Efesofɔ 5 - Bulu Ntam Pɔpwɛ mʋ́a Israel Ɩlʋ

Akristofɔ Atsiabi

¹ Ɩnɩá Bulu abiá ɔtɛhɩɛ dwɛ mlɩgyi sʋ a, mlɩtsia mʋ atsiabi.

² Mlɩdwɛ aba ɔkpagyiɔkpasʋ, fɛ alɩá Kristo lɔdwɛ anɩ, tsula bɔmɔ mʋ anɩ sʋ. Ɔlɔpʋ mʋ ɩwɩ bwɛ atɔ hahɛ pʋ́ afɔdɩɛ-abɔtɔá ɩbʋ ɔfan fanfaanfan ha Bulu, ilegyi mʋ ansɩ.

³ Bulu latɩn mlɩ ɩwɩ. Mʋ́ sʋ mlɩmáwa atsɩ mʋa ayin asʋn, wa hakpan, ntɛ ɔnsɩpɛ.

⁴ Mʋ́ ɔma a, ɩma alɛá mlɛ́blɩ asʋn ánɩ́ ɩbʋ pɛlɩ pʋ́ mʋ́á ɩma anulɛ, ntɛ wa ɔplɔɩkpan. Mboun mlɩda Bulu ɩpan bregyibrɛ.

⁵ Ɩwankɩ mlɩá mbʋa ɔtɔpʋ, ɔhakpan ntɛ ɔnsɩpɛ ɔwapʋ ɔkʋkʋ méenya ogyikpa Kristo mʋa Bulu iwiegyi amʋtɔ. (Tsufɛ ɔnsɩpɛ ɔwapʋ gyi fɛ ɔkpɩ ɔtswɛpʋ).

⁶ Mlɩmáha ɔkpa ɔhaa ɔpʋ asʋn ánɩ́ ɩma labi kʋkʋ mlɛ mlɩ. Tsufɛ tsiatɔ lalahɛ anfɩ odu sʋ Bulu tenya ɔblɔ bɩtɩ aha ánɩ́ bʋbʋ asʋtɔ-ɔnlɩn ɩsʋ nɩ.

⁷ Mʋ́ sʋ mlɩmápʋ amʋ́ gyi mba.

⁸ Brɛ amʋ a, okluntɔ mlɩtsie mlɩdɛ lakpan bwɛ. Tamɛ sei a, mlɩa anɩ Wienyɔ mlɩlabwɛ ɩkʋlɛ. Mʋ́ sʋ mlɩtsie wankɩtɔ. Ɩnɩ sʋ mlɩ tsiatɔ isuna ánɩ́ mlɩtsie wankɩtɔ.

⁹ Tsufɛ ɔha ánɩ́ ɔbʋ wankɩtɔ tɔbwɛ yile. Mʋ asʋn da ɔkpa, ɔbʋ ɔnɔkwalɩ.

¹⁰ Mʋ́ sʋ mlɩbɔ mbɔdɩ amlɩkasɩ tɔá Bulu tekle.

¹¹ Mlɩmágyi mba. Labi kʋkʋ ɩma mʋ́tɔ. Mboun mlɩlɛ amʋ́ bwɛhɛ ɔwan.

¹² Ɩhɩɛ bʋ pɛlɩá bɛ́blɩ ntobiá aha bʋtɔbwɛ ŋaintɔ ɩwɩ asʋn kʋraa.

¹³ Tamɛ nɩ ɩtɔ wankɩhɛ ɩwankɩ wʋlɩ tɔá ɩbʋ okluntɔsʋ a, itemli itowunhɛ.

¹⁴ Tsufɛ atɔ wankɩhɛ tɛlɛ togyitɔ ɔwan. Mʋ́ sʋ bɛblɩ bɛɛ, “Ɔdɩdɩpʋ, tsinki. Kʋsʋ tsu afulitɔ, Kristo ɔwankɩ wʋlɩ fʋsʋ.” nɩ.

¹⁵ Ɩnɩ sʋ mlɩkɩ mlɩ tsiatɔ wanklaan. Mlɩmátsia nkpa fɛ aha mimlahɛ, mboun mlɩtsia fɛ atɩansɩpʋ.

¹⁶ Nɩ mlenya brɛá mlɔ́pʋbwɛ ɩtɔ wanklaan a, mlɩmáyinta mʋ́. Tsufɛ lalahɛbwɛ lamoni alɩ brɛ anfɩtɔ.

