Gyumagyihɛ 9 - Bulu Ntam Pɔpwɛ mʋ́a Israel Ɩlʋ

Saul Klʋntɔdamli

^1-2 Alɩ brɛ anfɩtɔ fɛ́ɛ́ a, Saul mɔkʋsi Yesu akasɩpʋ amʋ bla ɔbɛɛ, mɔ́mɔ amʋ́. Mʋ́ sʋ ɔlɔyɔ Bulu igyi ɔhapʋ dɛhɛn wa yɔkʋlɩ mʋ ɔbɛɛ, ɔwanlɩn ɔwʋlʋ pʋlɛ mʋ suna Damasko Yudafɔ ofiakpa ahandɛ, mɛnɩ nɩ mʋ ɩbɩ da oyin ntɛ ɔtsɩ ɔkʋ, ɔna anɩ Wie ɔkpa amʋsʋ a, mɛ́kɩta mʋ, kpa mʋ ba Yerusalem.

³ Saul lɔpʋ ɔkpa ɔyɔ Damasko. Ɔlɛta wie ta a, nsaɩntɔ lɛkpa ogya wa mʋ.

⁴ Ɔlɛdɩda ɔsʋlʋtɔ kpla. Ɩnʋ olonu ɔmɛ kʋ. Ɔmɛ amʋ lɛfɩtɛ mʋ ɔbɛɛ, “Saul, Saul, ntogyi sʋ fʋdɩn mɩsʋ alɩ?”

⁵ Saul lɛfɩtɛ ɔbɛɛ, “Fʋ ma nɩ, mɩ Wie?” Mʋʋ ɔmɛ amʋ lɛbla mʋ ɔbɛɛ, “Mɩ Yesu nɩ. Mɩsʋ fʋdɩn nɩ.

⁶ Kʋsʋ, afʋyɔ wulutɔ ɩnʋ. Ɔkʋ obósuna fʋ tɔá lehian ánɩ́ fɔ́bwɛ.”

⁷ Saul aba ánɩ́ mʋa amʋ́nyɔ bʋna besi lɩɩ diin. Bonu ɔmɛ amʋ, tamɛ bʋmowun ɔhaa.

⁸ Saul lɔkʋsʋ lɩɩ. Olobwii ansibi, tamɛ ɔmɛdɛ atɔ wun. Mʋ́ sʋ bɛkɩta mʋ ɩbɩ, kpa mʋ ya Damasko wulutɔ.

⁹ Oletsia nkɛnsa owitɔ omowun atɔ. Omegyi atɔ, omonun tɔtɔ ɛ alɩ brɛ amʋtɔ.

¹⁰ Alɩ brɛ amʋtɔ a, Yesu ɔkasɩpʋ ɔkʋ bʋ Damasko ɩnʋ, bʋtɛtɩ mʋ Anania. Olowun atɔ. Mʋ́tɔ a, anɩ Wie Yesu lokpoli mʋ ɔbɛɛ, “Anania!” Olotsula ɔbɛɛ, “Mɩ Wie, mɩ nɩ.”

¹¹ Mʋʋ anɩ Wie lɛbla mʋ ɔbɛɛ, “Kʋsʋ yɔ brɔnʋ amʋʋ bʋtɛtɩ mʋ́ ‘Ɔkpa Tswiihɛ> amʋsʋ. Wie Yuda woyitɔ, afʋfɩtɛ oyin amʋʋ otsu Tarso, bʋtɛtɩ mʋ Saul amʋsʋ. Alaba, ɔbʋ ɩnʋ ɔdɛ mpaɩ bɔ.

¹² Alawun ánɩ́ oyin ɔkʋá bʋtɛtɩ mʋ Anania laba bɔpʋ ɩbɩ dɩnka mʋsʋ, mʋ ansibi labwii.”

¹³ Mʋʋ Anania lɛbla anɩ Wie ɔbɛɛ, “Mɩ Wie, nanu oyin anfɩ ɩwɩ asʋn. Alɩá ɔdɛpʋ lalahɛ gyi fʋ aha ánɩ́ bʋbʋ Yerusalem.

¹⁴ Igyi ahapʋ dɛhɛn amʋ ɛ baha mʋ tumi bɛɛ, ɔba Damasko bɛkɩta aha ánɩ́ bʋtɔbɔ mpaɩ fʋ ɩdatɔ fɛ́ɛ́.”

¹⁵ Anɩ Wie lɛbla mʋ ɔbɛɛ, “Yɔ, mɩlalɛ mʋ mbɛɛ, ɔbwɛ mɩ osumpʋ. Ɔha ɔmá bambatɔfɔ, amʋ́ awie pʋ́ Israelfɔ fɛ́ɛ́ abʋbɩ mɩ.

