Gyumagyihɛ 24 - Bulu Ntam Pɔpwɛ mʋ́a Israel Ɩlʋ

Paulo Ɔnɔtɩn

¹ Nkenu ɔma a, igyi ɔhapʋ dɛhɛn Anania mʋa Yudafɔ ahandɛ akʋ pʋ́ Mose mbla ɔbɩpʋ ɔkʋá bʋtɛtɩ mʋ Tertulo bɛba Kaesarea. Bɛba bɛkla asʋn ánɩ́ bʋbʋ tsu Paulo ɩwɩ suna ɔmásʋ ogyipʋ Felike.

² Bɛtɩ Paulo bɛlɩɩ. Mʋʋ Tetulo lɛkla mʋ asʋn ɔbɛɛ, “Onumnyampʋ Felike, faha iwilwii laba ɔmá anfɩtɔ. Fʋ nyansa lala atɔ tsɔtsɔɔtsɔ bwɛ anɩ ɔmá anfɩtɔ.

³ Fʋ bwɛhɛ legyi anɩ ansɩ ɔtɩnɛgyiɔtɩnɛ. Fʋdɛ atɔ bwɛ.

⁴ Mmedekle mbɛɛ, néyinta fʋ brɛ tsɔtsɔ. Mʋ́ sʋ nokokoli fʋ, nya klʋn ha anɩ, afʋnu anɩ asʋn tinbi anfɩ.

⁵ Anɩlawun ánɩ́ atɔ oyintapʋ oyin anfɩ gyi. Ɔtɛha kpokiti tɛda Yudafɔtɔ ɔyɩtɔ ɔtɩnɛgyiɔtɩnɛá ɔtɔyɔ. Ɔtra ogyi Nasaret ɔpasua amʋ Bulu igyi ɔhapʋ.

^6-7 Alakle ɔpʋ ifin da Bulu ɔtswɛkpa ɩnʋ, asa ɔkla ogya anɩlɛkɩta mʋ.

⁸ Nɩ fʋ onuto fɛfɩtɛ mʋ a, fówun ánɩ́ asʋn anfɩ anɩdɛblɩ tsu mʋ ɩwɩ anfɩ fɛ́ɛ́ bʋ mʋ́tɔ ntɛ ɩma mʋ́tɔ.”

⁹ Ɩnʋ amʋ fɛ́ɛ́ botsula mʋ́sʋ bɛɛ, asʋn amʋʋ alablɩ amʋ bʋ mʋ́tɔ.

Paulo Ɔnɔlɛ Felike Ansɩtɔ

¹⁰ Ɔmásʋ ogyipʋ Felike lɔbwɛ Paulo ɩbɩ ɔbɛɛ, ɔlɛ mʋ́ ɔnɔ. Ɩnʋ Paulo lɛblɩ ɔbɛɛ, “Nyin ánɩ́ fʋdɛ asʋn gyi ɔmá anfɩtɔ ɩlawa ɔpá. Ɩnɩ sʋ ɩbʋ mɩ ɔdwɛá nɛ́lɛ mɩ ɔnɔ fʋ ansɩtɔ.

¹¹ Nobwii ɩpa, fɛ́talɩ fɩtɛ nu ánɩ́ ɩbʋ mʋ́tɔá nɔyɔ Yerusalem yesum Bulu, ɩmɔkʋdʋn nkɛ duanyɔ.

¹² Mɩ anyaba anfɩ bʋmowun mɩa ɔhaa agyi nwɛn Bulu ɔtswɛkpa ɩnʋ. Bʋmowun mɩ anha kpokiti ɩda Yudafɔ ofiakpa kʋkʋ ntɛ ɔtɩnɛtɩnɛ wulu amʋtɔ.

¹³ Bʋma asʋansʋá bɔ́pʋgyi adansɩɛ ánɩ́ amʋ́ asʋn anfɩ bʋ mʋ́tɔ.

¹⁴ Tamɛ natsula ánɩ́ ntosum anɩ anain Bulu tsʋn anɩ Wie Ɔkpa amʋʋ bʋdɛ mʋ́ tɩ ɔpasua lalahɛ amʋsʋ. Nɔhɔ Mose Mbla amʋ pʋ́ mʋ́á Bulu ɔnɔsʋ atɔɩpʋ amʋ bɔwanlɩn tswɩ ɛ fɛ́ɛ́sʋ gyi.

¹⁵ Ndɛ ɔkpa kɩ fɛ alɩá amʋ́ ɛ bʋdɛ ɔkpa kɩ ánɩ́ Bulu ɔbɔ́kʋsʋa aha yile pʋ́ aha lalahɛ fɛ́ɛ́ tsu afulitɔ ɛkɛ kʋ.

