Hebrifɔ 10 - Bulu Ntam Pɔpwɛ mʋ́a Israel Ɩlʋ

¹ Alɩ amʋʋ Mose mbla lɛlɛ suna ánɩ́ bʋpʋha Bulu igyi amʋ ɩlɛlɩan mʋ́ amʋʋ ɩbɛ́ba amʋ kɛkɛ. Mʋ́ onuto amʋ Kristo labɔbwɛ a. Afɔdɩɛ oloku ɔkʋlɛ amʋ betsia bɔ ha Bulu ofifigyiofi. Tamɛ ɩmɛtalɩ ha aha amʋʋ bʋtɛbɛha igyi amʋ abʋfʋn Bulu ansɩtɔ.

² Nɩ ɩlɛtalɩ tɩn amʋ́ ɩwɩ Bulu ansɩtɔ ɔtsawʋlɛ pɛ a, tɛkɩ besi afɔdɩɛ amʋ bɔ, amʋ́ klʋn ɛ ilesi amʋ́ ɩpɔn ha ánɩ́ babwɛ lakpan.

^3-4 Tsufɛ nnantswie yinhɛ pʋ́ atrʋkpa obugya mɛ́ɛtalɩ lɛ nyankpʋsa tsu mʋ lakpantɔ ɛkɛkɛɛkɛ. Mboun ha ɩtɛha mʋ ɔtɛkaɩn mʋ lakpansʋ ofifigyiofi.

⁵ Ɩnɩ sʋ brɛá Kristo ɔba ɔyɩtɔ a, ɔlɛbla Bulu ɔbɛɛ, “Megyi atɔ hahɛ mʋ́a afɔdɩɛ fʋdedunka. Mboun ɔyʋlʋ fɛla yaɩ mɩ.

⁶ Fʋ ansɩ megyi ogya-afɔdɩɛ pʋ́ lakpan-afɔdɩɛ ɩwɩ.

⁷ Mʋʋ nɛblɩ mbɛɛ, ‘Mɩ Bulu, mɩ nɩ. Nɛba bɔbwɛ fʋ apɛ, fɛ alɩá bɔwanlɩn mɩ ɩwɩ asʋn wa fʋ asʋn wanlɩnhɛ amʋtɔ.> ”

⁸ Olegyankpa blɩ ɔbɛɛ, “Megyi afɔdɩɛ mʋ́a afɔdɩɛtɔ, mbwɩ tɔhɛ pʋ́ lakpan-afɔdɩɛ fʋdedunka. Fʋ ansɩ megyi mʋ́ ɩwɩ.” Ɔlɛblɩ alɩ, tamɛ mbla ɔkpasʋ ilehian ánɩ́ bɔ́bwɛ mʋ́.

⁹ Mʋʋ ɔlɛtra blɩ ɔbɛɛ, “Mɩ Bulu, mɩ nɩ. Nɛba bɔbwɛ fʋ apɛ.” Mʋ́ sʋ Bulu lalɛ afɔdɩɛ dada amʋ ibwi, pʋ Kristo afɔdɩɛ amʋ wa mʋ́ otsiakpa.

¹⁰ Yesu Kristo lɔbwɛ Bulu apɛ, pʋ mʋ ɩwɩ bɔ afɔdɩɛ anɩ nwunsʋ ɔtsawʋlɛ pɛ, ha brɛ fɛ́ɛ́. Mʋ́ sʋ anɩ ɩwɩ latɩn.

¹¹ Igyi ɔhapʋ okugyiɔkʋ tɛlɩɩ bɔ afɔdɩɛ oloku ɔkʋlɛ amʋ ekekegyiɛkɛ. Afɔdɩɛ-abɔtɔ amʋʋ otenya pʋbɔ mʋ́ tse du tse lafa amʋ kɛn ɔtɔpʋbɔ mʋ́ nɩ. Tamɛ afɔdɩɛ anfɩ mɛ́ɛtalɩ lɛ aha tsu amʋ́ lakpantɔ ɛkɛkɛɛkɛ.

¹² Kristo mʋ́ lenya bɔ lakpan ɩwɩ afɔdɩɛ ɔtsawʋlɛ pɛ amʋ a, ɩlɛta fɛ́ɛ́, oleyetsia Bulu gyɔpɩsʋ.

