Gyumagyihɛ 6 - Bulu Ntam Pɔpwɛ mʋ́a Israel Ɩlʋ

Ɔnɔ Alɩɩpʋ Abasienɔ Lɛ

¹ Brɛá akasɩpʋ amʋ bɛba bʋdɛklɛɩ a, ɩtrɛ lɛda Yudafɔ Griki ablɩpʋ amʋʋ bʋtɛblɩ Hebri ɔblɩ amʋ nsɩnɛ. Griki ablɩpʋ amʋ bɛɛ, ekekegyiɛkɛ, nɩ bʋdɛ atɔ ye a, bʋtamaha Grikifɔ asʋrapʋ.

² Mʋ́ sʋ sumbi ayɔpʋ duanyɔ amʋ bɛtɩ ahogyipʋ amʋ fɛ́ɛ́ fia, bla amʋ́ bɛɛ, “Ɩma alɛá abési Bulu asʋn ɔkanda betsia ye atɔtɔ.

³ Ɩnɩ sʋ apio, mlɩkɩ mlɩtɔ amlɩlɛ aha abasienɔá obú bʋ amʋ́sʋ, Ɔŋɛ Wankɩhɛ mʋ́a nyansa ɩtsɔ amʋ́tɔ. Fówun apʋ amʋ́ lɩɩ atɔtɔye ɔnɔ,

⁴ mɛnɩ anɩ ɛ abɛ́lɛ ansɩ kɩ mpaɩbɔ pʋ́ Bulu asʋn amʋ ɔkanda.”

⁵ Ansɩ legyi ahogyipʋ amʋ fɛ́ɛ́ asʋn anfɩ ɩwɩ. Mʋ́ sʋ bɛlɛ oyin ɔkʋá mʋ hogyi ɔnɔ ɩbʋ ɔnlɩn, Ɔŋɛ Wankɩhɛ ɛ ɩtsɔ mʋtɔ, bʋtɛtɩ mʋ Stefano mʋa Filipo, Prokoro, Nikanor, Timon, Parmena pʋ́ Nikolao, ogyi Grikiyin ɔkʋá otsu Antiokia asa alawie Yudafɔ osumtɔ.

⁶ Bɔpʋ aha anfɩ bosuna sumbi ayɔpʋ amʋ, sumbi ayɔpʋ amʋ ɛ bɔpʋ ɩbɩ dɩnka amʋ́sʋ, bɔ mpaɩ ha amʋ́.

⁷ Ɩnɩ sʋ Bulu asʋn amʋ lɛklɛɩ, akasɩpʋ amʋ bomoni Yerusalem. Bulu igyi ahapʋ amʋ o tsɔtsɔɔtsɔ bɔhɔ Yesu asʋn amʋ.

Stefano Kɩta

⁸ Bulu lɔwa awɩtɔlɛ ha Stefano tumi kpɔnkpɔɔnkpɔntɩ. Mʋ́ sʋ ɔlɔbwɛ ofula pʋ́ osuna akpɔnkpɔntɩ ɔmá amʋtɔ.

⁹ Tamɛ akʋ bɔkʋsʋ lɩɩ mʋsʋ. Aha anfɩ botsu ofiakpa kʋá bʋtɛtɩ mʋ́ “Nkpábiá Bahɔ Ɩwɩsʋtsia.” Amʋ́ akʋ bʋgyi Yudafɔá botsu Kirene pʋ́ Aleksandria awulusʋ. Akʋ ɛ botsu Kilikia pʋ́ Asia ɔmátɔ.

¹⁰ Tamɛ Ɔŋɛ Wankɩhɛ lɛha Stefano nyansa ɔlɔpʋtɔɩ. Mʋ́ sʋ bʋmɛtalɩ gyi mʋ nwɛn.

¹¹ Ɩnɩ sʋ bɛha akʋ ɔnɔ bɛɛ bʋblɩ bɛɛ, bonuá Stefano dɛtɔɩ wɔ Mose mʋa Bulu.

¹² Ɩnɩ lɛha aha ánɩ́ bʋbʋ ɩnʋ, Yudafɔ ahandɛ pʋ́ Mose mbla asunapʋ amʋ benya ɔblɔ Stefanosʋ. Ɩnʋ bɛnatɩ yɔtʋ mʋ, kɩta mʋ, kpa mʋ ya Yudafɔ Asʋn Agyipʋ amʋ ansɩtɔ.

¹³ Bɛlaha akʋ ɛ bɔwa afunu dɩnka mʋsʋ bɛɛ, “Oyin anfɩ tɔtɔɩ wɔ Bulu ɔtswɛkpa wankɩhɛ pʋ́ Mose mbla amʋ ekekegyiɛkɛ.

¹⁴ Anɩlonuá ɔdɛblɩ ɔbɛɛ, ‘Yesu Nasaretyin amʋ obóbwie Bulu ɔtswɛkpa amʋ, tsɛ amandɩɛá Mose losuna anɩ fɛ́ɛ́.> ”

¹⁵ Yudafɔ Asʋn Agyipʋ amʋ fɛ́ɛ́ besi bʋdɛ Stefano kɩ diin. Ɩnʋ bɛkɩ a, mʋ ansɩtɔ dɛ ogya kpa fɛ Bulu-ɔbɔpʋ ansɩtɔ.