Gyumagyihɛ 5 - Bulu Ntam Pɔpwɛ mʋ́a Israel Ɩlʋ

Anania Mʋa Safira

¹ Ɩnʋ oyin ɔkʋá bʋtɛtɩ mʋ Anania mʋa mʋ ka Safira ɛ bɛfɛ amʋ́ siadɩɛ kʋ.

² Tamɛ Anania lɛlɛ kɔba amʋ ɩkʋ ŋain, mʋ ka ɛ yin mʋ́ ɩwɩ. Ɔlɔpʋ kɔba amʋ trahɛ ba sumbi ayɔpʋ amʋ.

³ Mʋʋ Petro lɛfɩtɛ mʋ ɔbɛɛ, “Anania, ntogyi sʋ faha Ɔbʋnsam lagyi fʋsʋ, fapʋ kɔba amʋʋ fenya amʋ kʋ ŋain, bɔwa afunu suna Ɔŋɛ Wankɩhɛ?

⁴ Fʋbʋ fʋ ɔsʋlʋ asa fɛfɛ mʋ́. Ɩnɩá fɛfɛ mʋ́ ɛ a, fʋbʋ fʋ kɔba. Ntɔ lahan fʋ sʋ fabwɛ ɩtɔá igyi alɩ? Bulu fawa afunu suna o, megyi anyankpʋsa.”

⁵ Anania lenya nu asʋn anfɩ alɩ ɔlɛtɩn da wu. Mʋ́ sʋ ifu lɛhɩɛ kɩta aha ánɩ́ bonu asʋn anfɩ fɛ́ɛ́.

⁶ Ɩnʋ nyasubi akʋ bɔkʋsʋ tsu tati kɩklɩ mʋ, tsu mʋ yopula.

⁷ Ilegyi fɛ dɔnhwɩrɩ asa ɔma asa mʋ ka Safira ɛ lobowie ɩnʋ. Alɩ brɛ amʋtɔ a, omeyin tɔá ɩlaba mʋ klusʋ.

⁸ Petro lɛfɩtɛ mʋ ɔbɛɛ, “Safira, bla mɩ. Kɔba anfɩ gyi tɔá fʋa fʋ klu mlɩlenya brɛá mlɩlɛfɛ ɔsʋlʋ amʋ nɩ?” Safira lɛlɛ mʋ́ ɔnɔ ɔbɛɛ, “Ee, alɩ anɩlenya nɩ.”

⁹ Mʋ́ sʋ Petro lɛfɩtɛ mʋ ɔbɛɛ, “Ntogyi sʋ fʋa fʋ klu mlɩlabwɛ ɔnɔ-ɔkʋlɛ mlɩaa, mlɔ́sɔ anɩ Wie Ɔŋɛ kɩ? Kɩ, nyasubiá bayopula fʋ klu yinki lawie obu-ɔnɔ ɩnʋ a. Bɔ́sʋra fʋ ɛ ya.”

¹⁰ Ɩnʋnʋ ɔtsɩ amʋ ɛ lɛtɩn da Petro ayabitɔ ɩnʋ wu. Brɛá nyasubi amʋ bobowie ɩnʋ a, bowun ánɩ́ Safira ɛ lawu, sʋ botsu mʋ yopula mʋ manta mʋ klu.

¹¹ Ifu lɛhɩɛ wie ɔpasua amʋ pʋ́ aha ánɩ́ bonu asʋn anfɩ fɛ́ɛ́tɔ.

Sumbi Ayɔpʋ Amʋ Ofula Pʋ́ Osuna Bwɛ

¹² Bulu lɔtsʋn sumbi ayɔpʋ amʋsʋ bwɛ ofula pʋ́ osuna tsɔtsɔɔtsɔ wulu amʋtɔ. Ahogyipʋ amʋ fɛ́ɛ́ bɔbwɛ kʋlɛ tsia fia ɔtɩnɛkʋá bʋtɛtɩ ɩnʋ Salomo Abrandasʋ.

¹³ Aha ánɩ́ bʋmegyi ahogyipʋ kʋraa bɛtɩ ahogyipʋ amʋ ɩdayile. Tamɛ ɔkʋkʋ mɔbwɛ agywɩɩn ɔbɛɛ, mɛ́bɛtsɩa ahogyipʋ amʋtɔ.

¹⁴ Igyi alɩ o a, atsɩ mʋ́a ayin tsɔtsɔɔtsɔ bɔhɔ anɩ Wie Yesu gyi. Bulu letsia pʋ amʋ́ tsɩa ahogyipʋ amʋtɔ.

¹⁵ Sumbi ayɔpʋ amʋ ofulabwɛ sʋ wulu amʋtɔ aha betsia tsu amʋ́ alɔpʋ ba brɔnʋsʋ, bɛyaɩ nklan tswɩ pʋ amʋ́ tswɩ mʋ́sʋ. Fówun nɩ Petro ɔba bɔtsʋn ɩnʋ a, mʋ yiyi bɔ́wʋlɩ amʋ́sʋ.

