Gyumagyihɛ 15 - Bulu Ntam Pɔpwɛ mʋ́a Israel Ɩlʋ

Sumbi Ayɔpʋ Pʋ́ Ɔpasua Amʋ Ifia Yerusalem

¹ Brɛá Paulo mʋa Barnaba bʋbʋ Antiokia a, ayin akʋ botsu Yudea ɔmátɔ ba ɩnʋ. Bosuna ahogyipʋ amʋʋ bʋmegyi Yudafɔ amʋ atɔ bɛɛ, nɩ bʋmɔkʋtɩn kete Mose mbla ɔnɔ a, Bulu mɔ́ɔhɔ amʋ́ nkpa.

² Paulo mʋa Barnaba bɔkʋsʋ lɩɩ asʋn anfɩsʋ. Mʋ́ sʋ amʋ́a atɔ asunapʋ amʋ begyi mʋ́ nwɛn kinkiinkin. Ɩnɩ sʋ bɛblɩ bɛɛ, bɔ́wa Paulo mʋa Barnaba pʋ́ Antiokia ahogyipʋ amʋ akʋ Yerusalem, abʋyewun Yesu sumbi ayɔpʋ pʋ́ ɩnʋ ɔpasua ahandɛ amʋ tsu asʋn anfɩ ɩwɩ.

³ Ɔpasua amʋ besi aha amʋ ɔkpa bɛnatɩ. Brɛá bɔyɔ a, bʋna Foenike pʋ́ Samaria ɔmátɔ. Bɛbla ɩnʋfɔ amʋ bɛɛ, aha ánɩ́ bʋmegyi Yudafɔ ɛ badamli klʋntɔ ba Bulu wa. Asʋn anfɩ lɛhɩɛ wa ahogyipʋ amʋ fɛ́ɛ́ ansigyi.

⁴ Brɛá bowie Yerusalem a, ɔpasua amʋ, amʋ́ ahandɛ pʋ́ sumbi ayɔpʋ amʋ bɔhɔ amʋ́ atuu. Paulo aná bɛbla amʋ́ tɔá Bulu labwɛ tsʋn amʋ́sʋ fɛ́ɛ́.

⁵ Tamɛ ahogyipʋ amʋ akʋá botsu Farisifɔtɔ bɔkʋsʋ lɩɩ blɩ bɛɛ, “Ilehian ánɩ́ ɔmá bambasʋfɔ amʋ bɛ́tɩn kete, gyi Mose mbla ɛsʋ.”

⁶ Sumbi ayɔpʋ amʋ pʋ́ ɔpasua ahandɛ amʋ befia yɔ asʋn anfɩtɔ.

⁷ Bɛbɩtɩ asʋn anfɩ wa ɔpá. Mʋ́ ɔma a, Petro lɔkʋsʋ lɩɩ, bla amʋ́ ɔbɛɛ, “Mɩ apio, mlɩyin ánɩ́ tsu brɛ kʋtɔ a, Bulu lɛlɛ mɩ tsu mlɩtɔ ɔbɛɛ, mbla aha ánɩ́ bʋmegyi Yudafɔ mʋ asʋn wanklaan amʋ, mɛnɩ amʋ́ ɛ bónu, hɔ mʋ́sʋ gyi.

⁸ Bulu yin nyankpʋsa klʋntɔ. Ɔlɔpʋ Ɔŋɛ Wankɩhɛ amʋ ha amʋ́, fɛ alɩá ɔlɔpʋha anɩ pʋsuna ánɩ́ alahɔ amʋ́.

⁹ Olosuna ánɩ́ bʋmegyi ɔtsan ha anɩ, tsufɛ ɔlɛha amʋ́ klʋntɔ lɛtɩn brɛá amʋ́ ɛ bohogyi.

¹⁰ Ntogyi sʋ mlɩdɛ Bulu sɔ kɩ? Ntogyi sʋ mlɩdɛpʋ Mose mbla anfɩ anɩa anɩ anain anɩmɛtalɩ gyi mʋ́sʋ anfɩ han akasɩpʋ anfɩ?

¹¹ Ɛkɛkɛɛkɛ! Anɩlahogyiá Bulu ɔbɔ́tsʋn anɩ Wie Yesu awɩtɔlɛsʋ hɔ anɩ nkpa fɛ amʋ́.”

¹² Brɛá Petro lɔtɔɩ ta a, afiapʋ amʋ fɛ́ɛ́ bɔbwɛ diin. Mʋʋ Paulo mʋa Barnaba bɛbla amʋ́ alɩá Bulu lɔtsʋn amʋ́sʋ bwɛ ofula pʋ́ osuna tsɔtsɔɔtsɔ aha amʋʋ bʋmegyi Yudafɔ amʋtɔ.

