Gyumagyihɛ 27 - Bulu Ntam Pɔpwɛ mʋ́a Israel Ɩlʋ

Paulo Pʋya Roma Wulutɔ

¹ Brɛá bɛblɩ alɩ ta a, bɛkɩta agywɩɩn bɛɛ, abɔ́tsʋn ɔpʋsʋ yɔ Italia ɔmátɔ. Bɔpʋ Paulo mʋa obu adɩpʋ akʋ ɛ wa Romafɔ ɩsa akɔpʋ ɔhandɛ ɔkʋá bʋtɛtɩ mʋ Yulio ɩbɩtɔ. Ɔhandɛ anfɩ bʋ Roma Owie Dɛhɛn Augusto ɩsa akɔpʋ ɔpasuatɔ.

² Anɩlowie ntsusʋ-yibi kʋá itsu Adramitio fʋn, ɩyɔ ɔpʋ ɔnɔ awuluá ɩbʋ Asia ɔmátɔ. Makedoniayin Aristarko, otsu Tesalonika amʋ ɛ bʋ anɩtɔ.

³ Ɔyɩkɛhɛ a, anɩlɛlɩɩ Sidon ɔpʋ ɔnɔ. Ɩsa akɔpʋ ɔhandɛ Yulio lowun Paulo nwɛ, ɔlɛha mʋ ɔlɔyɔ mʋ aba wa, mɛnɩ bɛ́ha mʋ atɔá ibéhian mʋ.

⁴ Anɩlɔkʋsʋ tsu ɩnʋ a, afu lefia anɩ ɔpʋ amʋsʋ. Mʋʋ anɩlɔyɔtsʋn Kipro ɔsʋlʋ awunsʋ fʋn, tsufɛ afu amʋ mɛdɛtsʋn ɩnʋ mʋ́.

⁵ Anɩlɔtsʋn ɔpʋsʋ yɔtsʋn Kilikia pʋ́ Pamfilia fʋnsʋ yowie Likia ɔsʋlʋsʋ, Mira wulutɔ.

⁶ Ɩsa akɔpʋ ɔhandɛ amʋ lowun ntsusʋ-yibi kʋá itsu Aleksandria wulutɔ ɩyɔ Italia ɔmátɔ, ɔlɛlɛ anɩ wa mʋ́tɔ.

⁷ Anɩdɩn ɔpʋ amʋsʋ pʋtɔɔ. Mʋ́ sʋ anɩlegyi nkɛ tsɔtsɔɔtsɔ ɔkpatɔ. Ilepian anɩ asa anɩlowie Knido. Afu amʋ mɛha anɩ ɔkpa. Mʋ́ sʋ anɩlɔpʋ yɔtsʋn manta Kreta ɔmá. Ɩnʋ a, anɩlɔpʋkplɩ tsʋn Salmone wulu ɔsasɩ fʋn. Tsufɛ afu mɛdɛtsʋn ɩnʋ mʋ́.

⁸ Ɩnɩá anɩlɔtsʋn ɔpʋ ɔnɔ-ɔnɔ kʋraa o a, ilepian anɩ asa anɩlobowie ɔtɩnɛkʋá bʋtɛtɩ ɩnʋ “Otsubunɔ Wanklaan,” ɩbʋ manta Lasea wulutɔ.

⁹ Nkɛ tsɔtsɔɔtsɔ lɔbɔtsʋn, nkɛá bʋtɔpʋklɩ ɔnɔ kʋlɩ lakpansikie ɛ ɩlɔtsʋn. Nkɛ amʋtɔ ɛ a, ɔpʋ amʋ ɩdɛda. Mʋ́ sʋ mʋ́sʋ tsʋn lɔwa ifu. Ɩnɩ sʋ Paulo lɔtɔɩ kpla amʋ́ ɔbɛɛ,

¹⁰ “Mɩ awie, nawun ánɩ́ nɩ anɩmɛkɩ wanklaan anɩ ɔkpa anfɩ natɩtɔ a, abɔ́hʋlɩ atɔ tsɔtsɔɔtsɔ. Megyi atɔ pʋ́ ntsusʋ-yibi amʋ wʋlɛ, anɩ onutonuto ɛ abésin mʋ́tɔ.”