¹⁶ Ɔdɔm ánɩ́ botsu awuluá ɩbʋ bomli Yerusalemtɔ ɛ bɔpʋ amʋ́ alɔpʋ pʋ́ aha ánɩ́ ɔŋɛ lalahɛ dɛ amʋ́ han ba, sumbi ayɔpʋ amʋ bɛtsa amʋ́ ɩlɔ.

Sumbi Ayɔpʋ Amʋ Lu

¹⁷ Sumbi ayɔpʋ amʋ ɩwɩ lɔwa Bulu igyi ɔhapʋ dɛhɛn amʋ mʋa mʋ aba ánɩ́ bʋbʋ Saduki ɔpasuatɔ olu.

¹⁸ Ɩnɩ sʋ bɛkɩta sumbi ayɔpʋ amʋ wa obu.

¹⁹ Tamɛ onye, Bulu-ɔbɔpʋ ɔkʋ lɛba befinki obu amʋ, kpa sumbi ayɔpʋ amʋ dalɩ.

²⁰ Bulu-ɔbɔpʋ amʋ lɛbla amʋ́ ɔbɛɛ, “Mlɩyɔ amlɩyɛlɩɩ Bulu ɔtswɛkpa wunsɩnɛsʋ ɩnʋ, amlɩbla aha nkpa pɔpwɛ amʋ ɩwɩ asʋn fɛ́ɛ́.”

²¹ Sumbi ayɔpʋ amʋ begyi Bulu-ɔbɔpʋ amʋ asʋnsʋ. Mʋ́ sʋ bɛnatɩ yɔ wunsɩnɛsʋ ɩnʋ bakɛ, bʋdɛ aha atɔ suna. Ɔma-ɔma a, Bulu igyi ɔhapʋ dɛhɛn amʋ lɛtɩ Yudafɔ asʋn agyipʋ amʋ fɛ́ɛ́ fia. Mʋʋ bɔwa abi bɛɛ, bʋyɛlɛ sumbi ayɔpʋ amʋ ba.

²² Tamɛ bɔyɔ a, sumbi ayɔpʋ amʋ bʋma ɩnʋ. Ɩnɩ sʋ beyinki bɛbla ahandɛ amʋ bɛɛ,

²³ “Anɩlɔyɔ ɩnʋ a, anɩlowun ánɩ́ aklʋn amʋ fin wanklaan. Obu adɩpʋsʋ akɩpʋ amʋ bʋlɩɩ bʋdɛ aklʋn amʋ ɔnɔ gyo. Tamɛ brɛá anɩlefinki aklʋn amʋ a, anɩmowun ɔhaa obu amʋtɔ.”

²⁴ Bulu ɔtswɛkpa agyopʋ ɔhandɛ mʋa Bulu igyi ahapʋ dɛhɛn amʋ bonu asʋn anfɩ a, bɔbwɛ yɔɔ, si bʋdɛ asʋn ánɩ́ ɩbɛ́ba mʋ́ ɔma gywɩɩn.

²⁵ Ɩnʋ ɔha ɔkʋ lɛbɛbla amʋ́ ɔbɛɛ, “Mlɩkɩ, aha amʋʋ mlɩlɔwa obu amʋ bʋlɩɩ Bulu ɔtswɛkpa wunsɩnɛsʋ ɩnʋ, bʋdɛ aha atɔ suna.”

²⁶ Mʋ́ sʋ Bulu ɔtswɛkpa agyopʋ ɔhandɛ amʋ mʋa mʋ aba bɔyɔ yɛkpa sumbi ayɔpʋ amʋ ba. Bɛkpa amʋ́ diin pʋ amʋ́ ba, tsufɛ benya ifuá nɩ bɔpʋ ɩbɩ da amʋ́ a, aha bɛ́da amʋ́ abwi.

²⁷ Bɔpʋ amʋ́ ba bɛlɩɩ Yudafɔ asʋn agyipʋ amʋ ansɩtɔ. Mʋʋ Bulu igyi ɔhapʋ dɛhɛn amʋ lɛfɩtɛ amʋ́ ɔbɛɛ,

²⁸ “Anɩmɛda mlɩ ɔla anɩaa, mlɩmátra tɩ oyin anfɩ ɩda suna atɔ? Tamɛ mlɩkɩ tɔá mlɩlabwɛ. Mlɩlaha mlɩ atosunahɛ labʋla Yerusalem wulutɔ fɛ́ɛ́. Mlɩdekleá mlɔ́pʋ mʋ lowu sʋra anɩ.”

²⁹ Petro mʋa sumbi ayɔpʋ atrahɛ amʋ bɛlɛ mʋ́ ɔnɔ bɛɛ, “Bulu asʋnsʋ lehian ánɩ́ abégyi, megyi anyankpʋsa.

