Gyumagyihɛ 14 - Bulu Ntam Pɔpwɛ mʋ́a Israel Ɩlʋ

Paulo Mʋa Barnaba Bulu Asʋn Blɩ Ikonion Wulutɔ

¹ Ikonion wulutɔ ɛ a, alɩ kɛn Paulo mʋa Barnaba bɔyɔ Yudafɔ ofiakpa nɩ. Bɛblɩ Bulu asʋn ɩnʋ wanklaan. Mʋ́ sʋ Yudafɔ pʋ́ Grikifɔ tsɔtsɔɔtsɔ bɔhɔ Yesu gyi.

² Tamɛ Yudafɔ amʋʋ bʋmohogyi amʋ bɔtɔɩ wa ɔmátɔfɔ amʋ asʋtɔ, ha amʋ́ bɔkʋsʋ lɩɩ ahogyipʋ amʋsʋ.

³ Ifu mɛkɩta Paulo mʋa Barnaba. Betsia ɩnʋ wa ɔpá, blɩ anɩ Wie Yesu asʋn amʋ wanklaan. Yesu ɛ lɛlɩɩ amʋ́ ɔma, sʋ bɔbwɛ ofula pʋ́ osuna pʋsuna ánɩ́ mʋ awɩtɔlɛ asʋn amʋʋ bʋdɛblɩ amʋ igyi ɔnɔkwalɩ.

⁴ Mʋ́ sʋ wulu amʋtɔ ɩlɔbɔɩ anyɔ. Akʋ bobuo Yudafɔ amʋ, akʋ ɛ bobuo sumbi ayɔpʋ amʋ.

⁵ Mʋ́ ɔma a, Yudafɔ, ɔmátɔfɔ pʋ́ amʋ́ ahandɛ bɔbwɛ agywɩɩn bɛɛ, bɔ́wa sumbi ayɔpʋ amʋ ɩwɩɔsɩntɔ, da amʋ́ abwi mɔ.

⁶ Sumbi ayɔpʋ amʋ bonu asʋn anfɩ. Mʋ́ sʋ bɛsrɩ yɔ Likaonia awulu yile Listra mʋ́a Derbe pʋ́ awuluá ɩbʋ manta ɩnʋsʋ.

⁷ Bɛda asʋn wanklaan amʋ ɔkan ɩnʋ ɛ.

Paulo Mʋa Barnaba Gyumagyihɛ Listra Mʋ́a Derbe

⁸ Oyin ɔkʋ letsia Listra wulutɔ, bɔkwɩɩ mʋ ɩbɔ. Ɔmɔkʋkʋsʋ lɩɩ mʋ ayabisʋ kɩ.

⁹ Ɩbɔ anfɩ tsie ɔdɛ Paulo asʋn blɩhɛ nu. Paulo lesi lɩɩ kɩ mʋ alɩɩ, olowun ánɩ́ alahogyiá Bulu ɔbɛ́talɩ tsa mʋ.

¹⁰ Mʋ́ sʋ ɔlɔkplʋn kʋklʋkʋʋ blɩ ɔbɛɛ, “Kʋsʋ lɩɩ fʋ ayabi anyɔsʋ.” Ɩnʋ oyin amʋ lɔkʋsʋ ɔtsawʋlɛ pɛ, wa natɩ bɩ.

¹¹ Brɛá ɔdɔm amʋ bowun tɔá Paulo labwɛ a, bɔkplʋn blɩ Likaonia ɔblɩtɔ bɛɛ, “Ɩkpɩ amʋ badamli anyankpʋsa kplɩ ba anɩ wa.”

¹² Mʋ́ sʋ bɔpʋ amʋ́ ɔkpɩ kpɔnkpɔntɩ ɩda tɩ Barnaba bɛɛ, “Seus.” Bɔpʋ mʋ ɔtsɩamɩ ɩda tɩ Paulo bɛɛ, “Hermes,” tsufɛ Paulo lɩɩ amʋ́ ɔnɔ, ɔdɛtɔɩ nɩ.

¹³ Ɔkpɩ Seus ɔtswɛkpa bʋ wulu ɔnɔ. Seus igyi ɔhapʋ lɔyɔpʋ nnantswie pʋ́ oyi ntswɩtswɩɩ ba wulu ɔnɔ ɩnʋ. Tsufɛ mʋa ɔdɔm amʋ bʋdekleá bɔ́tswɛ sumbi ayɔpʋ amʋ.

¹⁴ Brɛá Barnaba mʋa Paulo bonu tɔá bɛba bɔbwɛ a, bɛkɩta amʋ́ atadɩɛ balɩ. Ilosuna ánɩ́ bʋmotsula dɩnka ɩtɔ amʋʋ bɛba bɔbwɛ amʋsʋ. Bɛsrɩ wie ɔdɔm amʋtɔ blɩ bɛɛ,

¹⁵ “Ntogyi mlɩdɛ ɩnɩ bwɛ? Anɩ ɛ anyankpʋsa anɩgyi fɛ mlɩ. Bulu asʋn wanklaan aba bɛbla mlɩ, amlɩsi atɔkpan anfɩ ɔmagya bobuo anɩ Wie Bulu Ɔkɩankpapʋ. Mʋlɔbwɛ ɔsʋ mʋ́a asɩ, ɔpʋ pʋ́ mʋ́tɔ atɔ fɛ́ɛ́.

