Efesofɔ 4 - Bulu Ntam Pɔpwɛ mʋ́a Israel Ɩlʋ

Anɩa Kristonyɔ Ɩkʋlɛbwɛ

¹ Ɩnɩ sʋ mɩ anfɩ nda obu anɩ Wie agyʋma yɔ sʋ anfɩ ndɛ ɩpa bwii ha mlɩ mbɛɛ, mlɩtsia tsiatɔ oduá ɩlɛkana alɩá Bulu lɛlɛ mlɩ ɔbɛɛ, mlɩbetsia.

² Mlɩba ɩwɩasɩ, amlɩlwii. Mlɩnya klʋn ha aba, amlɩdwɛ aba.

³ Ɔŋɛ Wankɩhɛ amʋ laha mlɩlabwɛ kʋlɛ. Mʋ́ sʋ mlɩbɔ mbɔdɩ amlɩtsia iwilwiitɔ, mɛnɩ ɩkʋlɛbwɛ amʋ ibétsia mlɩtɔ yɔ.

⁴ Ɔyʋlʋ kʋlɛ ɩwɩ ntobi anɩ fɛ́ɛ́ anɩgyi. Ɔŋɛ Wankɩhɛ kʋlɛ pɛ bʋ ɩnʋ. Alɩ kɛn Bulu lɛlɛ anɩ fɛ́ɛ́ ɔbɛɛ, abɛ́kɩ toku kʋlɛ pɛ ɔkpa nɩ.

⁵ Owie ɔkʋlɛ; hogyi kʋlɛ; asubɔ kʋlɛ.

⁶ Bulu ɔkʋlɛ. Mʋgyi anɩ fɛ́ɛ́ Ɔsɩ. Mʋdɛ anɩ fɛ́ɛ́sʋ gyi, ɔdɛ agyʋma yɔ tsʋn anɩ fɛ́ɛ́sʋ, otsie anɩ fɛ́ɛ́tɔ.

⁷ Kristo lɔwa awɩtɔlɛ ye atokiehɛ ha anɩ fɛ́ɛ́ ɔbɛɛ, apʋyɔ mʋ agyʋma,

⁸ fɛ alɩá bɔwanlɩn wa Bulu asʋn amʋtɔ bɛɛ, “Brɛá ɔlɔyɔ ɔsʋsʋ a, ɔlɛkpa ndoun buo ɩwɩ, kie aha atɔ.”

⁹ Nɩ bɔwanlɩn wa Bulu asʋn amʋtɔ bɛɛ, “Ɔlɔyɔ ɔsʋsʋ” a, idesuna ánɩ́ Kristo legyankpa kplɩ wie ɔsʋlʋtɔ.

¹⁰ Mʋmʋ idesuna ánɩ́ ɔha amʋʋ ɔlɛkplɩ wie ɔsʋlʋtɔ amʋ kɛn lɔyɔ ɔsʋsʋ, ɔtɩnɛá ɩlɔfʋa dʋn nɩ, mɛnɩ ɔbɔ́bʋla ɔsʋ mʋ́a asɩ fɛ́ɛ́, ha mʋ́ ɩfʋn.

¹¹ Kristo onuto lɔbwɛ anɩtɔ akʋ mʋ sumbi ayɔpʋ. Akʋ Bulu ɔnɔsʋ atɔɩpʋ. Akʋ mʋ asʋn wanklaan amʋ ɔkan adapʋ. Akʋ ɛ akpapʋ pʋ́ asunapʋ.

¹² Kristo lɛlɛ amʋ́ alɩ, mɛnɩ Bulu aha bɛ́talɩ yɔ mʋ agyʋma, pʋwa Kristo ɔyʋlʋ ɩkʋlɛ; igyi mʋ ɔpasua amʋ ɔwʋnlɩn,

¹³ mɛnɩ anɩ fɛ́ɛ́ abɔ́bwɛ kʋlɛ hogyitɔ, bɩ Bulu mʋ Bi amʋ. Fówun abɛ́dan, fʋn ɔkpagyiɔkpasʋ fɛ Kristo.

¹⁴ Ɩnɩ sʋ anɩmɛ́ɛtra bwɛ fɛ nyebiá aha ánɩ́ amʋ́ ɔnɔ bʋ ɔdwɛ bɛ́talɩ pʋ amʋ́ atosunahɛ pɔpwɛ kugyikʋ bɛmlɛ, fɛ alɩá ntsu tɛda ɔklʋn ya ɔtɩnɛgyiɔtɩnɛá idekle.

¹⁵ Mboun mlɩha abla aba ɔnɔkwalɩ asʋn amʋ ɔdwɛtɔ, mɛnɩ abɛ́dan togyitɔtɔ, bwɛ fɛ Kristo, ogyi ɔpasua amʋ nwun.

