Galatiafɔ 4 - Bulu Ntam Pɔpwɛ mʋ́a Israel Ɩlʋ

¹ Mlɩyɔ asʋn anfɩtɔ kɩ. Nɩ ɔha owu, si mʋ agyapadɩɛ yaɩ mʋ abi brɛá bʋmɔkʋdan a, bʋgyi fɛ nkpábi. Ɩbʋ mʋ́tɔá amʋ́bʋ amʋ́ sɩ atɔ fɛ́ɛ́,

² tamɛ ilehian ánɩ́ bɛ́ba ɩwɩasɩ ha amʋ́sʋ ɔkɩpʋ alɩɩ yɔfʋn nfi oduá amʋ́ sɩ losuna ánɩ́ bʋhɔ, asa abʋpʋ atɔ amʋ wa amʋ́ ɩbɩtɔ.

³ Alɩ anɩ ɛ anɩgyi asa Kristo lɛba nɩ. Anɩlɔbwɛ nkpábi ha ɔŋɛ, ntɛ tumiá ɩdɛ ɔyɩ anfɩsʋ gyi.

⁴ Tamɛ brɛá brɛ amʋ onuto lɔfʋn a, Bulu lɔwa mʋ Bi sɩsɩ, ɔha tsɩhɛ lɔkwɩɩ mʋ wa mbla amʋ asɩ.

⁵ Bulu lɔwa mʋ ánɩ́ ɔba bɔhɔ anɩ aha amʋʋ anɩgyi nkpábi ha Mose mbla amʋ tsu nkpábitɔ, mɛnɩ ɔbɔ́bwɛ anɩ mʋ abi onuto.

⁶ Bulu lodunka ánɩ́ obósuna ánɩ́ mlɩlabwɛ mʋ abi. Mʋ́ sʋ ɔlɔpʋ mʋ Bi amʋ Ɔŋɛ wa anɩ ɩklʋntɔ nɩ. Ɔŋɛ amʋ tɛha anɩtokpoli mʋ anɩaa, “Abba, mɩ Sɩ!” nɩ.

⁷ Mʋ́ sʋ opio, fʋtra fʋmegyi ɔkpábi, mboun Bulu mʋ bi. Ɩnɩá mʋ bi fʋgyi sʋ a, mʋ atɔ fɛ́ɛ́ igyi fʋ klɛ.

Galatiafɔ Ɩwɩ Ipian

⁸ Brɛá mlɩmɔkʋnya bɩ Bulu a, mlɩlɔbwɛ nkpábi ha ɩkpɩá bʋmegyi tɔtɔ.

⁹ Tamɛ sei mlɩlabɩ Bulu, ntɛ nɛ́blɩ mbɛɛ, alabɩ mlɩ. Ntogyi sʋ mlɩdekleá mléyinki yesum tumi anfɩ ɩma labi kʋkʋʋkʋ? Ntogyi sʋ mlɛ́tra yinki yɛbwɛ amʋ́ nkpábi fɛ brɛ amʋ?

¹⁰ Mlɩdɛ amandɩɛ kʋ bwɛ nkɛ kʋtɔ, tsra kʋtɔ, brɛ kʋtɔ pʋ́ nfi kʋtɔ.

¹¹ Mlɩ bwɛhɛ anfɩ sʋ ifu bʋ mɩtɔ. Ɩdɛ mɩ bwɛ fɛ ipian amʋʋ ndewun mlɩ sʋ amʋ fɛ́ɛ́ ɩbɔ́bwɛ kpaalɩ.

¹² Mɩ apio, nokokoli mlɩ, nabwɛ mɩ ɩwɩ fɛ mlɩ. Ntra mma mbla kʋkʋ asɩ. Mʋ́ sʋ mlɩtsia mɩ atsiabi. Megyi bɛɛ mbɛɛ, mlɩlapʋ lalahɛ kʋkʋ gyi mɩ, sʋ ndɛ ɩnɩ blɩ.

¹³ Mlɩlakaɩn ánɩ́ ɩwɩ ma mɩ ɔnlɩn asa nɛba ɩnʋ bɛda Bulu asʋn wanklaan amʋ ɔkan ɛkɛ gyankpapʋ?

¹⁴ Ɩsɔkɩ kpɔnkpɔntɩ mɩ ɩlɔ amʋ lɔbwɛ ha mlɩ, tamɛ mʋ́ o a, mlɩmobu mɩ tɔkʋ. Mboun mlɩlɔhɔ mɩ fɛ Bulu-ɔbɔpʋ, ntɛ Kristo Yesu onuto kʋraa.

¹⁵ Ansɩ lɛhɩɛ gyi anɩ alɩ brɛ amʋtɔ! Ntɔ lɛba? Mɩ onuto nowun ánɩ́ nɩ mlɛ́talɩ a, tɛkɩ mlɩloloti mlɩ ansibi wa mɩ alɩ brɛ amʋtɔ. Mʋ́ ntɔ dɛ mlɩ sei?

