Gyumagyihɛ 19 - Bulu Ntam Pɔpwɛ mʋ́a Israel Ɩlʋ

Paulo Bulu Asʋn Ɔkanda Efeso

¹ Brɛá Apolo bʋ Korinto a, Paulo lɔdʋ yɔtsʋn ɔsʋsʋ awulusʋ bɛdalɩ tii Efeso. Ɔlɔtʋ akasɩpʋ akʋ ɩnʋ.

² Mʋʋ ɔlɛfɩtɛ amʋ́ ɔbɛɛ, “Mlɩlenya Ɔŋɛ Wankɩhɛ brɛá mlɩlohogyi?” Bɛlɛ mʋ́ ɔnɔ bɛɛ, “Anɩmɔkʋnu kɩá Ɔŋɛ Wankɩhɛ kʋ bʋ ɩnʋ.”

³ Paulo lɛtra fɩtɛ amʋ́ ɔbɛɛ, “Asu mɔmʋ bɔbɔ mlɩ?” Bɛlɛ mʋ́ ɔnɔ bɛɛ, “Yohane asu amʋ bɔbɔ anɩ.”

⁴ Paulo lɛbla amʋ́ ɔbɛɛ, “Yohane lɔbɔ aha ánɩ́ badamli klʋntɔ asu. Ɔlɛbla amʋ́ ɔbɛɛ, bʋhɔ ɔha amʋʋ obuo mʋ ɔba amʋsʋ gyi. Mʋgyi Yesu.”

⁵ Brɛá aha amʋ bonu asʋn anfɩ a, bɛha bɔbɔ amʋ́ asu anɩ Wie Yesu ɩdatɔ.

⁶ Mʋ́ ɔma a, Paulo lɔpʋ ɩbɩ dɩnka amʋ́ nwunsʋ, Ɔŋɛ Wankɩhɛ lɛba amʋ́sʋ. Bɛblɩ ɔblɩ bamba, blɩ Bulu ɔnɔ asʋn ɛ.

⁷ Amʋ́ fɛ́ɛ́ bɔ́bwɛ ayin duanyɔ.

⁸ Paulo lɛlatsia yɔ Yudafɔ ofiakpa ɩnʋ. Ɔlɔwa klʋn tɔɩ lɛ asʋntɔ suna amʋ́ tsra asa kɛkɛ. Omenya ifu, mɛnɩ bɔ́hɔ asʋn amʋʋ ɔdɛblɩ tsu Bulu iwiegyi ɩwɩ amʋsʋ gyi.

⁹ Tamɛ amʋ́ akʋ bɔwa klʋntɔ odwin, bʋmɔhɔ mʋ asʋnsʋ gyi. Bɔtɔɩ wɔ anɩ Wie Ɔkpa amʋʋ Paulo dɛ amʋ́ suna amʋ ahatɔ ɩnʋ. Mʋ́ sʋ Paulo lɛkpa akasɩpʋ amʋ natɩ, oletsia suna amʋ́ atɔ oyin ɔkʋá bʋtɛtɩ mʋ Tirano atɔ ɔkasɩkpa.

¹⁰ Paulo losuna amʋ́ atɔ nfinyɔ kɛkɛ. Mʋ́ sʋ Yudafɔ pʋ́ Grikifɔá bʋbʋ Asia ɔmátɔ fɛ́ɛ́ bonu anɩ Wie asʋn amʋ.

Skewa Abi Asʋn

¹¹ Bulu lɔtsʋn Paulosʋ bwɛ ofula akpɔnkpɔntɩ kʋ.

¹² Aha bɔkʋla mʋ adukubi pʋ́ mʋ ɩwɩsʋ atɔ yɛdɩnka alɔpʋsʋ, benya ɩlɔtsa, ɔŋɛ lalahɛ ɛ lɛdalɩ ahatɔ.

¹³ Yudafɔ akʋ ɛ bʋbʋ nsɩnɛ ɩnʋ bʋna bʋdeki gya ɔŋɛ lalahɛ lɛ ahatɔ. Bɔwa klʋn bɛɛ, bɔ́pʋ anɩ Wie Yesu ɩda gya ɔŋɛ lalahɛ lɛ ahatɔ. Mʋ́ sʋ bɔkplʋn wa ɔŋɛ lalahɛ bɛɛ, “Dalɩ Yesu amʋʋ Paulo dɛ mʋ ɩwɩ asʋn ɔkan da amʋ ɩdatɔ.”

¹⁴ Igyi ahapʋ ɔhandɛ ɔkʋá bʋtɛtɩ mʋ Skewa abi yinhɛ abasienɔ letsia bwɛ ɩnɩ.