¹³ Brɛá Paulo mʋa Barnaba bɔtɔɩ ta a, Yakobo lɔyɔ mʋ́sʋ ɔbɛɛ, “Apio, mlɩyaa asʋ amlɩnu.

¹⁴ Simon Petro labla anɩ ɔbɛɛ, Bulu legyankpa lɛ suna ánɩ́ otekle aha amʋʋ bʋmegyi Yudafɔ amʋ asʋn. Mʋ́ sʋ ɔlɛlɛ amʋ́tɔ akʋ bwɛ mʋ aha.

¹⁵ Asʋn anfɩ pʋ́ Bulu ɔnɔsʋ atɔɩpʋ amʋ asʋn blɩhɛ labwɛ kʋlɛ. Tsufɛ bɔwanlɩn wa Bulu asʋn amʋtɔ bɛɛ,

¹⁶ ‘Bulu ɔbɛɛ. Ɩnɩ ɔma a, nɛ́latsu Dawid iwiegyi amʋʋ ɩladɩda amʋ kʋsʋ. Nɛ́layi mʋ́ abunti fɛ́ɛ́, ha mʋ́ bɛlɩɩ wanklaan,

¹⁷ mɛnɩ aha trahɛ amʋ pʋ́ amʋ́á bʋmegyi Yudafɔ, mɩ ɩda dɩn amʋ́sʋ fɛ́ɛ́ bódunka mɩá ngyi amʋ́ Wie, wun mɩ.

¹⁸ Alɩ mɩ, mlɩ Wie Buluá nɛlɛ ɩnɩ suna tsu bɩmbɩ ndɛblɩ nɩ.>

¹⁹ “Ɩnɩ sʋ tɔá mɩ Yakobo ndɛblɩ gyi, mlɩmáha apʋ asʋansʋ kɩklɩ aha anfɩ bʋmegyi Yudafɔ, badamli klʋntɔ ba Bulu wa anfɩ.

²⁰ Mboun mlɩha awanlɩn ɔwʋlʋ bla amʋ́ anɩaa, bʋmágyi atogyihɛá bapʋha ɩkpɩ, tsufɛ mʋ́ ɩwɩ mɛtɩn. Bʋmáwa atsɩ mʋ́a ayin asʋn. Bʋmágyi ɔbwɩá bɔpʋsa mʋ mɔ pʋ́ obugya.

²¹ Tsufɛ bɩmbɩ ɔpá a, bʋtɛda Mose mbla amʋ ɔkan wulugyiwulutɔ, bʋtɛkla mʋ́ Yudafɔ ofiakpa kugyikʋ ɔkpʋnʋ ɔdakɛ ɛ.”

Ɔwʋlʋ Pʋsɩsɩ Ahogyipʋá Bʋmegyi Yudafɔ

²² Mʋ́ sʋ sumbi ayɔpʋ amʋ, ɔpasua ahandɛ amʋ pʋ́ ɔpasua amʋ bɔbwɛ agywɩɩn bɛɛ, bɛlɛ ayin akʋ tsu amʋ́tɔ abʋbuo Paulo mʋa Barnaba yɔ Antiokia. Bɛlɛ Yuda ánɩ́ bʋtɛtɩ mʋ Barsaba mʋa Silas. Amʋ́ fɛ́ɛ́ bʋgyi akpapʋ ha ahogyipʋ amʋ.

²³ Ɔwʋlʋá bɔpʋha amʋ́ bɔpʋyatɔ asʋn gyi: “Ahogyipʋá mlɩmegyi Yudafɔ, mlɩbʋ Antiokia, Siria pʋ́ Kilikia ɔmátɔ. Mlɩ apio sumbi ayɔpʋ pʋ́ ɔpasua ahandɛ dɛ ɔwʋlʋ anfɩ wanlɩn sɩsɩ mlɩ. “Anɩdɛ mlɩ itsia ha.

²⁴ “Anɩlonuá anɩ apio akʋ botsu anɩtɔ ba mlɩ wa ɩnʋ, bɔpʋ asʋankʋ kɩklɩ mlɩ, pʋyinta mlɩ agywɩɩn. Anɩmɔkʋwa amʋ́.

²⁵ Ɩnɩ sʋ anɩlafia, tsula ánɩ́ abɛ́lɛ aha akʋ abʋkpa anɩ apio adwɛpʋ Barnaba mʋa Paulo ba mlɩ wa.

