Gyumagyihɛ 20 - Bulu Ntam Pɔpwɛ mʋ́a Israel Ɩlʋ

Paulo Yinki Yɔ Makedonia Mʋ́a Grikifɔtɔ

¹ Kpokiti amʋ ɔma a, Paulo lɛba bɛtɩ akasɩpʋ amʋ fɛ́ɛ́ fia, tɔɩ kpla amʋ́, wa amʋ́ atɛtɔ-ɔnlɩn. Ɔlɛkla amʋ́ asa ɔlɔpʋ ɔkpa ɔyɔ Makedonia ɔsʋlʋsʋ.

² Oleki nsɩnɛ ɩnʋ ɔpasua amʋsʋ tɔɩ kpla amʋ́ asa olobowie Grikifɔ ɔsʋlʋsʋ.

³ Oletsia ɩnʋ tsra asa. Brɛá ɔlɔbwɛ agywɩɩn ɔbɛɛ, mɛ́fa ɔpʋ yɔ Siria ɔsʋlʋsʋ a, olowun ánɩ́ Yudafɔ bʋdɛ mʋ tɛ abʋkɩta mʋ. Mʋ́ sʋ ɔlɔbwɛ agywɩɩn ɔbɛɛ, mɛ́layɔtsʋn Makedonia ɔsʋlʋsʋ.

⁴ Aha ánɩ́ bɛkpa mʋ ya ɩnʋ gyi Beroiayin Sopater, ogyi Piro mʋ bi; Tesalonikafɔ Aristarko mʋa Sekundo pʋ́ Derbeyin Gaio; amʋ́a Timoteo pʋ́ Asiafɔ Tihiko mʋa Trofimo.

⁵ Alɩ aha anfɩ begyankpa yogyo anɩ Troa wulutɔ.

⁶ Israelfɔ begyi amʋ́ Bodobodo Mátuhɛ Nkɛ ɔma a, anɩletsia ntsusʋ-yibitɔ tsu Filipi wulutɔ. Anɩlɛnatɩ nkɛna owitɔ. Ɛkɛ nusɩ a, anɩlɔbɔtʋ nkpa agyapʋ amʋ Troa wulutɔ. Anɩ fɛ́ɛ́ anɩletsia ɩnʋ nkensienɔ.

Eutiko Tsinki Tsu Lowutɔ

⁷ Kwasieda, igyi ndawɔtswɩ amʋtɔ ɛkɛ gyankpapʋ ntʋpwɛsʋ a, anɩlefia abégyi atɔ abatɔ fɛ alɩá anɩ Wie losuna anɩ. Ɩnɩá Paulo dekleá ɔbɛ́natɩ ɔyɩkɛhɛ sʋ a, ɔlɔtɔɩ kpla amʋ́ alɩɩ yɛha ɔyɩnsɩnɛ.

⁸ Nkandɩɛ tsɔtsɔɔtsɔ bʋ ɔsʋsʋ obu amʋʋ anɩlefia mʋ́tɔ amʋtɔ.

⁹ Oyimbi ɔkʋá bʋtɛtɩ mʋ Eutiko lɔdʋ bian nfansrɩ ɔnɔ, ɔdɛ asʋn amʋ nu. Ɩnɩá Paulo lɔtɔɩ wa ɔpá sʋ a, dɩdɩ lowie mʋ, fʋrʋ mʋ. Ɔlɛkpa tsu ɔsʋsʋ abansrʋ sasɩ nfansrɩtɔ ɩnʋ bɛda ɔsʋlʋtɔ. Brɛá boyotsu mʋ a, alawu fɛ́ɛ́.

¹⁰ Mʋʋ Paulo lɛkplɩ yɔ ɩnʋ, yemli bun mʋsʋ, lata mʋ puta, blɩ ɔbɛɛ, “Opuni mátsii mlɩ, ɔŋɛ bʋ mʋtɔ.”

¹¹ Paulo leyinki dʋ yɔ ɔsʋsʋ ɩnʋ, mʋa mʋ aba amʋ nyɔ bebiabia bodobodo gyi. Ɔlɔyɔ mʋ tɔɩ amʋsʋ alɩɩ yɔfʋn ɔyɩkɛhɛ, ɔlɛnatɩ.

