Gyumagyihɛ 11 - Bulu Ntam Pɔpwɛ mʋ́a Israel Ɩlʋ

Petro Asʋn Ɔnɔlɛ Yerusalem

¹ Yesu sumbi ayɔpʋ amʋ pʋ́ ahogyipʋ amʋʋ bʋbʋ Yudea ɔmátɔ amʋ bonuá ɔmá bambatɔfɔ ɛ bahɔ Bulu asʋn amʋ.

² Mʋ́ sʋ brɛá Petro lɔyɔ Yerusalem wulutɔ a, mʋa ahogyipʋ akʋá bʋtekleá aha bʋtɩn kete asa abʋwie ɔpasua amʋtɔ bɛbɩtɩ asʋn. Bɛfɩtɛ mʋ bɛɛ,

³ “Ntogyi sʋ fayɔ aha ánɩ́ bʋmɛtɩn kete woyi, fʋa amʋ́nyɔ mlɩlawa ɩbɩ gyi atɔ?”

⁴ Mʋ́ sʋ Petro lɛlɛ asʋn ánɩ́ ɩlɛbatɔ suna amʋ́ ɩkʋlɛ-kʋlɛ ɔbɛɛ,

⁵ “Mbʋ Yopa wulutɔ ndɛ mpaɩ bɔ nowun atɔ. Mʋ́tɔ a, nowun ánɩ́ tɔkʋá igyi fɛ ɔhrada tɛɩhɛ, bʋdɛ mʋ́ nsiebi ana lɛkplɩ tsu ɔsʋsʋ ba mɩ wa.

⁶ Nowun pututɔ-mbwɩ pʋ́ wulutɔ mbwɩ, mbwɩá bʋbʋ ayin, tamɛ bʋtɛka abɔnɔ pʋ́ ɔyɩtɔ mbubwi fɛ́ɛ́ ɔhrada amʋtɔ.

⁷ Ɩnʋ nonu ɔmɛ kʋ lɛdalɩ bla mɩ ɔbɛɛ, ‘Petro, kʋsʋ mɔ mbwɩ anfɩ afʋwɩ.>

⁸ “Mʋʋ nɛblɩ mbɛɛ, ‘Mɩ Wie, ɛkɛkɛɛkɛ. Bɔkwɩɩ mɩ ɔpá a, mmɔkʋgyi tɔá Yudafɔ amandɩɛ lekisi ntɛ mʋ́ ɩwɩ mɛtɩn kɩ.>

⁹ “Mʋʋ ɔmɛ amʋ lotsu ɔsʋsʋ labla mɩ ɔbɛɛ, ‘Mátɩ tɔá Bulu latɩn mʋ́ ɩwɩ atokisihɛ.>

¹⁰ Tse sa sɔɔn nowun atowunhɛ anfɩ. Mʋ́ ɔma a, ɩlɛlayinki yɔ ɔsʋsʋ.

¹¹ “Alɩ brɛ amʋtɔ kɛn a, ayin abasa akʋá bɔwa mɩ wa tsu Kaesarea baba bʋlɩɩ woyi amʋʋ ntsie mʋ́tɔ amʋ ɔnɔ.

¹² Ɔŋɛ Wankɩhɛ lɛbla mɩ ɔbɛɛ, mbuo amʋ́ yɔ, mmágyi nwɛn. Apio abasie anfɩ botsu Yopa anfɩ ɛ bobuo mɩ yɔ Kaesarea. Anɩ fɛ́ɛ́ anɩlɔyɔ Konelio woyitɔ.

¹³ Konelio lɛbla anɩ ɔbɛɛ, mowun Bulu-ɔbɔpʋ ɔkʋ mʋ woyitɔ, ɔlɛbla mʋ ɔbɛɛ, ‘Wa abi abʋyɔ Yopa yɛtɩ oyin ɔkʋá bʋtɛtɩ mʋ Simon Petro ba.

¹⁴ Ɔbɛbla fʋ asʋn ánɩ́ fʋa fʋ woyitɔ aha fɛ́ɛ́ mlɔ́tsʋn mʋ́sʋ nya nkpa.>

¹⁵ “Nenya tsu ɔnɔ ndɛtɔɩ alɩ, Ɔŋɛ Wankɩhɛ lɛba amʋ́sʋ fɛ alɩá ɩlɛba anɩsʋ ɛkɛ gyankpapʋ amʋ.

