Gyumagyihɛ 13 - Bulu Ntam Pɔpwɛ mʋ́a Israel Ɩlʋ

Barnaba Mʋa Saul Sumbi Wa

¹ Bulu ɔnɔsʋ atɔɩpʋ pʋ́ atɔ asunapʋ akʋ betsia Antiokia ɔpasua amʋtɔ. Amʋ́gyi: Barnaba, Simeon ánɩ́ bʋtɛtɩ mʋ Obibi, Lukioá otsu Kirene ɔmátɔ, Manaen ánɩ́ bɛyaɩ mʋa Galilea ɔmásʋ ogyipʋ Herodenyɔ tsukʋlɛ pʋ́ Saul.

² Brɛá bɛklɩ ɔnɔ, bʋdɛ anɩ Wie sum a, Ɔŋɛ Wankɩhɛ lɛbla amʋ́ ɔbɛɛ, “Mlɩlɛ Barnaba mʋa Saul ha mɩ, abʋyɔ agyʋma amʋʋ nɛtɩ amʋ́ mbɛɛ bʋbɔyɔ amʋ.”

³ Mʋ́ sʋ brɛá bɛklɩ ɔnɔ amʋ bɔ mpaɩ ta a, bɔpʋ ɩbɩ dɩnka amʋ́ nwunsʋ, si amʋ́ ɔkpa.

Barnaba Mʋa Saul Kipro Ɔsʋlʋsʋ Yɔ

⁴ Ɔŋɛ Wankɩhɛ lɔwa Barnaba mʋa Saul sumbi. Bɔyɔ Seleukia wulutɔ yotsu ntsusʋ-yibi fa yɔ ɔsʋlʋ kʋá ɩbʋ ntsu nsɩnɛ, bʋtɛtɩ mʋ́ Kiprosʋ.

⁵ Brɛá bowie wulu kʋá ɩbʋ ɩnʋ, bʋtɛtɩ mʋ́ Salamisʋ a, bɔyɔ Yudafɔ ofiakpa yɛda Bulu asʋn amʋ ɔkan. Yohane amʋʋ bʋtɛtra tɩ mʋ Marko amʋ ɛ lobuo amʋ́ yɛtsa amʋ́ agyʋma yɔ.

⁶ Bɛdalɩ Salami wulutɔ, bɛnatɩ alɩɩ bowie ɔsʋlʋ kʋá bʋtɛtɩ mʋ́ Pafosʋ. Ɩnʋ befia ɔfapʋ kpɔnkpɔntɩ ɔkʋá bʋtɛtɩ mʋ Bar-Yesu. Ogyi Yudayin, ɔtɔwa afunu ɔbɛɛ Bulu ɔnɔsʋ ɔtɔɩpʋ mʋgyi.

⁷ Mʋ nyawie gyi ɩnʋ ɔmásʋ ogyipʋ Sergio Paulo. Ɔmásʋ ogyipʋ anfɩ lɛtɩn ansɩ. Ɔlɔwa bɛyɛtɩ Barnaba mʋa Saul ba mʋ woyitɔ. Tsufɛ odekleá mónu Bulu asʋn.

⁸ Tamɛ ɔfapʋ Bar-Yesu anfɩ mʋ ɩda asɩ gyi, Elima Griki ɔblɩtɔ anfɩ mɛha amʋ́ ɔkpa abʋbla ɔmásʋ ogyipʋ amʋ Bulu asʋn amʋ. Ɔlɔbɔ mbɔdɩá ɔmásʋ ogyipʋ amʋ mánu Yesu ɩwɩ asʋn amʋ, fówun ɔmɔ́ɔhɔ mʋ́sʋ gyi.

⁹ Ɩnʋ Ɔŋɛ Wankɩhɛ lɔbʋla Saul amʋʋ bʋdɛ mʋ tɩ Paulo amʋtɔ, olesi ɔlɩɩ ɔdɛ ɔfapʋ amʋ ansɩtɔ kɩ.

¹⁰ Mʋʋ ɔlɛbla ɔfapʋ amʋ ɔbɛɛ, “Ɔbʋnsam mʋ bi, fʋtekisi ɩtɔ wanklaan kugyikʋ. Fapʋ ahamlɛ pʋ́ lalahɛgyi bwɛ fʋ agyʋma. Mʋ́ sʋ fʋméesi Bulu ɔnɔkwalɩ amʋ afunutɔ wa?

¹¹ Kɩ, Bulu ɔbɛ́bɩtɩ fʋ ɩsʋ. Fʋ ansibi bóbwie. Fʋmɛ́ɛtra wun ɔyɩkɛhɛtɔ owi alɩɩ yɔfʋn brɛ kʋ.” Ɩnʋnʋ Elima ansɩtɔ loklun mʋ. Mʋ́ sʋ ɔlɔwa tatapʋ bɩ, ɔdɛ ɔkʋ dunka ɔkɩta mʋ oyitɔ.