¹⁷ Mʋ́ sʋ mlɩmábwɛ mimlala. Mboun mlɩbɔ mbɔdɩ amlɩbɩ tɔá anɩ Wie tekle, amlɩbwɛ mʋ́.

¹⁸ Mlɩmánun nta bʋ, tsufɛ iteyinta ɔha. Mboun mlɩha Ɔŋɛ Wankɩhɛ amʋ ɔbʋla mlɩ bregyibrɛ.

¹⁹ Mlɩpʋ Bulu asʋn wa ɩlʋ, amlɩwa ɩlʋá Ɔŋɛ Wankɩhɛ lɔpʋwa mlɩ klʋntɔ pʋtɔɩ kpla aba; amlɩwa ɩlʋ ɛ tsu mlɩ klʋntɔ kanfʋ anɩ Wie.

²⁰ Mlɩda anɩ Sɩ Bulu ɩpan togyitɔtɔ bregyibrɛ, anɩ Wie Yesu Kristo ɩdatɔ.

Akristofɔ Aklu Mʋ́a Aka Tsiatɔ

²¹ Mlɩba ɩwɩasɩ ha aba fɛ alɩá mlɩtɛba ɩwɩasɩ ha Kristo.

²² Ɔtsɩ, ba ɩwɩasɩ ha fʋ klu fɛ alɩá fʋtɛba ɩwɩasɩ ha Kristo.

²³ Tsufɛ oklu bʋ tumi mʋ kasʋ, fɛ alɩá Kristo bʋ tumi ɔpasua amʋsʋ. Ɔpasua amʋ gyi mʋ ɔyʋlʋ, Kristo amʋ onuto gyi mʋ́ Ɔlɛpʋ.

²⁴ Alɩ amʋʋ ɔpasua amʋ tɛba ɩwɩasɩ ha Kristo amʋ a, alɩ kɛn ɔka ɛ ɔba ɩwɩasɩ ha mʋ klu togyitɔtɔ nɩ.

²⁵ Aklu, mlɩdwɛ mlɩ aka fɛ alɩ amʋʋ Kristo lɔdwɛ ɔpasua amʋ, tsula bɔmɔ mʋ mʋ́ sʋ amʋ.

²⁶ Kristo lotsula bɔmɔ mʋ pʋtɩn ɔpasua amʋ ɩwɩ ha Bulu. Olebie ɔpasua amʋ ntsu, pʋ mʋ asʋn amʋ gyʋra mʋ́ ɩwɩ.

²⁷ Omekleá ifin pʋ́ asʋansʋ bétsia ɔpasua amʋ ɩwɩ, ntɛ mʋ́ ɔtɩnɛkʋ ɩbɔ́kpʋkpʋ tɩa, mɛnɩ ɩbɔ́wa mʋ onuto amʋ akɩlɛ fɛ obitebi, ɔbɛ́kpa mʋ ba mʋ ɩwɩ wa.

²⁸ Alɩ kɛn lehian ánɩ́ oyin ɔbɔ́dwɛ mʋ ka fɛ mʋ ɩwɩ nɩ. Oyin ánɩ́ ɔtɔdwɛ mʋ ka tɔdwɛ mʋ onuto ɩwɩ.

²⁹ Tsufɛ ɔhaa tamalu mʋ ɩwɩ, bʋla ɔtɛbʋla mʋ ɩwɩ, kɩ mʋ ɩwɩsʋ wanklaan fɛ alɩá Kristo ɛ tɔbwɛ ha ɔpasua amʋ.

³⁰ Tsufɛ anɩ fɛ́ɛ́ anɩgyi Kristo ɔyʋlʋ ɩwɩ ntobi.

³¹ Fɛ alɩá bɔwanlɩn wa Bulu asʋn amʋtɔ bɛɛ, “Ɩnɩ sʋ oyin ɔbɛ́natɩ si mʋ sɩ mʋa mʋ yin, yɛmanta mʋ kasʋ. Fówun amʋ́ abanyɔ amʋ bɔ́bwɛ ɔyʋlʋ kʋlɛ” nɩ.

³² Ɔnɔkwalɩ, Bulu asʋn ŋainhɛ anfɩtɔ bʋ odwin. Ndɛkɩ mbɛɛ, Kristo mʋa ɔpasua amʋ ɩwɩ asʋn igyi.

³³ Mlɩ ɛ mlɩ asʋn igyi. Mʋ́ sʋ ntra ndɛ mlɩ bla mbɛɛ, oyingyioyin ɔdwɛ mʋ ka fɛ mʋ onuto ɩwɩ, ɔtsɩ ɛ obu mʋ klu.