Hebrifɔ 12 - Bulu Ntam Pɔpwɛ mʋ́a Israel Ɩlʋ

Anɩ Sɩ Bulu

¹ Anɩbʋ ɔdɔm anfɩ bɔpʋ hogyi tsia anfɩ odu bomli anɩ. Mʋ́ sʋ mlɩha anɩ ɛ atswɩ togyitɔá ɩdɛ anɩ bɩtɩa ya ɔma pʋ́ lakpan ánɩ́ ɩlakɩklɩ anɩ kinkiinkin tsalɩfwɩ, atomi tsii ɔsrɩ amʋʋ ɩda anɩ ansɩtɔ amʋ.

² Mlɩha apʋ ansɩ dɩnka Yesusʋ. Mʋgyi anɩ hogyi nfiasɩ pʋ́ mʋ́ ɔnɔmɔ. Ɩnɩá oyin ansigyi oduá ɩda gyo mʋ sʋ a, olotomi wun ipian oyikpalihɛsʋ wu. Omobu kpɔɩá bɔ́kpɔɩ mʋ tɔtɔ, alayɔ otsie Bulu owie obia amʋ gyɔpɩsʋ.

³ Mlɩpʋkɩ ipian ánɩ́ olotomi wun lakpan abwɛpʋ ɩbɩtɔ, brɛá bolu mʋ, wa mʋ ɩwɩɔsɩntɔ, mɛnɩ ɔŋɛ mɛ́ɛta mlɩ, mlɩméesi mʋ hogyi.

⁴ Ɩwɩá mlɩdɛprɩ lɛ ɩwɩ lakpantɔ a, mlɩmɔkʋtalɩ prɩ yɔfʋn brɛá mlési mlɩ nkpa ha.

⁵ Mlɩmátan ɩtɔɩá Bulu lɔtɔɩ kpla mlɩ anfɩ mlɩgyi mʋ abisʋ. Ɔbɛɛ, “Mɩ bi, nɩ nɛbɩtɩ fʋ ɩsʋ a, máhɔ mʋ́ lalahɛ sʋ. Nɩ nɔwa ɩyɩn wa fʋ a, máha mʋ́ ɩkpɔn fʋ.

⁶ Tsufɛ ɔha ánɩ́ ntɔdwɛ a, mʋ ntɔwa ɩyɩn wa. Ɔha ánɩ́ nɔpʋbwɛ mɩ bi a, mʋ ntɛbɩtɩ ɩsʋ.”

⁷ Tomi wun ipian, fɛ ɩsʋ bʋdɛ fʋ bɩtɩ. Bulu dɛ mlɩ ɩsʋ bɩtɩ fɛ mʋ abi. Tsufɛ obi ɔmɔmʋ bʋ ɩnʋá mʋ sɩ tamabɩtɩ mʋ ɩsʋ?

⁸ Nɩ ɔmɛbɩtɩ fʋ ɩsʋ fɛ alɩá ɔtɔbwɛ mʋ abi fɛ́ɛ́ a, idesuna ánɩ́ megyi mʋ bi onuto fʋgyi, klɛtobi fʋgyi mʋ.

⁹ Anɩ ɔsʋlʋ anfɩsʋ asɩ bʋtɛbɩtɩ anɩ ɩsʋ, anɩtobu amʋ́ ɛ. Ntogyi sʋ anɩmóotsula ba ɩwɩasɩ ha anɩ Sɩ Bulu dʋn amʋ́, anya nkpa ánɩ́ ɩtamata?

¹⁰ Brɛ itinbi pɛ anɩ ɔsʋlʋsʋ asɩ bʋtɔpʋbɩtɩ anɩ ɩsʋ alɩá bʋdekle. Bulu mʋ́ a, alɩá abɔ́wa alɛ sʋ ɔtɛbɩtɩ anɩ ɩsʋ, mɛnɩ anɩ ɛ anɩ ɩwɩ bɛ́tɩn fɛ mʋ.

¹¹ Nɩ bʋdɛ anɩ ɩsʋ bɩtɩ a, ɩtɛhan anɩ alɩ brɛ amʋtɔ. Ansɩ tamagyi anɩ. Tamɛ ɩsʋbɩtɩ amʋ ɔma a, anɩtɔbwɛ yile, tsia iwilwiitɔ.

Atosunahɛ Pʋ́ Ɔlada

¹² Mʋ́ sʋ mlɩmáha abatɔ iwu mlɩ, akpawunutɔ ɩkpɩnkɩ mlɩ. Mlɩwa ɩwɩ ɔwʋnlɩn!

¹³ Mlɩha mlɩ tsiatɔ ɩwa alɛ, mɛnɩ abubupʋ amʋ bʋméesin tsukʋlɛ, mboun bénya ɩlɔtsa.

¹⁴ Mlɩbɔ mbɔdɩ amlɩha iwilwii itsia mlɩa ɔhagyiɔha nsɩnɛ. Mlɩtsia nkpa ánɩ́ mʋ́ ɩwɩ lɛtɩn, tsufɛ ɔha ánɩ́ mʋ ɩwɩ mɛtɩn móowun anɩ Wie.

¹⁵ Mlɩkɩá mlɩtɔ ɔkʋkʋʋkʋ mɔ́ɔhʋlɩ Bulu awɩtɔlɛ amʋ. Mlɩtɔ ɔkʋkʋ ɛ mási asʋn wa mʋ klʋntɔ, mɛnɩ ɔmɔ́ɔpʋ asʋn wa mlɩ nsɩnɛ, iyinta mlɩtɔ akʋ.