¹¹ Tamɛ ɩsa akɔpʋ ɔhandɛ amʋ lɔhɔ ntsusʋ-yibi amʋtɔ ɔhandɛ pʋ́ mʋ wie asʋn si Paulo.

¹² Ɩnɩá otsubunɔ ɩnʋ ɩma alɛá abétsia ɩnʋ nyankpʋtswiebɩ sʋ a, amʋ́tɔ aha tsɔtsɔɔtsɔ bɛblɩ bɛɛ, abɛ́natɩ ɩnʋ. Amʋ́ ansɩ dɩn ánɩ́ abéyewie Foinike, igyi Kreta otsubunɔ, ɩbʋ owi ɔkplɩwiekpa fʋn, tsia ɩnʋ nyankpʋtswiebɩ amʋ.

Atsufu Kpɔnkpɔntɩ Ɔpʋsʋ Tsʋn

¹³ Ɩnʋ afu kʋá itsu gyɔpɩsʋ lɔwa tsʋn brɛʋʋ bɩ. Ɩnɩ sʋ aha amʋtɔ akʋ bosusuá amʋ́ agywɩɩn amʋ ɩbɛ́kana. Mʋ sʋ bɛlatsu simpiá ɩtɛha ntsusʋ-yibi tɛlɩɩ tsukʋlɛ wa ntsusʋ-yibi amʋtɔ, bɔpʋtsʋn Kreta ɔpʋ ɔnɔ-ɔnɔ.

¹⁴ Tamɛ ɩmɔwa ɔpá kʋkʋ afu kpɔnkpɔntɩ kʋ lɔkʋsʋ tsu Kreta ɩfʋnsʋ. Afu amʋ ɩda gyi “Bɩnasʋ-owi-ɔdalɩkpa-afu.”

¹⁵ Afu amʋ lebefia anɩ. Ɩnɩá anɩmɛtalɩ sankɩa ntsusʋ-yibi amʋ sʋ a, anɩlesi ɩwɩ ha afu amʋ, ɩlɔpʋ ntsusʋ-yibi amʋ natɩ.

¹⁶ Ɩlɔpʋ mʋ́ srɩ yɔtsʋn manta ɔpʋ nsɩnɛ ɔsʋlʋ kʋá bʋtɛtɩ mʋ́ Kauda asɩ. Ɩlɔwa ɔnlɩn asa bɛtalɩ tsu ɔklʋnbi amʋʋ bʋtɔpʋlɛ aha ánɩ́ bʋdɛ ntsu wie, isian ntsusʋ-yibi amʋ ɔma amʋ wa yibi amʋtɔ.

¹⁷ Ɩnʋ ntsusʋ-yibi amʋtɔ agyʋma ayɔpʋ bɛbɩtɩa ɔklʋnbi amʋ wa ntsusʋ-yibi amʋtɔ. Bɔpʋ ɔfɛ klɩ ntsusʋ-yibi amʋ kinkiinkin, mɛnɩ ɩmɛ́ɛmaɩn. Benya ifu bɛɛ, afu amʋ ɩbɔ́tsʋan ntsusʋ-yibi amʋ yowie Libia otsubunɔ osublutɔ. Mʋ́ sʋ bɛlɛ tatiá isian ntsusʋ-yibi amʋsʋ, mɛnɩ ntsusʋ-yibi amʋ bɛ́natɩ pʋtɔɔ. Mʋ́ o a, afu amʋ lɔtsʋan ntsusʋ-yibi amʋ natɩ ɔwʋnlɩnsʋ.

¹⁸ Mʋ́ ɔyɩkɛhɛ a, afu amʋ ɔnɔ lɛhɩɛ wa ɔnlɩn. Mʋ́ sʋ bɔwa amʋ́ atɔ sʋrahɛ lɛ wa ɔpʋtɔ bɩ.

¹⁹ Ɛkɛ sasɩ a, bɛlɛ ntsusʋ-yibi amʋ ɩwɩ ntobi kugyikʋá amʋ́ ɩbɩ lɛda wa ɔpʋ amʋtɔ.

²⁰ Anɩtra anɩmɛdɛ owi mʋ́a ntsrakpabi wun nkɛ tsɔtsɔɔtsɔ, afu amʋ ɔnɔ ɛ ɩtra bʋ ɔnlɩn. Mʋ́ sʋ anɩ ansɩ mɛtra dɩnka tɔtɔsʋ dʋn lowu.

