Gyumagyihɛ 16 - Bulu Ntam Pɔpwɛ mʋ́a Israel Ɩlʋ

Timoteo Paulo Mʋa Silastɔ Tsɩa

¹ Paulo mʋa Silas bɛnatɩ yɔ Derbe pʋ́ Listra. Ohogyipʋ ɔkʋá bʋtɛtɩ mʋ Timoteo bʋ Listra wulutɔ ɩnʋ. Mʋ yin gyi Yudayin ánɩ́ ɔlɔhɔ Yesu gyi, tamɛ mʋ sɩ gyi Grikiyin.

² Apioá bʋbʋ Listra pʋ́ Ikonion bɛtɩ Timoteo ɩdayile.

³ Paulo lekleá ɔbɛ́kpa Timoteo natɩ. Mʋ́ sʋ ɔlɛha bɛtɩn Timoteo kete, tsufɛ Yudafɔ amʋʋ bʋbʋ ɩnʋ amʋ fɛ́ɛ́ bʋyin ánɩ́ Grikiyin Timoteo mʋ sɩ gyi.

⁴ Brɛá bɔyɔ a, bowie wulugyiwulusʋ bʋtosuna ɩnʋ ahogyipʋ mbla oduá Yesu sumbi ayɔpʋ amʋ pʋ́ ɔpasua ahandɛ amʋʋ bʋbʋ Yerusalem amʋ bawa bɛɛ, bʋgyi mʋ́sʋ.

⁵ Ɩnɩ sʋ ɔpasua amʋ benya ɔwʋnlɩn hogyitɔ, klɛɩ ekekegyiɛkɛ.

Paulo Makedonia Ɔmátɔ Yɔ

⁶ Paulo mʋa mʋ aba amʋ bɔtsʋn Frigia pʋ́ Galatia ɔmásʋ. Tsufɛ Ɔŋɛ Wankɩhɛ mɛha amʋ́ ɔkpa ɔbɛɛ, bʋda Bulu asʋn amʋ ɔkan Asia ɔmátɔ.

⁷ Brɛá bowie Misia ɔsʋlʋ ɔka a, bɔbwɛ agywɩɩn bɛɛ béyinki tsʋn yɔ Bitinia ɔmátɔ, tamɛ Yesu Ɔŋɛ mɛha amʋ́ ɔkpa.

⁸ Mʋ́ sʋ bɔtsʋn Misia ɔsʋlʋsʋ kplɩ yɔ Troa wulutɔ.

⁹ Mʋ́ onye a, Paulo lowun atɔ. Olowun ánɩ́ Makedoniayin ɔkʋ lɩɩ mʋ ansɩtɔ, ɔdɛ mʋ kokoli ɔbɛɛ, “Fa ɔpʋ amʋ ba Makedonia, afʋbegyi anɩ bʋalɛ.”

¹⁰ Paulo lenya wun atɔ amʋ alɩ, ɩlɔwankɩ mʋ ánɩ́ Bulu dɛ anɩ wa ɔbɛɛ, ayɛda asʋn wanklaan amʋ ɔkan ɩnʋ. Mʋ́ sʋ anɩlɔpʋ ɔkpa yɔ Makedonia.

Lidia Klʋntɔdamli Filipi Wulutɔ

¹¹ Anɩlowie ntsusʋ-yibitɔ tsu Troa, fa ɔpʋ yɔ Samotrake ɔsʋlʋsʋ. Mʋ́ ɔyɩkɛhɛ a, anɩlɛlatsia yɔ Neapoli wulutɔ.

¹² Anɩlɔpʋ ayabitɔ tsu Neapoli yɔ Filipi wulutɔ. Filipi gyi Makedonia wulu yile nɩ. Romafɔ bʋ wulu anfɩtɔ. Anɩletsia ɩnʋ nkɛ kpalobi.

¹³ Ɔkpʋnʋ ɔdakɛ a, anɩlɛdalɩ wulutɔ yɔ ɔpʋ ɔnɔ ɔtɩnɛkʋá anɩkɩ anɩaa, abówun ɔtɩnɛá Yudafɔ bʋtefia bɔ mpaɩ. Anɩletsia ɩnʋ bla atsɩ akʋá bebefia ɩnʋ Bulu asʋn.

¹⁴ Atsɩá bonu asʋn amʋtɔ ɔkʋlɛ gyi Lidia. Tiatirayin ogyi, ɔtɛfɛ tatiá mʋ́ ntsu lɛpɛ, ɩbʋ bia. Bulu osumpʋ ogyi. Anɩ Wie lɛha mʋ olonu Paulo asʋn blɩhɛ amʋtɔ.