¹² Brɛá ɔmásʋ ogyipʋ amʋ lowun tɔá ɩlaba a, ɔlɔhɔ anɩ Wie gyi. Anɩ Wie ɩwɩ asʋn amʋʋ bʋdɛ mʋ suna amʋ lɛha ɔnɔ lobwie mʋ.

Barnaba Mʋa Paulo Antiokia Ánɩ́ Ɩbʋ Pisidia Ɔmátɔ Yɔ

¹³ Paulo mʋa mʋ aba amʋ botsu ntsusʋ-yibi tsu Pafo wulutɔ yɔ Perge, ɩbʋ Pamfilia ɔsʋlʋsʋ. Tamɛ Yohane Marko mʋ́ leyinki amʋ́ ɔma tsu ɩnʋ yɔ Yerusalem.

¹⁴ Bɔkʋsʋ tsu Perge yɔ Antiokia ánɩ́ ɩbʋ Pisidia ɔsʋlʋsʋ. Ɔkpʋnʋ ɔdakɛ a, bɔyɔ ɩnʋ Yudafɔ ofiakpa yetsia asɩ.

¹⁵ Bɛkla atɔ tsu Mose Mbla pʋ́ Bulu ɔnɔsʋ atɔɩpʋ nwʋlʋtɔ ta a, ofiakpa amʋ ahandɛ bɔwa abi bɛyɛbla Paulo aná bɛɛ, “Apio, nɩ mlɩdɛ asʋankʋá mlɛblɩ pʋwa aha anfɩ ɔwʋnlɩn a, ɔkpa da.”

¹⁶ Mʋʋ Paulo lɔkʋsʋ lɩɩ, ɔlɔbwɛ amʋ́ ɩbɩ ɔbɛɛ bʋkasʋ. Mʋʋ ɔlɛbla amʋ́ ɔbɛɛ, “Apio Israelfɔ pʋ́ ɔmá bambasʋfɔá mlɩtenya Bulu ifu, mlɩyaa asʋ amlɩnu.

¹⁷ Israel Bulu lɛlɛ anɩ anain bwɛ mʋ aha. Ɔlɛha bɛklɛɩ brɛá bʋgyi afɔɔ Egyipte ɔsʋlʋsʋ. Ɔlɔpʋ mʋ tumi kpɔnkpɔɔnkpɔntɩ kpa amʋ́ dalɩ ɔmá amʋtɔ.

¹⁸ Olenya klʋn kpa amʋ́ nfi adʋana (40) kɛkɛ ɔsʋlʋkpan amʋsʋ.

¹⁹ Oleyinta ɔmá asienɔ kɛkɛ Kanaan ɔsʋlʋsʋ, oleye amʋ́ ɔsʋlʋ amʋ pʋbwɛ siadɩɛ ha anɩ anain.

²⁰ Nfi lafana aduenu (450), ɔlɔpʋbwɛ ɩnɩ fɛ́ɛ́ ha amʋ́. “Mʋ́ ɔma a, ɔlɛha asʋn agyipʋ bɛkpa amʋ́ alɩɩ bɔtʋ Bulu ɔnɔsʋ ɔtɔɩpʋ Samuel.

²¹ Brɛá bɛbla Bulu bɛɛ, ɔyaɩ awie ha amʋ́ a, ɔlɛyaɩ Kis mʋ bi Saul owie ha amʋ́. Saul otsu Benyamin abusuantɔ. Olegyi iwie nfi adʋana (40).

²² Brɛá Bulu lɛkplɩ mʋ a, ɔlɛha bɛyaɩ Dawid obiasʋ ha amʋ́. Asʋn anfɩ Bulu lɛblɩ tsu mʋ ɩwɩ nɩ. Ɔbɛɛ, ‘Yisai mʋ bi Dawid gyi ɔha ánɩ́ mɩ klʋn dɩn mʋsʋ, tsufɛ ɔbɔ́bwɛ togyitɔá nɛ́bla mʋ mbɛɛ ɔbwɛ.>

²³ “Dawid anfɩ abi-anátɔ Bulu labɛlɛ Yesu tsu ha Israelfɔ ɔbɛɛ, ɔbwɛ amʋ́ Ɔlɛpʋ fɛ alɩá ɔlɛhɩɛ yaɩ.

²⁴ Asa Yesu lɛba a, Asu Ɔbɔpʋ Yohane legyankpa da ɔkan suna Israelfɔ fɛ́ɛ́ ɔbɛɛ, bʋdamli klʋntɔ, abʋha mʋ ɔbɔ amʋ́ asu.