¹⁶ Bɩmbɩ amʋ a, olesi ɔkpa ha ɔmágyiɔmá ánɩ́ bʋbwɛ tɔá bʋdekle.

¹⁷ Tamɛ mʋ́ o a, ɔmɔkʋsi atɔ wanklaan tsɔtsɔɔtsɔ bwɛ, pʋsuna ánɩ́ mʋbʋ ɩnʋ. Mʋtɛha nyankpʋ totswie, mlɩ ndɔtɔ-atɔ tɔwa alɛ. Mʋtɛha mlɩ atogyihɛ, ɔtɛha ansɩ tegyi mlɩ.”

¹⁸ Paulo aná asʋn blɩhɛ anfɩ fɛ́ɛ́ ɔma a, ɩlɔwa ɔnlɩn asa bɛtalɩ ka ɔdɔm amʋ itin bɛɛ, bʋmátɩn mbwɩ wʋlɩ amʋ́ ayabiasɩ tswɛ amʋ́.

¹⁹ Mʋ́ ɔma a, Yudafɔ akʋ botsu Antiokia ánɩ́ ɩbʋ Pisidia ɔmátɔ pʋ́ Ikonion wulutɔ ba bɛblɩ asʋn pʋtsɛ ɔdɔm amʋ agywɩɩn, bɔkʋsʋ lɩɩ Paulosʋ. Bɛda Paulo abwi, bɩtɩa mʋ dalɩ wulu amʋtɔ. Bʋkɩ bɛɛ alawu, sʋ besi mʋ tswɩ.

²⁰ Tamɛ brɛá akasɩpʋ amʋ bɛba bobomli mʋ a, ɔlɔkʋsʋ yinki yɔ wulu amʋtɔ. Mʋ́ ɔyɩkɛhɛ a, mʋa Barnaba bɛnatɩ yɔ Derbe wulutɔ.

Antiokia Ánɩ́ Ɩbʋ Siria Ɔmátɔ Yinki Ba

²¹ Paulo mʋa Barnaba bɛda asʋn wanklaan amʋ ɔkan Derbe. Aha tsɔtsɔɔtsɔ bɛdamli klʋntɔ mli Yesu akasɩpʋ. Mʋʋ bɛlayinki yɔ Listra, tsʋn yɔ Ikonion alɩɩ, bɛba bɛdalɩ Antiokia ánɩ́ ɩbʋ Pisidia ɔmátɔ.

²² Ɩnʋ Paulo mʋa Barnaba bɔwa akasɩpʋ amʋ atɛtɔ-ɔnlɩn bɛɛ, bʋkɩta hogyi amʋtɔ. Bɛbla amʋ́ bɛɛ, “Ilehian ánɩ́ abɔ́tsʋn ipian tsɔtsɔɔtsɔtɔ asa abówie Bulu iwiegyi amʋtɔ.”

²³ Bɔtʋ ɔpasua kugyikʋ a, bʋtɛklɩ ɔnɔ bɔ mpaɩ, yaɩ ahandɛ ha amʋ́, pʋ amʋ́ wa anɩ Wie amʋʋ amʋ́ ansɩ dɩn mʋsʋ amʋ ɩbɩtɔ.

²⁴ Beki Pisidia ɔmátɔ ɔpasua amʋsʋ ta a, bɛba Pamfilia ɔmátɔ.

²⁵ Bɛda Bulu asʋn wanklaan amʋ ɔkan Perge wulutɔ. Bɔkʋsʋ tsu ɩnʋ yɔ Atalia wulutɔ.

²⁶ Paulo mʋa Barnaba bɛlatsia ntsusʋ-yibitɔ tsu ɩnʋ bowie Antiokia. Ɩnʋ gyi ɔtɩnɛá ahogyipʋ amʋ begyankpa klɩ ɔnɔ bɔ mpaɩ, ánɩ́ Bulu ɔwa awɩtɔlɛ ha amʋ́, mɛnɩ bɔ́yɔ agyʋma anfɩ bamɔ mʋ́ ɔnɔ anfɩ nɩ.

²⁷ Brɛá bowie Antiokia a, bɛtɩ ɔpasua amʋ fɛ́ɛ́ fia. Bɛbla amʋ́ alɩá Bulu lapʋ amʋ́ gyi gyʋma, pʋ́ alɩá Bulu laha aha ánɩ́ bʋmegyi Yudafɔ ɛ bahɔ mʋ gyi.

²⁸ Betsia akasɩpʋ amʋ wa nkɛ tsɔtsɔɔtsɔ.