Efesofɔ 6 - Bulu Ntam Pɔpwɛ mʋ́a Israel Ɩlʋ

Abi Mʋ́a Akwɩɩpʋ

¹ Abi, mlɩa anɩ Wienyɔ mlɩlabwɛ kʋlɛ. Mʋ́ sʋ mlɩbu mlɩ akwɩɩpʋ. Tsufɛ mʋ́gyi tɔá ɩda ɔkpa ánɩ́ mlɔ́bwɛ nɩ.

² Ɩnɩgyi mbla amʋtɔ gyankpapʋá ɔlɛhɩɛ oyula manta mʋ́sʋ nɩ. “Bu fʋ sɩ mʋa fʋ yin,

³ mɛnɩ ɩbɔ́wa alɛ ha fʋ. Fówun fɛ́dan fuli nwun fʋ nkpa anfɩtɔ.”

⁴ Abi asɩ, mlɩmátsia wa mlɩ abi ɔblɔ. Mboun mlɩyaɩ amʋ́, amlɩsuna amʋ́ atɔ alɩá anɩ Wie tekle.

Nkpábi Pʋ́ Amʋ́ Awie

⁵ Nkpábi, mlɩbu mlɩ awie. Mlɩnya amʋ́ ifu, amlɩbu amʋ́ tsu mlɩ klʋntɔ fɛ alɩá mlɩtobu Kristo.

⁶ Mlɩmábwɛ yile amʋ́ ansɩtɔ alɩá bɛ́kanfʋ mlɩ sʋ. Tamɛ fɛ Kristo nkpábi a, mlɩbwɛ atɔ tsu mlɩ klʋntɔ fɛ alɩá Bulu tekle.

⁷ Mlɩlɛ ɩwɩtɔ yɔ agyʋma ansigyisʋ ha amʋ́, fɛ Kristo mlɩdɛ mʋ́ yɔ ha, megyi nyankpʋsa.

⁸ Mlɩdɩnka ansɩá anɩ Wie ɔbɛ́ka ɔhagyiɔha ɩkɔ, ɩtɔ wanklaan kugyikʋá ɔlɔbwɛ sʋ. Nɩ ɔkpábi fʋgyi o, fʋtsie fʋ ɩwɩsʋ o.

⁹ Awie, mlɩ ɛ mlɩkɩta mlɩ nkpábi wanklaan, fɛ alɩá nablɩ bɔtsʋn. Mlɩmábwɛ amʋ́ kpounkpoun. Mlɩkaɩn ánɩ́ mlɩa amʋ́nyɔ fɛ́ɛ́ owie amʋ bʋ ɔsʋsʋ. Mʋ mʋ́ ɔtamakɩ ɔhaa ansɩtɔ.

Bulu Akɔtɔ

¹⁰ Mɩ asʋn trahɛ-trahɛ gyi, apio, mlɩtsʋn anɩa anɩ Wienyɔ ɩkʋlɛbwɛsʋ amlɩha mʋ ɔwa mlɩ ɔwʋnlɩn tsu mʋ tumi kpɔnkpɔntɩ amʋtɔ.

¹¹ Mlɩdɩda ɩsa-akɔtɔ fɛ́ɛ́á Bulu laha mlɩ ɔbɛɛ, mlɩpʋkɔ Ɔbʋnsam, mɛnɩ mlɛ́talɩ lɩɩ mʋ ɔmlɛn amʋ ɔnɔ.

¹² Tsufɛ megyi anɩa anyankpʋsa dɛkɔ. Mboun anɩa ɔŋɛtɔ tumi lalahɛ, atumipʋ pʋ́ ɔŋɛ lalahɛá bʋbʋ ɔyɩ klunhɛ anfɩtɔ pʋ́ ɔtɩnɛgyiɔtɩnɛ dɛkɔ.

¹³ Mʋ́ sʋ mlɩdɩda Bulu akɔtɔ amʋ fɛ́ɛ́, mɛnɩ ɛkɛá lalahɛ kʋ ifwie mlɩtɔ a, mlɩmɛ́ɛsrɩ, mlɛ́talɩ lɩɩ mʋ́ ɔnɔ, tra nya ɔŋɛ wa ɔwʋnlɩn lɩɩ kinkiinkin.

