Gyumagyihɛ 10 - Bulu Ntam Pɔpwɛ mʋ́a Israel Ɩlʋ

Konelio Abi Wa Petro Wa

¹ Oyin ɔkʋ letsia Kaesarea ɩnʋ, bʋtɛtɩ mʋ Konelio. Ogyi Romafɔ ɩsa akɔpʋ ɔpasua kʋá bʋtɛtɩ mʋ́ Italia ɔhandɛ.

² Ɔbʋ nsi Bulusum ɩwɩ. Mʋa mʋ woyitɔfɔ fɛ́ɛ́ bʋtosum Bulu. Konelio tekie Yudafɔ ahianfɔ atɔ. Ɔtɔbɔ mpaɩ ha Bulu bregyibrɛ.

³ Ɛkɛ ɔkʋ Konelio lowun atɔ ntʋpwɛ dɔsatɔ. Mʋ atowunhɛ amʋtɔ a, olowun Bulu-ɔbɔpʋ ansɩ kaɩn. Bulu-ɔbɔpʋ amʋ lokpoli mʋ ɔbɛɛ, “Konelio!”

⁴ Ifu lɛkɩta mʋ. Mʋ́ sʋ olesi ɔdɛ Bulu-ɔbɔpʋ amʋ kɩ. Mʋʋ ɔlɛfɩtɛ Bulu-ɔbɔpʋ amʋ ɔbɛɛ, “Mɩ Wie, nkalɩ igyi?” Bulu-ɔbɔpʋ amʋ lɛbla mʋ ɔbɛɛ, “Bulu lahɔ fʋ mpaɩ. Fʋ aha atɔ kie ɛ lagyi mʋ ansɩ.

⁵ Wa abi abʋyɔ Yopa yɛtɩ Simon Petro ba.

⁶ Ɔlɔyɔswɩɩ ɔwʋlʋ-kpakpa ɩwɩ agyʋma ɔyɔpʋ Simon woyitɔ, manta ɔpʋ ɔnɔ.”

⁷ Brɛá Bulu-ɔbɔpʋ amʋ lɛnatɩ a, Konelio lɛtɩ mʋ asumpʋ abanyɔá bʋbʋ mʋ woyitɔ pʋ́ mʋ ɔbɩsʋfɛá ogyi ɩsa ɔkɔpʋ, otenya Bulu ifu.

⁸ Ɔlɛbla amʋ́ asʋn ánɩ́ ɩlaba fɛ́ɛ́, ɔlɔwa amʋ́ sɩsɩ Yopa.

⁹ Mʋ́ ɔyɩkɛhɛ bɔkʋsʋ bɔyɔ Yopa. Bɛta ɩnʋ wie ta, ɩbɔ́bwɛ fɛ ɔpa doduanyɔtɔ. Petro ɛ dɛdʋ ɔyɔ obu awunsʋ mpaɩ ɔbɔkpa.

¹⁰ Akʋn ɩhɩɛ dɛ mʋ. Mʋ́ sʋ olekleá obénya tɔkʋ wa ɔnɔ. Brɛá bʋdɛ atɔ amʋ nɩna ha mʋ a, Petro lowun atɔ.

¹¹ Atowunhɛ amʋtɔ a, olowun ánɩ́ ɔsʋsʋ lafinki, tɔkʋá igyi fɛ ɔhrada tɛɩhɛ, bʋdɛ mʋ nsiebi ana, ɩdɛkplɩ ɩba ɔsʋlʋsʋ.

¹² Ɔyɩtɔ mbwɩ ɔtsan-ɔtsan, mbwɩá bʋbʋ ayin, tamɛ bʋtɛka abɔnɔ pʋ́ ɔyɩtɔ mbubwi fɛ́ɛ́ bʋbʋ ɔhrada amʋtɔ.

¹³ Mʋʋ olonu ɔmɛ kʋ lɛdalɩ ɔbɛɛ, “Petro, kʋsʋ mɔ mbwɩ anfɩ afʋwɩ.”

¹⁴ Tamɛ Petro lɛlɛ mʋ́ ɔnɔ ɔbɛɛ, “O-o! Mɩ Wie, bɔkwɩɩ mɩ ɔpá a, mmɔkʋgyi tɔá Yudafɔ amandɩɛ lekisi ntɛ mʋ́ ɩwɩ mɛtɩn kɩ.”

¹⁵ Ɔmɛ amʋ lɛla bla mʋ ɔbɛɛ, “Mátɩ tɔá Bulu latɩn mʋ́ ɩwɩ atokisihɛ.”

¹⁶ Atowunhɛ amʋ pʋ́ ɔmɛ amʋ lɛba tse sa. Mʋ ansɩtɔ ɩnʋ botsu ɔhrada amʋ ya ɔsʋsʋ ɔtsawʋlɛ pɛ.

¹⁷ Brɛá Petro dɛ nwuntɔ bu tsu atowunhɛ anfɩ ɩwɩ a, Konelio abi amʋ ɛ bafɩtɛ wun Simon woyitɔ, ba bʋlɩɩ ɔkpa ɔnɔ.

