Galatiafɔ 5 - Bulu Ntam Pɔpwɛ mʋ́a Israel Ɩlʋ

Mlɩkɩ Mlɩ Ɩwɩgyisʋ

¹ Anɩ ɩwɩgyi sʋ Kristo laha anɩlagyi ɩwɩ! Mʋ́ sʋ mlɩlɩɩ kinkiinkin. Mlɩmátra tsula abʋbwɛ mlɩ nkpábi ha mbla amʋ.

² Mlɩnu! Mɩ Paulo dɛ mlɩ bla ánɩ́ nɩ mlesi ɩwɩ ha, bɛtɩn mlɩ kete a, ilosuna ánɩ́ tɔ amʋʋ Kristo lɔbwɛ amʋ ɩma mlɩ labi kʋkʋ.

³ Ntra ndɛ mlɩ ɔla da mbɛɛ, ɔhagyiɔha ánɩ́ ɔlɛha bɛtɩn mʋ kete a, ilehian ánɩ́ obégyi Mose mbla amʋ fɛ́ɛ́sʋ.

⁴ Ndɛ mlɩ bla mbɛɛ, mlɩ aha amʋʋ mlɩdɛ mbla amʋsʋ gyi, mɛnɩ Bulu obótsu mlɩá mlɩ asʋn da ɔkpa mʋ ansɩtɔ amʋ mlɩlamaɩn ɩwɩ lɛ Kristosʋ. Bulu awɩtɔlɛ amʋ ɩlatswɩ mlɩ pan.

⁵ Anɩ mʋ́ anɩ ansɩ dɩn ánɩ́ Bulu obótsu anɩ ánɩ́ anɩ asʋn da ɔkpa mʋ ansɩtɔ. Ɩnɩgyi tɔá anɩdɛ ɔkpa kɩ tsʋn Ɔŋɛ Wankɩhɛ amʋʋ ɔdɛ agyʋma yɔ anɩtɔ, tsʋn anɩ hogyisʋ amʋsʋ nɩ.

⁶ Tsufɛ nɩ anɩa Kristo Yesu anɩgyi kʋlɛ a, ketetɩn ntɛ ketemátɩn mehian. Mʋ́a idehian gyi anɩbʋ hogyiá ɩtɛha anɩtɔdwɛ Bulu pʋ́ anɩ aba.

⁷ Tɛkɩ mlɩdɛ mbɔdɩ bɔ asa. Ma koun latin mlɩ ɔkpa ɔbɛɛ, mlɩmátra buo ɔnɔkwalɩ amʋ?

⁸ Megyi Bulu bwɛhɛ igyi, tsufɛ mʋlɛlɛ mlɩ.

⁹ Mlɩkaɩn ánɩ́ bodobodotu-afa kpalobi tɛha bodobodo amʋ fɛ́ɛ́ itotu.

¹⁰ Anɩ Wie laha nahogyi ánɩ́ mlɩmɛ́ɛtra hɔ ɔha bamba atosunahɛ dʋn mɩ nkʋlɛ klɛ. Bulu ɔbɛ́bɩtɩ ɔha amʋʋ ɔdɛ mlɩ agywɩɩn damli amʋ ɩsʋ.

¹¹ Mɩ apio, nɩ ntra ndɛ ɔkan da blɩ mbɛɛ, ilehian ánɩ́ aha bɛ́tɩn kete a, mʋmʋ ntogyi sʋ Yudafɔ bʋtra bʋdɩn mɩsʋ? Mʋmʋ nɩ ndɛ Kristo oyikpalihɛsʋ lowu amʋ ɛ ɔkan da a, yɛ ɔhaa mɛ́ɛdɩnka mɩsʋ o.

¹² Mɩ sʋ mʋ́ a, tɛkɩ aha amʋʋ bʋdɛ mlɩ han bɛɛ, ilehian ánɩ́ mlɛ́tɩn kete amʋ bawuna flo amʋ́ ɩwɩ.