¹⁶ Alɩ amʋʋ ndɛ mlɩ ɔnɔkwalɩ bla amʋ sʋ namli mlɩ olupʋ?

¹⁷ Aha amʋʋ bʋdekleá mlɩgyi Yudafɔ mblasʋ amʋ bʋma mlɩ ɩwɩ agywɩɩn wanklaan kʋkʋ. Tɔá bʋdekle gyi bɛ́maɩn mlɩ lɛ mɩsʋ, mɛnɩ mlékle amʋ́ asʋn.

¹⁸ Ɩbʋ alɛá aha bódunka ánɩ́ mlɩdwɛ amʋ́, agywɩɩn wanklaan ɔkpasʋ. Megyi brɛá mbʋ mlɩ wa wʋlɛ.

¹⁹ Mɩ abi adwɛpʋ! Ɩwɩ tra ɩdɛ mɩ ɔsɩn ha mlɩ, fɛ ɔtsɩá ɩkwɩɩ dɛ mʋ dwiin. Nkɛtɩ mlɩlanya Kristo tsiatɔ mlɩtɔ asa ɩwɩ bési mɩ ɔsɩn.

²⁰ Ɩhɩɛ dɛ mɩ han ha mlɩ. Nɩ mɩ nkʋlɛ sʋ mʋ́ a, tɛkɩ mbʋ mlɩ wa sei, mɛnɩ nɛ́tsɛ mɩ tɔɩtɔ.

Hagar Mʋa Sara Nfantʋhʋn

²¹ Nfɩtɛ mlɩ aha amʋʋ mlɩdekleá mlóbuo Mose mbla amʋ. Mlɩmonu asʋn ánɩ́ ɩlɛblɩ asɩ?

²² Bɔwanlɩn wa Bulu asʋn amʋtɔ bɛɛ, Abraham lɔkwɩɩ abi yinhɛ anyɔ. Ɔkʋlɛ mʋ yin gyi ɔkpábi, onyɔsɩ mʋ yin gyi ɔdɩhɩɛ.

²³ Ɔkpábi amʋ lɔkwɩɩ mʋ bi kɛkɛ, tamɛ ɔdɩhɩɛ amʋ mʋ́ a, Bulu lɛhɩɛ mʋ yaɩ ánɩ́ mɛ́ha mʋ obi asa ɔlɔkwɩɩ.

²⁴ Mlɩha anu asʋn anfɩ asɩ tsʋn ɔkpa anfɩsʋ. Atsɩ abanyɔ anfɩ bʋlɩɩ ha ntam anyɔ ánɩ́ Bulu lɛka. Hagar lɩɩ ha Sinaibʋsʋ klɛ, tsufɛ nkpábi mʋ abi bʋgyi.

²⁵ Sinaibʋ amʋ ɩbʋ Arabia ɔmátɔ. Ɩlɩɩ ha ndɛ Yerusalem wulu. Yerusalem pʋ́ mʋ́tɔ aha fɛ́ɛ́ bʋgyi nkpábi, Mbla amʋ sʋ.

²⁶ Sara mʋ́ gyi ɔdɩhɩɛ, ɔlɩɩ ha ɔsʋsʋ Yerusalem. Mʋgyi anɩ yin nɩ.

²⁷ Tsufɛ Bulu asʋn wanlɩnhɛ amʋ lɛblɩ ɔbɛɛ, “Ɔtsɩ mákwɩɩpʋ, nya ansigyi! Ɔtsɩá ɩkwɩɩ mɔkʋdwiin mʋ kɩ, kplʋn, afʋsʋra okitikiti ansigyisʋ. Tsufɛ ɔtsɩ amʋʋ mʋ klu lesi mʋ tswɩ amʋ obénya abi tsɔtsɔɔtsɔ, dʋn ɔmʋamʋʋ mʋ klu da mʋ wa ekekegyiɛkɛ amʋ.”

²⁸ Mɩ apio, sei a, mlɩlabwɛ Bulu aha tsʋn mʋ tɔá ɔlɛhɩɛ yaɩsʋ; fɛ alɩá ɔlɛhɩɛ yaɩ asa bɔkwɩɩ Isakɩ.

²⁹ Alɩ brɛ amʋtɔ a, obi amʋʋ bɔkwɩɩ mʋ kɛkɛ, ogyi Ismael amʋ lɛdɩnka Isakɩ amʋʋ bɔkwɩɩ mʋ Ɔŋɛ Wankɩhɛ tumitɔ amʋsʋ. Alɩ kɛn igyi ha anɩ ndɛ nɩ.

³⁰ Tamɛ nkalɩ Bulu asʋn wanlɩnhɛ amʋ lɛblɩ? Ɔbɛɛ, “Gya ɔkpábi amʋ mʋa mʋ bi, tsufɛ megyi ɔkpábi mʋ bi amʋ mʋa ɔdɩhɩɛ mʋ bi amʋ obégyi amʋ́ sɩ atɔ.”

³¹ Mʋ́ sʋ apio, megyi ɔkpábi amʋ abi anɩgyi. Ɔdɩhɩɛ amʋ abi anɩgyi.