¹⁸ Konelio abi amʋ bokpoli fɩtɛ bɛɛ, “Ɔfɔɔ ɔkʋ tsie nfɩ, bʋtɛtɩ mʋ Simon Petro?”

¹⁹ Petro tra ɔdɛ nwuntɔ bu tsu atowunhɛ amʋ ɩwɩ, Ɔŋɛ Wankɩhɛ lɛbla mʋ ɔbɛɛ, “Simon, aha abasa akʋ baba bʋdɛ fʋ dunka.

²⁰ Kʋsʋ bwɛ, afʋkplɩ yefia amʋ́ amlɩnatɩ. Mágyi nwɛn, tsufɛ mɩlawa amʋ́ fʋ wa.”

²¹ Ɩnʋ Petro lɛkplɩ yɔtʋ amʋ́, bla amʋ́ ɔbɛɛ, “Mɩgyi ɔha amʋʋ mlɩdedunka amʋ nɩ. Ntogyi sʋ mlɩna?”

²² Aha amʋ bɛlɛ mʋ́ ɔnɔ bɛɛ, “Anɩmɛdɛ tsitsa. Ɩsa akɔpʋ ɔhandɛ Konelioá otenya Bulu ifu, Yudafɔ fɛ́ɛ́ bʋtɛtɩ mʋ ɩdayile lɔwa anɩ fʋ wa. Bulu-ɔbɔpʋ ɔkʋ labɛbla mʋ ɔbɛɛ, ɔba bɛtɩ fʋ afʋba mʋ woyitɔ, mɛnɩ obónu asʋn ánɩ́ fʋbʋ blɩ.”

²³ Mʋʋ Petro lɛkpa amʋ́ wa woyitɔ, ɔlɛha amʋ́ ɔdɩkpa. Ɔyɩ kɛhɛ a, Petro mʋa amʋ́nyɔ bɔkʋsʋ pʋ ɔkpa bɔyɔ Kaesarea. Brɛá bɔyɔ a, ahogyipʋ akʋá bʋbʋ Yopa ɩnʋ ɛ bobuo amʋ́ yɔ.

²⁴ Mʋ́ ɔyɩkɛhɛ a, boyowie Kaesarea wulutɔ. Botsutsua abʋwie ɩnʋ a, Konelio latɩ mʋ woyitɔ aha pʋ́ mʋ anyawie klakla befia, ɔdɛ amʋ́ ɔkpa kɩ.

²⁵ Brɛá Petro lowie-woyi amʋ ɔnɔ a, Konelio lɔkʋsʋ yefia mʋ, da akpawunu mʋ ayabitɔ sum mʋ.

²⁶ Tamɛ Petro lɛha mʋ ɔlɔkʋsʋ. Ɔlɛbla mʋ ɔbɛɛ, “Kʋsʋ, máda akpawunu ha mɩ. Nyankpʋsa mɩ ɛ ngyi.”

²⁷ Petro mʋa mʋnyɔ bʋna bʋdɛtɔɩ alɩɩ olowie-woyitɔ. Ɩnʋ olowun ánɩ́ aha tsɔtsɔɔtsɔ bafia.

²⁸ Mʋʋ ɔlɛbla amʋ́ ɔbɛɛ, “Mlɩ onuto mlɩyin ánɩ́ Yudafɔ mbla mɛha ɔkpa ánɩ́ Yudayin mʋa ɔmá bambatɔyin bʋbwɛ anyawie ntɛ ɔbɔ́yɔ mʋ wa kpan. Tamɛ Bulu laha mɩ nabɩ ánɩ́ mmákɩ mbɛɛ, ɔkʋ ɩwɩ mɛtɩn ntɛ ɔmɔfʋn amandɩɛ ɔkpasʋ.

²⁹ Mʋ́ sʋ brɛá fɔwa abi fɛɛ bʋbɛtɩ mɩ a, mmɔkpʋkpʋ nwuntɔ nɩ. Amansʋ igyi? Bla mɩ.”

³⁰ Mʋʋ Konelio lɛbla mʋ ɔbɛɛ, “Ndɛ ɛkɛ nasɩ, ntʋpwɛ dɔsatɔ mbʋ woyitɔ ndɛ mpaɩ bɔ. Ɔtsawʋlɛ pɛ a, nowun oyin ɔkʋ lɩɩ mɩ ansɩtɔ. Oyin amʋ lɔwa atadɩɛ fututu.

³¹ Oyin amʋ lɛbla mɩ ɔbɛɛ, ‘Konelio, Bulu lanu fʋ mpaɩ. Fʋ aha atokie ɛ lagyi mʋ ansɩ.

³² Mʋ́ sʋ wa abi abʋyɔ Yopa wulutɔ yɛtɩ Simon Petro ba. Ɔwʋlʋ-kpakpa ɩwɩ agyʋma ɔyɔpʋ Simon woyi ɔlɔswɩɩ. Otsie manta ɔpʋ ɔnɔ.>

³³ Mʋ́ sʋ ɩnʋnʋ nɔwa abi sɩsɩ fʋ. Ɩbʋ alɛá faba. Sei a, anɩ fɛ́ɛ́ anɩlafia Bulu ɩdatɔ. Anɩgyo anɩ Wie asʋn ánɩ́ alapʋha fʋ ɔbɛɛ, fʋbla anɩ.”

