Gyumagyihɛ 8 - Bulu Ntam Pɔpwɛ mʋ́a Israel Ɩlʋ

¹ Saul ɛ lotsula dɩnka Stefano mɔsʋ. Tsu ɛkɛ amʋsʋ a, bɛdɩnka ɔpasua amʋʋ ɩbʋ Yerusalem amʋsʋ, wa amʋ́ mɔ bɩ. Mʋ́ sʋ ɔpasua amʋ fɛ́ɛ́ bɛdasaɩn wa Yudea pʋ́ Samaria ɔmátɔ, si sumbi ayɔpʋ amʋ nkʋlɛ pɛ wa ɩnʋ.

Saul Ɔpasua Amʋsʋ Dɩnka

² Tamɛ Bulu asumpʋ akʋ bosu Stefano, bɩn mʋ.

³ Saul mʋ́ lefi ɔpasua amʋ bwie asɩ. Oletsia ki aha woyitɔ, bɩtɩa ahogyipʋ atsɩ mʋa ayin fɛ́ɛ́ yɛwa obu.

Filipo Bulu Asʋn Ɔkanda Samaria Wulutɔ

⁴ Ahogyipʋ amʋ bɛda Bulu asʋn wanklaan amʋ ɔkan ɔtɩnɛgyiɔtɩnɛá bɛdasaɩn yɔ.

⁵ Mʋ́ sʋ Filipo lɔyɔ Samaria wulu yile kʋtɔ yɛbla amʋ́ Kristo, (ɔha amʋʋ Bulu lada mʋ ofuli amʋ) ɩwɩ asʋn wanklaan amʋ.

⁶ Afiapʋ amʋ fɛ́ɛ́ bonu mʋ asʋn blɩhɛ, bowun osuna ánɩ́ ɔlɔbwɛ ɛ. Mʋ́ sʋ bɔhɔ mʋ asʋn amʋ.

⁷ Ɔŋɛ lalahɛ lɔsʋra okitikiti dalɩ aha tsɔtsɔɔtsɔtɔ. Aha ánɩ́ amʋ́ ɩfʋn lawu pʋ́ tsukʋlɛ asinpʋ tsɔtsɔɔtsɔ ɛ benya ɩlɔtsa.

⁸ Mʋ́ sʋ ansɩ lɛhɩɛ gyi Samariafɔ amʋ.

⁹ Alɩ brɛ amʋtɔ a, ɔfapʋ kpɔnkpɔntɩ ɔkʋá bʋtɛtɩ mʋ Simon bʋ wulu amʋtɔ. Brɛá Filipo mɔkʋba ɩnʋ a, ɔtɔbwɛ tumila suna mʋ pɩ amʋ, ɩtɔwa amʋ́ ifu. Ɔtɔpʋ ɩbɩ si kantɔ blɩ ɔbɛɛ, otumipʋ kpɔnkpɔntɩ mʋgyi.

¹⁰ Nyebi ahandɛ fɛ́ɛ́ bʋtobu mʋ, blɩ bɛɛ, “Oyin anfɩ dɛ Bulu tumi kpɔnkpɔntɩ amʋ.”

¹¹ Ɩnɩá ɔdɛpʋ mʋ asuma bwɛ ofula suna amʋ́, ɩlawa ɔpá sʋ a, amʋ́ fɛ́ɛ́ bɔhɔ mʋ gyi.

¹² Tamɛ brɛá Filipo lɛba bɛda Bulu iwiegyi pʋ́ Yesu Kristo ɩwɩ asʋn wanklaan amʋ ɔkan a, atsɩ mʋa ayin bɔhɔ mʋ asʋn amʋsʋ gyi, ɔlɔbɔ amʋ́ asu.

¹³ Simon onuto ɛ lohogyi, ɔlɛha Filipo lɔbɔ mʋ asu. Mʋ asubɔ ɔma a, ɔlɔpʋ ɩwɩ manta Filipo. Brɛá olowun alɩá Filipo dɛ ofula mʋ́a osuna bwɛ a, ɔnɔ lobwie mʋ.