¹⁶ Ɩna mʋsʋ ɔyʋlʋ, igyi ɔpasua amʋ ɔtɩnɛgyiɔtɩnɛ ɩtsa aba, ɩdɛ aba wanklaan. Nɩ nyankpʋsa-oyi ɩwɩ ntobi amʋ fɛ́ɛ́ ɩdɛ mʋ́ agyʋma yɔ wanklaan a, Kristo tɛha mʋ́ ɩtɛdan ɔdwɛtɔ.

Nkpa Dada Mʋ́a Pɔpwɛ

¹⁷ Mʋ́ sʋ ndɛ mlɩ ɔla da anɩ Wie ɩdatɔ mbɛɛ, mlɩmátra tsia fɛ aha ánɩ́ bʋmeyin Bulu. Ɩtɔá mɔ́ɔwa labi ha amʋ́ ɩwɩ bʋtɔgywɩɩn.

¹⁸ Amʋ́ nwuntɔ loklun. Mʋ́ sʋ bʋma nkpa pɔpwɛ amʋʋ itsu Bulu wa amʋ, tsufɛ bʋmeyin tɔtɔ. Ɩklʋntɔ bʋ amʋ́ odwin.

¹⁹ Lalahɛbwɛ tamawa amʋ́ pɛlɩ, bʋtekle hakpanla kugyikʋ bwɛ. Bʋtɔbwɛ lalahɛ kugyikʋ, bʋtamatalɩ kɩta ɩwɩ.

²⁰ Tamɛ mlɩ mʋ́ a, megyi tsiatɔ anfɩ odu mlɩlɛkasɩ tsu Kristo ɩwɩ.

²¹ Nyin ánɩ́ mlɩlanu Yesu ɩwɩ asʋn, basuna mlɩ ɔnɔkwalɩá ɩbʋ mʋtɔ ɛ.

²² Mʋ́ sʋ mlɩsi mlɩ tsiatɔ dada amʋʋ mlɩletsia amʋ. Mlɩ ɔwɔlɩ lalahɛ lɛmlɛ mlɩ alɩ brɛ amʋtɔ, ɩlɛha mlɩ tsiatɔ leyinta.

²³ Mlɩha Bulu ɔbwɛ mlɩ klʋn pʋ́ mlɩ agywɩɩn pɔpwɛ.

²⁴ Mlɩtsia tsiatɔ pɔpwɛá igyi Bulu atsiabi, mʋ́ ɩwɩ lɛtɩn, ɩna dɩnka ɔnɔkwalɩ ɔkpa amʋsʋ.

²⁵ Mʋ́ sʋ mlɩtɔ okugyiɔkʋ ɔmátra wa afunu. Ɔhagyiɔha ɔbla mʋ ba Okristoyin ɔnɔkwalɩ. Tsufɛ anɩ fɛ́ɛ́ anɩgyi nyankpʋsa-oyi ɔkʋlɛ amʋ ɩwɩ atɔ.

²⁶ Ɔblɔ ɩkɩta mlɩ a, ɩmáha mlɩ amlɩbwɛ lakpan. Ɩmátsia mlɩtɔ yɔfʋn owi tahɛ.

²⁷ Mlɩmátepi ha Ɔbʋnsam ɔkpa ɔmlɛ mlɩ, amlɩbwɛ lakpan.

²⁸ Owikplu mátra wi atɔ. Ɔpʋ mʋ ɩbɩ yɔ agyʋma, mɛnɩ obénya tɔkʋ kpa mʋ ɩwɩ, nya ɩkʋ ɛ ha aha ánɩ́ bʋma kʋkʋ.

²⁹ Mlɩmáha asʋn lalahɛ kʋkʋ ɩdalɩ tsu mlɩ ɔnɔ. Mboun mʋ́á ɩbɔ́bʋa ɔha, ɩbɔ́bwɛ yile, wa labi, wa mʋ́ anupʋ ɔwʋnlɩn.

³⁰ Mlɩmábwɛ tɔá ɩbɛ́han Ɔŋɛ Wankɩhɛ amʋ. Tsufɛ mʋ́ Bulu lɔpʋhɩɛ mlɩ nsʋ, pʋsuna ánɩ́ mʋbʋ mlɩ, mɔ́hɔ mlɩ nkpa ɛkɛ amʋ nɩ.

³¹ Mlɩlɛ ɔnsɩpɛkpan, olu pʋ́ ɔblɔkpan, ɩtrɛ, isia pʋ́ lakpan kugyikʋ agywɩɩn lɛ mlɩtɔ.

³² Mboun mlɩwa awɩtɔlɛ ha aba. Mlɩwun aba nwɛ, amlɩsi lakpan kie aba fɛ alɩ amʋʋ Kristo sʋ Bulu lesi mlɩ klɛ kie mlɩ amʋ.