Gyumagyihɛ 4 - Bulu Ntam Pɔpwɛ mʋ́a Israel Ɩlʋ

Petro Mʋa Yohane Ɔnɔlɛ Yudafɔ Asʋn Ogyikpa

¹ Brɛá Petro mʋa Yohane bʋbʋ mʋ́sʋ bʋdɛtɔɩ kpla aha amʋ a, Bulu igyi ahapʋ mʋ́a Bulu ɔtswɛkpa agyopʋ ɔhandɛ pʋ́ Sadukifɔ akʋ bɛba bɔtʋ amʋ́.

² Ɔblɔ lɛkɩta ahandɛ anfɩ. Tsufɛ sumbi ayɔpʋ amʋ bʋdɛ aha amʋ atɔ suna bɛɛ, Yesu lawu kʋsʋ tsu afulitɔ. Mʋ́ sʋ wukʋsʋ bʋ ɩnʋ ha ɔhagyiɔha.

³ Ahandɛ amʋ bɛkɩta Petro mʋa Yohane. Owi dɛta, sʋ bɔpʋ amʋ́ yɛwa obu yɛha ɔyɩkɛhɛ.

⁴ Tamɛ aha amʋʋ bonu amʋ́ atosunahɛ amʋtɔ aha tsɔtsɔɔtsɔ bohogyi, bɛtsɩa ahogyipʋ amʋtɔ. Mʋ́ sʋ ahogyipʋ amʋtɔ ayin bɔbwɛ fɛ mpɩm-nu (5,000).

⁵ Ɔyɩkɛhɛ nyankɩ a, Yudafɔ awie, amʋ́ ahandɛ pʋ́ Mose mbla asunapʋ bɛba befia Yerusalem.

⁶ Aha anfɩ pʋ́ ahandɛá befia asʋn amʋ asɩ gyi; Bulu igyi ɔhapʋ dɛhɛn Hana, mʋ woyitɔ ahandɛ Kaiafa, Yohane, Aleksandro pʋ́ woyi amʋtɔ aha fɛ́ɛ́.

⁷ Bɛha bɔpʋ Petro mʋa Yohane bɛlɩɩ amʋ́ ansɩtɔ, bɛfɩtɛ amʋ́ bɛɛ, “Ma tumitɔ ntɛ ma ɩdatɔ mlɩlɛtsa oyin anfɩ?”

⁸ Ɩnʋ a, Ɔŋɛ Wankɩhɛ lɔbʋla Petrotɔ. Mʋ́ sʋ ɩlɛha mʋ tumi, ɔlɛbla Yudafɔ awie pʋ́ amʋ́ ahandɛ amʋ ɔbɛɛ,

⁹ “Ndɛ mʋ́ mlɩdɛ anɩ fɩtɛ tɔá sʋá anɩlawa awɩtɔlɛ ha ɩbɔ anfɩ, tsa mʋ ɩlɔ?

¹⁰ Mʋmʋ tsu ndɛ mlɩa Israelfɔ fɛ́ɛ́ mlɩbɩá Yesu Kristo, Nasaretyin amʋ tumi pʋ́ mʋ ɩdatɔ oyin anfɩ ɔlɩɩ mlɩ ansɩtɔ anfɩ lanya ɩlɔtsa. Mʋgyi ɔha amʋʋ mlɩlɛda manta oyikpalihɛsʋ mɔ mʋ asa Bulu lɔkʋsʋa mʋ tsu afulitɔ amʋ nɩ.

¹¹ Yesu anfɩ ɩwɩ asʋn bɔwanlɩn wa Bulu asʋn amʋtɔ bɛɛ, ‘Ibwi amʋʋ mlɩ obu ayipʋ mlɩlekina amʋ labɔbwɛ okonkisʋbwi nɩ.>

¹² Yesu anfɩ nkʋlɛ pɛ gyi ɔha ánɩ́ Bulu lɔpʋha anɩ ɔyɩ anfɩtɔ ɔbɛɛ, atsʋn mʋsʋ nya nkpa. Ɔhaa tra ɔma ɩnʋá ɔdʋn mʋ.”