¹⁴ Sumbi ayɔpʋ amʋʋ bʋbʋ Yerusalem amʋ bonuá Samariafɔ bahɔ Bulu asʋn amʋ. Mʋ́ sʋ bɔwa Petro mʋa Yohane amʋ́ wa.

¹⁵ Brɛá boyowie ɩnʋ a, bɔbɔ mpaɩ ha Samariafɔ ahogyipʋ amʋ bɛɛ, bʋnya Ɔŋɛ Wankɩhɛ.

¹⁶ Tsufɛ asu kɛkɛ babɔ amʋ́ anɩ Wie Yesu ɩdatɔ, tamɛ amʋ́tɔ ɔkʋkʋ mɔkʋnya Ɔŋɛ Wankɩhɛ amʋ.

¹⁷ Ɩnʋ Petro mʋa Yohane bɔpʋ ɩbɩ dɩnka amʋ́ nwunsʋ, Bulu lɛha amʋ́ Ɔŋɛ Wankɩhɛ amʋ.

¹⁸ Simon lowun ánɩ́ ɩbɩ kɛkɛ sumbi ayɔpʋ amʋ bapʋ dɩnka ahogyipʋ amʋ nwunsʋ, Bulu laha amʋ́ Ɔŋɛ Wankɩhɛ. Mʋ́ sʋ ɔlɛlɛ kɔba ha Petro mʋa Yohane,

¹⁹ ɔlɛbla amʋ́ ɔbɛɛ, “Mlɩha mɩ tumi anfɩ kʋ, mɛnɩ nɩ mɩ ɛ nɔpʋ ɩbɩ dɩnka ɔkʋ nwunsʋ a, Bulu ɔbɛ́ha mʋ Ɔŋɛ Wankɩhɛ.”

²⁰ Tamɛ Petro lɛbla mʋ ɔbɛɛ, “Fʋa fʋ kɔba amʋ nyɔ fɛ́ɛ́ mlɩhɩ. Tsufɛ fʋkɩ fɛɛ, fɛ́talɩ pʋ kɔba hɔ Bulu itokiehɛ anfɩ.

²¹ Fʋma ogyikpa ntɛ ɔlɩɩkpa anɩ gyumagyihɛ anfɩtɔ, tsufɛ fʋ klʋntɔ mɛtɩn Bulu ansɩtɔ.

²² Damli klʋntɔ tsu fʋ lakpan anfɩtɔ, afʋkʋlɩ anɩ Wie Bulu. Fialɩ obési agywɩɩn lalahɛ anfɩ fabwɛ anfɩ kie fʋ.

²³ Tsufɛ nawun ánɩ́ fʋhɩɛ fʋbʋ ɔnsɩpɛ, lakpan lagyi fʋsʋ.”

²⁴ Simon lɛbla Petro mʋa Yohane ɔbɛɛ, “Nobwii ɩpa, mlɩkokoli mlɩ Wie Bulu ha mɩ, mɛnɩ ɔmɛ́ɛha asʋn anfɩ fablɩ anfɩtɔ kʋkʋ mɛ́ɛba mɩsʋ.”

²⁵ Brɛá Petro mʋa Yohane begyi adansɩɛ, da Yesu ɩwɩ asʋn amʋ ɔkan ta a, beyinki yɔ Yerusalem. Brɛá bʋna bɔyɔ a, bɛda asʋn wanklaan amʋ ɔkan Samaria nkuda tsɔtsɔɔtsɔ asɩ.

Etiopia Owie Sikasʋ Ɔkɩpʋ Klʋntɔdamli

²⁶ Alɩ brɛ amʋtɔ a, Bulu-ɔbɔpʋ lɛbla Filipo ɔbɛɛ, “Kʋsʋ pʋ ɔsasɩ ɔsʋlʋkpansʋ ɔkpa amʋʋ ɩda tsu Yerusalem ɩyɔ Gasa amʋ.”