²⁵ Brɛá Yohane ɔba bɔmɔ mʋ agyʋma ɔnɔ a, ɔlɛfɩtɛ aha amʋ ɔbɛɛ, ‘Ma mlɩdesusu mlɩaa ngyi? Megyi mɩgyi ɔha amʋʋ mlɩdɛ ɔkpa kɩ amʋ. Mʋ mʋ́ ɔbɛ́ba mɩ ɔma. Mmɔfʋn ánɩ́ nɔ́wɔɩ mʋ ntʋkʋta.>

²⁶ “Mɩ apio, Abraham abi-aná pʋ́ ɔmá bambasʋfɔá mlɩtenya Bulu ifu, mlɩyaa asʋ amlɩnu. Anɩgyi aha ánɩ́ Bulu lɔpʋ nkpahɔ asʋn amʋ sɩsɩ.

²⁷ Yerusalem atsiapʋ pʋ́ amʋ́ ahandɛ bʋmɛbɩá Yesu gyi Ɔlɛpʋ. Bʋmonu Bulu ɔnɔsʋ atɔɩpʋ amʋ asʋn ánɩ́ bɔwanlɩn tswɩ asɩ. Bʋtɛkla mʋ́ ɔkpʋnʋ ɔdakɛ kugyikʋ. Tamɛ begyi Yesu asʋn, ha mʋ ɩpɔn, mɔ mʋ; ɩlɛha Bulu ɔnɔsʋ atɔɩpʋ amʋ asʋn anfɩ lɛba mʋ́tɔ.

²⁸ Bʋmenya Yesu ɩwɩ asʋn kʋkʋá bɛ́lɩɩ mʋ́sʋ mɔ mʋ, tamɛ bɛbla Pilato bɛɛ, ɔha abʋmɔ mʋ.

²⁹ Mʋ́ sʋ brɛá bɔbwɛ tɔá bɔwanlɩn tsu mʋ ɩwɩ fɛ́ɛ́ ta a, bɛlɛ mʋ tsu oyikpalihɛ amʋsʋ yopula mʋ.

³⁰ Tamɛ Bulu lɔkʋsʋa Yesu tsu afulitɔ.

³¹ Mʋ́ ɔma a, oletsia lɛ ɩwɩ suna aha amʋʋ mʋa amʋ́nyɔ bɛnatɩ tsu Galilea yɔ Yerusalem amʋ brɛ tsɔtsɔɔtsɔtɔ. Aha anfɩ gyi aha ánɩ́ bʋdɛ mʋ ɩwɩ adansɩɛ gyi suna Israelfɔ nɩ.

^32-33 “Anɩ mʋ́ anɩdɛ mlɩ asʋn wanklaan amʋ bla. Mʋ́gyi, Bulu labwɛ tɔ amʋʋ ɔlɛhɩɛ anɩ anain amʋ ha amʋ́ abi-aná. Amʋ́gyi anɩ a. Tsufɛ alakʋsʋa Yesu tsu afulitɔ ha anɩ, fɛ alɩá bɔwanlɩn wa Israelfɔ ɩlʋ nyɔsɩtɔ bɛɛ, ‘Mɩ Bi gyi fʋ. Ndɛ nabwɛ fʋ Sɩ.>

³⁴ Bulu lɛtra tɔɩ tsu Yesu kʋsʋ tsu afulitɔ pʋ́ mʋ ɔyʋlʋ amʋʋ ɩmɔ́ɔplɔ wa ɔbɔtɔ ɛkɛkɛɛkɛ amʋ ɩwɩ ɔbɛɛ, ‘Nɔ́pʋ mɩ oyula wankɩhɛ amʋʋ nɛhɩɛ mbɛɛ, ɩbwɛ alɩágyialɩá nɔ́pʋha Dawid amʋ ha mlɩ.>

³⁵ Owie Dawid ɛ lɛtra lawanlɩn wa Israelfɔ Ɩlʋ bambatɔ ɔbɛɛ, ‘Fʋmɛ́ɛha fʋ osumpʋ wankɩhɛ mɔ́ɔplɔ wa fuli ɔbɔtɔ.>

³⁶ Owie Dawid losum Bulu mʋ nkpatɔ, bwɛ Bulu apɛ ta a, olowu, bopula mʋ mʋ anaintɔ, ɔlɔplɔ.

³⁷ Tamɛ Yesu anfɩ Bulu lɔkʋsʋa tsu afulitɔ anfɩ mʋ́ mɔplɔ.

^38-39 Mʋ́ sʋ apio, mlɩnu asʋn anfɩ anɩdɛ mlɩ bla anfɩ asɩ. Yesu anfɩ nkʋlɛsʋ mlɔ́tsʋn nya lakpansikie. Mose mbla mɛ́ɛtalɩ ha amlɩgyi asʋ Bulu ansɩtɔ. Tamɛ ɔhagyiɔha ánɩ́ alahɔ Yesu anfɩ gyi obégyi asʋ Bulu ansɩtɔ.