¹⁶ Ɩnʋ nɛkaɩn anɩ Wie asʋn blɩhɛsʋ. Ɔbɛɛ, ‘Yohane lɔpʋ ntsu bɔ aha asu. Tamɛ mlɩ mʋ́ a, Bulu ɔbɔ́pʋ Ɔŋɛ Wankɩhɛ bɔ mlɩ asu.>

¹⁷ Mʋ́ sʋ nɩ Bulu lapʋ mʋ atokiehɛ amʋ kie amʋ́, fɛ alɩá ɔlɔpʋkie anɩ aha amʋʋ anɩlɔhɔ anɩ Wie Yesu Kristo gyi amʋ a, mɩgyi ma ánɩ́ nétin Bulu ɔkpa?”

¹⁸ Brɛá sumbi ayɔpʋ amʋ bonu asʋn anfɩ a, besi Petro tɔɩ wa, bɛkanfʋ Bulu bɛɛ, “Mʋmʋ Bulu laha aha ánɩ́ bʋmegyi Yudafɔ ɔkpa ɔbɛɛ, amʋ́ ɛ bʋdamli klʋntɔ, abʋnya nkpa.”

Kristo Ɔpasua Ánɩ́ Ɩbʋ Antiokia

¹⁹ Stefano lowu ɔma a, bɛdɩnka ahogyipʋ amʋsʋ. Mʋ́ sʋ bɛdasaɩn yɔ Foinike mʋ́a Kipro ɔsʋlʋsʋ pʋ́ Antiokia wulutɔ. Yudafɔ nkʋlɛ bɛbla Bulu asʋn wanklaan amʋ.

²⁰ Tamɛ amʋ́tɔ akʋ mʋ́ botsu Kipro pʋ́ Kirene ɔmátɔ ba Antiokia bɛbla Grikifɔ amʋ anɩ Wie ɩwɩ asʋn wanklaan amʋ.

²¹ Anɩ Wie Bulu lɛlɩɩ amʋ́ ɔma. Mʋ́ sʋ amʋ́tɔ aha tsɔtsɔɔtsɔ bohogyi, damli klʋntɔ ba anɩ Wie Yesu wa.

²² Yerusalem ɔpasua amʋ bonu asʋn anfɩ. Mʋ́ sʋ bɔwa Barnaba sɩsɩ Antiokia.

^23-24 Barnaba gyi ɔha wanklaan, Ɔŋɛ Wankɩhɛ pʋ́ hogyi ɛ ɩtsɔ mʋtɔ. Brɛá olowie Antiokia, olowun alɩá Bulu lagyi amʋ́ bʋalɛ a, ansɩ legyi mʋ. Mʋʋ ɔlɔtɔɩ kpla amʋ́ ɔbɛɛ, bʋpʋ amʋ́ klʋn fɛ́ɛ́ dɩnka anɩ Wie Yesusʋ, abʋgyi mʋ mblasʋ. Ɩnɩ sʋ aha tsɔtsɔɔtsɔ bɔtsʋn mʋ asʋn amʋsʋ hɔ anɩ Wie gyi.

²⁵ Mʋ́ ɔma a, Barnaba lɔyɔ Tarso wulutɔ yodunka Saul.

²⁶ Brɛá olowun mʋ a, ɔlɛkpa mʋ ba Antiokia. Betsia ɩnʋ ofi ɔkʋlɛ, tsia fia ɔpasua amʋ, suna amʋ́ atɔ. Antiokia begyankpa tɩ akasɩpʋ amʋ bɛɛ “Akristofɔ” nɩ.

²⁷ Bulu ɔnɔsʋ atɔɩpʋ akʋ botsu Yerusalem ba Antiokia alɩ brɛ amʋtɔ kɛn.

²⁸ Amʋ́tɔ ɔkʋlɛ ɩda gyi Agabo. Ɔlɔkʋsʋ lɩɩ, blɩ Ɔŋɛ Wankɩhɛ tumitɔ tswɩ ɔbɛɛ, “Akʋn kpɔnkpɔntɩ kʋ bɛ́ba Roma ɔmátɔ fɛ́ɛ́.” Ɩlɛba mʋ́tɔ brɛá Roma Owie Klaudio tsie obiasʋ.

²⁹ Akasɩpʋ amʋ bɔbwɛ agywɩɩn bɛɛ, amʋ́tɔ okugyiɔkʋ obódunka tɔá obénya, abʋpʋyekie apio ahogyipʋá bʋbʋ Yudea ɔmátɔ.

³⁰ Begyi dɩnka mʋ́sʋ, bɔpʋha Barnaba mʋa Saul bɔpʋya ɔpasua amʋ ahandɛ.