¹⁵ Ɛkɛ ɔkʋ ɔŋɛ lalahɛ lɛfɩtɛ amʋ́ ɔbɛɛ, “Nyin Yesu, nabɩ Paulo, mlɩ ɛ mɛ, amɛndɩ mlɩgyi?”

¹⁶ Ɔha amʋʋ ɔŋɛ lalahɛ bʋ mʋtɔ amʋ lotu wie amʋ́tɔ, da amʋ́, tɩtɩ amʋ́ atadɩɛ fɛ́ɛ́. Ɩnʋ amʋ́ fɛ́ɛ́ bɔpʋ amʋ́ yaya pʋ́ amʋ́ ɩwɩ nlɔ srɩ dalɩ woyi amʋtɔ.

¹⁷ Yudafɔ pʋ́ Grikifɔá bʋbʋ Efeso ɩnʋ fɛ́ɛ́ bonu asʋn anfɩ. Ifu lɛkɩta amʋ́. Mʋ́ sʋ bɔpʋ obú ha anɩ Wie Yesu.

¹⁸ Aha amʋʋ bohogyi amʋtɔ tsɔtsɔɔtsɔ bɛlɛ amʋ́ lakpan blɩ.

¹⁹ Amʋ́tɔ akʋ bʋgyi oko alɛpʋ. Botsu oko amʋ nwʋlʋ ba bɔwa mʋ́ fɛ́ɛ́ ogya aha ansɩtɔ ɩnʋ. Bobu amʋ́ nwʋlʋ amʋ ibia a, ɩlɔbwɛ sika fututu mpɩm-aduenu (50,000).

²⁰ Ɩna anɩ Wie Yesu tumisʋ mʋ asʋn amʋ lenya ɔkpa klɛɩ wanklaan.

Demetrio Mʋa Mʋ Aba Ɩkɔ Lɛ Wa Efeso

²¹ Asʋn anfɩ fɛ́ɛ́ ɔma a, Bulu Ɔŋɛ amʋ lɛha Paulo lɔbwɛ agywɩɩn ánɩ́ ɔbɔ́yɔ Makedonia pʋ́ Akaia ɔsʋlʋsʋ, fówun ɔyɔ Yerusalem. Mʋʋ ɔlɛblɩ ɔbɛɛ, “Nɩ nowie ɩnʋ a, ilehian ánɩ́ nɛ́yɛkɩ Roma wulutɔ ɛ.”

²² Mʋ́ sʋ ɔlɔwa mʋ abʋapʋ abanyɔ, bʋgyi Timoteo mʋa Erasto sɩsɩ Makedonia. Mʋ onuto olesi tsia Asia ɔmátɔ kpalobi.

²³ Alɩ brɛ amʋtɔ a, anɩ Wie Ɔkpa amʋʋ bʋdɛ aha suna amʋ sʋ asʋn kpɔnkpɔntɩ kʋ lɛda Efeso ɩnʋ.

²⁴ Oyin ɔkʋá ɔtɔbwɛ sika fututu atɔ, bʋtɛtɩ mʋ Demetrio bʋ ɩnʋ. Oyin anfɩ tɔpʋ sika fututu bwɛ ɔkpɩ yile Artemi ɔtswɛkpa akusubiá ɩlɛlɩan mʋ ɔtswɛkpa yile amʋ fɛ. Mʋa mʋ aba agyʋma anfɩ ayɔpʋ bʋtenya kɔba tsɔtsɔɔtsɔ tsu mʋ́tɔ.

²⁵ Ɔlɛtɩ mʋ aba amʋ pʋ́ aha ánɩ́ bʋtɔbwɛ agyʋma amʋ odu fia. Mʋʋ ɔlɛbla amʋ́ ɔbɛɛ, “Mɩ apio, mlɩyin ánɩ́ agyʋma anfɩ sʋ anɩ fɛ́ɛ́ anɩlawa alɛ nɩ.

²⁶ Yɛ mlɩtsie mlɩdenu, mlɩdewun tɔá Paulo dɛbwɛ? Alata aha bla ta Efeso wulutɔ pʋ́ Asia ɔmátɔ fɛ́ɛ́ fia ɔbɛɛ, ɩkpɩá aha bapʋ ɩbɩ pwɛ bʋmegyi tɔtɔ. Alata aha ɔnɔ mlɛ ta, bʋdɛ mʋ asʋnsʋ hogyi.

²⁷ Megyi anɩ agyʋma wʋlɛ ibéyinta. Ɔhaa mɛ́ɛtra bu ɔkpɩ tsɩhɛ Artemi ɔtswɛkpa yile amʋ. Ɔkpɩ amʋ ɩda ɛ bɔ́fwɩ lɛ ɔyɩtɔ. Tamɛ tɛkɩ mʋgyi ɔkpɩá aha fɛ́ɛ́ bʋtɔtswɛ Asia ɔmátɔ pʋ́ ɔyɩtɔ fɛ́ɛ́ nɩ.”