¹² Mʋʋ aha amʋ bɛkpa kebi amʋ ya woyi a. Ansɩ lɛhɩɛ gyi amʋ́ ánɩ́ ɔbʋ nkpa.

Paulo Troa Tsu Yɔ Mileto Wulutɔ

¹³ Anɩlegyankpa yowie ntsusʋ-yibi amʋtɔ ayɔ Aso wulutɔ yotsu Paulo ɩnʋ. Tsufɛ Paulo lɛha anɩ ɩbɩ ɔbɛɛ, ɔbɔ́tsʋn ayabitɔ ɔkpa ka tii ɩnʋ.

¹⁴ Brɛá anɩa mʋnyɔ anɩleyefia aba Aso wulutɔ ɩnʋ a, olowie ntsusʋ-yibi amʋtɔ, anɩlɛfa yɔ Mitilene wulutɔ.

¹⁵ Anɩlɛnatɩ ɩnʋ ɔyɩkɛhɛ, anɩlɔkʋsʋ ɩnʋ yowie Kio. Ɛkɛ nyɔsɩ a, anɩlɔkʋsʋ ɩnʋ yowie Samo wulutɔ. Mʋ́ ɛkɛ sasɩ ɛ a, anɩlɛtra kʋsʋ ɩnʋ yowie Mileto wulutɔ.

¹⁶ Paulo mekleá obéyinta brɛ Asia ɔmátɔ. Mʋ́ sʋ ɔmɛkplɩ Efeso wulutɔ, tsufɛ ɔdɛkɔsɩá nɩ ɔbɛ́talɩ a, obóyowie Yerusalem asa abʋgyi Pentekoste nkɛ amʋ.

Paulo Efeso Ɔpasua Ahandɛ Kla

¹⁷ Brɛá anɩloyowie Mileto wulutɔ a, Paulo lɔwa abi sɩsɩ Efeso ɔpasua ahandɛ ɔbɛɛ, bʋba bɔtʋ mʋ.

¹⁸ Brɛá ahandɛ amʋ bebefia mʋ a, ɔlɛbla amʋ́ ɔbɛɛ, “Mlɩyin alɩá mɩa mlɩnyɔ anɩlɔpʋtsia tsu ɛkɛ gyankpapʋá nɛba Asia ɔmátɔ.

¹⁹ Mlɩyin alɩá nɛba ɩwɩasɩ yɔ agyʋma ha mɩ Wie, pʋ́ alɩá Yudafɔ bɔkʋsʋ lɩɩ mɩsʋ, nowun ipian, su kʋraa.

²⁰ Mlɩyin ánɩ́ mmɔpʋ asʋn ánɩ́ ɩbɛ́kpa mlɩ ŋain mlɩ brɛá nɛda Bulu asʋn amʋ ɔkan dɩnsʋ pʋ́ mlɩ woyitɔ.

²¹ Alɩá nɔtɔɩ kpla Yudafɔ pʋ́ Grikifɔ fɛ́ɛ́ mbɛɛ, bʋsi lakpan bwɛ abʋdamli ba Bulu wa, abʋbɔhɔ anɩ Wie Yesu gyi.

²² “Sei anfɩ a, nɔyɔ Yerusalem, fɛ alɩá Ɔŋɛ Wankɩhɛ labla mɩ. Mmeyin tɔá ɩbɛ́ba mɩsʋ ɩnʋ.

²³ Tamɛ mʋ́á Ɔŋɛ Wankɩhɛ tɛbla mɩ wulugyiwulusʋ, nyin gyi, asʋn wunhɛ pʋ́ obudɩ da gyo mɩ.

²⁴ Tamɛ mmotsu mʋ́ asʋnbogya. Mboun alɩá nɔ́mɔ agyʋma amʋʋ anɩ Wie Yesu lɛha mɩ amʋ ɔnɔ. Agyʋma amʋ gyi, nɛ́bla aha Bulu awɩtɔlɛ asʋn wanklaan amʋ.