²⁶ Aha anfɩ lasi amʋ́ nkpa ha anɩ Wie Yesu Kristo agyʋma amʋ sʋ nɩ.

²⁷ Mʋ́ sʋ anɩdɛ Yuda mʋa Silas wa anɩaa, bʋpʋ ɔnɔ bɛbla mlɩ asʋn amʋʋ anɩlawanlɩn wa ɔwʋlʋ amʋtɔ amʋ kɛn.

²⁸ Ɔŋɛ Wankɩhɛ lalɛ suna anɩ, anɩ ɛ anɩlahɔ mʋ́ ánɩ́ ɩma alɛá abɔ́pʋ atɔ dwindwin kʋkʋ sʋra mlɩ, dʋn mbla anfɩ mʋ́ ɩwɩ dehian anfɩ.

²⁹ Mbla amʋ gyi, ‘Mlɩmágyi atogyihɛá bapʋha ɩkpɩ. Mlɩmágyi ɔbwɩá bɔpʋsa mʋ mɔ pʋ́ obugya. Mlɩmáwa atsɩ mʋ́a ayin asʋn.> “Nɩ mlɩdɛ mbla anfɩsʋ gyi a, ɩbɔ́wa alɛ ha mlɩ. Anɩlafʋn nfɩ.”

³⁰ Bɔwanlɩn ɔwʋlʋ anfɩ ha amʋ́ ta a, besi amʋ́a sumbi ayɔpʋ amʋ ɔkpa bɔpʋya Antiokia. Boyowie ɩnʋ tɩ ahogyipʋ amʋ fɛ́ɛ́ fia, pʋ ɔwʋlʋ amʋ wa amʋ́ ɩbɩtɔ.

³¹ Bɛkla ɔwʋlʋ amʋ a, ansɩ lɛhɩɛ gyi amʋ́, tsufɛ mʋ́tɔ asʋn lɛha klʋn lɛdɩ amʋ́ asɩ.

³² Yuda mʋa Silas, bʋgyi Bulu ɔnɔsʋ atɔɩpʋ amʋ bɔtɔɩ kpla amʋ́ wanklaan pʋwa amʋ́ ɔwʋnlɩn, wa amʋ́ atɛtɔ-ɔnlɩn.

^33-34 Betsia amʋ́ wa nkɛ kpalobi, ɔpasua amʋ lesi amʋ́ ɔkpa iwilwiitɔ, beyinki yɔ aha amʋʋ bɔwa amʋ́ sumbi amʋ wa.

³⁵ Paulo mʋa Barnaba ɛ betsia Antiokia ɩnʋ yɔfʋn brɛ kʋ. Amʋ́a ɩnʋ ahogyipʋ amʋ akʋ betsia suna atɔ, tsia da anɩ Wie asʋn wanklaan amʋ ɔkan.

Paulo Mʋa Barnaba Abasʋmaɩn

³⁶ Brɛ kʋ ɔma a, Paulo lɛbla Barnaba ɔbɛɛ, “Ha ayinki yɔ awuluá anɩlada anɩ Wie asʋn wanklaan amʋ ɔkan fɛ́ɛ́sʋ, ayɛkɩ alɩá bʋtsie.”

³⁷ Barnaba lekleá bɛ́kpa Yohane ánɩ́ bʋtɛtɩ mʋ Marko buo ɩwɩ.

³⁸ Tamɛ Paulo lɛblɩ ɔbɛɛ, ɩma alɛá Marko obóbuo amʋ́, tsufɛ ɔmɛtra buo amʋ́ abʋyɔ Bulu agyʋma amʋ. Oleyinki amʋ́ ɔma tsu Pamfilia wulutɔ ɔpá.

³⁹ Paulo mʋa Barnaba bɛprɩ asʋn anfɩ kinkiinkin, ɩlɛha bɛmaɩn abasʋ. Barnaba lɛkpa Marko buo ɩwɩ, botsu ntsusʋ-yibi yɔ Kipro ɔmátɔ.

⁴⁰ Paulo ɛ lɛkpa Silas buo ɩwɩ, Antiokia ahogyipʋ amʋ bɔpʋ amʋ́ wa Bulu ɩbɩtɔ, bɔpʋ ɔkpa.

⁴¹ Paulo lɔyɔtsʋn Siria mʋ́a Kilikia ɔmátɔ; ɔlɔwa ɔpasua amʋʋ ɩbʋbʋ ɩnʋ amʋ ɔwʋnlɩn.