Hebrifɔ 13 - Bulu Ntam Pɔpwɛ mʋ́a Israel Ɩlʋ

Alɩá Abégyi Bulu Ansɩ

¹ Mlɩkɩta mlɩ aba Akristofɔ dwɛtɔ kinkiinkin.

² Mlɩmátan afɔɔhɔsʋ. Tsufɛ mʋ́lɛha akʋ bɔhɔ Bulu-abɔpʋ afɔɔ, ɩmɔwankɩ amʋ́ nɩ.

³ Mlɩkaɩn obu adɩpʋsʋ, fɛ mlɩa amʋ́nyɔ da obu. Mlɩkaɩn aha ánɩ́ bʋdɛ ɩwɩɔsɩn wunsʋ, fɛ mlɩa amʋ́nyɔ dɛ ɩwɩɔsɩn amʋ wun.

⁴ Aklu mʋa aka bʋbu aba amʋ́ abatsiatɔ. Ɔkʋkʋ mádalɩ mʋ ba ɔma, tsufɛ Bulu ɔbɛ́bɩtɩ aha ánɩ́ bʋda aha ánɩ́ bʋmegyi amʋ́ aklu ntɛ amʋ́ aka wa, pʋ́ mbʋa atɔpʋ fɛ́ɛ́ ɩsʋ.

⁵ Kɔba asʋn ɩmádʋn mlɩ ɔdwɛ wa. Tɔá mlɩbʋ igyi mlɩ ansɩ, tsufɛ Bulu lablɩ ɔbɛɛ, “Mmɛ́ɛnatɩ si mlɩ, ntɛ kina mlɩ ɛkɛkɛɛkɛ.”

⁶ Mʋ́ sʋ abɛ́talɩ wa klʋn blɩ anɩaa, “Mɩ Wie Bulu gyi mɩ ɔbʋapʋ. Mʋ́ sʋ tɔtɔ mɔ́ɔwa mɩ ifu. Ntɔ nyankpʋsa ɔbɛ́talɩ bwɛ mɩ?”

⁷ Mlɩkaɩn mlɩ nkpa agyapʋ amʋʋ begyankpa bla mlɩ Bulu asʋn amʋsʋ. Mlɩkɩ alɩá bɔpʋtsia, amlɩnya hogyi fɛ amʋ́.

⁸ Alɩ amʋʋ Yesu Kristo gyi igye amʋ a, alɩ ogyi ndɛ, alɩ kɛn obétsia brɛ fɛ́ɛ́ ɛ nɩ.

⁹ Mʋ́ sʋ mlɩmáha atosunahɛ ɔtsan-ɔtsan igyi mlɩ ansɩ, ɩbɩtɩa mlɩ lɛ ɔkpa wanklaan amʋsʋ. Ɩbʋ alɛá mlɛ́ha Bulu ɔbɔ́wa awɩtɔlɛ ha mlɩ ɔŋɛtɔ ɔwʋnlɩn, megyi atogyihɛ mbla ánɩ́ ɩtamawa labi kʋkʋ ha mʋ́sʋ agyipʋsʋ gyi.

¹⁰ Anɩbʋ afɔdɩɛ-ɔswɩ kʋá igyi ahapʋ amʋʋ bɛha Bulu igyi ɔsʋlʋsʋ nfɩ amʋ bʋma ɔkpa gyi mʋ́sʋ atɔ.

¹¹ Bulu igyi ɔhapʋ dɛhɛn tɔpʋ mbwɩ obugya wie Ɔwankɩkpatɔ Ɔwankɩkpa ɩnʋ yɔbɔ amʋ́ lakpan ɩwɩ afɔdɩɛ, bʋtɔpʋ aye amʋ mʋ́ ya mmuatse, yɛwa mʋ́ ogya.

¹² Ɩnɩ sʋ Yesu ɛ lowu mmuatse, mɛnɩ ɔbɔ́pʋ mʋ onuto obugya gyʋra mʋ aha, amʋ́ lakpan sʋ nɩ.