⁴⁰ Mʋ́ sʋ mlɩkɩ wanklaan, mɛnɩ asʋn amʋʋ Bulu ɔnɔsʋ atɔɩpʋ bɛblɩ tswɩ amʋ ɩmɛ́ɛba mlɩsʋ.

⁴¹ Asʋn amʋ gyi, ‘Asʋn amʋ ɩwa mlɩ aha ánɩ́ mlɩtɔwa Bulu asʋn nyanya ifu, amlɩwu. Tsufɛ nɩ ndɛ ɔkʋ ɔblɩ gyʋma ánɩ́ ndegyi mlɩtɔ kʋraa a, mlɩmóohogyi.> ”

⁴² Brɛá Paulo mʋa Barnaba bʋdɛdalɩ Yudafɔ ofiakpa ɩnʋ a, aha amʋ bɔkʋlɩ amʋ́ bɛɛ, bʋba ɔkpʋnʋ ɔdakɛ amʋʋ ɩba amʋ, abʋtra bɔtɔɩ tsu asʋn amʋ ɩwɩ suna amʋ́.

⁴³ Brɛá aha amʋ bɛdalɩ Yudafɔ ofiakpa ɩnʋ a, Yudafɔ tsɔtsɔɔtsɔ pʋ́ ɔmá bambatɔ abiá bawie Yudafɔ osumtɔ bɛkpla buo Paulo mʋa Barnaba. Mʋ́ sʋ sumbi ayɔpʋ anfɩ bɔtɔɩ kpla amʋ́ bɛɛ, bʋpʋ ansɩ dɩnka Bulu awɩtɔlɛsʋ.

⁴⁴ Ɔkpʋnʋ ɔdakɛ amʋʋ bɛbla amʋ́ bɛɛ bʋba amʋ lɔfʋn a, ilesi kpalobi tɛkɩ aha bɛta wulu amʋtɔ. Amʋ́ fɛ́ɛ́ bɛba Bulu asʋn onukpa Yudafɔ ofiakpa ɩnʋ.

⁴⁵ Brɛá Yudafɔ bowun ɔdɔm amʋ a, Paulo aná ɩwɩ lɔwa amʋ́ olu. Ɩnɩ sʋ begyi Paulo asʋn blɩhɛ amʋ nwɛn, sia mʋ.

⁴⁶ Tamɛ Paulo mʋa Barnaba bɔwa klʋn bla aha amʋ bɛɛ, “Tɛkɩ mlɩ lehian ánɩ́ abégyankpa bla Bulu asʋn anfɩ. Tamɛ ɩnɩá mlɩlekina mʋ́ nu, mlɩdɛ mlɩ ɩwɩ kɩ mlɩaa, mlɩmehian nkpa ánɩ́ ɩtamata amʋ sʋ a, anɩlayinki ayɔ ɔmá bambasʋfɔ wa.

⁴⁷ Tsufɛ alɩ Bulu lɔwa anɩ nɩ. Ɔbɛɛ, ‘Napʋ fʋ bwɛ ɔkandɩɛ ha ɔmá bambasʋfɔ. Ɔyɩtɔ aha fɛ́ɛ́ bɔ́tsʋn fʋsʋ nya nkpa ánɩ́ ɩtamata.> ”

⁴⁸ Brɛá ɔmá bambasʋfɔ amʋ bonu asʋn anfɩ a, ansɩ legyi amʋ́, bɛkanfʋ anɩ Wie asʋn amʋ. Ɩnʋ aha ánɩ́ Bulu lalɛ ɔbɛɛ, bʋnya nkpa ánɩ́ ɩtamata bɔhɔ asʋn amʋsʋ gyi.

⁴⁹ Anɩ Wie asʋn amʋ ɩlɛklɛɩ wie ɔmá amʋtɔ ɔtɩnɛgyiɔtɩnɛ.

⁵⁰ Tamɛ Yudafɔ amʋ pʋ́ atsɩá bʋbʋ Yudafɔ osumtɔ, obú bʋ amʋ́sʋ pʋ́ wulu ahandɛ bɔkʋsʋ lɩɩ Paulo mʋa Barnabasʋ, gya amʋ́ lɛ ɔmá amʋtɔ.

⁵¹ Sumbi ayɔpʋ amʋ bɛkpakpa amʋ́ ayabitɔ-ɩsɩ wʋlɩ amʋ́ nwunsʋ, bɛnatɩ yɔ Ikonion wulutɔ.

⁵² Tamɛ Ɔŋɛ Wankɩhɛ pʋ́ ansigyi lɔbʋla Antiokia akasɩpʋ amʋtɔ.