¹⁵ Mʋ́ sʋ brɛá anɩlɔbɔ mʋa mʋ woyitɔ aha asu a, olobwii ɩpa ha anɩ, blɩ ɔbɛɛ, “Nɩ mlɩlahogyiá nahɔ Yesu gyi a, mlɩbetsia mɩ woyitɔ.” Ɔtsɩ anfɩ bʋ anɩsʋ alɩɩ anɩlobuo mʋ yɔ mʋ woyitɔ.

Paulo Mʋa Silas Obudɩ Filipi

¹⁶ Ɛkɛ ɔkʋ ayɔ Yudafɔ mpaɩ ɔbɔkpa ɩnʋ a, anɩlɔtʋ otsibi ɔkʋá ogyi ɔkpábi ɩnʋ. Atɔla ɔŋɛ bʋ mʋsʋ. Ɔtɛla atɔ, blɩ asʋn ánɩ́ ɩbɛ́ba. Ɔtɔbwɛ kɔba tsɔtsɔɔtsɔ ha mʋ awie tsu mʋ́tɔ.

¹⁷ Otsibi anfɩ lɛkpla buo anɩa Paulonyɔ. Ɔna ɔdɛkplʋn blɩ ɔbɛɛ, “Aha anfɩ gyi Ɔsʋsʋʋsʋ mʋ Wie amʋ asumpʋ nɩ. Amʋ́dɛ mlɩ nkpahɔ ɔkpa suna nɩ.”

¹⁸ Ɔlɔbwɛ mʋ́ nkɛ tsɔtsɔɔtsɔ. Ɩnɩ lɛhan Paulo. Mʋ́ sʋ ɔlɛdamli bla otsibi amʋ ɔbɛɛ, “Atɔla-ɔŋɛ, ndɛ mbla wa ha fʋ Yesu Kristo ɩdatɔ, dalɩ mʋtɔ!” Ɩnʋnʋ ɔŋɛ amʋ lɛdalɩ mʋtɔ.

¹⁹ Ɔkpábi amʋ awie bowun ánɩ́ amʋ́ kɔba ɔkpa latin. Mʋ́ sʋ bɛkɩta Paulo mʋa Silas, bɩtɩa amʋ́ ya wulu ahandɛ ansɩtɔ.

²⁰ Bɔpʋ amʋ́ ya Romafɔ asʋn agyipʋ bɛɛ, “Yudafɔ aha anfɩ bʋgyi, bʋdɛ asʋn kle wa anɩ wulu anfɩtɔ.

²¹ Bʋdɛ amandɩɛ lalahɛá anɩ mbla mɛha mʋ́ ɩwɩ ɔkpa suna. Romafɔ anɩ mʋ́ anɩgyi. Anɩmɛ́ɛtalɩ hɔ amʋ́ amandɩɛ amʋ gyi mʋ́sʋ.”

²² Ɩnʋ ɔdɔm amʋ botu bun Paulo mʋa Silasʋ. Asʋn agyipʋ amʋ bɛha bɛɛ, bʋwɔɩ amʋ́ atadɩɛ, abʋnwɛn amʋ́ mplɩ.

²³ Bɛpɩtɩ Paulo mʋa Silas atɔ wanklaan ta a, bɛha bɔpʋ amʋ́ tswɩ obu. Bɛbla obu adɩpʋsʋ ɔkɩpʋ bɛɛ, ogyo amʋ́ wanklaan.

²⁴ Asʋn amʋʋ bɛbla obu adɩpʋsʋ ɔkɩpʋ amʋ sʋ ɔlɔpʋ amʋ́ yɔtswɩ obutotɔ, wa amʋ́ ayabi kplakitsi.

Obu Adɩpʋsʋ Ɔkɩpʋ Yesu Hogyi

²⁵ Mʋ́ ɔyɩ-nsɩnɛ a, Paulo mʋa Silas bʋdɛ mpaɩ bɔ, bʋdɛ ɩlʋ wa kanfʋ Bulu. Obu adɩpʋ atrahɛ amʋ ɛ bʋda bʋdenu.

²⁶ Ɔtsawʋlɛ pɛ a, ɔsʋlʋ lɛkpɩnkɩ ɔwʋnlɩnsʋ, ɩlɛkpɩnkɩ obu amʋ ntswɩasɩ. Mʋ́ aklʋn fɛ́ɛ́ lefinki. Obu adɩpʋ amʋ ɩkan pʋ́ amʋ́ kplakitsi amʋ fɛ́ɛ́ lɔwɔɩ.

