́talɩ gyi aha ánɩ́ bʋtɔsɔ amʋ́ kɩ ɛ bʋalɛ.