¹³ Ɩnɩá Yudafɔ ahandɛ amʋ bʋyin ánɩ́ Petro mʋa Yohane bʋmɔkʋkasɩ ɔwʋlʋ kɩ, tamɛ ifu mɛdɛ amʋ́ sʋ a, ɔnɔ lobwie amʋ́. Ɩlɔwankɩ amʋ́ ánɩ́ babuo Yesu kɩ.

¹⁴ Ahandɛ amʋ bʋmenya asʋansʋ blɩ. Tsufɛ bowun ánɩ́ ɩbɔ amʋʋ alanya ɩlɔtsa amʋ lɩɩ Petro mʋa Yohane wa.

¹⁵ Mʋ́ sʋ bɛbla Petro aná bɛɛ, bʋdalɩ asʋn ogyikpa ɩnʋ kpalobi, abʋkɩta agywɩɩn. Mʋʋ ahandɛ amʋ bɛfɩtɛ aba bɛɛ,

¹⁶ “Nkalɩ abɔ́bwɛ aha anfɩ? Ɔhagyiɔha labɩ Yerusalem wulutɔá amʋ́ labwɛ osuna kpɔnkpɔntɩ anfɩ. Anɩmɛ́ɛtalɩ gyi mʋ́ nwɛn.

¹⁷ Tamɛ alɩá ɩbɔ́bwɛ asʋn anfɩ mɛ́ɛtra klɛɩ a, mlɩha ada amʋ́ ɔla kinkiinkin anɩaa, bʋmátra bla ɔhaa asʋansʋ Yesu ɩdatɔ ɛ.”

¹⁸ Ɩnʋ bɛlatɩ Petro mʋa Yohane ba obuto ɩnʋ, bɛda amʋ́ ɔla bɛɛ, bʋmátra bla ɔhaa asʋngyiasʋn ntɛ suna atɔ Yesu ɩdatɔ ɛkɛkɛɛkɛ.

¹⁹ Mʋʋ Petro mʋa Yohane bɛbla amʋ́ bɛɛ, “Mlɩ onuto mlɩkɩ. Mɔmʋ bʋ alɛ Bulu ansɩtɔ, ánɩ́ abónu mlɩ asʋn loo, ntɛ Bulu klɛ?

²⁰ Tsufɛ anɩ mʋ́ anɩmɛ́ɛtalɩ si tɔá anɩlawun pʋ́ asʋn ánɩ́ anɩlanu blɩ.”

²¹ Bʋmɛtalɩ bɩtɩ amʋ́ ɩsʋ, tsufɛ aha amʋ fɛ́ɛ́ bʋdɛ Bulu kanfʋ ofula kpɔnkpɔntɩ amʋʋ alabwɛ amʋ sʋ. Mʋ́ sʋ ahandɛ amʋ bɛtra da amʋ́ ɔla kinkiinkin, besi amʋ́ bɛnatɩ.

²² Oyin amʋ ɩlɔtsa lɔwa ifu, tsufɛ alahɔ dʋn nfi adʋana (40) alɩ brɛ amʋtɔ.

Ahogyipʋ Amʋ Atɔ Kʋlɩhɛ

²³ Yudafɔ ahandɛ amʋ benya si amʋ́ alɩ, Petro mʋa Yohane beyinki ba amʋ́ aba ahogyipʋ amʋ wa. Bɛbla amʋ́ asʋn ánɩ́ Bulu igyi ahapʋ dɛhɛn pʋ́ Yudafɔ ahandɛ amʋ bɛblɩ fɛ́ɛ́.

²⁴ Brɛá ahogyipʋ amʋ bonu asʋn amʋ a, amʋ́ fɛ́ɛ́ bɔpʋ ɔmɛ kʋlɛ kʋlɩ Bulu bɛɛ, “Anɩ Wie Bulu Otumipʋ, fʋlɔbwɛ ɔsʋ fɔbwɛ asɩ, ɔpʋ mʋ́a ntsu pʋ́ mʋ́tɔ atɔ fɛ́ɛ́.