²⁷ Obu adɩpʋsʋ ɔkɩpʋ amʋ letsinki, wun ánɩ́ aklʋn amʋ fɛ́ɛ́ lafinki. Ɩnʋ ɔlɛlɛ ɔdayi ɩya anyɔ ɔbɛɛ amʋwɔ ɩwɩ, tsufɛ ɔkɩ ɔbɛɛ obu adɩpʋ amʋ fɛ́ɛ́ badalɩ srɩ.

²⁸ Tamɛ Paulo lɔkplʋn kʋklʋkʋʋ bla mʋ ɔbɛɛ, “Mábwɛ ɩwɩ tɔtɔ. Anɩ fɛ́ɛ́ anɩbʋ ɩnʋ.”

²⁹ Obu adɩpʋsʋ ɔkɩpʋ amʋ lɛha botsu ɔkandɩɛ ba mʋ, ɔlɔwa ɔsa wie obu amʋtɔ. Ifu dɛ mʋ, sʋ ɔdɛkpɩnkɩ kpakpakpakpa. Ɔlɛyɛda akpawunu Paulo mʋa Silas ayabitɔ.

³⁰ Ɩnʋ ɔlɛkpa amʋ́ dalɩ yɛfɩtɛ amʋ́ ɔbɛɛ, “Mɩ awie, ntɔ mbwɛ asa Bulu ɔhɔ mɩ nkpa?”

³¹ Mʋʋ Paulo mʋa Silas bɛbla mʋ bɛɛ, “Hɔ Yesu gyi, mɛnɩ Bulu ɔbɔ́hɔ fʋa fʋ woyitɔ aha fɛ́ɛ́ nkpa.”

³² Mʋʋ bɛbla mʋa mʋ woyitɔ aha fɛ́ɛ́ anɩ Wie Yesu asʋn wanklaan amʋ.

³³ Onye-onye amʋ a, oyin amʋ leyia amʋ́ ɩwɩ nlɔ amʋʋ benya brɛ amʋʋ bɛpɩtɩ amʋ́ atɔ amʋ. Ɔlɛha amʋ́ bɔbɔ mʋa mʋ woyitɔ aha amʋ asu ɩnʋnʋ.

³⁴ Obu adɩpʋsʋ ɔkɩpʋ anfɩ lɔpʋ amʋ́ ya mʋ woyitɔ, ɔlɛyɛha bɛnɩna atɔ ha amʋ́ begyi. Ɩnɩá mʋa mʋ woyitɔ aha fɛ́ɛ́ bahɔ Bulu gyi sʋ a, ansɩ lɛhɩɛ gyi amʋ́.

³⁵ Mʋ́ ɔyɩkɛhɛ a, asʋn agyipʋ amʋ bɔwa aha akɩtapʋ akʋ bɛɛ bʋyɛbla obu adɩpʋsʋ ɔkɩpʋ amʋ bɛɛ, osi aha amʋ abʋnatɩ.

³⁶ Mʋ́ sʋ oyin amʋ lɛbla Paulo ɔbɛɛ, “Asʋn agyipʋ amʋ bapʋ ɔmɛ sɩsɩ mɩ bɛɛ, nsi fʋa Silas amlɩnatɩ. Mʋ́ sʋ mlɩnatɩ iwilwiitɔ.”

³⁷ Tamɛ Paulo lɛbla aha akɩtapʋ amʋ akʋ ɔbɛɛ, “Bʋmegyi anɩ asʋn, tamɛ banwɛn anɩ atɔ ɔbʋntɔ. Romafɔ anɩgyi, tamɛ bawa anɩ obu. Ntogyi sʋ bʋdekleá bési anɩ ŋaintɔ? Ɛkɛkɛɛkɛ! Asʋn agyipʋ amʋ onuto bʋba bɛlɛ anɩ.”

³⁸ Aha akɩtapʋ amʋ beyinki yɔ yɛbla asʋn agyipʋ amʋ. Brɛá bonuá Romafɔ Paulo mʋa Silas bʋgyi a, ifu lɛhɩɛ kɩta amʋ́.

³⁹ Mʋ́ sʋ boyobwii ɩpa ha Paulo aná, bɛkpa amʋ́ dalɩ yokokoli amʋ́ bɛɛ bʋdalɩ wulu amʋtɔ.

⁴⁰ Ɩnʋ Paulo mʋa Silas bɛnatɩ yɔ Lidia woyitɔ. Befia apio ahogyipʋ amʋ ɩnʋ, tɔɩ kpla amʋ́, wa amʋ́ ɔwʋnlɩn asa bɛnatɩ.