¹³ Tsu alɩ brɛ amʋtɔ ɔpá otsie ɩnʋ ogyo brɛá Bulu ɔbɔ́pʋ mʋ alupʋ bwɛ mʋ ayabi oyikpa.

¹⁴ Mʋ afɔdɩɛ kʋlɛ pɛ amʋ ɩlaha aha amʋʋ Bulu lapʋ amʋ́ bwɛ mʋ klɛ amʋ bafʋn ha brɛ fɛ́ɛ́, ɔlala kʋkʋʋkʋ ɩtra ma amʋ́ ɩwɩ.

¹⁵ Ɔŋɛ Wankɩhɛ ɛ legyi mʋ́ ɩwɩ adansɩɛ suna anɩ. Olegyankpa blɩ ɔbɛɛ,

¹⁶ Anɩ Wie ɔbɛɛ, “Ntam anfɩ obétsia mɩa amʋ́nyɔ nsɩnɛ, brɛ amʋʋ ɩba amʋtɔ nɩ. Nɔ́pʋ mɩ mbla wa amʋ́ klʋntɔ, wanlɩn mʋ́ wa amʋ́ nwuntɔ.”

¹⁷ Ɔlɛtra blɩ ɔbɛɛ, “Mmɛ́ɛtra kaɩn amʋ́ lakpan pʋ́ amʋ́ lalahɛsʋ ɛkɛkɛɛkɛ.”

¹⁸ Mʋ́ sʋ nɩ Bulu lasi lakpan kie a, mʋmʋ mʋ́ ɩwɩ afɔdɩɛ kʋkʋ ɩtra medehian ɛ.

Mlɩha Akpʋkpɛ Manta Bulu

¹⁹ Ɩnɩ sʋ mɩ apio, Yesu obugya amʋ sʋ anɩbʋ ɔkpa wie ɔsʋsʋ Ɔwankɩkpatɔ Ɔwankɩkpa ɩnʋ faan.

²⁰ Mʋ lowu amʋ sʋ alafinki tati amʋʋ bɔpʋka obu amʋtɔ amʋ ha anɩ. Mʋ́gyi ɔkpa pɔpwɛá ɩtɛha anɩ nkpa nɩ.

²¹ Anɩbʋ Bulu igyi ɔhapʋ dɛhɛn kpɔnkpɔɔnkpɔntɩ ɔkʋá ɔdɛ Bulu ahasʋ kɩ.

²² Mʋ́ sʋ mlɩha apʋ ɩklʋn ánɩ́ ɩbʋ ɔnɔkwalɩ, pʋ́ hogyiá mʋ́ ɔnɔ bʋ ɔnlɩn kpʋkpɛ manta Bulu. Tsufɛ alapʋ Kristo obugya gyʋra anɩ. Anɩ klʋn mɛ́ɛtra ha anɩ pɔn, alapʋ ntsu wankɩhɛ ɛ fwɩ anɩ ɩwɩ.

²³ Mlɩha akɩta tɔ amʋʋ anɩdɛ mʋ́ ɩwɩ adansɩɛ gyi, anɩdɛ mʋ́ ɔkpa kɩ amʋtɔ kinkin, tsufɛ Ɔnɔkwalɩpʋ Bulu gyi. Ɔbɔ́bwɛ tɔá ɔlɛhɩɛ ánɩ́ mɔ́bwɛ ha anɩ.

²⁴ Mlɩha akɩ alɩá ɩbɔ́bwɛ abɔ́wa aba ɔwʋnlɩn, ɔdwɛ mʋ́a yilebwɛtɔ.

²⁵ Mlɩmáha asi anɩ ofiakpa yɔ, fɛ alɩá akʋ bʋdɛbwɛ. Mboun mlɩha atra wa aba ɔwʋnlɩn tsɩa. Tsufɛ mlɩdewun ánɩ́ anɩ Wie ɔbakɛ amʋ ɩdɛkpʋkpɛ ba.

²⁶ Mɩ apio, lakpan ɩwɩ afɔdɩɛ kʋkʋ ɩtra ma ɩnʋ ha anɩ, nɩ akɩ ansɩ bwɛ lakpan brɛá anɩlabɩ ɔnɔkwalɩ amʋ.