²⁷ Mʋʋ Filipo lɔkʋsʋ pʋ ɔkpa. Brɛá ɔyɔ a, ɔlɔtʋ Etiopia ɔmá ɔhandɛ ɔkʋá baflo mʋ. Ɔhandɛ amʋ gyi Etiopia owie tsɩhɛ Kandake sikasʋ ɔkɩpʋ. Oyin anfɩ layɔ Yerusalem yesum Bulu,

²⁸ yinki ɔyɔ woyi, otsie mʋ keketɔ, mpɔnkɔ bʋdɛ mʋ bɩtɩ. Ɔdɛ Bulu ɔnɔsʋ ɔtɔɩpʋ Yesaia ɔwʋlʋ amʋ kla.

²⁹ Mʋʋ Ɔŋɛ Wankɩhɛ lɛbla Filipo ɔbɛɛ, “Kpʋkpɛ manta keke anfɩ.”

³⁰ Filipo lɛsrɩ tʋ keke amʋ wun ánɩ́ Bulu ɔnɔsʋ ɔtɔɩpʋ Yesaia ɔwʋlʋ amʋ oyin amʋ dɛ kla. Mʋ́ sʋ ɔlɛfɩtɛ mʋ ɔbɛɛ, “Ɔhandɛ, fʋdɛ asʋn amʋʋ fʋdɛkla amʋ asɩ nu?”

³¹ Ɔhandɛ amʋ lɛlɛ mʋ́ ɔnɔ ɔbɛɛ, “Nkalɩ ɩbɔ́bwɛ nónu mʋ́ asɩ nɩ ɔkʋ mɛlɛ mʋ́ asɩ suna mɩ?” Mʋ́ sʋ ɔlɛbla Filipo ɔbɛɛ, “Dʋ tsia mɩ wa ayɔ.”

³² Bulu asʋn ánɩ́ ɔdɛkla ɔwʋlʋ amʋtɔ gyi: “Ɔlɔbwɛ diin fɛ kufa ánɩ́ bapʋ bɛya ɔmɔkpa. Ɔmobwii mʋ nnonyɔ. Ɔlɔbwɛ diin fɛ alɩá kufa tɔbwɛ, nɩ bʋdɛ mʋ ɩwɩ imi kpa.

³³ Bɔkpɔɩ mʋ, bʋmegyi mʋ asʋn ɔnɔkwalɩsʋ. Ɔhaa mɛ́ɛtalɩ suna mʋ abi-aná, tsufɛ bɛka mʋ nkpa itin ɔsʋlʋ anfɩsʋ.”

³⁴ Mʋʋ ɔmá ɔhandɛ amʋ lɛfɩtɛ Filipo ɔbɛɛ, “Ma ɩwɩ asʋn Bulu ɔnɔsʋ ɔtɔɩpʋ anfɩ dɛblɩ, mʋ onuto ntɛ ɔha bamba?”

³⁵ Ɩnʋ Filipo lɛlɩɩ Yesaia asʋn wanlɩnhɛ anfɩsʋ bla mʋ Yesu ɩwɩ asʋn wanklaan amʋ.

^36-37 Bɔpʋ bɔyɔ a, bɔtʋ ntsu kʋ. Mʋʋ ɔmá ɔhandɛ amʋ lɛfɩtɛ Filipo ɔbɛɛ, “Ntsu da a, ntɔ letin mɩ asubɔ ɔkpa?”

³⁸ Mʋ́ sʋ ɔmá ɔhandɛ amʋ lɛha mʋ keke amʋ ɔbɩtɩpʋ lɛlɩɩ. Mʋa Filipo bɛkplɩ wie ntsu amʋtɔ, Filipo lɔbɔ mʋ asu.

³⁹ Brɛá bɛdalɩ ntsu amʋtɔ a, anɩ Wie Ɔŋɛ lotsu Filipo natɩ. Ɔmá ɔhandɛ amʋ mɛtra wun mʋ, tamɛ ɔlɔpʋ ansigyi natɩ ɔyɔ woyi.

⁴⁰ Filipo ɛ lɛyɛdalɩ Asoto wulutɔ. Ɔlɛnatɩ ki ɩnʋ awulusʋ da asʋn wanklaan amʋ ɔkan alɩɩ, oloyowie Kaesarea wulutɔ.