²¹ Nkɛ tsɔtsɔɔtsɔ lɔtsʋn, aha amʋ bʋtra bʋmɛdɛ atɔ gyi. Ɩnʋ Paulo lɔkʋsʋ lɩɩ amʋ́ fɛ́ɛ́ ansɩtɔ, bla amʋ́ ɔbɛɛ, “Mɩ awie, tɛkɩ nɩ mlɩlonu mɩ ɔmɛ, anɩmɛnatɩ Kreta otsubunɔ a, tɛkɩ anɩmɔkʋ befia ipian, hʋlɩ anɩ atɔ alɩ.

²² Tamɛ sei a, mbla mlɩ amlɩnu. Mlɩwa klʋn, tsufɛ anɩtɔ ɔkʋkʋ móowu, ntsusʋ-yibi anfɩ wʋlɛ obéyinta.

²³ Igye onye a, mɩ Buluá ntosum lɔwa mʋ ɔbɔpʋ mɩ wa.

²⁴ Ɔlɛbla mɩ ɔbɛɛ, ‘Paulo, mánya ifu. Ɩbwɛbwɛbwɛ a, fɛ́lɩɩ Roma Owie Dɛhɛn ansɩtɔ. Bulu lawa awɩtɔlɛ ha fʋ. Mʋ́ sʋ alahɔ aha anfɩ fʋa amʋ́nyɔ mlɩna anfɩ fɛ́ɛ́ nkpa.>

²⁵ Mʋ́ sʋ mɩ awie, mlɩnya klʋn, tsufɛ mɩ ansɩ dɩn ánɩ́ Bulu ɔbɛ́ha ɩbɛ́ba mʋ́tɔ fɛ alɩá mʋ ɔbɔpʋ labɛbla mɩ.

²⁶ Tamɛ ɩbwɛbwɛbwɛ a, afu amʋ ɩbɛ́da anɩ ya ɔpʋ nsɩnɛ ɔsʋlʋ kʋsʋ.”

²⁷ Ɛkɛ duanasɩ onye a, afu amʋ bʋ mʋ́sʋ ɩdɛ anɩda ya nsɩnɛ ɩnʋ ɔpʋá bʋtɛtɩ mʋ́ Adriasʋ. Mʋ́ ɔyɩnsɩnɛ a, ntsusʋ-yibi amʋtɔ agyʋma ayɔpʋ bosusuá anɩlata ɔsʋlʋ tʋ ta.

²⁸ Mʋ́ sʋ bɔpʋ ɔfɛ kapʋ ɔpʋ amʋ oklu kɩ. Benya ayabi lafakʋlɛ adʋanyɔ (120). Brɛ kpalobi ɔma a, bɛtra kapʋ mʋ́ kɩ, benya ayabi adukweba (90).

²⁹ Ifu lɛkɩta ntsusʋ-yibitɔ agyʋma ayɔpʋ amʋ ánɩ́ abɔ́dʋ abʋtasʋ. Mʋ́ sʋ bɛda asimpiá bʋtɔpʋkɩta ntsusʋ-yibi lɩɩ ana kɛkɛ sian mʋ́ ɔma, si mʋ́ wa ɔpʋ amʋtɔ. Bokokoli Bulu bɛɛ, ɔyɩ ɩkɛ amʋ́.

³⁰ Agyʋma ayɔpʋ amʋ akʋ bekleá bɛsrɩ dalɩ ntsusʋ-yibi amʋtɔ. Mʋ́ sʋ bɛkɩ ansɩ lɛ ɔklʋn kusubi amʋ dɩnka ɔpʋ amʋsʋ hɩɛɛ, fɛ simpi amʋ bʋdɛpʋsian ɔklʋn amʋ ɔnɔsʋ.

³¹ Tamɛ Paulo lɛbla ɩsa akɔpʋ pʋ́ amʋ́ ɔhandɛ ɔbɛɛ, “Nɩ ntsusʋ-yibi amʋtɔ agyʋma ayɔpʋ bʋmetsia mʋ́tɔ a, mlɩméenya nkpa.”