¹⁶ Mɩ onuto nósuna mʋ alɩá ɔbɔ́kʋkʋ wun ipian mɩ sʋ.”

¹⁷ Mʋ́ sʋ Anania lɔyɔ Yuda woyitɔ, yɔpʋ ɩbɩ dɩnka Saulsʋ, bla mʋ ɔbɛɛ “Opio Saul, anɩ Wie Yesu amʋʋ ɔlɛlɛ ɩwɩ ɔwan suna fʋ brɛ amʋʋ fɛba nfɩ amʋ lawa mɩ fʋ wa. Ɔbɛɛ, mbɛha fʋ afʋlawun atɔ, Ɔŋɛ Wankɩhɛ ɔbʋla fʋtɔ.”

¹⁸ Tɔkʋá igyi fɛ klɛmɛtɩ-afwɩ lɛmaɩn lɛ mʋ ansibisʋ kpada ɩnʋnʋ. Mʋ́ sʋ ɔlɛla ɔdɛ atɔ wun. Ɩnʋ ɔlɔkʋsʋ, bɔbɔ mʋ asu.

¹⁹ Bɛha mʋ atɔ olegyi, ɔwʋnlɩn lɛlawie mʋ. Saul letsia akasɩpʋ amʋ wa nkɛ kpalobi.

Saul Bulu Asʋn Ɔkanda Damasko

²⁰ Ɩnʋnʋ ɔlɛnatɩ yɔ amʋ́ ofiakpa, yefi Yesu ɩwɩ asʋn ɔkan da asɩ ɔbɛɛ, “Yesu gyi Bulu mʋ bi amʋ nɩ.”

²¹ Aha ánɩ́ bonu mʋ asʋn blɩhɛ anfɩ fɛ́ɛ́ ɔnɔ lobwie amʋ́. Mʋ́ sʋ bɛfɩtɛ bɛɛ, “Megyi mʋdɛ Yesu asumpʋ mɔ Yerusalem nɩ? Megyi amʋ́ ɔkɩtakpa ɔlɛba nfɩ, ɔkpa amʋ́ ya igyi ahapʋ dɛhɛn amʋ?”

²² Tamɛ Saul lɛlanya tumi blɩ asʋn amʋ ɔwʋnlɩnsʋ ɔbɛɛ, lɛlɛ Yesu gyi Kristo, (ɔha amʋʋ Bulu lada mʋ ofuli amʋ). Alɩá ɔlɛhɩɛ lɛ asʋn amʋtɔ lɛha Yudafɔá bʋbʋ Damasko ɩnʋ bɔbwɛ basaa. Bʋmowun mʋ́á bótsu.

²³ Nkɛ tsɔtsɔɔtsɔ ɔma a, Yudafɔ amʋ befia kɩta agywɩɩn bɛɛ bɔ́mɔ Saul.

²⁴ Mʋ́ sʋ betsia gyo wulu amʋ ɔnɔ ɔpa onye, mɛnɩ bénya mʋ mɔ mʋ. Tamɛ akʋ bowi tsa Saulsʋ bɛɛ, alɩ Yudafɔ amʋ babwɛ agywɩɩn nɩ.

²⁵ Mʋ́ sʋ ɛkɛ ɔkʋ onye a, Saul abuopʋ amʋtɔ akʋ botsu mʋ wa lakpatɔ, pʋ mʋ tsʋn ikwitɔ kplɩ mʋ yi ɩban ɔma, ɔlɛsrɩ natɩ.

Saul Yerusalem Yɔ

²⁶ Brɛá Saul lowie Yerusalem a, ɔlɔtsʋn ɔkpa kugyikʋsʋ ánɩ́ obówie Yesu akasɩpʋ amʋtɔ. Tamɛ bʋmohogyiá alabwɛ ɔkasɩpʋ. Mʋ́ sʋ benya mʋ ifu.

²⁷ Ɩnʋ Barnaba lɛkpa mʋ ya, yɛlɛ mʋ suna sumbi ayɔpʋ amʋ. Ɔlɛbla amʋ́ alɩá anɩ Wie lɛlɛ ɩwɩ ɔwan suna Saul Damasko ɔkpatɔ, mʋa Yesunyɔ bɔtɔɩ; pʋ́ alɩá Saul lɔwa klʋn da Bulu asʋn amʋ ɔkan ɔwʋnlɩnsʋ Yesu ɩdatɔ Damasko wulutɔ.

²⁸ Mʋ́ sʋ Saul lowie amʋ́tɔ, beki Yerusalem wulutɔ. Ɔlɔwa klʋn blɩ Bulu asʋn amʋ Yesu ɩdatɔ.