¹⁶ Mlɩkɩá mlɩtɔ ɔkʋkʋ ɛ mɔ́ɔbwɛ mʋ ɩwɩ mbʋa ɔtɔpʋ, ntɛ ɔha ánɩ́ ɔtamabu Bulu fɛ Esau. Mʋlɔpʋ mʋ handɛ tsɛ ɔtsawʋlɛ atogyihɛ.

¹⁷ Fɛ alɩá mlɩyin yaɩ a, ɔma a, olobodunka obidɛhɛn-oyula tsu mʋ sɩ wa, tamɛ mʋ sɩ lekina mʋ ha. Ɩbʋ mʋ́tɔá ɔlɛhɩɛ su kokoli mʋ sɩ, tamɛ omenya mʋ́tɔ ɔkpa.

¹⁸ Megyi ɩbʋá mlɛtalɩ pʋ ɩbɩ da asɩ mlɩlaba. Ɔtɩnɛá oklun tuun pʋ́ afu kpɔnkpɔɔnkpɔntɩ bʋ, ogya ɛ idetsii fɛ Sinaibʋ amʋʋ Israelfɔ bɔyɔ mʋ́ asɩ brɛá Bulu dɛpʋ mʋ mbla ha amʋ́ amʋ asɩ mlɩlaba.

¹⁹ Ɩnʋ bonu ɔkpɛ lɔfʋlɩ kʋklʋkʋʋ, bonu ɔmɛ kpɔnkpɔɔnkpɔntɩ kʋ lɛlɩn bla amʋ́ asʋn, sʋ bokokoli bɛɛ itsia alɩ, bʋmedekleá bɛ́tra nu asʋansʋ.

²⁰ Tsufɛ bʋmɛtalɩ gyi mbla amʋʋ Bulu lɔwa ha amʋ́ ɔbɛɛ, “Nɩ ɔbwɩ ɔkʋ kʋraa ɩwɩ ɩda ɩbʋ amʋ a, bʋda mʋ abwi mɔ” amʋsʋ.

²¹ Tɔá bowun ɩnʋ lɔwa amʋ́ ifu. Mʋ́ sʋ Mose o lɛblɩ ɔbɛɛ, “Ifu laha mɩ ndɛkpɩnkɩ!”

²² Mlɩ mʋ́ a, Sionbʋ asɩ mlɩlaba. Bulu Ɔkɩankpapʋ amʋ wulu yile, igyi ɔsʋsʋ Yerusalem pʋ́ Bulu-abɔpʋ mpɩm-mpɩm ansɩ ogyikpa mlɩlaba.

²³ Bulu bitɩ amʋ abi, bʋgyi aha amʋʋ bawanlɩn amʋ́ ada ɔsʋsʋ amʋ ofiakpa mlɩlaba. Bulu, ogyi aha fɛ́ɛ́ asʋn ogyipʋ amʋ wa mlɩlaba. Mlɩlaba aha amʋʋ Bulu latsu amʋ́á bafʋn amʋ akla wa.

²⁴ Yesu wa mlɩlaba. Mʋgyi Bulu mʋa anyankpʋsa nsɩnɛ ntam ɔma ɔlɩɩpʋ nɩ. Yesu obugya wunyahɛ amʋʋ ɩlɔpʋ yile ba dʋn Habel obugya amʋ wa mlɩlaba.

²⁵ Mʋ́ sʋ mlɩkɩ wanklaan, mɛnɩ mlɩméekina Bulu amʋʋ ɔdɛ mlɩ asʋn bla amʋ. Tsufɛ Israelfɔ amʋʋ bekina asʋn ánɩ́ ɔlɔwa Mose blɩ Sinaibʋ asɩ nu amʋ bʋmɛtalɩ srɩ si ɩsʋbɩtɩ amʋ. Nɩ anɩ ɛ akina ɔha anfɩ ɔdɛtɔɩ tsu ɔsʋsʋ anfɩ ɔmɛ nu a, anɩ ɩsʋbɩtɩ bɔ́dʋn amʋ́ klɛ.

²⁶ Brɛá Bulu lɔtɔɩ Sinaibʋsʋ a, mʋ ɔmɛ lɛha ɔsʋlʋ lɛkpɩnkɩ. Tamɛ sei a, alahɩɛ ɔbɛɛ, “Nɛ́tra kpɩnkɩ ɔsʋlʋ ɔtsawʋlɛ, kpɩnkɩ ɔsʋsʋ ɛ tsɩa mʋ́tɔ.”

²⁷ “Nɛ́tra kpɩnkɩ mʋ́ ɔtsawʋlɛ” anfɩ idesuna ánɩ́ Bulu ɔbɛ́kpɩnkɩ atɔ bwɛhɛ amʋ, lɛ mʋ́ ɩnʋ. Tɔá ɩmɛ́ɛkpɩnkɩ ɛkɛkɛɛkɛ pɛ obésian.

²⁸ Mʋ́ sʋ mlɩha ada Bulu ɩpan. Tsufɛ iwiegyiá ɩmɛ́ɛkpɩnkɩ abénya tsu mʋ wa. Mlɩha abu mʋ, anya mʋ ifu, mɛnɩ abégyi mʋ ansɩ.

²⁹ Tsufɛ lɛlɛ mʋ́ a, ogya anɩ Bulu amʋ gyi, ɔtɔhɔ atɔ plɩplɩplɩplɩ.