³² Mʋ́ sʋ ɩsa akɔpʋ amʋ bɛka ɔklʋn kusubi amʋ ɔfɛ tɩn, ha afu lɔtsʋan mʋ́ natɩ.

³³ Ɔyɩ ɩba bɛkɛ a, Paulo lobwii ɩpa ha amʋ́ fɛ́ɛ́ ɔbɛɛ, bʋgyi atɔ. Ɔlɛblɩ ɔbɛɛ, “Kwasieda anyɔ sɔɔn nɩ, atogyihɛ mɛdɩnka mlɩ ɔwɔlɩ. Mlɩmɔkʋgyi tɔtɔɔtɔ.

³⁴ Nobwii ɩpa ha mlɩ, mlɩgyi atɔ ngya, mɛnɩ mlɩmóowu. Mlɩtɔ ɔkʋkʋ nwunsʋ-imi kʋlɛ kʋraa ɩmɔ́ɔfwɩ.”

³⁵ Paulo lɔtɔɩ ta a, ɔlɛlɛ bodobodo ipin, da Bulu ɩpan amʋ́ fɛ́ɛ́ ansɩtɔ, ɔlɛmaɩn kʋ wa gyi bɩ.

³⁶ Ɩnʋ anɩtɔ okugyiɔkʋ lɔwa klʋn gyi atɔ.

³⁷ Anɩ aha lafanyɔ aduesienɔ-sie (276) bʋ ntsusʋ-yibi amʋtɔ.

³⁸ Brɛá amʋ́ fɛ́ɛ́ begyi atɔ alɩá bɛtalɩ a, bɛlɛ ayo amʋʋ ɩbʋ ntsusʋ-yibi amʋtɔ fɛ́ɛ́ wa ɔpʋtɔ, ha ntsusʋ-yibi amʋ lɛta odwin.

Ntsusʋ-yibi Amʋ Bwiebwie

³⁹ Brɛá ɔyɩ dɛkɛ a, agyʋma ayɔpʋ amʋ bowun ánɩ́ ɔpʋ amʋ bambi lowie ɔsʋlʋ kʋsʋ, tamɛ bʋmɛbɩ otsubunɔ oduá igyi. Ɩnʋ bɔbwɛ agywɩɩn bɛɛ, bɛ́kan ntsusʋ-yibi amʋ ya ɩnʋ.

⁴⁰ Mʋ́ sʋ bɛkaka simpi amʋ tɩntɩn wa ɔpʋtɔ. Bɛsankɩ ntsusʋ-yibi amʋ mpaɩ ɛ. Mʋʋ botsu tati yile amʋʋ isian ntsusʋ-yibi amʋ ansɩtɔ amʋ fʋa, fia afu amʋ, bɔpʋ bɔyɔ ɔpʋ ɔnɔ.

⁴¹ Tamɛ ntsusʋ-yibi amʋ ɩlɔyɔdʋ ŋɛsɩsʋ, sin ɩnʋ, ɔpʋ amʋ lɛda wʋlɩ ɔklʋn amʋ ɔma maɩn-maɩn mʋ́.

⁴² Ɩsa akɔpʋ amʋ bɔbwɛ agywɩɩn bɛɛ, bɔ́mɔ obu adɩpʋ amʋ fɛ́ɛ́, mɛnɩ ɔkʋkʋ mɛ́ɛpɩtɩ dalɩ srɩ.

⁴³ Tamɛ amʋ́ ɔhandɛ lekleá ɔbɔ́hɔ Paulo nkpa. Mʋ́ sʋ ɔmɛha amʋ́ ɔkpa abʋmɔ obu adɩpʋ amʋ. Tamɛ ɔlɛbla amʋ́ ɔbɛɛ, ɔhagyiɔha ánɩ́ ɔbɛ́talɩ a, otu wie ɔpʋ amʋtɔ, ɔpɩtɩ dalɩ.

⁴⁴ Ɔma a, ɔlɛha atrahɛ amʋ ɛ bɔdʋ dɩnka ntsusʋ-yibi amʋ afʋnsʋ yowie ogbemgbesʋ. Amʋ́ fɛ́ɛ́ begyi mbla amʋsʋ, bɔyɔ ogbemgbesʋ ɩnʋ.