Gyumagyihɛ 3 - Bulu Ntam Pɔpwɛ mʋ́a Israel Ɩlʋ

Petro Mʋa Yohane Ɩbɔ Ɔkʋ Tsa

¹ Ɛkɛ ɔkʋ ntʋpwɛ dɔsatɔ mpaɩbɔ brɛ a, Petro mʋa Yohane bɔyɔ Bulu ɔtswɛkpa amʋ wunsɩnɛsʋ.

² Oyin ɔkʋá bɔkwɩɩ mʋ ɩbɔ tetsia Bulu ɔtswɛkpa amʋ ɔkpa ɔnɔ kʋá bʋtɛtɩ mʋ́ “Ɔkpa ɔnɔ Wanklaan.” Aha bʋtotsu mʋ ba bɛyaɩ ɩnʋ ekekegyiɛkɛ, ɔtɔkʋlɩ aha ánɩ́ bówie Ɔtswɛkpa ɩnʋ kɔba.

³ Brɛá ɩbɔ amʋ lowun ánɩ́ Petro mʋa Yohane bʋdebitiwie Ɔtswɛkpa ɩnʋ a, ɔlɔkʋlɩ amʋ́ kɔba.

⁴ Petro mʋa Yohane besi lɩɩ bʋdɛ mʋ kɩ diin. Mʋʋ Petro lɛbla mʋ ɔbɛɛ, “Fʋ mʋ́ kɩ anɩ wʋlɛ.”

⁵ Ɩbɔ amʋ kɩ ɔbɛɛ, bɛ́ha mʋ tɔkʋ. Mʋ́ sʋ olotsu ansɩ fʋa ɔdɛ amʋ́ kɩ.

⁶ Tamɛ Petro lɛbla mʋ ɔbɛɛ, “Mma sika fututu ntɛ pɛpɛ, tamɛ nɛ́ha fʋ tɔá mbʋ. Kʋsʋ lɩɩ, afʋnatɩ Yesu Kristo Nasaretyin amʋ ɩdatɔ!”

⁷ Ɩnʋ Petro lɛkɩta mʋ gyɔpɩ bɩ, tsu mʋ lɩɩ. Ɩnʋnʋ ɔwʋnlɩn lowie mʋ ayabi pʋ mʋ ntsakpatɔ.

⁸ Olofuli kpayi ɔtsawʋlɛ pɛ, wa natɩ bɩ. Mʋ́ sʋ ɔlɛkpla buo Petro aná wie Bulu ɔtswɛkpa wunsɩnɛsʋ ɩnʋ; ɔna odefuli kpayi; ɔdɛ Bulu kanfʋ.

⁹ Aha ánɩ́ bʋbʋ ɩnʋ fɛ́ɛ́ bowun mʋá ɔna ɔdɛ Bulu kanfʋ.

¹⁰ Mʋ́ sʋ brɛá ɩlɔwankɩ amʋ́ ánɩ́ ɩbɔ amʋʋ otetsia Ɔkpa Ɔnɔ Wanklaan ɩnʋ kʋlɩ atɔ amʋ nɩ a, ɩlɔwa amʋ́ wanwan, bwie amʋ́ ɔnɔ.

Petro Tɔɩ Bulu Ɔtswɛkpa Wunsɩnɛsʋ

¹¹ Oyin amʋ pu Petro mʋa Yohane kinkiinkin Bulu ɔtswɛkpa wunsɩnɛsʋ, ɔtɩnɛkʋá bʋtɛtɩ ɩnʋ Salomo Abrandasʋ. Mʋ ɩlɔtsa lɔwa amʋ́ wanwan. Mʋ́ sʋ bɛsrɩ ba amʋ́ wa ɩnʋ.

¹² Brɛá Petro lowun amʋ́ a, ɔlɛfɩtɛ amʋ́ ɔbɛɛ, “Mɩ apio Israelfɔ, ntogyi sʋ asʋn anfɩ lawa mlɩ wanwan alɩ? Ntogyi sʋ mlɩlaba mlɩdɛ anɩ kɩ alɩ? Mlɩkɩ mlɩaa, anɩ onuto tumi ntɛ anɩ Bulusum wanklaan laha sʋ oyin anfɩ lakʋsʋ ɔna?