¹⁴ Mʋ́ sʋ mlɩkʋsʋ, amlɩda ɩwɩsʋ. Ɔnɔkwalɩwa ɩbwɛ ɔfɛá ɩklɩ mlɩ osiesʋ. Yilebwɛ ɩbwɛ mlɩ kantɔ-atintɔ.

¹⁵ Ɩwɩsʋda ha iwilwii asʋn wanklaan amʋtɔ kɩta pʋ́ mʋ́ blɩ ɩbwɛ mlɩ ɩsatɔ ntʋkʋta.

¹⁶ Ɩnɩ fɛ́ɛ́ ɔma a, mlɩkɩta Kristo hogyi amʋtɔ bregyibrɛ. Ɩbwɛ mlɩ atintɔá mlɔ́pʋtin mlɩ ɩwɩ, mɛnɩ Ɔbʋnsam mbɩn pɩɔnpɩɔn amʋʋ ɩdɛtsʋn amʋtɔ kʋkʋ ɩmɔ́ɔwɔ mlɩ.

¹⁷ Mlɩpʋ Bulu nkpahɔ amʋ bwɛ mlɩ kʋtʋpa. Mlɩkɩta Bulu asʋn amʋtɔ, ɩbwɛ mlɩ ɩsatɔ ɔdayiá Ɔŋɛ Wankɩhɛ amʋ tɛha mlɩ.

¹⁸ Mlɩha Bulu Ɔŋɛ amʋ ɔkpa mlɩ, amlɩbɔ mpaɩ bregyibrɛ. Mlɩkʋlɩ Bulu, ɔtsa mlɩ ɔkpagyiɔkpasʋ. Mʋ́ sʋ mlɩdɩnka ansɩ ɩwɩsʋ. Mlɩmási mpaɩ bɔ ha Bulu aha fɛ́ɛ́.

¹⁹ Mlɩbɔ mpaɩ ha mɩ. Nɩ nobwii ɔnɔ a, Bulu ɔpʋ mʋ asʋn amʋ wa mɩ ɔnɔ; ɔha mɩ antalɩ wa klʋn blɩ asʋn ŋainhɛ amʋʋ ɩbʋ mʋ asʋn wanklaan amʋtɔ amʋ fɛ́ɛ́.

²⁰ Asʋn amʋ ɩwɩ sumbi ɔyɔpʋ ngyi. Mʋ́ ɔkanda sʋ nda obu nɩ. Mlɩbɔ mpaɩ mlɩaa, Bulu ɔha mɩ antalɩ wa klʋn blɩ mʋ́ alɩá ilehian.

Ɩkla

²¹ Osumbi ɔnɔkwalɩpʋ anɩ pio ɔdwɛpʋ Tihiko gyi anɩ Wie agyʋma amʋtɔ. Ɔbɛ́bla mlɩ mɩ ɩwɩ asʋn fɛ́ɛ́, mɛnɩ mlɛ́bɩ alɩá ngyi pʋ́ tɔá ndɛbwɛ.

²² Ɩnɩ koun sʋ ndɛ mʋ wa mlɩ wa nɩ. Ndekle mbɛɛ, ɔbɛ́bla mlɩ alɩá togyitɔ ɩdɛ mʋ́sʋ yɔ nfɩ. Ɔtɔɩ kpla mlɩ pʋwa mlɩ ɔwʋnlɩn.

²³ Ɔsɩ Bulu mʋa anɩ Wie Yesu Kristo bʋha mlɩ ahogyipʋ amʋ fɛ́ɛ́ iwilwii. Bʋha amlɩtsia dwɛ aba, mlɩ ansɩ ɩdɩnka Bulusʋ brɛ fɛ́ɛ́.

²⁴ Ogyi aha ánɩ́ bʋtamasi anɩ Wie Yesu Kristo dwɛ fɛ́ɛ́ bʋalɛ.