Petro Asʋn Blɩhɛ

³⁴ Mʋʋ Petro lotsu ɔnɔ blɩ ɔbɛɛ, “Nawun ánɩ́ lɛlɛ Bulu tamakɩ ɔhaa ansɩtɔ.

³⁵ Mboun ɔha ánɩ́ otenya mʋ ifu, ɔtɔbwɛ yile asʋn otekle ɔmágyiɔmátɔ.

³⁶ Mlɩyin asʋn wanklaan ánɩ́ Bulu lɔpʋha Israelfɔ. Asʋn amʋ gyi, Bulu lapʋ iwilwii ba tsʋn Yesu Kristo, aha fɛ́ɛ́ Owie amʋsʋ.

³⁷ Mlɩyin asʋn kpɔnkpɔntɩá ɩlɛba Yudea ɔmátɔ fɛ́ɛ́. Ilotsu asɩ tsu Galilea ɔmátɔ, brɛá Asu Ɔbɔpʋ Yohane lɛda asubɔ ɔkan ɔma.

³⁸ Mlɩyin anɩ Wie Yesu Nasaretyin amʋ. Mlɩyin ánɩ́ Bulu lɔpʋ mʋ Ɔŋɛ Wankɩhɛ pʋ́ tumi wa mʋtɔ, oleki ɔtɩnɛgyiɔtɩnɛ bwɛ yile, tsa aha ánɩ́ bʋbʋ ɔbʋnsam tumi asɩ ɩlɔ, tsufɛ Bulu buo mʋ.

³⁹ Anɩgyi aha ánɩ́ anɩlowun mʋ bwɛhɛá ɔlɔbwɛ Yudea pʋ́ Yerusalem ɔmátɔ fɛ́ɛ́ nɩ. Bɛda mʋ manta oyikpalihɛsʋ mɔ mʋ.

⁴⁰ Tamɛ mʋ́ ɛkɛ sasɩ a, Bulu lɔkʋsʋa mʋ, lɛ mʋ ɔwan, aha bowun mʋ.

⁴¹ Megyi ɔyɩtɔ aha fɛ́ɛ́ lowun mʋ, tamɛ anɩ aha amʋʋ Bulu lɛlɛ yaɩ ɔbɛɛ, abwɛ mʋ adansɩfɔ amʋ mʋ́ anɩlowun mʋ. Mʋ kʋsʋ tsu afulitɔ ɔma a, anɩa mʋnyɔ legyi, anɩlɔwɩ nɩ.

⁴² Ɔlɛhɩɛ anɩ ɔbɛɛ, ada mʋ asʋn wanklaan amʋ ɔkan suna aha, agyi mʋ ɩwɩ adansɩɛ ánɩ́ mʋgyi ɔha ánɩ́ Bulu lalɛá obégyi akɩankpapʋ pʋ́ awupʋ fɛ́ɛ́ asʋn nɩ.

⁴³ Bulu ɔnɔsʋ atɔɩpʋ amʋ fɛ́ɛ́ bɛblɩ bɛɛ lɛlɛ, ɔhagyiɔha ánɩ́ ɔlɔhɔ Kristo gyi a, Bulu obési mʋ lakpan fɛ́ɛ́ kie mʋ Kristo ɩdatɔ.”

Ɔmá Bambasʋfɔ Ɔŋɛ Wankɩhɛ Nya

⁴⁴ Brɛá Petro dɛ asʋn anfɩ blɩ a, Ɔŋɛ Wankɩhɛ lɛba aha amʋʋ bʋdɛ mʋ asʋn amʋ nu amʋ fɛ́ɛ́sʋ.

⁴⁵ Ɔnɔ lobwie Yudafɔ ahogyipʋ amʋʋ bobuo Petro ba ɩnʋ amʋ ánɩ́ Bulu lapʋ mʋ Ɔŋɛ Wankɩhɛ amʋ kie aha ánɩ́ bʋmegyi Yudafɔ.

⁴⁶ Tsufɛ bowun ánɩ́ aha amʋ bʋdɛ ɔblɩ bamba blɩ, bʋhɩɛ bʋdɛ Bulu kanfʋ. Mʋ́ sʋ Petro lɛbla amʋ́ ɔbɛɛ,

⁴⁷ “Bulu laha aha anfɩ ɛ Ɔŋɛ Wankɩhɛ fɛ anɩ. Ɔkʋ ɔbɛ́talɩ tin amʋ́ ɔkpa ɔbɛɛ, bʋmábɔ amʋ́ asu?”

⁴⁸ Mʋ́ sʋ ɔlɛblɩ ɔbɛɛ, bʋbɔ amʋ́ asu Yesu Kristo ɩdatɔ. Mʋ́ ɔma a, bokokoli Petro bɛɛ, otsia amʋ́ wa kpalobi.