²⁹ Mʋa Yudafɔ amʋʋ bʋtɛblɩ Griki ɔblɩ amʋ betsia tɔɩ, gyi aba nwɛn. Tamɛ alɩ brɛ amʋtɔ fɛ́ɛ́ a, bʋdɛ agywɩɩn bwɛá bɔ́mɔ mʋ.

³⁰ Brɛá mʋ́ afu lɔwʋlɩ ahogyipʋ amʋ a, bɛkpa mʋ ya Kaesarea, ha mʋ ɔlɛnatɩ yɔ Tarso.

³¹ Mʋ́ sʋ ɩwɩ lolwii ɔpasua ánɩ́ ɩbʋ Yudea, Galilea pʋ́ Samaria ɔmátɔ. Ɔŋɛ Wankɩhɛ lɛkpa amʋ́ bɛklɛɩ, dan hogyitɔ, betsia tsiatɔá ilegyi anɩ Wie Yesu ansɩ.

Aha Akʋ Ɩlɔ Tsa

³² Petro lɛnatɩ ki Samaria nkudasɩ. Ɛkɛ ɔkʋ ɔlɛyɛkɩ Bulu aha ánɩ́ bʋbʋ Lida wulutɔ.

³³ Ɩnʋ a, oleyefia oyin ɔkʋá bʋtɛtɩ mʋ Enea, olesin tsukʋlɛ nfikwe nɩ.

³⁴ Petro lɛbla mʋ ɔbɛɛ, “Enea, Yesu Kristo latsa fʋ ɩlɔ. Kʋsʋ kunta fʋ ɔklan.” Ɩnʋ Enea lɔkʋsʋ.

³⁵ Aha ánɩ́ bʋtsie Lida wulutɔ pʋ́ Saron nsaɩntɔ fɛ́ɛ́ bowun oyin amʋ. Mʋ́ sʋ bohogyi, bobuo anɩ Wie.

³⁶ Ɔtsɩ ɔkʋ bʋ Yopa wulutɔ, ogyi ɔkasɩpʋ. Bʋtɛtɩ mʋ Tabita. Mʋ ɩda amʋ asɩ Griki ɔblɩtɔ gyi, “Dorka.” Mʋ́ asɩ gyi, “Abrɛ.” Yile ɔbwɛpʋ ogyi. Ɔbʋ awɩtɔlɛ ha ahianfɔ.

³⁷ Brɛá Petro bʋ Lida a, ɩlɔ lɛda Tabitasʋ. Olowu, bebie mʋ ntsu, si mʋ tswɩ abansrʋ kʋtɔ.

³⁸ Yopa mʋa Lida awulu ɩma ɩfɔ aba wa. Mʋ́ sʋ brɛá akasɩpʋ amʋʋ bʋbʋ Yopa amʋ bonu lowu anfɩ a, bɔwa abi anyɔ sɩsɩ Petro bɛɛ, bobwii ɩpa ha mʋ, ɔwa ɔsa tʋ amʋ́.

³⁹ Ɩnʋ Petro lɔwa ɔsa bwɛ, mʋa amʋ́nyɔ bɛnatɩ. Brɛá olobowie ɩnʋ a, bɛkpa mʋ ya abansrʋ amʋtɔ. Wulu amʋtɔ asʋrapʋ fɛ́ɛ́ bʋbʋ fuli amʋ asɩ. Bɛkpa puta Petro bʋdesu, bʋdɛ atadɩɛá Dorka lɔbwɛ brɛá otsie nkpa pʋsuna mʋ.

⁴⁰ Petro legyaa asʋrapʋ amʋ fɛ́ɛ́ lɛ obu amʋtɔ. Mʋʋ ɔlɛda akpawunu bɔ mpaɩ, asa ɔlɛdamlɩ kɩ fuli amʋ blɩ ɔbɛɛ, “Tabita, kʋsʋ.” Ɩnʋ Tabita lobwii ansibi. Brɛá olowun Petro a, ɔlɔkʋsʋ tsia.

⁴¹ Ɩnʋ Petro lɛkɩta mʋ bɩ, ɔlɔkʋsʋ lɩɩ. Petro lɛtɩ asʋrapʋ amʋ pʋ́ ahogyipʋ atrahɛ amʋ. Mʋʋ ɔlɔpʋ Tabita suna amʋ́ ánɩ́ alatsinki.

⁴² Asʋn anfɩ lɛklɛɩ wa Yopa wulutɔ. Mʋ́ sʋ aha tsɔtsɔɔtsɔ bɔhɔ anɩ Wie gyi.

⁴³ Petro letsia Simon ánɩ́ ɔtɔyɔ ɔwʋlʋ-kpakpa ɩwɩ agyʋma wa Yopa ɩnʋ wa ɔpá.