Efesofɔ 3 - Bulu Ntam Pɔpwɛ mʋ́a Israel Ɩlʋ

Paulo Ɔma Bambasʋfɔ Bulu Asʋn Bla

¹ Mɩ Paulo nda obu Kristo Yesu asʋn wanklaan amʋʋ ndɛ ɔkan da mlɩ aha ánɩ́ mlɩmegyi Yudafɔtɔ amʋ sʋ.

² Nyin ánɩ́ mlɩlanu awɩtɔlɛá Bulu lɔwa ha mɩ, pʋ agyʋma anfɩ wa mɩ ɩbɩtɔ ɔbɛɛ, mbwɛ, ɩwa labi ha mlɩ.

³ Bulu lɛlɛ mʋ asʋn ŋainhɛ amʋʋ ɔlɛkɩklɩ yaɩ amʋ ɔwan suna mɩ. Mʋ́ nawanlɩn kutuklu a.

⁴ Nɩ mlɛkla ɔwʋlʋ anfɩ a, ɩbɔ́wankɩ mlɩá nanu Kristo ɩwɩ asʋn ŋainhɛ amʋ asɩ.

⁵ Tsu ɔyɩ ɔpá a, Bulu mɔkʋlɛ asʋn ŋainhɛ anfɩ suna nyankpʋsa ɔkʋkʋ. Tamɛ sei anfɩ a, alabɛlɛ mʋ́ ɔwan tsʋn mʋ Ɔŋɛ amʋsʋ suna aha amʋʋ alalɛ, bʋgyi mʋ sumbi ayɔpʋ pʋ́ mʋ ɔnɔsʋ atɔɩpʋ wankɩhɛ amʋ.

⁶ Mʋ asʋn ŋainhɛ amʋ gyi, Bulu layula ɔma bambasʋfɔ ɛ fɛ Yudafɔ, tsʋn mʋ asʋn wanklaan amʋsʋ. Amʋ́a Yudafɔ bamli ɔlɛpɛ ɔkʋlɛtɔ atɔ agyipʋ. Alabwɛ amʋ́a Yudafɔ kʋlɛ. Mʋ́ sʋ babwɛ ɔyʋlʋ kʋlɛ. Amʋ́ ɛ bénya atɔ amʋʋ Bulu lɛhɩɛ ánɩ́ ɔbɛ́ha Yudafɔ tsʋn Kristo Yesusʋ amʋ kʋ.

⁷ Ɩna Bulu awɩtɔlɛ pʋ́ mʋ tumisʋ ɔlɔbwɛ mɩ mʋ asʋn wanklaan amʋ osumpʋ.

⁸ Ɩbʋ mʋ́tɔá kebikʋsʋ ngyi Bulu aha fɛ́ɛ́tɔ. Tamɛ Bulu lɔwa awɩtɔlɛ ha mɩ ɔbɛɛ, nda Kristo oyula amʋʋ ɩdʋn blɩ amʋ ɩwɩ ɔkan ha aha ánɩ́ bʋmegyi Yudafɔ.

⁹ Mʋlɔwa mɩ ɔbɛɛ, nha anyankpʋsa fɛ́ɛ́ abʋbɩ alɩá ɔdɛpʋ mʋ asʋn ŋainhɛ amʋ yɔ agyʋma. Mʋlɔbwɛ ɔsʋ mʋ́a asɩ, ɔlɔpʋ mʋ asʋn anfɩ ŋain tsu ɔyɩ ɔpá.

¹⁰ Ɔlɔbwɛ mʋ́ alɩ, mɛnɩ ɔbɔ́tsʋn mʋ ɔpasua amʋsʋ lɛ mʋ nyansa ɔtsan-ɔtsan suna ɔŋɛ lalahɛ awie pʋ́ atumipʋá bʋbʋ ɔtɩnɛá bʋdɛ iwie gyi fɛ́ɛ́.

¹¹ Ɩnɩgyi tɔá Bulu lɛhɩhɩɛ yaɩ asa ɔlɛlɛ ɔyɩ nɩ. Alaha mʋ́ ɩlaba mʋ́tɔ sei tsʋn anɩ Wie Kristo Yesusʋ.

¹² Ɩnɩá anɩlahɔ mʋ gyi, anɩa mʋnyɔ anɩlabwɛ ɩkʋlɛ sʋ a, abɛ́talɩ wa klʋn yɔ mʋ ansɩtɔ faan, anɩmɛ́ɛtra nya ifu.

¹³ Mʋ́ sʋ ndɛ ɩpa bwii ha mlɩ mbɛɛ, mlɩmáha abatɔ iwu mlɩ, ɩwɩɔsɩn anfɩ ndewun ha mlɩ anfɩ sʋ; tsufɛ ɩbɔ́wa labi ha mlɩ.

Kristo Ɔdwɛ

¹⁴ Ɩnɩ sʋ mɩ akpawunu iyi asɩ, ndɛ anɩ Sɩ amʋ kokoli.

¹⁵ Mʋtɔ abusuan kugyikʋá ɩbʋ ɔsʋ mʋ́a asɩ lɛlɩn tsu.

¹⁶ Mʋbʋ oyula akpɔnkpɔntɩ ha mʋ abi. Mʋ́ sʋ ndɛ mʋ kokoli mbɛɛ, mʋ Ɔŋɛ amʋ ɔhɩɛ wa mlɩ ɔkla ɔwʋnlɩn tsu mʋ oyula kpɔnkpɔntɩ atokiehɛ amʋtɔ,

¹⁷ Kristo ɔtsʋn mlɩ hogyisʋ tsia mlɩ klʋntɔ bregyibrɛ. Ndɛ mʋ kʋlɩ mbɛɛ, ɔha amlɩlɛ nlin yɔ ɔtɔtɔ, Bulu-dwɛ pʋ́ mlɩ abadwɛtɔ, amlɩlɩɩ kinkiinkin.

¹⁸ Fówun mlɩa Bulu aha atrahɛ mlɛ́talɩ bɩá Kristo ɔdwɛ lɛhɩɛ moni, ɩlɛhɩɛ tɛɩ, ɩhɩɛ bʋ ɩswɩ, ɩlɛhɩɛ fʋa, ɩlɛhɩɛ wie ɔtɔtɔ.

¹⁹ Ntra ndɛ mʋ kokoli mbɛɛ, ɔha amlɩbɩ Kristo ɔdwɛ amʋʋ nyankpʋsa ɔkʋkʋ mɛ́ɛtalɩ nu mʋ́ asɩ yi amʋ. Fówun mlɩ tsiatɔ bɔ́bwɛ fɛ Bulu klɛ.

²⁰ Ɩnɩá Bulu tumi dɛ agyʋma yɔ anɩtɔ sʋ a, ɔtɛtalɩ bwɛ atɔ ha anɩ dʋn alɩá anɩtɔkʋlɩ mʋ, ntɛ anɩtosusu.

²¹ Ɩnɩ sʋ mlɩha akanfʋ Bulu. Anyankpʋsa otuntufla fɛ́ɛ́ bʋkanfʋ mʋ atɔ akpɔnkpɔntɩ amʋʋ ɔdɛbwɛ Kristo Yesu pʋ́ ɔpasua amʋtɔ amʋ sʋ, tsu sei yɔfʋn brɛá ɩtamata. Amen!