Galatiafɔ 6 - Bulu Ntam Pɔpwɛ mʋ́a Israel Ɩlʋ

Ɩkʋ Tsu Lɛ Aba Asʋntɔ

¹ Mɩ apio, nɩ mlɩtɔ ɔkʋ ɔbwɛ lakpan kʋ a, mlɩ aha amʋʋ Ɔŋɛ Wankɩhɛ dɛ mlɩ kpa amʋ mlɩnya klʋn tɔɩ kpla mʋ pʋtɔɔ. Tamɛ mlɩkɩ mlɩ ɩwɩ wanklaan, mɛnɩ mlɩ ɛ mlɩmɛ́ɛdɩda ɩsɔkɩ amʋ odutɔ.

² Mlɩtsu ɩkʋ lɛ mlɩ aba asʋntɔ. Nɩ mlɩdɛ mʋ́ bwɛ alɩ a, mlɩdɛ Kristo mbla amʋsʋ gyi nɩ.

³ Nɩ ɔkʋ dɛ mʋ ɩwɩ kɩ ɔbɛɛ mɔfʋn togyitɔtɔ, tamɛ omegyi tɔtɔ a, ɔdɛ mʋ ɩwɩ mlɛ.

⁴ Mlɩkapʋ mlɩ onuto tsiatɔ kɩ. Nɩ ɩbʋ alɛ a, mʋmʋ mlɛ́talɩ pʋ ɩbɩ si kantɔ mlɩ bwɛhɛ sʋ, mlɩmɔ́ɔpʋ kapʋ ɔha bamba klɛ.

⁵ Tsufɛ anɩtɔ okugyiɔkʋ ɔbɔ́sʋra mʋ onuto atɔ sʋrahɛ.

⁶ Bulu asʋn amʋ akasɩpʋ bʋye atɔ wanklaan ánɩ́ bʋbʋ ɩkʋ ha amʋ́ asunapʋ.

⁷ Mlɩmámlɛ mlɩ ɩwɩ. Ɔhaa tamamlɛ Bulu. Ɔhagyiɔha ɔbɔ́kpɔtɩ tɔá olodu.

⁸ Nɩ ɔkʋ lodu tsiatɔ lalahɛ wa mʋ klʋntɔ a, lowu ɔbɔ́kpɔtɩ tsu mʋ́tɔ. Tamɛ nɩ ɔlɛha Ɔŋɛ Wankɩhɛ amʋ lodu tsiatɔ wanklaan wa mʋ klʋntɔ a, ɔbɔ́kpɔtɩ nkpa ánɩ́ ɩtamata tsu mʋ́tɔ.

⁹ Mʋ́ sʋ yilebwɛ mákpɔn anɩ. Tsufɛ nɩ abatɔ mowu anɩ a, abɔ́kpɔtɩ nkpa ánɩ́ ɩtamata mʋ́ brɛtɔ.

¹⁰ Mʋ́ sʋ bregyibrɛá anya mʋ́ ɩwɩ ɔkpa a, mlɩha abwɛ yile ha ɔhagyiɔha, titriu anɩ apio ahogyipʋ.

Itsiaha Pʋ́ Ɔlada

¹¹ Mlɩkɩ atɔ wanlɩnhɛ akpɔnkpɔntɩá napʋ mɩ onuto ɩbɩ wanlɩn sɩsɩ mlɩ!

¹² Aha amʋʋ bʋdedunka ánɩ́ bégyi asʋ aha ansɩtɔ amʋ lɩɩ mlɩsʋ bɛɛ, mlɩha abʋtɩn mlɩ kete nɩ. Megyi tɔtɔ sʋ bʋdɛ ɩnɩ bwɛ. Alɩá Yudafɔ bʋmɛ́ɛdɩnka amʋ́sʋ bɛɛ, bʋdɛblɩ bɛɛ Kristo oyikpalihɛsʋ lowu amʋ pɛsʋ ɔha ɔbɔ́tsʋn nya nkpa.

¹³ Kete atɩnpʋ amʋ onuto o bʋtamagyi Mose mbla amʋsʋ. Tamɛ bʋdekleá mlɩtɩn kete, mɛnɩ bɔ́pʋtsu ɩwɩ suna amʋ́ aba ánɩ́ baha mlɩlatɩn kete.

¹⁴ Mɩ mʋ́ a, ɩmába mʋ́tɔá nótsu ɩwɩ ɔyɩ anfɩtɔ tɔtɔɔtɔsʋ, dʋn anɩ Wie Yesu Kristo oyikpalihɛsʋ lowu amʋ. Tsufɛ mʋ lowu amʋ sʋ ɔyɩtɔ tsia ɩtra ma mɩ labi, mɩ ɛ mma labi kʋkʋ ha mʋ́.

¹⁵ Ketetɩn ntɛ ketemátɩn megyi tɔtɔ. Mʋ́a idehian gyi ɔha obémli ɔha pɔpwɛ.

¹⁶ Iwilwii mʋ́a nwewun ɩtʋ aha amʋʋ bʋdɛ mbla anfɩsʋ gyi amʋ, pʋ́ aha ánɩ́ bʋhɩɛ bʋgyi Bulu aha!

¹⁷ Asa nɛ́kpa mɩ asʋn opulu a, mbla mlɩ. Mlɩtɔ ɔhaa mátra wa mɩ tɔɩ. Tsufɛ mɩ ɩwɩ apɩna anfɩ idesuna ánɩ́ Yesu ɔkpábi ngyi.

¹⁸ Mɩ apio, anɩ Wie Yesu Kristo ogyi mlɩ bʋalɛ. Amen!