¹³ Mɩ apio, Bulu lɛlɛ mlɩ ɔbɛɛ, mlɩbegyi ɩwɩ. Tamɛ mlɩmátsʋn mlɩ ɩwɩgyi amʋsʋ layotsu mlɩ tsiatɔ dada amʋ. Mboun mlɩpʋ ɔdwɛ sum mlɩ aba,

¹⁴ tsufɛ Mose mbla amʋ fɛ́ɛ́ ɩlɩɩ mbla kʋlɛ pɛ amʋʋ ɩdɛblɩ ɔbɛɛ, “Dwɛ fʋ ba fɛ fʋ ɩwɩ.” amʋsʋ.

¹⁵ Tamɛ nɩ mlɩlabwɛ mlɩ ɩwɩ fɛ mbwɩkɩta-atɔ, mlɩdɛ aba fɩnɩ, mlɩdɛ aba lala a, mʋmʋ mlɩkɩ wanklaan; nɩ megyi alɩ mlɛ́hɩ aba.

Tsiatɔ Dada Pʋ́ Ɔŋɛtɔ Atsiabi

¹⁶ Mʋ́ sʋ ndɛ mlɩ bla mbɛɛ, mlɩha Ɔŋɛ Wankɩhɛ amʋ ɔkpa mlɩ. Mʋmʋ mlɩmɔ́ɔbwɛ tɔá mlɩ tsiatɔ dada tekle.

¹⁷ Tsufɛ tɔá anɩ tsiatɔ dada tekle ɩhɩɛ na ɔtsan ha tɔá Ɔŋɛ Wankɩhɛ amʋ tekle. Tɔá Ɔŋɛ Wankɩhɛ amʋ tekle ɛ ɩhɩɛ na ɔtsan ha tɔá anɩ tsiatɔ dada tekle. Atoku anyɔ anfɩ ɩlɔkʋsʋ lɩɩ abasʋ, mɛnɩ mlɩmɔ́ɔbwɛ tɔá mlɩtekle.

¹⁸ Nɩ Ɔŋɛ Wankɩhɛ amʋ dɛ mlɩ kpa a, mʋmʋ mlɩmá Mose mbla amʋ asɩ.

¹⁹ Tsiatɔ dada bwɛhɛ tɛlɩn ɔwan. Mʋ́gyi; atsɩ mʋa ayin asʋnwa, agywɩɩn lalahɛ bwɛ, ifintotsia,

²⁰ ɩkpɩtswɛ, afatɔplei, olu, ɩtrɛ, fʋ nkʋlɛ klɛ dunka, ɔblɔkpan, ɔnsɩpɛ, aba-asɩmanu, ɩwɩmaɩn lɛ fʋ abasʋ,

²¹ ɔkabagya, ntabʋ, pleikpada pʋ́ mʋ́á ɩlɛlɩan ɩnɩ aná. Mʋ́ aná ɩwɩ asʋn ndɛ mlɩ bla, fɛ alɩá nɛbla mlɩ yaɩ. Mbɛɛ, aha ánɩ́ bʋtɔbwɛ ɩnɩ odu bʋméenya Bulu iwiegyi amʋtɔ agyapadɩɛ kʋkʋ.

²² Tamɛ nɩ Ɔŋɛ Wankɩhɛ amʋ dɛ anɩ kpa a, mʋ́ abi swiehɛá ibétsia anɩtɔ gyi, ɔdwɛ, ansigyi, iwilwii, ɩklʋnya, awɩtɔlɛ, yilebwɛ, ɔnɔkwalɩ,

²³ ilwii pʋ́ ɩwɩsʋgyi. Mbla kʋkʋʋkʋ má ɩnʋá iletin alɩ ntobi anfɩ ɔkpa.

²⁴ Aha ánɩ́ bʋgyi Kristo klɛ bamɔ amʋ́ tsiatɔ dada pʋ́ amʋ́ ɔwɔlɩ lalahɛ Kristo Yesu oyikpalihɛ amʋsʋ.

²⁵ Ɔŋɛ Wankɩhɛ amʋ laha anɩ nkpa pɔpwɛ. Mʋ́ sʋ mlɩha agyi mʋ asʋnsʋ.

²⁶ Anɩmátsu ɩwɩ suna aba, ntɛ wa aba ɔblɔ, ntɛ pɛ ansɩ aba atɔsʋ.