²⁵ “Sei anfɩ a, nyin ánɩ́ mlɩ aha anfɩ nɛbɛda Bulu iwiegyi ɩwɩ asʋn ɔkan mlɩtɔ anfɩtɔ ɔkʋkʋ mɛ́ɛtra wun mɩ ɛkɛkɛɛkɛ.

²⁶ Mʋ́ sʋ ndɛ mlɩ bla mbɛɛ, nɩ mlɩtɔ ɔkʋ menya nkpa ánɩ́ ɩtamata a, megyi mɩ sʋ omenya.

²⁷ Tsufɛ nabla mlɩ togyitɔá Bulu dekle ɔbɛɛ, mlɩbɩ.

²⁸ “Mʋ́ sʋ mlɩkɩ mlɩ ɩwɩ pʋ́ aha amʋʋ Ɔŋɛ Wankɩhɛ lɔpʋwa mlɩ ɩbɩtɔ amʋsʋ wanklaan. Mlɩkpa Bulu ɔpasua amʋʋ ɔlɛyaɩ tsʋn mʋ onuto mʋ bi lowusʋ amʋ wanklaan.

²⁹ Nyin ánɩ́ nɛnatɩ a, akʋá bʋgyi fɛ nkpataku, bʋbʋ ɩyɩn bɛ́ba bowie mlɩtɔ, da ɔpasua amʋ saɩn.

³⁰ Mlɩtɔ akʋ o bɔ́kʋsʋ, damli ɔnɔkwalɩ amʋ pʋbɩtɩa mlɩtɔ akʋ buo ɩwɩ.

³¹ Mʋ́ sʋ mlɩda ɩwɩsʋ. Mlɩkaɩn ánɩ́ netsia mlɩ wa nfinsa sɔɔn, pʋ ansɩ-ntsú yɩrɩ ɩwɩ suna mlɩ atɔ ɔpa onye.

³² “Mʋ́ sʋ sei a, ndɛpʋ mlɩ wa Bulu mʋa mʋ awɩtɔlɛ asʋn amʋtɔ. Mʋ awɩtɔlɛ asʋn amʋ ɩwa mlɩ ɔwʋnlɩn, ɩha amlɩdan, talɩ lɩɩ kinkin. Amlɩnya atɔ amʋʋ ɔlɛhɩɛ yaɩ ha mʋ aha amʋʋ bamli mʋ klɛ amʋ.

³³ Brɛá mbʋ mlɩ wa a, mmɛpɛ ansɩ ɔhaa sika pɛpɛ, mʋ sika fututu ntɛ mʋ atɔsʋ.

³⁴ Mlɩ onuto mlɩyin ánɩ́ mɩ ɩbɩ anfɩ nɔpʋyɔ agyʋma nya tɔá ɩdɛ mɩa mɩ aba amʋ hian fɛ́ɛ́.

³⁵ Natsʋn ɔkpagyiɔkpasʋ suna mlɩ alɩá mlɔ́pʋ ɩbɩ yɔ agyʋma, pʋgyi aha ánɩ́ ɩwɩ ma amʋ́ ɔnlɩn bʋalɛ. Mlɩkaɩn anɩ Wie Yesu onuto asʋn blɩhɛsʋ. Ɔbɛɛ, ‘Bulu toyula ɔha ánɩ́ otekie atɔ dʋn ɔha ánɩ́ bʋtekie mʋ.> ”

³⁶ Brɛá Paulo lɛblɩ asʋn anfɩ ta a, mʋa amʋ́nyɔ fɛ́ɛ́ bɛda akpawunu bɔ mpaɩ.

³⁷ Amʋ́ fɛ́ɛ́ bosu brɛá bɛlata aba puta, kla aba.

³⁸ Tɔá ɩlɔwa amʋ́ ahʋmɩtɩ gyi mʋ́ amʋʋ ɔlɛblɩ ɔbɛɛ, mʋmɛ́ɛtra wun amʋ́ ɛkɛkɛɛkɛ amʋ. Besi mʋ ɔkpa yowie ɔpʋ ɔnɔ, olowie ntsusʋ-yibitɔ.