³⁰ Mlɩlɛda Yesu manta oyikpalihɛsʋ mɔ mʋ. Tamɛ anɩ anain Bulu lɔkʋsʋa mʋ tsu afulitɔ.

³¹ Olotsu mʋ ya ɔsʋsʋ, pʋ mʋ yɛyaɩ mʋ gyɔpɩsʋ, bwɛ mʋ aha Ɔkpapʋ pʋ́ Nkpa Ɔhɔpʋ. Fówun ɔkpa ɩdɩ ha Israelfɔ abʋdamli klʋntɔ, Bulu osi amʋ́ lakpan kie amʋ́.

³² Anɩgyi alɩ asʋn anfɩ ɩwɩ adansɩfɔ nɩ. Ɔŋɛ Wankɩhɛ amʋʋ Bulu lɔpʋkie aha ánɩ́ bʋtegyi mʋ asʋnsʋ amʋ ɛ dɛ mʋ́ ɩwɩ adansɩɛ gyi.”

³³ Brɛá Yudafɔ ahandɛ amʋ bonu asʋn anfɩ a, ɩlɔwa amʋ́ ɔblɔ. Mʋ́ sʋ bɔbwɛ agywɩɩn bɛɛ, bɔ́mɔ sumbi ayɔpʋ amʋ.

³⁴ Tamɛ Yudafɔ ahandɛ amʋtɔ ɔkʋá ogyi Farisiyin, mʋ ɩda gyi Gamaliel, ogyi Mose mbla osunapʋá aha fɛ́ɛ́ bʋtobu mʋ lɔkʋsʋ lɩɩ, blɩ ɔbɛɛ bʋkpa sumbi ayɔpʋ amʋ dalɩ kpalobi.

³⁵ Ɩnʋ ɔlɛbla Yudafɔ ahandɛ amʋ ɔbɛɛ, “Israelfɔ ayin, mlɩkɩ wanklaan ɩtɔ anfɩ mlɩaa mlɔ́pʋgyi aha anfɩ ɩwɩ.

³⁶ Mlɩkaɩn ánɩ́ brɛ kʋtɔ a, oyin ɔkʋá bʋtɛtɩ mʋ Teuda letsia. Ɔlɔbwɛ mʋ ɩwɩ fɛ ɔha kpɔnkpɔntɩ ɔkʋ. Mʋ́ sʋ aha bɔ́bwɛ fɛ lafana (400) sɔɔn bobuo mʋ. Tamɛ bɔmɔ mʋ, mʋ abuopʋ fɛ́ɛ́ bɛdasaɩn, mʋ bwɛhɛ ɛ fɛ́ɛ́ lowie ntsu.

³⁷ Mʋ ɔma a, Yuda ánɩ́ ogyi Galileayin ɛ lɛba ahaklabɩ. Mʋ ɛ ɔlɛkpa ɔdɔm buo ɩwɩ. Tamɛ bɔmɔ mʋ, mʋ abuopʋ amʋ fɛ́ɛ́ bɛdasaɩn.

³⁸ Mʋ́ sʋ ndɛ mlɩ bla mbɛɛ, mlɩsi aha anfɩ. Mlɩmápʋ ɩbɩ da amʋ́. Tsufɛ nɩ itsu anyankpʋsa wa a, mʋ́ fɛ́ɛ́ ɩbɛ́ba bɔtsʋn.

³⁹ Tamɛ nɩ itsu Bulu wa a, mlɩmɛ́ɛtalɩ ka amʋ́ itin. Mʋ́ sʋ mlɩmábwɛ amʋ́ tɔtɔ, mɛnɩ ɩmɔ́ɔbwɛ fɛ mlɩa Bulunyɔ mlɩdɛkɔ.” Yudafɔ ahandɛ amʋ botsula dɩnka Gamaliel asʋn anfɩsʋ.

⁴⁰ Ɩnʋ bɛha bɛtɩ sumbi ayɔpʋ amʋ ba obuto ɩnʋ. Bɛha bɔnwɛn amʋ́ atɔ, bɛda amʋ́ ɔla bɛɛ, bʋmátra tɩ Yesu ɩda suna atɔ ɛkɛkɛɛkɛ, besi amʋ́ bɛnatɩ.

⁴¹ Brɛá sumbi ayɔpʋ amʋ bɛdalɩ Yudafɔ asʋn ogyikpa ɩnʋ bɔyɔ a, ansɩ dɛ amʋ́ gyi. Tsufɛ Bulu laha amʋ́ ɛ bawun ɩwɩɔsɩn Yesu sʋ.

⁴² Sumbi ayɔpʋ amʋ betsia suna atɔ ekekegyiɛkɛ, da Bulu asʋn wanklaan amʋ ɔkan Bulu ɔtswɛkpa ɩnʋ pʋ́ woyigyiwoyitɔ bɛɛ, Yesu gyi Kristo, (ɔha amʋʋ Bulu lada mʋ ofuli amʋ).