²⁵ Fɔtsʋn Ɔŋɛ Wankɩhɛsʋ ha anɩ nain Dawid, ogyi fʋ osumpʋ lɛblɩ ɔbɛɛ, ‘Ntogyi sʋ ɔmá-ɔmá banya ɔblɔ? Ntogyi sʋ aha fɛ́ɛ́ babwɛ agywɩɩn kʋkʋ kpaalɩ?

²⁶ Ɔsʋlʋsʋ awie badɩda atɔ. Wulu ahandɛ batɩ aba fia, kɩta agywɩɩn lalahɛ anɩ Wie Bulu mʋa Kristo, (ɔha amʋʋ ɔlɛda mʋ ofuli) amʋsʋ.> ”

²⁷ Petro lɔyɔ mʋ asʋnsʋ ɔbɛɛ, “Lɛlɛ a, asʋn anfɩ laba mʋ́tɔ. Owie Herode mʋa Pontio Pilatoá bʋmegyi Yudafɔ pʋ́ Israelfɔ babwɛ kʋlɛ wulu anfɩtɔ, kʋsʋ lɩɩ Yesusʋ. Mʋgyi fʋ osumpʋ wankɩhɛá fɛda mʋ ofuli nɩ.

²⁸ Tamɛ bʋmɛbɩ ánɩ́ tɔá fɛhɩhɩɛ yaɩ fɛ́ɛ́ ɩbɛ́ba mʋ́tɔ fʋ apɛ pʋ́ fʋ tumitɔ dodo babwɛ a.

²⁹ Anɩ Wie Bulu, kɩ alɩá baka anɩsʋ, afʋkpa fʋ asumpʋ, mɛnɩ abɛ́talɩ blɩ fʋ asʋn amʋ, anɩméenya ifu.

³⁰ Tsa aha ɩlɔ fʋ tumitɔ, afʋha abwɛ ofula pʋ́ osuna fʋ osumpʋ wankɩhɛ Yesu ɩdatɔ.”

³¹ Brɛá bɔbɔ mpaɩ anfɩ ta a, amʋ́ ofiakpa ɩnʋ fɛ́ɛ́ ɩlɛkpɩnkɩ. Ɔŋɛ Wankɩhɛ lɔbʋla amʋ́tɔ. Mʋ́ sʋ bɔwa klʋn da Bulu asʋn amʋ ɔkan.

Ahogyipʋ Amʋ Atɔtɔ Ye

³² Ahogyipʋ amʋ fɛ́ɛ́ bɔpʋ ɩklʋn kʋlɛ mʋ́a agywɩɩn kʋlɛ tsia. Ɔkʋkʋ mɛblɩ ɔbɛɛ, tɔá mʋbʋ igyi mʋ nkʋlɛ klɛ. Mboun okugyiɔkʋ atɔ lɔbwɛ amʋ́ fɛ́ɛ́ klɛ.

³³ Sumbi ayɔpʋ amʋ bɔpʋ tumi kpɔnkpɔɔnkpɔntɩ gyi anɩ Wie Yesu ɩwɩ adansɩɛ bɛɛ, Bulu lakʋsʋa mʋ tsu afulitɔ. Bulu lɛhɩɛ wa awɩtɔlɛ ha ahogyipʋ amʋ fɛ́ɛ́.

³⁴ Amʋ́tɔ ɔkʋkʋ megyi ohian, tsufɛ amʋ́á bʋbʋ ɔsʋlʋ pʋ́ woyi betsia fɛ mʋ́, pʋ mʋ́ ɔnɔ kɔba ba

³⁵ sumbi ayɔpʋ amʋ, betsia ye mʋ́ ha ɔhagyiɔha alɩá ilehian mʋ.

^36-37 Mʋ́ sʋ alɩ kɛn Lewiyin ɔkʋá bʋtɛtɩ mʋ Yosef lɛfɛ ɔsʋlʋ, ɔlɔpʋ kɔba amʋ ba sumbi ayɔpʋ amʋ nɩ. Yosef anfɩ otsu Kipro ɔmátɔ, sumbi ayɔpʋ bɛha mʋ ɩda Barnaba, (mʋ́ asɩ gyi, “Aha atɛtɔ-ɔnlɩn ɔwapʋ.”)