¹³ Mʋ́ sʋ mlɩha adalɩ yɔ mʋ wa mmuatse ɩnʋ, abʋkpɔɩ anɩa mʋnyɔ.

¹⁴ Tsufɛ anɩmá wuluá ibétsia yɔ ɔsʋlʋsʋ nfɩ. Anɩgyo wulu amʋʋ ɩba amʋ.

¹⁵ Mʋ́ sʋ mlɩha atsʋn Yesusʋ akanfʋ Bulu, ɩbwɛ afɔdɩɛá anɩdɛpʋha mʋ ekekegyiɛkɛ. Mʋ́gyi ɔnɔtɔ asʋn ánɩ́ anɩdɛpʋwa anɩ Wie numnyam nɩ.

¹⁶ Mlɩmátan awɩtɔlɛwasʋ. Mlɩye mlɩ atɔtɔ ha aba, tsufɛ mʋ́ aná gyi afɔdɩɛá itegyi Bulu ansɩ nɩ.

¹⁷ Mlɩbu mlɩ nkpa agyapʋ, amlɩba ɩwɩasɩ ha amʋ́. Tsufɛ bʋtamada ɔkpʋnʋ mlɩ ɔklasʋkɩ sʋ. Bʋyin ánɩ́ bɛ́yɛlɛ alɩá bɔpʋkɩ anɩ ɔklasʋ ɔnɔ Bulu ansɩtɔ. Mlɩha amʋ́ abʋbwɛ amʋ́ agyʋma ansigyisʋ, megyi nwɛsʋ. Nɩ megyi alɩ a, ɩmɔ́ɔwa labi kʋkʋ ha mlɩ.

¹⁸ Mlɩtsia bɔ mpaɩ ha anɩ. Nyin ánɩ́ anɩ klʋn mɛdɛ anɩ pɔn ha, tamɛ anɩdekleá abétsia tsiatɔ wanklaan bregyibrɛ.

¹⁹ Nhɩɛ ndekleá mlɩbɔ mpaɩ, Bulu ɔha mɩ ansanki ba mlɩ wa nkenyɔ anfɩtɔ kotoo.

Mpaɩ Trahɛ

^20-21 Iwilwii Ɔhapʋ Bulu, ɔlɔkʋsʋa anɩ Wie Yesu Kristo tsu afulitɔ amʋ ɔha amlɩtalɩ bwɛ yile kugyikʋá odekle. Ndɛ mʋ kokoli mbɛɛ, ɔtsʋn Yesu Kristosʋ ɔbwɛ tɔá odekle anɩtɔ. Yesu gyi akufa Ɔkpapʋ kpɔnkpɔntɩá Bulu lɔpʋ mʋ obugya ka ntam amʋʋ ɩbʋ ɩnʋ brɛ fɛ́ɛ́, mʋa mʋ akufa, bʋgyi mʋ aha amʋ nsɩnɛ nɩ. Numnyam ɩbwɛ mʋ klɛ yɔfʋn brɛá ɩtamata! Amen.

Ɩkla

²² Mɩ apio, ɩbʋ mʋ́tɔá ɔwʋlʋ kutuklu nawanlɩn sɩsɩ mlɩ. Tamɛ nobwii ɩpa, mlɩyaa asʋ amlɩnu mʋ́tɔ asʋn ánɩ́ ndɛpʋwa mlɩ ɔwʋnlɩn.

²³ Ndɛ mlɩ ɩbɩ ha ánɩ́ balɛ anɩ pio Timoteo obu. Nɩ ɔlɔwa ɔsa bɔtʋ mɩ nfɩ mʋ́ a, nɛ́kpa mʋ abɛ́ba bɛkɩ mlɩ.

²⁴ Nɛha mlɩ nkpa agyapʋ pʋ́ Bulu aha atrahɛ fɛ́ɛ́ itsia. Akristofɔ amʋʋ bʋbʋ Italia ɔmátɔ amʋ ɛ bɛha mlɩ itsia.

²⁵ Ndɛ Bulu kokoli mbɛɛ, ɔwa awɩtɔlɛ ha mlɩ fɛ́ɛ́! Amen!