²⁸ Brɛá ɔdɔm amʋ bonu asʋn anfɩ a, benya ɔblɔ, sʋra okitikiti bɛɛ, “Ɔkpɩ kpɔnkpɔntɩ anɩ Efesofɔ ɔkpɩ Artemi gyi!”

²⁹ Kpokiti lɛda wulu amʋtɔ fɛ́ɛ́. Aha amʋ bɛkɩta Paulo abuopʋ Gaio mʋa Aristarkoá botsu Makedonia, srɩ pʋ amʋ́ ya wulu ofiakpa.

³⁰ Paulo onuto lekleá ɔbɔ́yɔ ofiakpa ɩnʋ, ɔyɔtɔɩ kpla ɔdɔm amʋ, tamɛ akasɩpʋ amʋ bʋmɛha mʋ ɔkpa.

³¹ Ɔmá amʋtɔ ahandɛ akpɔnkpɔntɩ akʋá bʋgyi Paulo anyawie ɛ bɔwa obi loyobwii ɩpa ha mʋ bɛɛ, ɔmáyɔ ofiakpa ɩnʋ.

³² Kpokiti lɛda ofiakpa ɩnʋ. Anɩ bɛɛ alɩ, anɩ ɛ bɛɛ alɩ. Amʋ́tɔ aha tsɔtsɔɔtsɔ bʋmɛbɩ tɔá sʋá befia ɩnʋ.

³³ Yudafɔ amʋ akʋ bɔyɔ ofiakpa ɩnʋ. Bowuta Aleksandro sɩsɩ ɔbʋntɔ, bʋdɛ mʋ asʋn ánɩ́ ɔyɛblɩ bla. Ɩnɩ sʋ Aleksandro lotsu ɩbɩ fʋa, ɔbɛɛ amʋlɛ mʋ́ ɔnɔ.

³⁴ Tamɛ brɛá bowun ánɩ́ Yudayin ogyi a, bɛlasʋra okitikiti, blɩ asʋn kuakʋlɛ dɔnhwɩrɩ anyɔ kɛkɛ bɛɛ “Ɔkpɩ kpɔnkpɔntɩ anɩ Efesofɔ ɔkpɩ Artemi gyi!”

³⁵ Ɩnɩ fɛ́ɛ́ ɔma a, wulu atɔ ɔwanlɩnpʋ lɛha ɔdɔm amʋ bɛkpa ɔnɔ bun. Mʋʋ ɔlɛbla amʋ́ ɔbɛɛ, “Efesofɔ ayin, ma meyin ánɩ́ Efeso nfɩ gyi anɩ ɔkpɩ kpɔnkpɔntɩ Artemi pʋ́ mʋ ibwi amʋʋ ɩlɛkpa tsu ɔsʋsʋ amʋ nwun?

³⁶ Ɔhaa má ɩnʋá ɔbɛ́talɩ gyi asʋn anfɩ ɩwɩ nwɛn? Mlɩnya klʋn, mɛnɩ mlɩmóoko mli.

³⁷ Aha anfɩ mlɩlakpa ba nfɩ anfɩtɔ ɔkʋkʋ mɔkʋwi tɔtɔ tsu ɔtswɛkpa ɩnʋ. Bʋmɔkʋblɩ asʋansʋ kʋsʋ lɩɩ anɩ ɔkpɩ tsɩhɛ Artemisʋ.

³⁸ Tamɛ nɩ Demetrio mʋa mʋ aba agyʋma ayɔpʋ amʋ bɛɛ bʋbʋ ɔkʋ ɩwɩ asʋn a, asʋn agyipʋ bʋbʋ ɩnʋ, asʋn ogyikpa ɛ bʋ ɩnʋ. Bɛ́talɩ pʋ asʋn amʋ ya ɩnʋ kpɛblɩ mʋ́.

³⁹ Nɩ mlɩbʋ asʋn bamba kʋ tsɩa ɩnɩtɔ mʋ́ a, bɛ́talɩ yɛblɩ mʋ́ ɔtɩnɛ amʋʋ anɩ fɛ́ɛ́ anɩtefia gyi asʋn amʋ.

⁴⁰ Tsufɛ nɩ anɩmɛkɩ wanklaan a, abénya asʋn ánɩ́ anɩlahan wulu amʋ agywɩɩn ndɛ. Nɩ bɛfɩtɛ anɩ ɛ a, anɩméenya asʋansʋ pʋlɛ mʋ́ ɔnɔ.”

⁴¹ Olenya blɩ asʋn anfɩ ta alɩ, ɔlɛha amʋ́ fɛ́ɛ́ bɛdasaɩn.