²⁷ Mboun tɔá ɩlasi gyi, abétsia ifusʋ gyo Bulu asʋn ogyikɛ pʋ́ ogya kpɔnkpɔɔnkpɔntɩ amʋʋ ɩbɔ́hɔ Bulu alupʋ amʋ.

²⁸ Nɩ aha abanyɔ-abasa begyi ɔkʋ ɩwɩ adansɩɛ, ánɩ́ alakina Mose mbla amʋsʋ gyi a, bʋtɔmɔ mʋ. Bʋtamawun mʋ nwɛ.

²⁹ Mʋmʋ nɩ ɔkʋ ɔkɩ Bulu mʋ Bi amʋ ansɩtɔ kotikoti, omobuá mʋ obugya amʋʋ Bulu lɔpʋsi mʋ ntamsʋ, ɩlɔgyʋra mʋ ɩwɩ amʋ bʋ ibia, olesia Bulu awɩtɔlɛ Ɔŋɛ amʋ mʋ́ a, mʋ ɩsʋbɩtɩá ɔbɛ́hɩɛ nya mɛ́ɛba kɩ.

³⁰ Tsufɛ anɩyin ánɩ́ Bulu lɛblɩ ɔbɛɛ, “Mɩ, mlɩ Wie tɛka lalahɛ ɩkɔ. Mɩ ɔbɛ́ka aha lalahɛ akɔ amʋ́ lakpan sʋ.” Ɔlɛtra blɩ ɔbɛɛ, “Mɩ, mlɩ Wie obégyi mɩ aha asʋn.”

³¹ Ɩbʋ ifuá fɛ́kpa wie Bulu Ɔkɩankpapʋ amʋ agblatɔ.

³² Mlɩmátan brɛ amʋʋ Bulu wankɩ lɔwankɩ wʋlɩ mlɩsʋ amʋsʋ. Mlɩkaɩn ánɩ́ alɩ brɛ amʋtɔ a, mlɩlɔtsʋn ɩwɩɔsɩn tsɔtsɔɔtsɔtɔ, tamɛ mlɩlɛlɩɩ kinkiinkin.

³³ Betsia sia mlɩ, wa mlɩ ɩwɩɔsɩn aha ansɩtɔ. Brɛ kʋtɔ ɛ a, mlɩlɛtsa aha ánɩ́ bʋdɛ ɩwɩɔsɩn amʋ odu wun.

³⁴ Mlɩlosu ha obu adɩpʋ. Brɛá aha bɔpʋ ɔwʋnlɩn swɩɩ mlɩ atɔ a, mlɩlesi ha amʋ́ ansigyisʋ. Tsufɛ mlɩyin ánɩ́ mlɩbʋ atɔá ɩbʋ alɛ dʋn mʋ́, ibétsia brɛ fɛ́ɛ́tɔ.

³⁵ Mʋ́ sʋ ɩmákpɔn mlɩ. Mlɩkɩta ɩwɩ, amlɩlɩɩ kinkin, tsufɛ mlɩbʋ ɩkɔka kpɔnkpɔɔnkpɔntɩ Bulu wa.

³⁶ Ilehian ánɩ́ mlótomi, mɛnɩ mlɛ́talɩ bwɛ Bulu apɛ, fówun mlénya ɩtɔ amʋʋ Bulu lɛhɩɛ yaɩ ha mlɩ amʋ.

³⁷ Tsufɛ bɔwanlɩn wa Bulu asʋn wanlɩnhɛ amʋtɔ bɛɛ, “Iméegyi nkɛ kʋkʋ Bulu obówotii. Ɔmɔ́ɔwa ɔpá.

³⁸ Aha ánɩ́ amʋ́ hogyi sʋ Bulu latsu amʋ́ ánɩ́ amʋ́ asʋn da ɔkpa obétsia nkpa. Tamɛ nɩ amʋ́tɔ ɔkʋ mɔwa klʋn kɩta ɩwɩ mʋ hogyitɔ, oleyinki ɔma mʋ́ a, Bulu ansɩ méegyi mʋ ɩwɩ.”

³⁹ Tamɛ anɩmegyi fɛ aha ánɩ́ badamli ɔma ha Bulu, bafwɩ. Mboun anɩgyi aha ánɩ́ amʋ́ hogyi lahɔ amʋ́ nkpa.