¹³ Anɩ anain Abraham, Isakɩ pʋ́ Yakob bosum Bulu. Mʋlɔwa mʋ osumpʋ Yesu numnyam. Tamɛ mlɩlɔpʋ mʋ ha mlɩaa, bʋmɔ mʋ. Mlɩlekina ɔha anfɩ tɛkɩ Pilato lɔbwɛ agywɩɩn ánɩ́ mési mʋ ɔnatɩ anfɩ.

¹⁴ Mlɩlekina Ɔha Wankɩhɛ pʋ́ Yile Ɔbwɛpʋ anfɩá bɔwanlɩn mʋ ɩwɩ asʋn wa Bulu asʋn ɔwʋlʋtɔ anfɩ, bla Pilato mlɩaa, osi aha ɔmɔpʋ amʋ mboun ha mlɩ.

¹⁵ Mlɩlɛha bɔmɔ nkpa ɔhapʋ anfɩ, tamɛ Bulu lɔkʋsʋa mʋ tsu afulitɔ. Anɩgyi mʋ́ ɩwɩ adansɩfɔ nɩ.

¹⁶ Yesu tumi laha ɩbɔ anfɩ mlɩyin yaɩ, mlɩdɛkɩ anfɩ ɩwɩ lawa mʋ ɔnlɩn. Anɩ Yesu hogyi latsa mʋ, mlɩ fɛ́ɛ́ mlɩdewun a.

¹⁷ “Ɩnɩ sʋ mɩ apio, nyin ánɩ́ mábɩ lɛha mlɩa mlɩ ahandɛ mlɩlɔpʋ ɩnɩ fɛ́ɛ́ gyi Yesu.

¹⁸ Tamɛ Bulu lɛblɩ tsʋn mʋ ɔnɔsʋ atɔɩpʋ amʋ fɛ́ɛ́sʋ yaɩ ɔbɛɛ, ‘Kristo, (ɔha amʋʋ nɛda mʋ ofuli amʋ) obówun ɩwɩɔsɩn.> Mʋ́ sʋ ɔlɛha ɩlɛba alɩ nɩ.

¹⁹ Mʋ́ sʋ mlɩdamli klʋntɔ, amlɩyinki ba Bulu wa, mɛnɩ obési mlɩ lakpan fɛ́ɛ́ kie mlɩ, wa mlɩ ɔwʋnlɩn pɔpwɛ,

²⁰ lapʋ Yesu sɩsɩ mlɩ. Mʋ Bulu lɛda ofuli yaɩ ha mlɩ nɩ.

²¹ Ilehian ánɩ́ Yesu obétsia ɔsʋsʋ ɩnʋ yɔfʋn brɛá Bulu ɔbɛ́la togyitɔ bwɛ, fɛ alɩá ɔlɛha mʋ ɔnɔsʋ atɔɩpʋ wankɩhɛ amʋ bɛblɩ tswɩ.

²² Anɩ nain Mose lɛblɩ ɔbɛɛ, ‘Mlɩ Wie Bulu ɔbɛ́ha mʋ ɔnɔsʋ ɔtɔɩpʋ ɔkʋá ogyi fɛ mɩ ɔbɛ́dalɩ tsu mlɩtɔ ha mlɩ. Mlɩgyi mʋ asʋn blɩhɛ fɛ́ɛ́sʋ.

²³ Ɔhagyiɔha ánɩ́ omobu ɔnɔsʋ ɔtɔɩpʋ anfɩ a, Bulu ɔbɛ́lɛ mʋ lɛ mʋ ahatɔ, mɔ mʋ.>

²⁴ “Tsu Samuelsʋ a, Bulu ɔnɔsʋ atɔɩpʋá bɛba fɛ́ɛ́ bɔtɔɩ tsu asʋn anfɩ ɩdɛba nkɛ anfɩtɔ ɩwɩ.

²⁵ Mlɩgyi Bulu ɔnɔsʋ atɔɩpʋ amʋ abi-aná. Mlɩbʋ ɩtɔ amʋʋ Bulu lɛhɩɛ yaɩ ha anɩ anain amʋ. Tsufɛ Bulu lɛbla Abraham ɔbɛɛ, ‘Nɔ́tsʋn fʋ abi-anásʋ yula ɔyɩtɔ aha fɛ́ɛ́.>

²⁶ Ɩnɩ sʋ brɛá Bulu lɛlɛ mʋ osumpʋ Yesu a, olegyankpa pʋ mʋ sɩsɩ mlɩ Israelfɔ. Ɔbɛɛ obóyula mlɩ, amlɩsi lakpan bwɛ nɩ.”