¹⁶ Ɩnɩ sʋ ntɔbɔ mbɔdɩá mɩ klʋn méetsia ha mɩ pɔn Bulu mʋa anyankpʋsa fɛ́ɛ́ ansɩtɔ bregyibrɛ.

¹⁷ “Ɩnɩá nɛdalɩ Yerusalem ɩlawa ɔpá a, nayinki ba ɩnʋ, napʋ atokiehɛ nɛba mɩ aha abʋpʋha ahianfɔ, mɩ anha Bulu igyi.

¹⁸ Mʋ́ ɔbwɛkpa mbʋ Bulu ɔtswɛkpa ɩnʋ. Brɛá nɔgyʋra ɩwɩ ta amandɩɛ amʋ ɔnɔ a, bɛba bɔtʋ mɩ ɩnʋ. Megyi mɩa ɔdɔm kʋkʋ lɔyɔ ɩnʋ. Kpokiti kʋkʋ ɛ mɛda ɩnʋ.

¹⁹ Yudafɔ akʋ botsu Asia ɔmátɔ ba bʋbʋ ɩnʋ. Nɩ nɔbwɛ ɩtɔ lalahɛ kʋ a, tɛkɩ amʋ́ kʋraa ɔbɛ́ba bɛbla fʋ, mɩa amʋ́nyɔ abɛ́blɩ mʋ́.

²⁰ Nɩ ɩbɔ́wa alɛ kʋraa a, ha aha anfɩ onuto abʋblɩ tsitsa oduá Yudafɔ asʋn agyipʋ amʋ bowun mɩ ɩwɩ, brɛá bɔpʋ mɩ ya amʋ́ ansɩtɔ.

²¹ Asʋn kuakʋlɛ pɛá nɔkplʋn blɩ brɛá nlɩɩ Yudafɔ asʋn agyipʋ amʋ ansɩtɔ gyi, ‘Mlɩdɛ mɩ asʋn gyi ndɛ, tsufɛ nohogyiá awupʋ bɛlakʋsʋ tsu afulitɔ.> ”

²² Ɩnɩá onumnyampʋ Felike yin anɩ Wie ɔkpa amʋ wanklaan sʋ a, olotu asʋn amʋ hɩɛ. Ɔlɛblɩ ɔbɛɛ, “Nɩ ɩsa akɔpʋ ɔhandɛ Lisia ɔba nfɩ a, nówun alɩá nɔ́mɔ asʋn amʋ ɔnɔ.”

²³ Ɔlɛbla ɩsa akɔpʋ ɔhandɛ amʋ ɔbɛɛ, ogyo Paulo ɩwɩ wanklaan, ɔha mʋ otsia iwilwiitɔ. Ɔha mʋ aba ɔkpa abʋkɩ mʋsʋ.

Paulo Felike Mʋa Mʋ Ka Drusila Ansɩtɔ Lɩɩ

²⁴ Nkɛ kpalobi kʋ ɔma a, Felike mʋa mʋ ka Drusila ánɩ́ ogyi Yudayintse bɛba. Felike lɛha bɛyɛkpa Paulo ba, ɔlɔbɔtɔɩ tsu mʋ hogyiá ɔbʋ Kristo Yesutɔ ɩwɩ suna amʋ́.

²⁵ Tamɛ brɛá ɔdɛtɔɩ tsu yilebwɛ, ɩwɩsʋgyi pʋ́ Bulu asʋn ogyikɛ amʋʋ ɩba amʋ ɩwɩ a, ifu lɛkɩta Felike. Mʋ́ sʋ ɔlɛbla Paulo ɔbɛɛ, “Kʋ yinki asa. Nenya brɛ wanklaan kʋ a, nɛ́latɩ fʋ.”

²⁶ Brɛ amʋtɔ fɛ́ɛ́ Felike lɛkɩ ɔkpa ánɩ́ Paulo obódunka tɔkʋ bɛha mʋ ɔnɔ. Mʋ́ sʋ ɩbʋ nʋ bʋ ɩnʋ a, alapina wa abi bayɛtɩ Paulo, mʋa mʋnyɔ batɔɩ.

²⁷ Nfinyɔ ɔma a, Felike lɛnatɩ. Porkio Festo lebetsia mʋ obiasʋ. Ɩnɩá Felike dekle ɔbɛɛ, mʋ asʋn ɩwa Yudafɔ amʋ ɔdwɛ sʋ a, olesi Paulo wa obu natɩ.